Vululami Ku Nga Ri Khale Eka Matiko Hinkwawo
“U ta lav̌isisa ku lulama ntsena leŝaku u hanya, ni leŝaku u fuma tiko leri Yehova, Šikwembu ša wena, a ku nyikaka rona.”—DEUTERONOMA 16:20.
1. A xi ri xihi xikongomelo xo sungula xa Xikwembu hi munhu naswona hi yihi ndlela yin’we ntsena leyi xi nga byi hetisisaka ha yona ke?
XIKONGOMELO xa Yehova Xikwembu loko a tumbuluxa wanuna ni wansati a xi ri xa leswaku misava yi tala hi swivumbiwa leswi hetisekeke. Hinkwaswo ka swona a swi ta n’wi dzunisa naswona swi endla xiphemu xa swona eku fumeni ka misava. (Genesa 1:26-28) Tanihi leswi munhu a endliweke hi xifaniso ni xivumbeko xa Xikwembu, u nyikiwe timfanelo ta vutlhari, vululami, rirhandzu ni matimba. Munhu a a ta swi kota ku hetisisa swikongomelo swa Muvumbi wa yena ha yena hi ku tirhisa timfanelo leti hi ku ringanisela ntsena.
2. Ku landzelela vululami a ku ri ka nkoka ku fikela kwihi eka vana va Israyele?
2 Hi laha swi xiyiweke ha kona eka xihloko lexi hundzeke, munhu u xandzukele ndlela ya Xikwembu ya ku endla swilo naswona u avanyiseriwe rifu. Manuku ke, hikwalaho ka ku nga hetiseki, a swi nga ha koteki eka yena ku hetisisa xikongomelo xo sungula xa Xikwembu hi vanhu. Ku tsandzeka ka munhu ku kombisa vululami lebyi hetisekeke ku ve mhaka leyi xiyekaka eku hlulekeni loku. Kutani ke, a swi hlamarisi leswi Muxe a tsundzuxeke vana va Israyele a ku: “U ta lav̌isisa ku lulama ntsena”! Vutomi ni vuswikoti bya vona byo teka rifuwo ra Tiko ra Xitshembiso a swi titshege hi ku landzelela ka vona vululami.—Deuteronoma 16:20.
Ndzhuti Wa Swilo Leswinene Leswi Taka
3. Ha yini ku kambisisa ku tirhisana ka Yehova na Israyele ku ri ka nkoka eka hina namuntlha?
3 Ku tirhisana ka Yehova na tiko ra Israyele ku tiyisa ku tiyiseka ka hina ka leswaku hakunene u ta veka vululami bya yena erivaleni eka matiko hinkwawo hi ku tirhisa Nandza wa yena la hlawuriweke, Yesu Kriste. Muapostola Pawulo u hlamusela timhaka hi ndlela leyi a ku: “Hinkwaswo leswi tsariweke hi va khale, swi tsariwile leswaku hi dyondza ha swona, ni leswaku hi va ni ku langutela, hikwalaho ka ku tiyisela ni ku chaveleriwa loku hi ku kumaka eMatsalweni.” (Varhoma 15:4) Tanihi leswi Xikwembu ‘xi rhandzaka vunene ni vululami,’ a xi lava leswaku Vaisrayele va xi tekelela eku hanyisaneni ka vona hinkwako. (Psalma 33:5) Leswi swi nga voniwa kahle hi ku kambisisa milawu yi nga ri yingani eka leya 600 leyi nyikiweke Israyele.
