Nkarhi Wa Ku Avanyisa Ka Xikwembu Wu Fikile
“Chavani Xikwembu, mi xi dzunisa, hikuva nkarhi wa xona wa ku avanyisa wu fikile.”—NHLAVUTELO 14:7.
1. Tindzima to sungula ta Nhlavutelo ti katsa yini?
BUKU ya Nhlavutelo yi na vuprofeta lebyi nyanyulaka lebyi nga ni ku hetiseka ka byona esikwini ra hina. Xihloko lexi hundzeke xi xiye byin’wana bya byona, ku katsa ku pfuriwa ka swilemo swa tsevu swo fanekisela. Swilemo leswi swi pfuriweke swi paluxe ku khandziya loku onhaka ka vagadi va mune va tihanci ta Nhlavutelo ‘emasikwini lawa ya makumu.’ (2 Timotiya 3:1; Nhlavutelo 6:1-8) Nakambe byi hlamusele mayelana ni lava nga ta fuma na Kriste etilweni ni lava nga ta pona ‘nhlomulo lowukulu’ leswaku va ta hanya hi laha ku nga heriki emisaveni. Swilemo swa tsevu swi komba leswaku ‘nkarhi lowu vekiweke’ wa ku avanyisa ka Xikwembu “wu kusuhi.”—Nhlavutelo 1:3; 7:4, 9-17.
2. Xana tinanga ta nkombo to fanekisela ta Nhlavutelo ndzima 8 ti tirhisiwa njhani?
2 Kambe ka ha ri na xilemo xin’wana, xa vunkombo. Nhlavutelo 8 yi hi byela leswi paluxiwaka loko xi pfuriwa yi ku: “Hi loko ndzi vona tintsumi ta 7 leti yimaka emahlweni ka Xikwembu, ti nyikiwa tinanga ta 7.” Ndzimana 6 yi ri: “Kutani ke, tintsumi leta 7 leti a ti ri ni tinanga ta 7, ti tilulamisela ku ti chaya.” Eminkarhini ya Bibele, tinanga a ti tirhiseriwa ku kombisa swiendlakalo swa nkoka. Hi ndlela leyi fanaka, ku chayiwa ka tinanga leti ta nkombo ku tisa nyingiso eka timhaka ta nkoka wa vutomi ni rifu enkarhini wa hina. Naswona loko tintsumi ti chaya tinanga, Timbhoni ta vanhu leti nga emisaveni ti landzela hi ku hangalasa mahungu ya nkoka hinkwako lama twarisiwaka loko ku chayiwa nanga yin’wana ni yin’wana.
Leswi Ku Chayiwa Ka Tinanga Ku Vulaka Swona
3. Ku chayiwa ka tinanga ta nkombo ku vula yini?
3 Ku chayiwa loku ka tinanga ku hi tsundzuxa makhombo lama Yehova a ma chululeke ehenhla ka Egipta wa khale. Makhombo wolawo a ku ri swikombiso swa ku avanyisa ka Yehova ehenhla ka mfumo wolowo wo sungula wa misava ni vukhongeri bya wona bya vunwa, kambe ma tlhele ma pfulela vanhu va Xikwembu ndlela yo baleka ha yona. Hi ku fanana, ku chayiwa ka tinanga ta Nhlavutelo i makhombo ya manguva lawa, sweswi ehenhla ka misava hinkwayo ya Sathana ni vukhongeri bya yona bya vunwa. Kambe ke, lawa a hi makhombo ya xiviri kambe i marungula ma khombo ya ku avanyisa ka Yehova. Ma boxela vanhu va Xikwembu ndlela yo baleka ha yona.
