Vululami Eka Hinkwavo Hi Muavanyisi Loyi A Vekiweke Hi Xikwembu

“Hikuva Tatana ú rhandza N’wana [naswona] . . . ú nyikile N’wana ntirho hinkwawo wo avanyisa.”—YOHANE 5:20, 22.

1. Xana u kongomana njhani na swivutiso leswi fanaka ni leswiya swi kongomaneke ni vanhu van’wana eka lembe xidzana ro sungula?

XANA vululami i bya nkoka ku fika kwihi eka wena? I matshalatshala yo tanihi kwihi lawa a wu ta ma endla leswaku a tiyiseka hi ku amukela vululami bya ntiyiso ni ya ku hanya loko byi lawula misava hinkwayo? U tikolota ku anakanya hi swivutiso sweswo, hi laha vavanuna ni vavasati van’wana lava dumeke va endleke ha kona eAthena, eGreece.

2, 3. (a) I yini lexi yiseke eka xirhambo xa Pawulo xa leswaku vayingiseri va yena va Vaathena va hundzuka? (b) Ha yini ku hundzuka ku twale ku hlamarisa eka vayingiseri volavo?

² Va twe nkulumo leyi nga rivalekiki hi Pawulo muapostola wa Vukriste eka huvo leyi dumeke ya Vaareyopago. Xo sungula u anakanyisise hi vukona bya Xikwembu xin’we, Muvumbi, lexi hinkwerhu ka hina hi xi kolotaka vutomi. Leswi swi yise eka mahetelelo lama twalaka ya leswaku hi ni vutihlamuleri eka Xikwembu lexi. Emhakeni leyi Pawulo u te: “Xikwembu xi tshikile minkarhi ya ku pfumala ku tiva yi hundza [ku fana ni ku gandzela ka vanhu swikwembu], kutani sweswi, ematikweni hinkwawo, xi lerisa vanhu leswaku va hundzuka hinkwavo.”—Mintirho 17:30.

³ Entiyisweni, ku hundzuka a ku ta va nhlamuselo leyi hlamarisaka eka vayingiseri volavo. Ha yini swi ri tano ke? Magriki ya khale a ma tiva ku hundzuka hi mongo wo tivona xihoxo eka xiendlo kumbe marito yo karhi. Hambi swi ri tano, hi laha dikixinari yin’wana yi kombisaka ha kona, rito leri “a ri nga ringany[eti] ku hundzuka eka langutelo leri heleleke ra mahanyelo, ku cinca loku heleleke eka nkongomiso wa vutomi, ku hundzuka loku khumbaka mahanyelo hinkwawo.”

4. Nhlamuselo ya Pawulo ehenhleni ka ku hundzuka yi seketeriwe hi mianakanyo yihi?

⁴ Hambi swi ri tano, handle ko kanakana u nga swi vona leswaku ha yini ku hundzuka ko tano loku enteke ku fanela. Landzela mianakanyo ya Pawulo. Vanhu hinkwavo va kolota vutomi bya vona eka Xikwembu, kutani hinkwavo va tihlamulela eka xona. Manuku ke, i swinene naswona swi lulamile leswaku Xikwembu xi va langutela ku xi lava, ku kuma vutivi ha xona. Loko Vaathena volavo a va nga tivanga misinya ya milawu ni ku rhandza ka xona, a va fanele va dyondza swilo leswi ivi manuku va hundzuka leswaku va twananisa vutomi bya vona na swona. Leswi a swi nga ta tiseketela hi ndlela leyi a swi fanela ha yona ku endla tano ntsena. Hi nga vona xivangelo eka ku chaputa ka Pawulo ka matimba: “Hikuva xi vekile siku leri xi nga ta avanyisa misava eku lulameni ha rona, hi wanuna loyi xi n’wi hlawuleke; kutani xi kombisile vanhu hinkwavo ku tiya ka mhaka leyi hi ku pfuxa munhu loyi exikarhi ka vafi.”—Mintirho 17:31.

