Ku Tshama Hi Hlelekele—Ku Ponela Eka Gidi Ra Malembe
“Ti ta endla ntlhambi wun’we, ti va ni murisi un’we.”—YOHANE 10:16.
1. Eka Xikwembu lexi hanyaka minkarhi hinkwayo, gidi ra malembe ri fana na yini?
YEHOVA i Muvumbi wa nkarhi wa vanhu. Naswona eka yena, Xikwembu lexi nga fiki lexi nga xa hi laha ku nga heriki, gidi ra malembe ri fana ni siku leri hundzaka hi ku hatlisa kumbe hambi ku ri nguva yin’we ntsena ya nkarhi wa wachi eka byin’we bya vusiku bya hina.—Psalma 90:4; 2 Petro 3:8.
2. I nguva yihi ya nkarhi lowu Yehova a wu vekeleke ku katekisiwa ka vanhu hinkwavo?
2 Xikwembu xi veke siku ro fanekisela ra gidi ra malembe hi nkarhi lowu xi nga ta katekisa mindyangu hinkwayo ya misava ha rona. (Genesa 12:3; 22:17, 18; Mintirho 17:31) Leswi swi katsa lava sweswi va feke ni lava va ha hanyaka. Xikwembu xi ta swi endlisa ku yini leswi ke? Kunene, hi ku tirhisa Mfumo wa xona ha Yesu Kriste, “rišaka” ra wansati wa xona wo fanekisela!—Genesa 3:15.
3. (a) Xirhendze xa Rixaka ra wansati wa Xikwembu xi lumiwe hi ndlela yihi, kambe xilondza xolexo xi horisiwe njhani? (b) Eku heleni ka Mfumo wa Yesu Kriste wa Gidi ra Malembe, u ta endla yini hi nyoka yo fanekisela?
3 Xirhendze xo fanekisela xa Rixaka ra wansati wa Xikwembu (kumbe nhlengeletano ya le tilweni) xi lumiwile loko Yesu Kriste a tokote rifu ro dlawela ku pfumela ni loko a tshame a file hi swiphemu swa masiku manharhu hi lembe ra 33 ra Nguva ya hina leyi Tolovelekeke. Kambe hi siku ra vunharhu, Xikwembu xa Matimba Hinkwawo, Munyiki Lonkulu wa Vutomi, xi horise xilondza xexo hi ku pfuxa N’wana wa xona loyi a tshembekaka a ya evuton’wini lebyi nga hava ku fa exivandleni xa moya. (1 Petro 3:18) Leswi Yesu a nga ta ka a nga fi nakambe, u le xiyin’weni xo fuma tanihi Hosi ehenhla ka vanhu hi gidi ra malembe ni ku “faya” nhloko ya nyoka yo fanekisela, a yi phyandlasa yi nga ha vi kona endzhaku ka makumu ya ku Fuma ka Gidi ra Malembe. Mawaku nkateko lowu nga ta va wona eka vanhu lava tshembekaka lava hlengeletiweke!
4. I muxaka muni wa xiyimiso lexi Xikwembu a xi xi hetisisa hi vanhu va xona?
4 Ku hlengeleta lokukulu a ku hambeta exikarhi ka vanhu va Yehova emisaveni hinkwayo hi nkarhi wa ‘makumu lawa ya mafambiselo ya swilo’ ku sukela loko Minkarhi ya Vamatiko yi herile hi 1914. (Matewu 24:3; Luka 21:24, King James Version) Xiyimiso lexi xa ku hlengeleta ka le mahlweni ka Gidi ra Malembe ka karhi ka yisiwa emahlweni ku pfumelelana ni ku rhandza ni le hansi ka nkongomiso wa Muhlengeleti Lonkulu, Yehova Xikwembu. Hi ku tirhisa wansati wa yena, nhlengeletano leyi fanaka ni nsati wa yena ya le tilweni, ku velekiwa ka Mfumo wa yena lowu tshembisiweke ha Yesu Kriste ku endleke hi 1914, hi laha swi tiyisiwaka ha kona hi ku hetiseka ka vuprofeta bya Bibele.