4. Ku chayiwa ka tinanga ta nkombo ku kume ku hetiseka ka kona enkarhini wa hina hi ndlela yihi?
4 Ku pfumelelana ni ku chayiwa loku ka tinanga ta nkombo, swiboho leswi himetelaka leswi lwisanaka ni misava ya Sathana swi nyikeriwile eka mintsombano ya nkombo yo hlawuleka ya lembe na lembe ya vanhu va Yehova ku sukela hi 1922 ku ya eka 1928. Madzana ya timiliyoni ta tikopi ta swiboho, ma hangalasiwile. Hambi swi ri tano, ku chayiwa ka marungula walawo yo heta matimba a ku nga hikeriwanga malembe walawo ntsena, kambe ku hambetile emasikwini hinkwawo ya makumu. Kutani namuntlha ku twarisiwa ka wona i ka matimba ngopfu ku tlula rini na rini, tanihi leswi timiliyoni ta “ntshungu lowukulu” ti engeteleke marito ya tona eka ntlawa lowuntsongo wa lava totiweke lava sunguleke ku chumayela endzhaku ka Nyimpi yo Sungula ya Misava. (Nhlavutelo 7:9) Sweswi lembe rin’wana ni rin’wana, hi matimba ni tinhlayo leti andzaka, timiliyoni leti ti twarisa leswaku misava ya Sathana yi onhake hi laha ku heleleke.
5. I mani ‘xiphemu xin’we xa nharhu’ xa misava lexi avanyisiwaka ku sungula hi ku avanyisa loku vavaka, naswona ha yini?
5 Eka Nhlavutelo 8:6-12, tinanga to sungula ta mune ta chayiwa. Xihangu, ndzilo ni ngati swa chuluriwa, swi yisa eku lovisiweni ka ‘xiphemu xin’we xa nharhu’ xa misava. Ha yini ‘xiphemu xin’we xa nharhu’ xi hlamuseriwe tanihi xiphemu xa misava lexi nga ni nandzu lexi rhangaka ku ta eku avanyisiweni loko biha? Hikuva loko mafambiselo ya Sathana hinkwawo ya soleka emahlweni ya Xikwembu, xiphemu xin’wana xi soleka ku tlurisa. Xana i xiphemu xihi? I xiphemu lexi xi titekeleke vito ra Kriste—Vujagana. Naswona loko marungula ya ku avanyisa ka Xikwembu ya tile ku ta lwisana na byona endzhaku ka Nyimpi yo Sungula ya Misava, enkarhini wolowo xivandla xa Vujagana xi katse kwalomu ka n’we xa nharhu xa vanhu.
6. Ha yini Yehova a tshike Vujagana byi ya eku lovisiweni?
6 Vukhongeri bya Vujagana i mihandzu ya vugwinehi bya malembe ya 1 900 ku sukela eVukristeni bya ntiyiso lebyi Yesu ni vadyondzisiwa va yena va byi vhumbeke. (Matewu 13:24-30; Mintirho 20:29, 30) Vafundhisi va Vujagana va titeka tanihi vadyondzisi va Vukriste, kambe tidyondzo ta vona ti suseriwe kule ni ntiyiso wa Bibele, naswona mintirho ya vona leyo biha yi hambeta yi tisa xisandzu evitweni ra Xikwembu. Nandzu wa vona wa ngati hikwalaho ka ku seketela tinyimpi ta lembe xidzana leri ra vu-20 wu paluxiwile. Vujagana i xiphemu xa mafambiselo ya Sathana ya swilo hi laha ku heleleke. Xisweswo, byi kuma marungula ya matimba, ya khombo lama humaka eka Yehova lama kombaka leswaku a byi faneriwi hi tintswalo ta Xikwembu hi laha ku heleleke. Yehova u tshike yindlu ya Vujagana yi ya eku lovisiweni tanihi laha entiyisweni yindlu ya Vayuda ya lembe xidzana ro sungula yi endleke ha kona!—Matewu 23:38.
Ku Pfuxeteriwa Ku Chumayela Ka Misava Hinkwayo
7, 8. (a) Eka Nhlavutelo ndzima 9, xana ku chayiwa ka nanga ya vunkombo ku paluxa yini? (b) Tinjiya ti fanekisela vamani?
