Nkambisiso Wa Mahungu
“Ku Nga Ri Hi Ku Swi Vona”
Minkambisiso ya sweswinyana ya sayense yi tiyise leswaku Nguvu yo lahla vafi ya Turin i vukanganyisi bya lembe xidzana ra vu-14. Hambi swi ri tano, “Makhatoliki ma khutaziwe ku hambeta ni ku xixima ka wona ka nguvu leyi yo lahla vafi tanihi xifaniso xa xikombiso xa Kriste, lexi xa ha riki na vuswikoti byo endla masingita,” ku vika The New York Times. Anastasio Ballestrero, bixopo-nkulu wa Turin, u te: “Matimba lama nga tolovelekangiki lama ntlhontlhaka ya xifaniso xa Yesu Kriste ya fanele ku hlayisiwa.”
Xana leswi swi vula yini ke? Swi vula leswaku hambi leswi kereke yi pfumeleke leswaku xifaniso lexi bombisiweke xa ntsumbu wa munhu lowu nga engubyeni yo lahla vafi xi nga riki xona lexiya xa Yesu Kriste, Makhatoliki lama tshembekaka hambi swi ri tano ma fanele ku hambeta ya xi xiya onge hi loko xi ri Kriste naswona xisweswo tanihi nchumu lowu kwetsimaka. Ha yini ke? Hi ku ya hi Adam Otterbein, muprista wa Rhoma Khatoliki loyi a nga ni vutihlamuleri bya Holy Shroud Guild, swifaniso leswi fanaka na tinguvu to lahla vafi swi nga pfuna vapfumeri ku nyika xichavo eka loyi xifaniso xi yimelaka yena.
A swi hlamarisi leswi, ku nga khathariseki ku pfumela ka yona ntiyiso, nguvu yo lahla vafi yi tshamaka yi ri mfungho wa matimba wa ripfumelo ra Kereke ya Khatoliki. “Swifaniso, swifaniso swa mihlovo-hlovo ni swifaniso leswo kwetsima . . . swi nyikiwa xivandla lexi xiximekaka emukhuveni wa Makhatoliki,” ku xiya The New York Times.
Xana Bibele yi seketela ku tirhisiwa ka swifaniso swo tano evugandzerini? E-e! Rito ra Xikwembu ri vula erivaleni ri ku: “Chavani ku phahla swikwembu swa hava.” (1 Vakorinto 10:14; ringanisa Eksoda 20:4-6.) Vakriste va tsundzuxiwa ku gandzela Xikwembu “hi moya ni ntiyiso,” hayi hi mpfuno wa xifaniso kumbe xilo xo karhi. (Yohane 4:24) Hi laha ku faneleke, Pawulo u tsale leswaku Vakriste va ntiyiso va “famba hi ku pfumela, ku nga ri hi ku ŝi v̌ona.”—2 Vakorinto 5:7, Bibele ya Xitsonga.
Mianakanyo Leyi Hoxeke
Ku fambisana ni mboyamelo lowu nga erivaleni eku tiphyuphyiseni ka mimpimanyeto ya Bibele exikarhi ka vakhongeri, “nhlayo leyi kulaka ya vafundhisi va U.S. yi endla njhekanjhekisano wa leswaku tikereke ta Vukriste ti lava ndzhundzunuko wa rimbewu,” ku vika Star Tribune. Phepha-hungu leri ra Minnesota ri tshaha malangutelo lama hleriweke kahle hi lava dumeke ku fana na John Spong, bixopo wa Newark wa Kereke ya Episcopal ya Amerika, na James Nelson, mutshila wa ntivo-rimbewu eUnited Theological Seminary eNew Brighton. Phepha leri ri vula leswaku lava ni vafundhisi van’wana va vona onge tikereke ti fanele ku “katekisa mimpatswa ya vasodoma emintirhweni ya kereke, ti amukela vutihlamuleri bya vona eka un’wana hi vuxaka bya rirhandzu, bya mahanyelo; . . . ti nyika vantshwa lava tshembisaneke vukati ku katekisa ka kereke loko va hanya evuxakeni bya rirhandzu, lebyi hlambanyeriweke hambi loko va nga tekananga”; naswona “va pfumela loko vanhu lavakulu lava vupfeke va gingiriteka erimbewini hi tindlela ta vutihlamuleri, hambi loko va nga tekananga.” Ha yini vafundhisi va pfumela leswaku ku hundzuka ko tano ka laveka? Spong u vula leswaku “ha byi amukela vutomi bya mpfangano wa rimbewu” loko ku hlangana ko tano ku nga katekisiwanga.