5. Xana vayingiseri va hlamule njhani eka nkulumo ya Pawulo, naswona ha yini?

⁵ Ndzimana yoleyo, leyi fuweke swinene hi tinhlamuselo, leyi khorwisaka swinene, yi faneriwa hi ku xiyisisa ka hina ka rixaladza, hikuva yi pfuxa ntshembo wa vululami lebyi hetisekeke enkarhini wa hina. Xiya marito lama nge: “xi vekile siku,” “avanyisa misava,” “eku lulameni,” “hi wanuna loyi xi n’wi hlawuleke,” ‘xi kombisile ku tiya ka mhaka leyi,’ “ku pfuxa munhu loyi.” Marito wolawo lama nge “ku pfuxa munhu loyi” ma tise endlelo ra matimba eka vayingiseri va Pawulo. Hi laha tindzimana 32-34 ti kombisaka ha kona, van’wana va vungunyile. Van’wana va siye bulo. Kambe ke, vantsongo va ve vapfumeri lava hundzukeke. Hambi swi ri tano, hina a hi tlhariheni ku tlula vunyingi bya vayingiseri va le Athena, hikuva leswi i swa nkoka lowukulu loko hi lava vululami bya ntiyiso. Ku kuma nhlamuselo leyi teleke ya ndzimana 31, xo sungula languta marito lama nge: ‘Xi kunguhata ku avanyisa misava hinkwayo.’ Xana i mani “xi” yoloye, naswona mimpimanyeto ya yena hi yihi, ngopfu-ngopfu loko ku tiwa eka vululami?

6. Hi nga dyondza hi ndlela yihi ehenhleni ka Loyi a vekeke siku ro avanyisa misava?

⁶ Kavula, Mintirho 17:30 yi kombisa loyi Pawulo a a vulavula ha yena—Xikwembu xexi xi byelaka hinkwavo leswaku va hundzuka, Munyiki wa hina wa Vutomi, Muvumbi. Hi ntumbuluko, hi nga kuma swo tala ehenhleni ka Xikwembu eka mintirho ya xona ya ku tumbuluxa. Kambe mpimanyeto wa xona wa vululami ngopfu-ngopfu wu le rivaleni exihlobyeni xin’wana, Bibele, leyi nga ni rhekhodo ya ku tirhisana ka xona ni vavanuna vo fana na Muxe ni milawu ya Xikwembu ya Israyele.

I Muxaka Muni Wa Ku Avanyisa Ni Ku Lulama?

7. Muxe u nyikela vumbhoni byihi loko ku tiwa eka Yehova ni vululami?

⁷ U nga ha va u swi xiya leswaku hi makume ya malembe Muxe u ve ni ku tirhisana lokukulu na Yehova Xikwembu, a va tshinelelane swinene lerova Xikwembu xi vula leswaku xi vulavule na Muxe “hi nomu.” (Tinhlayo 12:8) Muxe a a yi tiva ndlela leyi Yehova a n’wi khomeke ha yona, ni ndlela leyi Xikwembu xi tirhisaneke ha yona ni vanhu van’wana ni matiko hinkwawo. Ekusuhi ni makumu ya vutomi bya yena, Muxe u nyikele nhlamuselo leyi yi tiyisaka nhlana: “I Ribye le’ro tiya; ni mitiro ya yena yi hetisekile; hikuva tindlela hikwato ta yena ti lulamile; i Šikwembu šo ṭhembeka, ši nga ri na nanḍu; ši ni vunene, ši lulamile.”—Deuteronoma 32:4.