7 Eka Nhlavutelo 9:1 ntsumi ya vuntlhanu yi chaya nanga ya yona, kutani xivono xi paluxa nyeleti leyi teke emisaveni. Nyeleti leyi yi na xilotlelo evokweni ra yona. Yi pfula hi xona khele leri ku pfaleriweke tinjiya leto tala eka rona. Nyeleti i Hosi ya Yehova leyi ya ha ku vekiwaka exitulwini xa le tilweni, Yesu Kriste. Tinjiya i malandza ya Xikwembu, lama xanisiweke naswona swi vonaka onge ma dlayiwile loko vayimeri va vona lava rhangelaka va khotsiwile hi 1918. Kambe Kriste, loyi sweswi a nga ematimbeni ya Mfumo etilweni, wa va ntshunxa leswaku va sungula ku chumayela ka vona ka le rivaleni, ngopfu-ngopfu ku khomisa vafundhisi lava endleke xikungu xo dlaya ntirho wa vona tingana.—Matewu 24:14.
8 Eka Nhlavutelo 9:7 tinjiya ti hlamuseriwa hi ndlela leyi: “Tinjiya ta kona a ti vonaka ti fana ni timangwa leti lunghiseleriweke ku ya enyimpini. Etinhlokweni ta tona a ku ri ni swin’wana swo fana ni tiharhi, ti vonaka wonge i ta nsuku; tinghohe ta tona a ti fana ni ta vanhu.” Ndzimana 10 ya engetela yi ku: “Mincila ya tinjiya yi fana ni ya swipame yi ri ni mindzhombo.” Tinjiya leti ti fanisela kahle masalela ya vadya-ndzhaka va Mfumo lava pfuxetiweke lava engeteke va ya enyimpini ya moya ku sukela hi 1919 ku ya emahlweni. Hi matimba lama pfuxetiweke, va twarise marungula ya ku avanyisa ka Xikwembu lama lumaka, ngopfu-ngopfu lama lwisanaka ni Vujagana lebyi onhaka.
9, 10. (a) Ku chayiwa ka nanga ya vutsevu ku paluxa yini? (b) I vamani va katsekaka eka timiriyadi ta tihanci ta ntamu?
9 Ku ya emahlweni, ntsumi ya vutsevu yi chaya nanga ya yona. (Nhlavutelo 9:13) Leyi yi hlavutela ku ntshunxiwa ka tinhenha. Ndzimana 16 yi vula leswaku ti endla nhlayo ya ‘timiriyadi timbirhi ta timiriyadi,’ ku nga 200 wa timiliyoni! Naswona ti hlamuseriwe eka tindzimana 17 na 19 hi ndlela leyi landzelaka: “Tinhloko ta timangwa a ti fana ni ta tinghala; emilon’weni ya tona a ku huma ndzilo ni musi ni xivavula. . . . Mincila ya tona yi fana ni tinyoka.” Mavuthu lawa ma rhanga ma pfuma ehansi ka nkongomiso wa Hosi, Kriste Yesu. Naswona i xivono muni xo chavisa swonghasi lexi ti nga xona!
10 Xana tihanci leti ta matimba ti yimela yini? Leswi ti hlayiwaka hi timiliyoni, ku nge vi masalela lama totiweke ntsena, lama sweswi ya nga kwalomu ka 8 800 ntsena emisaveni. Timiriyadi leti ta tihanci ti fanele ti katsa “ntshungu lowukulu” wa Nhlavutelo ndzima 7, lava va nga ni ntshembo wa ku hanya emisaveni hi laha ku nga heriki. EBibeleni, rito leri nge ‘miriyadi’ hakanyingi ri vula nhlayo leyikulu, ya ntsandza vahlayi. Xisweswo, tihanci leti to fanekisela a ti katsi hlayo leyi hungutekaka ya lava totiweke kambe ti tlhela ti katsa timiliyoni ta marito ya matimba naswona lama andzaka ya “ntshungu lowukulu,” wa “tinyimpfu tin’wana” lowu hambetaka ni ntirho wa le rivaleni lowu sunguriweke hi masalela lama totiweke lama fanaka ni tinjiya.—Yohane 10:16.