Hambi swi ri tano, leswi Spong ni van’wana va hlulekaka ku swi xiya hi leswaku hi kona ku katekisiwa ka ku hlangana ko tano loku simekaka ku amukela ka kereke ka ‘vutomi byo tano bya mpfangano wa rimbewu.’ Rito ra Xikwembu ra twisiseka. “Loko ti ri timbhisa, . . . ni vaoswi, . . . ni vavanuna lava endlaka swa tingana ni vavanuna-kulobye . . . va nga ka va nga dyi ndzhaka ya Mfumo wa Xikwembu.” Valandzeri va Kriste a va lerisiwi ntsena ku ‘tshika ku tolovelana’ ni vanhu vo tano kambe va tlhela va byeriwa ku “hlongola lowo biha” exikarhi ka vona.—1 Vakorinto 5:11, 13; 6:9-11.
Xilaveko Lexikulu
Nan’waka, xiviko xa tinhlayo xa Britain’s Free Church Federal Council xi paluxe ku ehla kun’wana ka mintlawa ya yona ya 15 leyi tirhisanaka. Ro sungula, vuxirho byi ehlele ehansi ka mfungho wa miliyoni yin’we, ku vika Church Times, phepha-hungu ra Kereke ya Nghilandi. Xivangelo-ke? Hambi leswi tikereke ti vulaka leswaku ti ni vutihlamuleri eka “vunyingi lebyikulu . . . lebyi xilaveko xa byona lexikulu ku nga ku kutsuriwa,” xihloko lexi xi vika leswaku “Tikereke leti Ntshunxekeke ti hambetile ti nyiketela nkarhi ni matimba leswo tala swinene eka . . . mintirhisano.” Hi ku ya hi Church Times, “loko Tikereke ti hunguteka, a hi mhaka ya swona leswi ku bindzula ka tona ka lembe na lembe ku waka kumbe hikwalaho ka leswi mintswalo leyikulu ya mavandla ya tona yi nga sirheletiwangiki: i mhaka ya leswi va nga tekangiki vutirheli bya vona bya nkutsulo hi matimba swinene.”
Varhangeri va vukhongeri va siku ra Yesu na vona a va byi tekanga hi matimba vutirheli bya vona. Yesu hi laha ku faneleke u va sorile hikwalaho ka ku “onha rito ra Xikwembu” hi mikhuva ya vona. U vule leswaku a va ri vakanganyisi, lava ‘chavaka Xikwembu hi milomu ya vona kambe timbilu ta vona ti ri kule na xona.’—Marka 7:6, 7, 13.
Hambi swi ri tano, vatirheli va ntiyiso va Yehova Xikwembu va tinyiketerile “[evutirhelini byo] vula Rito.” Va teka xileriso xa Yesu xo ‘endla vadyondzisiwa’ hi matimba, naswona va landzela xikombiso xa vaapostola, lava ‘a va nga rhuteli ku dyondzisa ni ku twarisa mahungu lamanene ya Kriste.’ Eka Vakriste va ntiyiso, ntirho lowu i wa nkoka lowukulu.—Mintirho 6:4; Matewu 28:19, 20; Mintirho 5:42.