4. Xana swiphiqo swa timfanelo ta tiko a swi tlhantlhiwa njhani ehansi ka Nawu wa Muxe?
4 Swiphiqo swa timfanelo ta tiko a swi nga ri kona loko Nawu wa Muxe wu landzeleriwa. Loko yi hlamusela mhaka ya la nga riki Muisrayele loyi a teke ku ta tshama etikweni, Levitika 19:34 yi ri: “E muluv̌eri, l’a luv̌elaka e šikari ka ṅwina o ta v̌a ka ṅwina kukotisa uṅwana wa ṅwina; u ta ṅwi ranḍa kukotisa loko u tiranḍa.” Mawaku lunghiselelo ro lulama ni ra rirhandzu swonghasi! Ku ya emahlweni, vaavanyisi ni timbhoni hi laha ku fanaka va tsundzuxiwe ku: “U nga ṭhuki u lanḍelela la’v̌o tala e ku endla ŝo biha; u nga v̌oyameli ka la’v̌o tala e hubyeni loko va hombolokisa e ku lulama. U nga ṭhuki u ya hi ngohe hambi ku ri ka šisiwana e hubyeni.” (Eksoda 23:2, 3) Wa nga anakanya hi sweswo—vululami byi kongomisiwa eka lava fuweke ni le ka swisiwana hi laha ku fanaka!
5. Pimanisa milawu ya vugevenga ehansi ka Nawu wa Muxe ni lowu wa namuntlha.
5 Ehansi ka nxaxamelo wa Nawu wa Muxe, milawu ya vugevenga a yi tlakukile swinene ku tlula milawu ya le tibukwini ta milawu ta matiko namuntlha. Hi xikombiso, muyivi a a nga pfaleriwi leswaku a ta va ndzhwalo eka vanhu lava tirhaka hi matimba lava hlayisaka Nawu. A a fanele ku tirha ivi a hakela leswi a swi yiveke swi hlayiwe kambirhi kumbe ku tlula. Kutani muhlaseriwa a a nga lahlekeriwi. A hi nge muyivi u ala ku tirha ni ku hakela. Emhakeni yoleyo, a a xavisiwa evuhlongeni ku kondza hakelo yi endliwa. Loko a hambeta a kombisa langutelo ro tiomisa nhloko, a a dlayiwa. Hi ndlela leyi vululami a byi endliwa eka muhlaseriwa naswona lowu a ku ri nsivelo lowukulu eka van’wana lava va nga ha vaka va voyamele eku yiveni. (Eksoda 22:1, 3, 4, 7; Deuteronoma 17:12) Ku tlula kwalaho, tanihi leswi vutomi byi hlawulekeke emahlweni ya Xikwembu, mudlayi wihi na wihi a a dlayiwa. Leswi a swi susa munhu wo biha, la dlayaka etikweni. Hambi swi ri tano, tintswalo a ti kombisiwa eka mudlayi la nga endlangiki hi vomu.—Tinhlayo 35:9-15, 22-29, 33.
6. Ku kambisisa milawu ya Israyele ku hi tisa eka makumu wahi ke?
6 Kutani ke, xana i mani la nga kanetaka leswaku vululami a byi fungha ku tirhisana hinkwako ka vuavanyisi ka Xikwembu ni tiko ra Israyele? Hikwalaho, mayana xikhongotelo, mawaku ntshembo, lowu talaka eka hina loko hi anakanyisisa hi ndlela leyi xitshembiso xa Xikwembu eka Esaya 42:1 xi nga ta tirhisiwa ha yona hi ku tirhisa Yesu Kriste! Kwalaho hi nyikiwa xitiyisekiso lexi: “O ta dyonḍisa v̌amatiko le’ŝo lulama.”
Vululami Lebyi Fambisanaka Ni Musa
7. Hlamusela ku tirhisana ka musa ka Yehova ni tiko ra Israyele.
7 Vululami bya Xikwembu byi fambisana ni musa. Leswi swi kombisiwe kahle loko Vaisrayele va sungule ku xandzukela tindlela leto lulama ta Xikwembu. Yingisa nhlamuselo ya Muxe ya nkhathalelo wa ntwela-vusiwana wa Yehova eka vona hi nkarhi wa malembe ya vona ya 40 emananga loko a ku: “O ṅwi kumile mananga, e mananga ya ku huwelela lo’ku tšhav̌isaka. O ṅwi biyerile, o ṅwi wundlile, o ṅwi hlayisile kukota šanga ya tihlo ra yena, kukotisa gama loko ri pfuša mav̌ondlo ya rona, loko ri hahela e henhla ka v̌ana v̌a rona, ri dlamula timpapa, ri v̌a teka, ri v̌a [veka] e tinsiv̌eni ta rona. I Yehova ntsena l’a fambiseke tiko ra yena.” (Deuteronoma 32:9-12) Endzhakunyana, loko tiko ri gwineha, Yehova u khongoterile a ku: “Hunḍukani ku fambeni ka ṅwina lo’ko biha.”—Zakaria 1:4a.