11. Ha yini ku vuriwa leswaku “matimba ya timangwa ya le milon’weni ya tona,” naswona ‘ti onha njhani hi mincila ya tona’?
11 Nhlavutelo 9:19 yi ri: “Matimba ya timangwa ma le milon’weni ya tona,” kutani ‘ti onha hi mincila ya tona.’ Xana matimba ya le milon’weni ya tona hi ndlela yihi? Hikuva hi makume ma malembe, hi ku tirhisa Xikolo xa Vutirheli bya le Tilweni ni minhlangano yin’wana, malandza ya Xikwembu ma dyondzisiwe ndlela yo chumayela marungula ya xona yo avanyisa hi rito ra nomu. Naswona va vavisa hi mincila ya vona hi ndlela yihi? Hikuva va hangalase tibiliyoni ta tibuku leti sekeriweke hi Bibele emisaveni hinkwayo, xisweswo va siya marungula lama tlhavaka lama lwisanaka ni misava ya Sathana endzhaku ka vona. Eka vakaneti va tona, tinhenha leti entiyisweni ti fana ni timiriyadi ta timiriyadi.
12. I yini lexi tinjiya ni tihanci to fanekisela ti faneleke ku hambeta ti xi endla, naswona vuyelo byi va byihi?
12 Xisweswo, tinjiya ni tihanci to fanekisela ti fanele ti twarisa marungula ya ku avanyisa ka Xikwembu kahle swinene na hi ndlela leyi twalaka tanihi leswi siku ra xona ra ku tirihisela ri tshinelaka. Eka lava va timbilu letinene, marungula wolawo i mahungu lamanene ngopfu emisaveni. Kambe eka lava hlawulaka misava ya Sathana, i mahungu layo biha, hikuva ya vula leswaku misava ya vona yi ta herisiwa ku nga ri khale.
13. ‘Khombo ra vunharhu’ leri fambisanaka ni ku chayiwa ka nanga ya vunkombo ri katsa yini, naswona i “khombo” hi ndlela yihi?
13 Tinjiya leti vavisaka ni tinhenha swi hlamuseriwa tanihi ro sungula ni ra vumbirhi ra “makhombo” manharhu lama tiyisiweke hi Xikwembu. (Nhlavutelo 9:12; 11:14) Xana i yini ‘khombo ra vunharhu’? Eka Nhlavutelo 10:7 hi byeriwa ku: “Siku leri ntsumi ya vu-7 yi chayaka, . . . makungu ya Xikwembu lawa a ma fihliwile, lawa xi ma tiviseke eka vaprofeta malandza ya xona, ma ta hetiseka.” Xihundla lexi xo hlawuleka xi katsa “rišaka” leri tshembisiweke ro sungula aEdeni. (Genesa 3:15) “Rišaka” rero ngopfu-ngopfu i Yesu kambe ri tlhela ri katsa vanghana va yena lava totiweke lava nga ta fuma na yena etilweni. Kutani xihundla xo hlawuleka xi khumba Mfumo wa Xikwembu wa le tilweni. Mfumo lowu wu tisa “khombo” ra vunharhu leri kunguhatiweke hi Xikwembu, hikuva ri tisa ku avanyisa ka Xikwembu ko lwisana ni misava ya Sathana ku ya eku heteleleni.
Mfumo Wu Tlhomiwile
14. Xana ku chayiwa ka nanga ya vunkombo ya Nhlavutelo 11:15 ku twarise yini?
14 Manuku swa tlhekeka! Nhlavutelo 11:15 yi ri: “Hi loko ntsumi ya vu-7 yi chaya nanga ya yona, kutani ku va ni marito lama huwelelaka hi le tilweni ma ku: ‘Matimba ya ku fuma misava, sweswi ma nyikiwile [Yehova] Hosi ya hina ni Mesiya wa yona, kutani u ta fuma hi laha ku nga heriki.’” Ina, ku tivisiwa leswaku Mfumo wa Xikwembu ha Kriste wu tlhomiwe etilweni hi lembe ra 1914. Naswona loko masalela ya pfuxetiwile endzhaku ka Nyimpi yo Sungula ya Misava, ma yise mahungu lawa emahlweni.