8. Ha yini hi fanele ku xiya leswi Elihu a swi vuleke emhakeni ya vululami?

⁸ Nakambe, xiya vumbhoni lebyi humaka eka Elihu, wanuna la xiyiweke hikwalaho ka vutlhari ni ku twisisa ka yena. U nga tiyiseka leswaku a a nga ri munhu la fikelelaka makumu ya vuphukuphuku. Hi laha ku hambaneke, eka mphikamakaneta yin’wana u tshame ku tlula vhiki loko a ri karhi a yingisela minjhekanjhekisano yo leha yo burisana leyi humaka ematlhelweni hinkwawo. Manuku ke, eka ntokoto wa Elihu hi yexe ni le ku dyondzeni ka yena ka tindlela ta Xikwembu, i makumu wahi lawa a ma fikeleleke mayelana ni Xikwembu? U te: “Hikwalaho ṅwina v̌av̌anuna v̌o twisisa, nḍi yingiseni! Ŝo biha ŝi le kule na Šikwembu; a ku na ku homboloka eka Lo’wa-matimba-hikwawo! Hikuv̌a u tlherisela ka munhu le’ŝi ringanaka mitiro ya yena. O ṅwi nyika e ku ringana mikhuv̌a ya yena. Kunene, Šikwembu a ši endli leŝi nga lulamangiki; Lowa-matimba-hikwawo a nga ka a nga hombološi ku lulama.”—Yobo 34:10-12.

9, 10. Ha yini mimpimanyeto ya Xikwembu ya vaavanyisi va vanhu yi fanele ku hi khutaza? (Levitika 19:15)

⁹ Tivutise: Xana sweswo a swi hlamuseli hi laha ku heleleke leswi a hi ta swi lava eka muavanyisi, leswaku a khoma munhu un’wana ni un’wana hi ku ya hi mintirho ya yena, kumbe swiendlo, loyi a nga yiki hi nghohe kumbe ku hombolokisa vululami? Loko ku ri leswaku a wu fanele ku langutana ni muavanyisi wa munhu, xana a wu nga ta titwa u ntshunxekile loko a fana ni yoloye?

¹⁰ Bibele yi vulavula hi Yehova tanihi ‘Muavanyisi wa misava hinkwayo.’ (Genesa 18:25) Hambi swi ri tano, minkarhi yin’wana, u tirhise vaavanyisi va vanhu. Xana a a langutela yini eka vaavanyisi va Vaisrayele lava a va n’wi yimela? Eka Deuteronoma 16:19, 20, hi hlaya vukongomisi bya Yehova lebyi yisaka eka nhlamuselo ya ntirho wa vaavanyisi: “U nga ṭhuki u v̌oyamisa ku lulama; u nga ṭhuki u ya hi ngohe ya v̌anhu, kambe u nga ṭhuki u amukela tinyiko, hikuv̌a nyiko yi phumerisa mahlo ya tintlhari, kambe yi onha timhaka ta lav̌o lulama. U ta lav̌isisa ku lulama nṭena leŝaku u hanya.” Milawu ya manguva lawa leyi hlamuselaka Vululami yi nga byi hlamusela ha vomu tanihi lebyi phumerisiweke ku kombisa ku ya hi nghohe, kambe u nga swi vona leswaku Xikwembu xi tlule kwalano swinene. Entiyisweni xi lave ku pfumala ku ya hi nghohe ko tano eka vaavanyisi va vanhu lava a va fanele ku xi yimela ni ku tirhisa milawu ya xona.

11. Hi nga dlayelela hi ku yini eku pfuxeteni ka rungula leri ra Bibele ehenhleni ka vululami?

¹¹ Vuxokoxoko lebyi ehenhleni ka langutelo ra Xikwembu ra vululami byi tiyisa hi ku kongoma ku chaputa ka nkulumo ya Pawulo. Eka Mintirho 17:31 Pawulo a tivise leswaku Xikwembu “xi vekile siku leri xi nga ta avanyisa misava eku lulameni ha rona.” Sweswo hi swona leswi hakunene hi nga swi langutelaka eka Xikwembu—vululami, vunene, ku pfumala ku ya hi nghohe. Hambi swi ri tano, vanhu van’wana va nga ha karhateka hikuva hi ku ya hi ndzimana 31, Xikwembu xi ta tirhisa “wanuna” ku avanyisa vanhu hinkwavo. Xana i mani “wanuna” yoloye, naswona i xitiyisekiso xihi lexi hi nga na xona xa leswaku u ta khomelela eka mpimanyeto lowu tlakukeke wa Xikwembu wa vululami?