8, 9. (a) Xikwembu xi kombise vululami bya musa eka Vayuda ku fika eka mpimo wihi? (b) I khombo rihi ro hetelela leri va weleke, kambe i yini lexi nga vuriwaka hi ndlela ya Xikwembu yo tirhisana na vona ke?
8 Nyiko ya musa ya Yehova yi wele etindleveni leti feke. Hi ku tirhisa muprofeta Zakariya, Xikwembu xi te: “A v̌a yingisangi, a v̌a hlayisangi rito ra mina.” (Zakaria 1:4b) Kutani vululami bya Xikwembu lebyi nga ni ntwela-vusiwana byi xi susumetele ku rhumela N’wana wa xona la nga tswariwa a ri swakwe ku va pfuna ku tlhelela eka Xona. Yohane Mukhuvuri u tivise N’wana wa Xikwembu hi ku vula a ku: “Vonani! Hi lexi Xinyimpfana xa Xikwembu lexi susaka swidyoho swa misava!” (Yohane 1:29) Hi malembe yo hlayanyana, handle ko karhala Yesu u dyondzise Vayuda tindlela letinene ta Xikwembu, a endla mahlori yo tala kutani xisweswo a tikombisa leswaku a a ri Mukutsuri la vhumbiweke. (Luka 24:27; Yohane 5:36) Kambe vanhu a va yingisangi kumbe ku tshemba. Hikwalaho, Yesu u susumetiwe ku huwelela a ku: “Yerusalema, Yerusalema, wena la dlayaka vaprofeta, la khandlaka hi maribye lava rhumiweke ka wena, kangani ndzi naverile ku hlengeleta vana va wena kukotisa huku loko yi hlengeleta swiciwana swa yona ehansi ka timpapa ta yona, kambe a wu swi lavanga. Vonani, muti wa n’wina wu ta sala wu nga ri na munhu.”—Matewu 23:37, 38.
9 Xikwembu xi hlwerise ku humesa ku avanyisa ka xona loku vavaka hi malembe man’wana ya 37, ku fikela hi 70 C.E. Manuku xi pfumelele Varhoma ku herisa Yerusalema ivi va yisa magidi ya Vayuda evuhlongeni. Loko hi kambisisa ku tiyisela ni ku leha mbilu ka Yehova hi nkarhi wa malembe xidzana yo tala, i mani la nga tsandzekaka ku vona mfungho wa vululami eku tirhisaneni ka yena hinkwako ni yindlu ya Israyele ke?
Vululami Eka Matiko Hinkwawo
10. Vululami bya Xikwembu byi yisiwe eka matiko hinkwawo hi ndlela yihi?
10 Endzhaku ka loko Vaisrayele va ale Yesu, Yakobo u te: “Xikwembu xi [sungule] ku tikarhata, xi tilavela, exikarhi ka vamatiko, vanhu lava nga ta vuriwa va xona ha kunene.” (Mintirho 15:14) “Vanhu” lava, ku katsa ni Vayuda volavo va nga ri vangani lava amukeleke Yesu tanihi Mesiya, hinkwavo va vumba ‘Israyele wa Xikwembu wa moya’ naswona u vumbiwe hi vagandzeri va Kriste Yesu lava tswariweke hi moya va 144 000. (Vagalatiya 6:16; Nhlavutelo 7:1-8; 14:1-5) Mupfumeri wo sungula wa Matiko la nga yimbangiki a a ri Korneliyo. Loko Korneliyo ni ndyangu wa yena va amukele ndlela ya Xikwembu ya ku ponisa, Petro u te: “Ndza twisisa swinene sweswi leswaku Xikwembu a xi yi hi nghohe ya vanhu; kambe ematikweni hinkwawo loyi a xi chavaka a vuya a endla leswi lulameke, xa n’wi tsakela.” (Mintirho 10:34, 35) Pawulo u engetela eka vunene bya ku nga yi hi nghohe ka Yehova loko a ku: “Hikokwalaho, a ku na Muyuda kumbe Mugriki, a ku na hlonga kumbe muntshunxeki, a ku na wanuna kumbe wansati, hikuva hinkwenu mi un’we eka Kriste Yesu. Kutani, loko mi ri va ka Kriste, swi vula leswaku mi rixaka ra Abrahama, mi vadyandzhaka hikwalaho ka xitshembiso.”—Vagalatiya 3:28, 29.