15. Hi 1922, i xiendlakalo xihi xi kombiseke nsusumeto lowuntshwa eku chumayeleni ka Mfumo?
15 Entsombanweni wa malandza ya Yehova wa 1922 eCedar Point, Ohio, U.S.A., magidi lama a ma ri kona ya twe xitiviso lexi nyanyulaka lexi nge: “Leri i siku ra masiku hinkwawo. Vonani, Hosi ya fuma! Mi vayimeri va yona va le rivaleni. Hikwalaho twarisani, twarisani, twarisani, Hosi ni mfumo wa yona.” Sweswo swi sungule nsusumeto lowukulu wa ku chumayela ka Mfumo ka le rivaleni loku katsaka ku avanyisa loku twarisiweke hi vachayi va tinanga va tintsumi va nkombo. Namuntlha, kwalomu ka timiliyoni tinharhu na hafu ta malandza ya Yehova emabandlheni lama tlulaka 57 000 emisaveni hinkwayo va katseka eku chumayeleni loku ka Mfumo ka misava hinkwayo. Hakunene i timiriyadi.
16. Eka Nhlavutelo ndzima 12, i xiendlakalo xihi xin’wana lexi katsaka tilo ni misava lexi paluxiweke hi ku chayiwa ka nanga ya vunkombo?
16 Kambe ntsumi ya vunkombo yi na swo tala swo swi paluxa. Nhlavutelo 12:7 yi vula leswaku manuku “ku lwa ku va kona etilweni.” Ndzimana 9 yi hi nyika vuyelo bya goza ra Kriste Hosi: “Hi loko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi na Sathana, Mukanganyisi wa misava hinkwayo; yi cukumetiwile yi ya wela ehansi emisaveni, tintsumi ta yona na tona ti cukumetiwa kun’we na yona.” Ndzimana 12 ya engetela yi ku: “Hikwalaho, tsakani n’wina matilo, na n’wina lava akeke eka wona.” Ina, matilo a ma basisiwile enkucetelweni wa Sathana, hi xona xivangelo xa ntsako lowukulu exikarhi ka tintsumi leto tshembeka. Kambe xana swi vula yini eka vanhu? Ndzimana yoleyo leyi fanaka ya hlamula: “Kambe mi ni khombo, n’wina misava ni lwandle, hikuva Diyavulosi u xikele ka n’wina a karihile ngopfu, hi ku tiva leswaku nkarhi wa yena wu komile.”
17. Ha yini ku hlamuseriwa ka hulumendhe ya misava tanihi “xivandzana” eka Nhlavutelo ndzima 13 ku fanela?
17 Nhlavutelo 12:3 yi hlamusela Sathana tanihi ‘dragona leyikulu, leyi nga ni tinhloko ta nkombo ni timhondzo ta khume,’ mulovisi la fanaka ni xivandzana lexo biha. Leswi swi komba leswaku i musunguri wa “xivandzana” xa politiki ya laha misaveni lexi hlamuseriweke eka ndzima 13, tindzimana 1 na 2. Xivandzana xexo nakambe xi na tinhloko ta nkombo ni timhondzo ta khume, ku fana na Sathana. Ndzimana 2 yi ri: “Dragona [Sathana] yi nyika ntamu wa yona eka xivandzana lexi, yi xi nyika ni xiluvelo xa yona ni matimba lamakulu.” Ku hlamusela tihulumendhe ta politiki tanihi xivandzana hakunene swa fanela, hikuva eka lembe xidzana leri ra vu-20 ntsena, vanhu lava tlulaka dzana ra timiliyoni va dlayiwile etinyimpini ta matiko.