12, 13. Hi swi tivisa ku yini leswaku i “wanuna” wihi loyi Xikwembu xi nga ta n’wi tirhisa ku avanyisa?

¹² Mintirho 17:18 yi hi byela leswaku Pawulo “a a va byela ta Yesu ni ta ku pfuka eku feni.” Kutani ke, eku heleni ka nkulumo yakwe, vayingiseri va swi tivile leswaku Pawulo a a vula Yesu Kriste loko a vula leswaku Xikwembu xi ta ‘avanyisa misava eku lulameni hi ku tirhisa wanuna loyi xi n’wi vekeke naswona Xikwembu xi n’wi pfuxile exikarhi ka vafi.’

¹³ Yesu u pfumerile leswaku Xikwembu xi n’wi veke tanihi muavanyisi la fikeleleke ni mpimanyeto wa le henhla. Eka Yohane 5:22 u te: “Na swona Tatana a nga avanyisi munhu ni un’we, kambe u nyikile N’wana ntirho hinkwawo wo avanyisa.” Endzhaku ko boxa ku pfuxiwa eku feni loku taka ka lava va nga emasirheni, Yesu u tlhandlekerile a ku: “Ndzi nga ka ndzi nga tisunguleli ndzi endla xilo hi ndzexe; ndzi avanyisa hi laha ndzi byeriwaka ha kona; hikokwalaho, ku avanyisa ka mina ku lulamile, hikuva a ndzi lavi ku endla ku rhandza ka mina, kambe ku rhandza ka Loyi a ndzi rhumeke.”—Yohane 5:30; Psalma 72:2-7.

14. I ku khomiwa ka muxaka muni loku hi nga ku langutelaka eka Yesu?

¹⁴ Mayana ndlela leyi xitiyisekiso lexi xi twananaka kahle swonghasi ha yona ni leswi hi swi hlayeke eka Mintirho 17:31! Kwalaho Pawulo na yena u nyike xitiyisekiso xa leswaku N’wana u ta “avanyisa misava eku lulameni.” Entiyisweni sweswo a swi ringanyeti ku avanyisa ko karhi ka tihanyi, loku nga lawulekiki, ni loku nga fambisaniki ni mintlhaveko, swa ku ringanyeta ke? Ematshan’wini ya sweswo, ku avanyisa loko lulama ku katsa vululami lebyi tsetselelaka lebyi nga ni musa ni ku twisisa. Hi nga tshuki hi rivala leswi: Hambi leswi Yesu sweswi a nga etilweni, a a ri munhu. Kutani a nga va ni ntwela-vusiwana. Eka Vaheveru 4:15, 16 Pawulo u khumbanyana leswi eku hlamuseleni ka Yesu tanihi muprista lonkulu.

15. Xana Yesu u hambanisa ku yini ni vaavanyisi va vanhu?

¹⁵ Loko u ri karhi a hlaya Vaheveru 4:15, 16, anakanya hi ntshunxeko lowu hi faneleke ku titwa hi ri na wona ku va na Yesu tanihi Muavanyisi: “Hikuva Muprista [ni Muavanyisi] Lonkulu loyi hi nga na yena a hi loyi a tsandzekaka ku hi twela vusiwana emikarhalweni ya hina, kambe hi loyi a ringiweke hi matlhelo hinkwawo ku fana na hina, ntsena yena a nga dyohanga. Hikokwalaho, a hi tshineleni kusuhi ni xiluvelo xa tintswalo hi ri ni ku tshemba leswaku hi ta tsetseleriwa ni ku kuma tintswalo leti nga ta hi pfuna eminkarhini ya ku pfumala.” Etikhoto namuntlha, hakanyingi swa chavisa ku vitaneriwa emahlweni ka Bokisi. Hambi swi ri tano, emhakeni ya Kriste tanihi Muavanyisi, hi nga ‘tshinelela hi ntshunxekile leswaku hi kuma tintswalo, musa lowu nga fanelangiki ni mpfuno hi nkarhi lowu faneleke.’ Hambi swi ri tano, malunghana ni nkarhi lowu, u ni xivangelo lexinene xo vutisa u ku, ‘Xana Yesu u ta va avanyisa rini vanhu hi ku lulama?’