11. I xitshembiso xihi lexi nyikiweke Abrahama naswona xi ta hetisisiwa ku yini?
11 Laha hi tsundzuxiwa hi xitshembiso lexi hlamarisaka lexi Yehova a xi nyikeke Abrahama. Swi titshege hi ku pfumela ka Mupatriarka loyi ku nyikela n’wana wa yena la rhandzekaka Isaka, Xikwembu xi te eka yena: “Leŝi u endliseke ŝeŝo, u nga nḍi alelanga ṅwana wa wena, loyi a nga ŝakwe, nḍi ta ku katekisa kunene, . . . Kutani matiko hikwawo ya misav̌a ma ta tinkhensa ha rišaka ra wena.” (Genesa 22:16-18) Xana xitshembiso lexi xi ta hetisisiwa hi ndlela yihi ke? “Rišaka ra Abrahama,” leri vumbiweke hi Yesu Kriste ni valandzeri va yena lava totiweke va 144 000 lava tikombiseke va tshembekile ku fikela eku feni, va ta fuma vanhu va ri ematilweni hi malembe ya gidi. (Nhlavutelo 2:10, 26; 20:6) Malunghana ni nkarhi wolowo lowu katekisiweke, Yehova wa hi tiyisekisa loko a ku: “Ku fuma ka yena [i] ku rula loku nga heriki.” Ha yini? Hikuva “ku fuma” ka Mfumo wolowo wa Vumesiya ku ta ‘tiyisiwa hi vululami ni vunene hi laha ku nga heriki.’—Esaya 9:7.
12. Minkateko ya ntwanano wa Abrahama ana se ya karhi ya tokotiwa hi mpimo wo fikela kwihi?
12 Kambe a ku na xilaveko xo yima kukondza Ku Fuma Ka Gidi Ra Malembe ka Yesu Kriste ku sungula leswaku u ta tsakela minkateko ya ntwanano wa Abrahama. Minkateko leyi ana se yi karhi ya tokotiwa hi “ntshungu lowukulu” wa vanhu “v[o] huma hi le matikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Hi ku ‘hlantswa tinguvu ta vona hi ndlela yo fanekisela ivi va tiendla ti basa hi ngati ya Xinyimpfana,’ Yesu Kriste, va ve ni xiyimo lexinene emahlweni ka Yehova. Ku fana na Abrahama, va ve vanghana va Yehova! Vululami hakunene byi fungha ndlela ya Yehova ya ku ponisa timiliyoni to huma eka matiko hinkwawo.—Nhlavutelo 7:9, 14.
Xana U Amukela Tindlela Ta Xikwembu To Lulama?
13, 14. (a) Hi kwihi ku kambisisa mbilu ka munhu hi xiyexe loku hinkwerhu hi faneleke ku ku endla? (b) Xana ku tlangela ka hina eka Yehova ku nga kombisiwa njhani?
13 Xana mbilu ya wena yi khumbekile ni ku susumetiwa swinene hi ndlela ya Xikwembu ya vululami ni ya rirhandzu hi ku nyika N’wana wa xona la nga swakwe tanihi nkutsulo wa wena ke? Anakanya ku titwa ka Abrahama loko Yehova a n’wi kombele ku nyikela n’wana wa yena, loyi a a n’wi rhandza swinene swonghasi! Kambe ku titwa ka Xikwembu ku entile swinene. Anakanya ku titwa ka yena loko N’wana wa yena la rhandzekaka a tokota ku tsongahatiwa, ku rhukana ka lava hundzaka, ku vava lokukulu ka mhandzi ya nxaniso. Anakanya ku titwa ka Yehova hi ku rila ka Yesu loko a ku: “Xikwembu xanga, Xikwembu xanga, u ndzi tshikele yini?” (Matewu 27:39, 46) Hambi swi ri tano, vululami byi lave leswaku Yehova Xikwembu a pfumelela N’wana wa Yena ku fa hi ndlela yoleyo leswaku a kombisa ku tshembeka ka yena eku twariseni ka ku lulama ka Xikwembu. Ku tlula kwalaho, hi ku pfumelela N’wana wa yena leswaku a fa, Yehova u hi pfulele ndlela ya ku pona.