5. I ku velekiwa ka yini loku vhumbiweke eka Nhlavutelo 12:5, naswona leswi swi hlamuseriwe rini ro sungula eka Xihondzo xo Rindza xa Xinghezi?
5 Xisweswo marito lawa ya Nhlavutelo 12:5 ma hetiseke hi laha ku kwetsimaka: “Wansati a veleka n’wana wa wandzisanyana, loyi a nga ta fuma matiko hinkwawo hi nhonga ya nsimbi. Kambe n’wana a vutliwa, a yisiwa ehenhla eka Xikwembu ni le xiluvelweni xa xona.” Ku velekiwa ka Mfumo wa Yehova ha Kriste, hi laha ku faniseriweke ha kona hi n’wana la ha ku velekiwaka wa wansati wa Xikwembu, ku hlamuseriwe ro sungula eka Xihondzo xo Rindza xa Xinghezi xa March 1, 1925. Ku velekiwa ka Mfumo lowu wa Vumesiya etilweni hi 1914 ku hambana ni ku velekiwa ka “tiko” ra “v̌ana” va Siyoni emisaveni hi 1919.—Esaya 66:7, 8.
6. (a) Ku velekiwa ka Mfumo ku lave ntirho wihi lowu vhumbiweke hi Yesu? (b) Ku endla ntirho lowu swi lave yini eka vanhu va Yehova, naswona i muxaka muni wa xivumbeko lexi sweswi va xi kombisaka?
6 Ku velekiwa ka Mfumo wa Yehova lowu a nga ta lwela vuhosi bya yena lebyo lulama evuakweni hinkwabyo ha wona—aha, hi lowu nchumu lowu a wu faneriwa hi ku twarisiwa emisaveni hinkwayo! Naswona lowu a wu ri nkarhi wa ku hetiseka ka marito lawa ya Yesu malunghana ni swikombiso swa ‘vukona’ bya yena lebyi nga vonakiki leswi nge: “Evangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” (Matewu 24:3, 14) Ku chumayela loku hlanganeke, loku twananaka empin’weni wa matiko hinkwawo, emisaveni hinkwayo hakunene a ku ta lava ku hlela xiphemu lexi vonakaka xa nhlengeletano ya Yehova ya vuako hinkwabyo. Watch Tower Bible and Tract Society, leyi a yi yimeriwa hi muungameri wa yona wa nkarhi wolowo, J. F. Rutherford, a yi pfumelelana na leswi. Kutani ke, ku sukela endzhaku ka lembe ra nyimpi ra 1919, ku hlengeletiwa ka vaseketeri lava tshembekaka va Sosayiti tanihi tiko leri hlengeletiweke ku ye emahlweni hi laha ku tiyeke, ku ri karhi ku khongeleriwa vukongomisi ni nkateko wa Muhlengeleti la Tlakukeke, Yehova Xikwembu. Eku kongomaneni na Nyimpi ya Vumbirhi ya Misava, ku nga khathariseki ku kanetiwa ka tihanyi hi Vafasisi, ntlawa wa Manazi wa Hitler, na Catholic Action, Timbhoni ta Yehova emisaveni hinkwayo ti kombise xivumbeko lexi hlanganeke emisaveni leyi nga nala.
7. (a) Vanhu va Yehova va nga langutela ku pona nhlomulo lowukulu hi ku tshama evuxakeni byihi kun’we? (b) Vaponi va Ndhambi va ponise ku yini, naswona va fanekisele vamani?