“Siku” Ro Avanyisa—Rini Ke?

16, 17. Hi swi tivisa ku yini leswaku ku avanyisa ka le tilweni ku ya emahlweni sweswi?

¹⁶ Tsundzuka leswaku Pawulo u vule leswaku Xikwembu “xi vekile siku” ro avanyisa misava hi Muavanyisi wa Xona la vekiweke. Eku tilunghiseleleni ka “siku” rero ro avanyisa, Yesu a endla ntirho wa nkoka wo avanyisa namuntlha, ina, sweswi. Ha yini hi nga vulaka sweswo? Ku nga ri khale emahlweni ka ku khomiwa ivi a avanyiseriwa rifu hi tihanyi, Yesu u nyike vuprofeta bya matimu lebyi katsaka siku ra hina. Hi byi kuma eka Matewu ndzima 24. Yesu u hlamusele swiendlakalo swa misava leswi a swi ta fungha nguva leyi vuriwaka ‘ku hela ka mafambiselo ya swilo.’ Tinyimpi, tindlala, ku tsekatseka ka misava ni makhombo man’wana lama humeleleke emisaveni hinkwayo ku sukela hi Nyimpi yo Sungula ya Misava swi kombisa leswaku vuprofeta bya Yesu byi le ku hetisekeni sweswi ni leswaku ku nga ri khale ‘makumu ma ta fika.’ (Matewu 24:3-14) Hi makume ya malembe layo tala Timbhoni ta Yehova a ti ri karhi ti hlamusela leswi hi Bibele. Loko u lava vumbhoni lebyi engetelekeke bya mhaka leyi ha yona hi tivaka leswaku hi le masikwini ya makumu ya mafambiselo lama hombolokeke, Timbhoni ta Yehova ti nga byi nyikela.

¹⁷ Kambe ke, xiyisisa xiphemu xo hetelela xa Matewu ndzima 25, lexi ku nga xiphemu xa vuprofeta bya Yesu ehenhleni ka masiku ya makumu. Matewu 25:31, 32 yi tirha enkarhini wa hina: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima [etilweni]. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti.” Manuku languta ehansi laha Yesu a vulaka vuyelo bya ntirho wa yena wo hlawula, kumbe wo avanyisa. Ndzimana 46 yi ri: “Kutani volavo [vanhu lava a va avanyisaka va ri lava fanaka ni timbuti] va ta ya eku biweni loku nga heriki, kambe lavo lulama va ta ya evutomini lebyi nga heriki.”

18. Xana ku avanyisa enkarhini wa hina ku ta yisa eka yini?

¹⁸ Xisweswo hi hanya enkarhini wa nkoka swinene wa ku avanyisa. Lava ‘hakunene va lavaka Xikwembu ni ku xi kuma’ namuntlha va ta avanyisiwa tanihi “tinyimpfu” leti nga enxaxamelweni wa ku pona makumu ya mafambiselo ya namuntlha ni ku nghena emisaveni leyintshwa leyi nga ta landzela. Manuku 2 Petro 3:13 yi ta xiyiwa: ‘Hi ku ya hi ku tshembisa ka yena hi langutela matilo lamantshwa ni misava leyintshwa, laha ku lulama ku nga ta aka kona.’ Rero ku ta va “siku” leri marito ya Pawulo eka Mintirho 17:31 ma nga ta tirha hi laha ku taleke eka rona, nkarhi wa leswaku misava yi avanyisiwa hi ku lulama.

19, 20. I vamani lava nga ta khumbiwa hi Siku leri taka ra ku Avanyisa?