14 Kutani ke, entiyisweni ku tlangela ka hina eka Yehova ni N’wana wa yena ku fanele ku hi susumetela ku vula erivaleni hi ku: “Ku ponisiwa ku huma eka Xikwembu xa hina . . . ni le ka Xinyimpfana!” (Nhlavutelo 7:10) Hi ku hlamula ka hina lokunene hi ndlela leyi, hi kombisa leswaku hi pfumela marito ya Muxe lama nge: “Tindlela hikwato ta [Yehova] ti lulamile.” (Deuteronoma 32:4) Mawaku ntsako lowu hi faneleke ku wu tisa embilwini ya Yehova ni ya N’wana wa yena loko hi ri karhi hi pfumela kutani hi landzelela tindlela to lulama ta Xikwembu ta ku ponisa vanhu!
15. Xana marito ya Yesu eka Nikodema ma vula yini eka hina?
15 Xana a hi tsaki leswi vapfumeri-kulorhi hi va-1870 va tekeke xiyimo lexi tiyeke emhakeni ya gandzelo ra nkutsulo ke? Xana a hi tsaki leswi hina namuntlha hi kumekaka eka nhlengeletano leyi yi tiyimiseleke ku seketela ndlela ya Xikwembu yo lulama ni ya rirhandzu ya ku ponisa vanhu ke? Loko hi tsaka, kutani hi fanele ku nyikela nyingiso lowu hlawulekeke eka leswi Yesu a swi byeleke Nikodema a ku: “Xikwembu a xi rhumanga n’wana wa xona emisaveni ku ta avanyisa misava, kambe a ku ri ku endlela leswaku misava yi ta ponisiwa ha yena. Loyi a pfumelaka eka N’wana, a nga avanyisiwi; . . . Kambe loyi a hanyaka entiyisweni, wa ta eku vonakaleni, leswaku mintirho ya yena yi ta vonaka yi ri leyi endliweke hi ku yingisa Xikwembu.” Ku balekela ku avanyisa lokukulu ka Xikwembu, hi fanele hi kombisa ripfumelo ra hina eka N’wana hi ku endla ‘mintirho leyi fambisanaka na Xikwembu.’—Yohane 3:17, 18, 21.
16. Xana vadyondzisiwa va Yesu va nga n’wi kwetsimisa njhani Tatana wa le matilweni?
16 Yesu u te: “Tata wa mina ú dzunisiwa hi loko mi veka mihandzu leyo tala, ku kombisa leswaku mi vadyondzisiwa va mina va xiviri. Loko mi hlayisa milawu ya mina, mi ta tshama erirhandzwini ra mina, hi laha na mina ndzi hlayiseke milawu ya Tata wa mina, kutani ndzi tshama erirhandzwini ra yena.” (Yohane 15:8, 10) Hi yihi yin’wana ya milawu leyi? Wun’wana wu kumeka eka Yohane 13:34, 35, laha Yesu a byeleke vadyondzisiwa vakwe a ku: “Ndzi mi nyika nawu lowuntshwa ndzi ri: Rhandzanani! . . . Hinkwavo va ta tiva leswaku mi vadyondzisiwa va mina, loko mi rhandzana.” Mihandzu ya rirhandzu yi le rivaleni exikarhi ka Timbhoni ta Yehova. Yesu nakambe u lerisile a ku: “Yanani ha kona, mi ya hundzula vamatiko hinkwavo leswaku va va vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20) Xana wa yi endla ‘mintirho leyi yi fambisanaka ni Xikwembu’ hi munhu hi xiyexe ke?