7 I Timbhoni ta Yehova ntsena, lavaya va masalela lama totiweke ni “ntshungu lowukulu,” tanihi nhlengeletano leyi hlanganeke ehansi ka nsirhelelo wa Muhleri la Tlakukeke, leti ti nga ni ntshembo wo karhi wa Matsalwa wa ku pona makumu lama tshinelaka ya mafambiselo lawa ma avanyisiweke lama lawuriwaka hi Sathana Diyavulosi. (Nhlavutelo 7:9-17; 2 Vakorinto 4:4) Va ta vumba “nyama” leyi Yesu Kriste a vuleke leswaku yi ta ponisiwa eka nhlomulo lowukulu eka matimu hinkwawo ya vanhu. Hi laha a swi ri ha kona emasikwini ya Nowa, ku vule Yesu, swi ta va tano esikwini leri A nga ta humelela ha rona. Endzeni ka ngalava leyi tekeke malembe yo tala ya matshalatshala lama hlanganeke ku yi heta, i mimoya ya nhungu ntsena ya vanhu leyi poneke Ndhambi ya misava hinkwayo. Va pone tanihi ntlawa lowu hlanganeke wa ndyangu. (Matewu 24:22, 37-39; Luka 17:26-30) Nsati wa Nowa u yelana ni mutekiwa wa Kriste, naswona vana va yena va xinuna ni vingi va yena va yelana ni “tinyimpfu tin’wana” ta siku ra namuntlha ta Yesu, leti ti kuleke ti ya eka ntshungu lowukulu lowu engetelekaka, laha swiphemu swo hetelela swa tona sweswi hi nga swi tiviki. (Yohane 10:16) Leswaku va ponela eka Gidi ra Malembe ehansi ka Nowa Lonkulu, Yesu Kriste, va fanele ku tshama va hlanganile ni masalela lama totiweke, “vahlawuriwa” lava masiku ya “nhlomulo lowukulu” ma nga ta hungutiwa hikwalaho ka vona.—Matewu 24:21, 22.
Ku Ponela Eka Gidi Ra Malembe
8. Loko a gimeta vuprofeta byakwe malunghana ni vukona bya yena, i xikombiso xihi lexi Yesu a xi nyikeke, naswona siku ra June 1, 1935, a ri ri ra nkoka ku fika kwihi loko ku tiwa eku byi twisiseni?
8 Hi ku ya hi Evangeli ya Matewu, Yesu u gimete vuprofeta bya yena bya vumbhoni bya vukona bya yena hi xikombiso. Xikombiso xa tinyimpfu ni timbuti lexi fanisiweke hi ndlela leyi tolovelekeke xa tirha sweswi, hi nkarhi wa makumu ya mafambiselo lawa ya swilo, lama sunguleke eku heleni ka Minkarhi ya Vamatiko hi 1914. (Matewu 25:31-46) Siku ra Mugqivela, June 1, 1935, a ri ri ra nkoka loko ku tiwa eku twisiseni ka mfungho wa tinyimpfu ta xikombiso xa yena tanihi leti nga swirho swa ntshungu lowukulu. Esikwini rero, entsombanweni wa Timbhoni ta Yehova eWashington, D.C., vanhu va 840 va khuvuriwile hi ku kombisa ku tinyiketela ka vona eka Yehova Xikwembu ha Yesu Kriste. Vo tala va lava va teke goza leri hi ku hatla va hlamula nkulumo leyi a yi vulavula hi Nhlavutelo 7:9-17 leyi nyikeriweke hi J. F. Rutherford. A ku ri ku navela ka vona ku va xiphemu xa ntshungu lowukulu wa tinyimpfu tin’wana ta Murisi Lonene, va va ni nkarhi wo pona nhlomulo lowukulu lowu tshinelaka ni wa ku hanya ku ya fika emakun’wini ya mafambiselo lawa ivi va nghena eku Fumeni ka Gidi ra Malembe ka Hosi leyi nga Murisi, Yesu Kriste. Va kuma vutomi lebyi nga heriki emisaveni ya paradeyisi hi laha ku heleleke.—Matewu 25:46; Luka 23:43.
9. Ha yini tinyimpfu ti rhamberiwa ku dya ndzhaka ya ‘mfumo lowu lunghiseleriweke tona,’ naswona ti le xiyin’weni lexinene xo endla leswinene eka vamakwavo va Hosi hi ndlela yihi?