¹⁹ Siku rero ro Avanyisa ri ta katsa leswi ti tlulelaka ekule “tinyimpfu” leti ponaka, leti ana se ti nga ta va ti avanyiseriwe ku fanela ku nghena emisaveni leyintshwa. Tsundzuka leswaku endzhaku ko vula leswaku Tata wakwe u n’wi nyike ku avanyisa, Yesu u vulavule hi ku pfuxiwa loku taka. Nakambe, eka Mintirho 10:42, muapostola Petro u vule leswaku Yesu Kriste “hi yena loyi a vekiweke hi Xikwembu ku va muavanyisi wa lava hanyaka ni lava feke.”

²⁰ Hikwalaho, ‘siku rero leri vekiweke’ leri boxiweke eka Mintirho 17:31 leri Xikwembu hi ku tirhisa Yesu Kriste xi nga ta “avanyisa misava eku lulameni” ha rona ri ta va nkarhi wa leswaku vanhu lava feke va pfuxiwa. Mawaku ntsako lowonghasi lowu wu nga ta va kona ku vona matimba ya Xikwembu ya tirhisiwa leswaku ma hlula rifu, xirhalanganya lexi nkarhi hinkwawo a ku ri vuhomboloki lebyikulu. Vanhu van’wana, ku fana na Yesu hi byakwe, va dlayiwe hi ndlela ya tihanyi hi mimfumo kumbe mavuthu ya tinyimpi lama hlaselaka. Van’wana va lahlekeriwe hi vutomi bya vona hikwalaho ka swiendlakalo leswi nga tiviwiki swo fana ni swidzedze, ku tsekatseka ka misava, mindzilo ya xitshuketa ni timhangu to tala ta muxaka wolowo.—Eklesiasta 9:11.

Vuhomboloki Bya Nkarhi Lowu Hundzeke Byi Tlhantlhiwile

21. Vuhomboloki bya nkarhi lowu hundzeke byi ta hlurisiwa ku yini emisaveni leyintshwa?

²¹ Anakanya hi ku va hi kota ku vona varhandziwa va hina va vuyiseriwa evuton’wini! Xisweswo vo tala va ta va ni nkarhi wa vona wo sungula ‘wo lava Xikwembu ni ku xi kuma hakunene’ kutani emahlweni ka vona va ta va ni “vutomi lebyi nga heriki” lebyi ku nga vaka hakelo ya “tinyimpfu.” Vanhu van’wana lava pfuxiweke, kun’we ni vaponi va mafambiselo lawa yo homboloka, va ve vahlaseriwa va vuhomboloki lebyi nga erivaleni byo fana ni vulema byo tswariwa na byona, vubofu, ku fa tindleve, kumbe ku hluleka ku vulavula. Xana swilo swo tano swi ta fanela ‘emisaveni leyintshwa laha ku lulama ku faneleke ku aka kona’? Yehova u tirhise Esaya ku nyikela vuprofeta byo hambana-hambana lebyi nga ta va ni ku hetiseka lokunene ka xiviri hi nkarhi wa Siku ro Avanyisa leri taka. Xiya leswi hi nga swi langutelaka: “Hi laha mahlo ya v̌o-fe-mahlo ma nga ta hanyanya, ni tindlev̌e leti siv̌ekeke ti nga ta pfuleka; ŝilema ŝi ta tlula kukota tinhlangu, kutani ririmi ra mbev̌ev̌e ri ta yimbelela hi ku ṭaka.”—Esaya 35:5, 6.

22. Ha yini Esaya ndzima 65 yi ri leyi khutazaka swinene malunghana ni vululami?

²² Ku vuriwa yini hi vuhomboloki byin’wana lebyi sweswi byi vangelaka gome lerikulu? Esaya ndzima 65 yi na tinhlamulo leti tsakisaka leti khutazaka. Ku ringanisiwa ka Esaya 65:17 na 2 Petro 3:13 ku kombisa leswaku ndzima leyi na yona yi kombetela eka nkarhi wa “matilo lamantshwa ni misava leyintshwa,” mafambiselo lamantshwa yo lulama. Hambi swi ri tano, i yini lexi nga ta sivela vanhu va nga ri vangani lava hombolokeke eku onheni ka ku rhula ni vululami? Loko yi ya emahlweninyana, Esaya 65 yi hlamusela hinkwaswo leswi nga vonakaka swi ri xiphiqo.