17. I vuyelo byihi lebyi kombisaka leswaku ntirho wo chumayela ni ku dyondzisa i xikombiso xa vululami bya Yehova ke?
17 Vululami bya ndlela ya Yehova eku pfumeleleni ka valandzeri va Yesu ku endla mintirho leyi yo chumayela ni ku dyondzisa byi vonaka kahle loko hi kambisisa leswi swi hetisisiweke hi Timbhoni ta Yehova hi lembe rin’we ntsena. Hi 1988, a ku ri na vadyondzisiwa lavantshwa lava khuvuriweke va 239 268! Xana leswi a swi tisi ntsako embilwini ya wena?
Xikwembu Xa Vululami Xi Ta Teka Goza Hi Xihatla
18. Hikwalaho ka ku xanisiwa ka vanhu va Yehova i swivutiso swihi leswi nga tlakusiwaka?
18 Ntirho wo chumayela a wu hetisisiwanga ku ri hava nkaneto. Yesu u byele valandzeri vakwe a ku: “Loko va ndzi xanisile, na n’wina va ta mi xanisa.” (Yohane 15:20) Matimu ya manguva lawa ya Timbhoni ta Yehova ya seketela ntiyiso wa marito wolawo. Ku yirisiwa, ku bohiwa, ku biwa hambi ku ri ku xanisiwa swi tokotiwile hi Timbhoni ematikweni yo hambana-hambana. Marito ya vuprofeta ya Habakuk nakambe ya ta emianakanyweni ya hina loko a ku: “Nawu wu etlele, a ka ha avanyisiwi hi ku lulama.” Hikwalaho, minkarhi yin’wana, hambi ku ri vanhu va Yehova va nga ha titwa va lava ku vutisa ku: ‘Ha yini Yehova a tshika lava endlaka hi vuxisi ke? Ha yini A miyela loko munhu wo biha a mita munhu la lulameke ku tlula yena ke?’—Habakuk 1:4, 13.
19. I xikombiso xihi lexi Yesu a xi nyikeke leswaku a hi pfuna ku twisisa timhaka hi langutelo ra Xikwembu?
19 Yesu u nyikele xifaniso lexi pfunaka ku hlamula swivutiso swo tano ivi xi hi endla hi swi kota ku vona swilo hi langutelo ra Xikwembu. Eka Luka 17:22-37, Yesu u hlamusela swiyimo swa vukarhi leswi nga ta fungha ku hela ka mafambiselo lawa ya swilo. U vule leswaku swi ta fana ni leswiya swi landzeleke Ndhambi esikwini ra Nowa ni ku lovisiwa ka Sodoma na Gomora emasikwini ya Lota. Manuku ke, hi laha swi hlamuseriweke ha kona eka Luka 18:1-5, Yesu u hundzulukele eka vadyondzisiwa vakwe ivi “a va byela xifaniso ku komba leswaku vanhu va fanele ku khongela hi minkarhi hinkwayo, va nga heli timbilu.” Yesu u vulavule hi noni leyi a yi pfumala swinene na hi “muavanyisi” loyi a a ri exiyin’weni xo anerisa swilaveko swa yona. Noni yi hambete yi kombela yi ku: “Ndzi avanyisele eka loyi a ndzi tengisaka.” Hikwalaho ka ku phikelela ka yona, muavanyisi eku heteleleni ‘u endlile leswaku yi kuma vululami.’
20. I dyondzo yihi leyi xifaniso xa Yesu xi hi khomeleke yona?
20 Hi yihi dyondzo eka hina namuntlha? Loko a pimanisa muavanyisi yoloye la nga lulamangiki na Yehova, Yesu u te: “Yingisani leswi vuriwaka hi muavanyisi loyi la nga tshembekangiki. Kutani, xana Xikwembu a xi nga avanyiseri vahlawuriwa va xona, ni ku va lehisela mbilu, vona lava huwelelaka eka xona vusiku ni nhlekanhi, xana? Ndzi ri ka n’wina: Xi ta hatlisa ku va avanyisela.”—Luka 18:6-8a.