9 Ha yini vanhu lava va fanaka na tinyimpfu va rhamberiwa ku ‘dya ndzhaka ya mfumo lowu lunghiseleriweke vona ka ha ri mpfhuka misava yi tumbuluka’? Hosi yi va byela leswaku ku hikwalaho ka leswi va endleke leswinene eka ‘vamakwavo,’ vakwe naswona hi ku endla sweswo va va va swi endle eka yena. Hi rito leri nge ‘vamakwerhu,’ Hosi yi vula masalela ya vamakwavo va moya lava ha riki emisaveni emakun’wini lawa ya mafambiselo ya swilo. Loko va ve ntlhambi wun’we ni vamakwavo lava va Hosi leyi nga Murisi, Yesu Kriste, va ta hambeta va hlangana swinene hi laha swi kotekaka ha kona ni masalela yo tano naswona xisweswo va ta va exiyin’weni lexinene xo endla leswinene eka vona. Hambi ku ri etindleleni ta leswi vonakaka, a va ta pfuna vamakwavo va Yesu ku chumayela rungula ra Mfumo lowu simekiweke emisaveni hinkwayo makumu ma nga si fika. Hi ndlela leyi, tinyimpfu a ti ta tlangela lunghelo ra tona ro hambeta ti hlangana ni masalela tanihi ntlhambi wun’we wa Murisi un’we.
10. Swi vula yini eka tinyimpfu ku ‘dya ndzhaka ya mfumo leyi lunghiseleriweke tona misava yi nga si tumbuluka’?
10 Ku dya ndzhaka ya ‘mfumo leyi lunghiseleriweke tona’ a swi vuli swona leswaku tinyimpfu leti ti ta fuma na Yesu Kriste ni vamakwavo etilweni hi malembe ya gidi. Ku ri na sweswo, ku sukela eku sunguleni ka Gidi ra Malembe, tinyimpfu ti ta dya ndzhaka ya xivandla xa le misaveni ya Mfumo. Tanihi leswi va nga vatukulu va Adamu na Evha, xivandla lexi xa le misaveni lexi Mfumo wa Xikwembu ha Kriste wu nga ta xi lawula xi lunghiseleriwe vona “hi mpfuka misava yi tumbuluka” eka vanhu lava kutsulekaka. Ku ya emahlweni, tanihi leswi tinyimpfu ti vaka vana va laha misaveni va Hosi, leyi vaka ‘Tata wa vona la nga Heriki,’ va dya ndzhaka ya xivandla kumbe xiyimo xa laha misaveni, ehansi ka Mfumo wa Xikwembu.—Esaya 9:6, 7.
11. Tinyimpfu ti swi kombisisa ku yini leswaku ti yimela Mfumo, naswona hikwalaho ka leswi, i nkateko wihi lowu nga wa tona?
11 Ku hambana ni timbuti to fanekisela, vanhu lava fanaka tinyimpfu va kombisa leswaku va yimela Mfumo hi laha ku nga hoxisiki. Hi ndlela yihi ke? Hi mintirho, ku nga ri hi marito ntsena. Hikwalaho ka ku nga vonaki ka Hosi ematilweni, va nga ka va nga endli leswinene hi ku kongoma eka yena eku seketeleni ka Mfumo wa yena. Kutani va endla leswinene eka vamakwavo vakwe va moya lava ha riki emisaveni. Hambi loko leswi swi vangela rivengo, ku kanetiwa ni ku xanisiwa hi timbuti, hikwalaho ka ku endla leswinene ko tano, tinyimpfu ti byeriwa hi Hosi leswaku ti ‘katekisiwile hi Tata wa yona.’
12. Tinyimpfu leti ponaka ti ta va ni lunghelo ro tlhela ti amukela vamani, naswona emhakeni leyi, i mianakanyo yihi leyi swirho swa masalela swi yi tsakeleke?