18. Xana i yini xivandzana xa timhondzo timbirhi xa Nhlavutelo 13:11, naswona mintirho ya xona yi pfuna njhani ku xi hlamusela?
18 Hi laha ndzimana 11 yi vulaka ha kona, xivono lexi landzelaka eka Nhlavutelo 13 xa paluxa, “xivandzana xin’wana lexi humaka hi le misaveni, xi ri ni timhondzo timbirhi ku fana ni xinyimpfana, kambe xi vulavula kukota dragona.” Xivandzana lexi xa timhondzo timbirhi i ku hlangana ka politiki ka Anglo-America. Xi fana ni xinyimpfana hikuva xi tiendla onge a xi tivi ku vavisa, muxaka lowu voningiweke ngopfu wa hulumendhe. Kambe xi vulavula ku fana ni dragona, ku fana na Sathana, kutani xi vitaniwa “xivandzana xin’wana” hikuva mintirho ya xona ya mafumele yi fana ni xivandzana. Xa tshikilela ni ku xungeta naswona xi tirhisa ni vukari kun’wana ni kun’wana laha ndlela ya xona ya mafumele yi nga amukeriwiki. A xi khutazi ku titsongahatela Mfumo wa Xikwembu kambe, ku ri na sweswo, xi pfuna misava ya Sathana. Hi yona mhaka leyi ndzimana 14 yi nge: “Xi kanganyisa vaaki va misava.”
19, 20. (a) Xana vutshembeki bya malandza ya Yehova byi komba yini? (b) Hi swi tiva njhani leswaku masalela lama totiweke ma ta hlula ehenhla ka misava ya Sathana?
19 Misava leyi yi nga ehansi ka vulawuri bya Sathana i ndhawu yo tika ku hanya eka yona, eka lava, hi ku twanana ni xileriso xa Yesu eka Vakriste va ntiyiso, va nga riki xiphemu xa yona. (Yohane 17:16) Xisweswo, i xikombiso lexi xiyekaka xa matimba ni ku katekisa ka Yehova leswi malandza ya yena emisaveni hinkwayo namuntlha ma hlayisaka vutshembeki naswona ma hambetaka ma kurisa Yehova ni tindlela ta yena leto lulama hi vun’we. Ma endla leswi ma langutane na nkaneto wa matimba, nxaniso naswona hambi ku ri rifu.
20 Masalela lama totiweke ya ve vahlaseriwa va Sathana lava kongomeke hikwalaho ka leswi va nga ta va vafumi-kulobye na Kriste. Kambe Nhlavutelo ndzima 14 yi komba leswaku nhlayo leyi teleke ya vona, 144 000, yi hlengeletiwa na Kriste hi laha ku hlulaka ematimbeni ya Mfumo. Hi ku tshembeka va namarhela N’wini wa vona, hikuva hi laha ndzimana 4 yi vulaka ha kona: “Hi lava va landzelelaka Xinyimpfana hinkwako lomu xi yaka kona”—va endla leswi ku nga khathariseki nxaniso wa tihanyi lowu Sathana a wu tiseke ehenhla ka vona.
Ku Kuma Ku Avanyisa Ka Xikwembu Ku Sungula
21, 22. (a) I switiviso swihi leswi tintsumi ti swi endlaka eka Nhlavutelo 14:7, 8? (b) Ha yini ntsumi yi tivisa ku wa ka Babilona wa vukhongeri loko a ha ri kona?
21 Eka Nhlavutelo 14:7 ntsumi ya huwelela yi ku: “Chavani Xikwembu, mi xi dzunisa, hikuva nkarhi wa xona wa ku avanyisa wu fikile. N’wi gandzeleni, yena muendli wa tilo ni misava ni wa lwandle ni swihlovo swa mati.” Xana i mani loyi a rhangaka a kuma ku avanyisa loku vavaka ka Xikwembu? Ndzimana 8 yi hlamula yi ku: “Ku landza ntsumi yin’wana ya vumbirhi, yi ku: ‘Ú wile, ú wile Babilona, muti lowukulu, yena loyi a nga nwisa vanhu va matiko hinkwawo evhinyo ya ku leva ka vuoswi bya yena!’” Laha i nkarhi wo sungula, kambe hayi wo hetelela, laha Nhlavutelo yi vulavulaka hi “Babilona, muti lowukulu,” mfumo wa misava wa vukhongeri bya mavunwa.