23. Eka vanhu van’wana Siku ra ku Avanyisa ri ta va ni vuyelo byihi lebyikulu?

²³ Hi nkarhi wa Siku leri ro Avanyisa leri yaka emahlweni, Yesu u ta ya emahlweni ni ntirho wakwe wo avanyisa vanhu, loko va fanelekela vutomi lebyi nga heriki. Van’wana va nge faneli. Endzhaku ko nyikiwa nkarhi lowu ringaneke, kumbexana hambi ku ri “dzana ra malembe,” yo lava Xikwembu, van’wana va ta kombisa leswaku va ala ku endla leswi lulameke. Va ta lahlekeriwa hi vutomi emisaveni yoleyo leyintshwa hi laha ku faneleke, hi laha hi nga swi vonaka ha kona eka Esaya 65:20: “Rukano wu ta wela šidyohi, loko ši ta v̌a ni dzana ra malembe.” Vanhu vo tano lava avanyiseriweke ku ka va nga faneli vutomi va ta va vantsongo. Hi na swivangelo hinkwaswo swo langutela leswaku hina—ni van’wana lavo tala—hi ta tsakela ku dyondza ni ku endla vululami.—Esaya 26:9.

24. Xana xiyimo xi ta va xihi loko ku tiwa eka xirhalanganya xa ikhonomi?

²⁴ Xana sweswo swi vula leswaku a ku nga vi ni vuhomboloki lebyi yaka emahlweni, hambi ku ri vuhomboloki bya ikhonomi? Wolowo i ntiyiso! Esaya 65:21-23 yi kombetela eka mhaka yoleyo: “V̌a ta aka tindlu, v̌a ta ṭhama ka tona; v̌a ta byala tivinya, v̌a dya mihanḍu ya tona. V̌a nga ka v̌a nga ha aki tindlu, leŝaku uṅwana a ta ṭhama kona, v̌a nga ka v̌a nga ha byari leŝaku uṅwana a ta dya, hikuv̌a masiku ya tiko ra mina ma ta ringana ni masiku ya miri, kutani v̌ahlawuriwa v̌a mina v̌a ta ṭakela ntiro wa mav̌oko ya v̌ona. V̌a nga ha tikarateli ŝa hav̌a, v̌a nga ha v̌eleki v̌ana, e ku v̌a v̌ona v̌a hatla va fa; hikuv̌a v̌a ta v̌a rišaka leri katekisiweke hi Yehova, kutani v̌ana v̌a v̌ona, v̌a ta hanya na v̌ona.” Mayana ku hundzuka konghansi loku nga ta va ku hambanile ni namuntlha! Mawaku nkateko lowonghasi!

25. Hi wihi ntshembo wa wena ni ku tiyimisela ehenhleni ka vululami lebyi humaka eka Muavanyisi la vekiweke wa Xikwembu?

²⁵ Hikwalaho ke, hinkwavo lava navelaka vululami lebyi nga heriki va nga tiyiseka. Hakunene byi ta ta—hi ku hatlisa. Sweswi, hi nkarhi wo koma lowu saleke enkarhini lowu wa ku avanyisa, i nkarhi wa ku tihlanganisa ni Timbhoni ta Yehova eku laveni Xikwembu ni ku xi kuma hakunene, ku va ni mimbuyelo leyi nga heriki.

Swivutiso Swa Mpfuxeto

◻ I vumbhoni byihi lebyi hi nga na byona mayelana ni mpimanyeto wa Xikwembu wa vululami?

◻ Xana Yesu u ta katsekisa ku yini eka Siku leri taka ra ku Avanyisa?

◻ Ha yini wa hina wu ri nkarhi wo nonon’hwa malunghana ni ku avanyisa ka Xikwembu?

◻ Xana vuhomboloki lebyi hundzeke byi ta lulamisiwa hi ndlela yihi emisaveni leyintshwa?

[Laha Xifaniso Xi Humaka Kona eka tluka 15]

Pictorial Archive (Near Eastern History) Est.