12 Ntshungu lowukulu wa vapfuneti lava fanaka ni tinyimpfu eka vamakwavo va Hosi va moya wu ta katekisiwa hi lunghelo leri tsakisaka ro ponela eka Gidi ra Malembe. Hi ku famba ka nkarhi, va ta hlanganyela eku amukeleni ka vanhu lava feke lava nga emasirheni. (Yohane 5:28, 29; 11:23-25) Lava va ta katsa vapatriarka ni vaprofeta lavo tshembeka lava xanisekeke ni ku tiyisela swinene ku lweriwa ka vuhosi bya Yehova leswaku va ta ‘kuma ku pfuxiwa loku antswaka,’ kumbexana ko rhanga. (Vaheveru 11:35) Vavanuna ni vavasati vo tano lava pfuxiweke va ripfumelo, lava longoloxiwekenyana eka Vaheveru ndzima 11, va ta katsa Yohane Mukhuvuri. (Matewu 11:11) Van’wana va masalela lama totiweke va anakanye hi ku pona ni ku hanya leswaku va ta tlhela va amukela vanhu vo tano lava pfuxiweke lava tshembekaka lava feke emahlweni ka Pentekosta ya 33 C.E. Xana lava totiweke xisweswo va ta va ni lunghelo?
13. Ha yini a swi nga ta boha leswaku masalela ya va kona ku amukela ni ku khathalela lava va nga ta va va pfuxiwile emisaveni?
13 Leswi a swi nga bohi. Ntshungu lowukulu wa vaponi va nhlomulo wu ta va ekusuhi hi tinhlayo letikulu leswaku wu khathalela xiyimo ni ku toloveta vanhu lava pfuxiweke ni “misava leyintshwa” ehansi ka “matilo lamantshwa.” (2 Petro 3:13) Hambi ku ri sweswi, ntshungu lowukulu wa karhi wu hleleriwa leswi. Namuntlha, loko vamakwavo va moya va Yesu emisaveni va va ehansi ka 9 000 hi ku ya hi xiviko, vaponi exikarhi ka vona va ta va lavantsongo swinene leswaku va khathalela ntirho wo lunghiselela hinkwawo lowu yisaka eku pfuxiweni ka vanhu lava tolovelekeke. (Ezekiel 39:8-16) Manuku ke, laha hi laha ntshungu lowukulu, lowu hlayiwaka hi timiliyoni, wu nga ta tirha hi ndlela leyi humelelaka. Naswona lunghelo ro tano ri hlayiseriwe vona handle ko tilumaluma.
14. (a) Vo tala va ntshungu lowukulu va dyondzisiwa yini, naswona ha yini vo tala va vona sweswi va fanele va byarha vutihlamuleri? (b) I swiendlakalo swihi leswi faneleke ku humelela ku nga ri khale, naswona i ntirho wihi lowu yimeleke tinyimpfu tin’wana?
14 Vo tala va ntshungu lowukulu ana se va karhi va dyondzisiwa hi vutihlamuleri bya bandlha na hi swiyimiso swa miako leswi nhlengeletano ya Xikwembu yi swi kongomisaka emisaveni hinkwayo. Naswona swa khutaza ku vona vavanuna lava engetelekeke lava kuleke emoyeni va ntshungu lowukulu va averiwa ku byarha vutihlamuleri lebyikulu enhlengeletanweni leyi Yehova sweswi a yi tirhisaka emisaveni. Masalela ya lava totiweke ma kula hi malembe naswona a ma ha swi koti kahle ku rhwala ndzwalo lowu. Vamakwavo lava va Hosi va amukela mpfuno wa rirhandzu wa nhlengeletano lowu vakulu ni malandza ya vutirheli lava nga ni timfanelo ta moya va tinyimpfu tin’wana va kotaka ku wu nyika. Ku nga ri khale, Babilona lonkulu u ta susiwa exivonweni xa misava. Kutani hi laha Nhlavutelo 19:1-8 yi kombisaka ha kona, vukati bya Xinyimpfana ni mutekiwa wa xona wa lava 144 000 hinkwavo byi ta hetiseka ematilweni, naswona tinyimpfu tin’wana, leti tirhaka tanihi misava leyintshwa ehansi ka matilo lamantshwa, ti ta yimela Hosi eku yiseni emahlweni ka ntirho lowunene wo vuyetela ku kondza loko misava hinkwayo yi va paradeyisi leyi akeriweke ku dzunisa Xikwembu.—Esaya 65:17; ringanisa Esaya 61:4-6.