22 Leswi vukhongeri bya ha riki na matimba eswiphen’wini swo hambana-hambana swa misava, ha yini ntsumi yi tivisa leswaku Babilona Lonkulu ana se u wile? Kasi, ku humelele yini hi 539 B.C.E. loko Babilona wa khale a wile kambe a nga lovisiwanga hi laha ku heleleke? Phela, malandza ya Yehova lama nga mahlonga ya tlhelele etiko-xikaya ra wona malembe mambirhi endzhakunyana kutani ya kondletela vugandzeri bya ntiyiso! Hi ndlela leyi fanaka, ku kondleteriwa ka malandza ya Xikwembu entirhweni lowu pfuxetiweke ni ku humelela ka moya leswi sunguleke hi 1919 i vumbhoni lebyi nga erivaleni bya leswaku hi nkarhi wolowo, hi 1919, Babilona Lonkulu u tokote ku wa tanihi laha Yehova a swi voneke ha kona. Kwalaho u n’wi avanyisele ku n’wi herisa hi laha ku heleleke endzhakunyana.
23. (a) Xana ku lovisiwa ka Babilona Lonkulu ku lulamiseriwa njhani ndlela? (b) I vuprofeta byihi byin’wana lebyi nga ta xiyiwa enkandziyisweni lowu landzelaka wa Xihondzo xo Rindza?
23 Tanihi masungulo ya ku tshinela ka ku lovisiwa kakwe, Babilona wa manguva lawa ana se u le nhlomulweni lowukulu. Vubihi bya yena, vunghwavava byakwe lebyikulu, ku pfumala ku tshembeka ni ku nghenelela eka politiki swi hangalake hinkwako. Etindhawini to tala ta Yuropa, vanhu vo tala a va ha yi ekerekeni. Ematikweni yo tala ya vusoxalisi, vukhongeri byi tekiwa tanihi “xirivatisi xa vanhu.” Nakambe, Babilona wa manguva lawa u khomisiwe tingana emahlweni ya varhandzi hinkwavo va Rito ra Xikwembu ra ntiyiso. Kutani sweswi kavula u rindzile, enxaxamelweni wa rifu wa ku lovisiwa kakwe loku n’wi fanelaka. Ina, ‘nkarhi lowu vekiweke wu kusuhi’ wa swiendlakalo swa misava leswi hlaselaka! Kutani eka nkandziyiso lowu landzelaka wa Xihondzo xo Rindza, swihloko swin’wana leswi hlayiwaka swi ta hlamusela vuprofeta lebyi nga eka Nhlavutelo malunghana ni ku lovisiwa ka “muoswi” wa vukhongeri loku tshinelaka kun’we ni ka mafambiselo hinkwawo ya swilo ya Sathana.
A Wu Ta Hlamula Njhani?
◻ Xana ku chayiwa ka tinanga ta nkombo loku sungulaka eka Nhlavutelo ndzima 8 ku vula yini esikwini ra hina?
◻ Ha yini ku nghena Vujagana ku sungula eku avanyisiweni loku vavaka?
◻ Ntirho wo chumayela wa masalela lama totiweke ni “ntshungu lowukulu” wu hlamuseriwe njhani eka Nhlavutelo ndzima 9?
◻ Xana xitiviso lexi nga eka Nhlavutelo 11:15 xi vula yini etilweni ni le misaveni?
◻ Tanihi laha swi hlamuseriweke ha kona eka Nhlavutelo 14:8, vukhongeri bya Babilona byi we njhani hi 1919, naswona leswi swi vula yini eka yena?