21. Hi fanele hi languta ni ku tlhantlha swiphiqo swa hina swa munhu hi xiyexe hi ndlela yihi?
21 Hi minkarhi hinkwayo tsundzuka leswaku loko swi ta eka swiphiqo swa hina swa munhu hi xiyexe, ku hlwela kun’wana ni kun’wana loku vonakaka onge ku kona eka nhlamulo ya swikombelo swa hina a ku vangiwi hi ku nga lavi etlhelweni ra Xikwembu. (2 Petro 3:9) Loko hi tikuma hi tokota ku xaniseka ko karhi kumbe vuhomboloki ku fana ni noni liya, hi nga va ni ripfumelo ra leswaku Xikwembu xi ta vona leswaku vululami bya endliwa eku heteleleni. Hi nga ri kombisa njhani ripfumelo ro tano ke? Hi ku khongela hi ku phikelela naswona hi seketela swikhongelo swa hina hi ku hlayisa mahanyelo yo tshembeka. (Matewu 10:22; 1 Vatesalonika 5:17) Hi ku tshembeka ka hina, hi ta kombisa leswaku ri kona ripfumelo emisaveni, leswaku ku ni varhandzi va vululami va ntiyiso ni leswaku hi le xikarhi ka vona.—Luka 18:8b.
‘Tsakani, N’wina Matiko, Ni Vanhu Va Xona’
22. Muxe u hetelele risimu ra yena hi mhaka yihi ya ku hlula ke?
22 Hi malembe xidzana yo tala lama hundzeke, Muxe u hetelele risimu ra yena hi marito lama ya ku hlula a ku: “Ṅwina matiko, yimbelelani hi ku ṭaka kuṅwe ni tiko ra šona, hikuv̌a Šikwembu ši rihisela ngati ya malanḍa ya šona, ši ta tirihisela e henhla ka v̌alala v̌a šona, ši phahlela misav̌a ya šona ni tiko ra šona e mhamba.” (Deuteronoma 32:43) Siku ra Yehova ra ku tirihisela hi minkarhi hinkwayo ra tshinela. Ha tlangela swinene swonghasi leswi a ha kombisaka ku leha mbilu kun’we ni vululami!
23. I vuyelo byihi lebyi tsakisaka lebyi yimeleke lava va hlanganyelaka eku tsakeni ka vanhu va Xikwembu?
23 Ndlela ya ha pfulekile eka lava nga ematikweni hinkwawo “leswaku hinkwavo va ta ya eku hundzukeni,” kambe a ku na nkarhi wo tlanga ha wona. Petro u tsundzuxile a ku: “Siku ra [Yehova] ri ta ta tanihi khamba.” (2 Petro 3:9, 10) Vululami bya Xikwembu byi lava leswaku mafambiselo lawa yo biha ya herisiwa hi ku hatlisa. Loko ya herisiwa, onge hi nga kumiwa exikarhi ka lava va amukeleke xirhambo lexi xa ntsako lexi nge: “Ṅwina matiko, yimbelelani hi ku ṭaka kuṅwe ni tiko ra šona.” Ina, onge hi nga va exikarhi ka lava tsakeke lava voneke leswaku vululami byi fungha tindlela ta Xikwembu hinkwato!
A Wu Ta Hlamurisa Ku Yini?
◻ Ha yini Nawu wa Muxe wu fanele wu tiyisa ripfumelo ra hina eka vululami bya Xikwembu?
◻ I yini lexi faneleke ku hi susumetela ku amukela tindlela to lulama ta Xikwembu?
◻ Yehova a nga kwetsimisiwa njhani?
◻ Namuntlha, hi kwihi ntsena laha ntsako wa ntiyiso wu nga kumiwaka kona ke?
[Xifaniso lexi nga eka tluka 25]
“Ndza twisisa swinene sweswi leswaku Xikwembu a xi yi hi nghohe ya vanhu; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.”—Mintirho 10:34, 35
[Xifaniso lexi nga eka tluka 28]
Xikwembu xi ta endla leswaku vululami byi endliwa eka vahlawuriwa va xona lava huwelelaka xona