15. I mintshembo yihi leyi ntshungu lowukulu wu yi langutelaka hi mahlo-ngati eka Gidi ra Malembe?
15 Hi nkarhi wa ku Fuma ka Kriste ka Gidi ra Malembe, loko vanhu lava kutsuriweke eku feni va pfuxiwa, ntshungu lowukulu lowu ponaka wu ta tiphina hi malunghelo lamakulu ni lama xiximekaka. Manuku va ta va vana va xinuna ni va xisati va Hosi. Swi ta va leswi kotekaka eka vana vo tano lava nga exikarhi ka vona ku khoma xikhundla xa tihosana, tanihi leswi vana va Hosi Davhida a va ri tihosana leti nga ni vutihlamuleri byo hambana-hambana.a Leswi swi hi tsundzuxa hi Psalma 45, leyi nga ni nhlamuselo ya “hosi” ya Yehova leyi totiweke.
16. Kahle-kahle Psalma 45 yi kombetela eka vamani, naswona leswi swi nga kombisiwa njhani?
16 Psalma 45 kahle-kahle yi kombetela eka hosi yihi? Kunene, eka Yesu Kriste! Vaheveru 1:9 yi vula sweswo loko yi tshaha Psalma 45:7, leyi nge: “U rhandzile ku lulama, u vengile ku homboloka. Hikokwalaho Xikwembu, Xikwembu xa wena, xi ku cherile mafurha ya ntsako lowukulu ku tlula vanakuloni.” Kutani entiyisweni hi le ka Yesu Kriste la kwetsimisiweke laha Psalma 45:16 yi nge: “V̌ana v̌a wena v̌a ta ṭhama e maṭhaṅweni ya vatata wa wena; u ta v̌a v̌eka tihosana e misav̌eni hikwayo.”
17. Hosi, Yesu Kriste, u tsakela yini na vamani hi ku hlawuleka?
17 Handle ko hoxisa, Yesu u tsakela swinene vumundzuku bya yena tanihi Hosi leyi fumaka ku tlula nkarhi wa yena wa laha misaveni lowu hundzeke. Kavula, a nga wu rivali nkarhi wolowo lowu hundzeke naswona ngopfu-ngopfu vakokwa va yena va vanhu lava katsekeke exitshembisweni xa Yehova xo katekisa mindyangu hinkwayo hi ku tirhisa Rixaka ra Abrahama. Kambe sweswi ku tsakela ka yena lokukulu ku le ka vumundzuku lebyi nga kusuhi tanihi laha swi kunguhatiweke ha kona hi loyi a n’wi endleke Hosi, Yehova Xikwembu. Kutani vana va Yesu va laha misaveni, ngopfu-ngopfu vana va xinuna lava nga exikarhi ka vona lava fanelekaka ku tirha ehansi ka yena eswikhundleni swa vuhosana, va ta teka xivandla xa ntsako—ku tlula vakokwa va yena vo rhanga va laha misaveni.
18. Ku hundzuluxela kun’wana ka Psalma 45:16 ku ku kandziyisa njhani ku tsakela lokukulu ka Yesu vana va tihosana ku tlula vakokwa va yena va xinuna va laha misaveni?
18 Ku tsakela lokukulu ka Yesu vana va tihosana ku tlula vakokwana vo rhanga va xinuna ku kandziyisiwa hi ku hundzuluxela ko hambana-hambana ka Bibele. Hi leti tindlela tin’wana leti van’wana va hundzuluxelaka Psalma 45:16 ha tona. “Vana va wena vaxinuna va ta nghena exivandleni xa vatata wa wena, ivi va tlhandluka va ri tihosana e misaveni hikwayo.” (Moffatt) “Vana va wena va xinuna va ta teka swivandla swa vatata va wena; u ta va endla tihosana emisaveni hinkwayo.” (Ndzimana 17, The New American Bible) “Vana va velekeriwe wena ematshan’weni ya vatata wa wena: wena u ta va endla tihosana emisaveni hinkwayo.”—The Septuagint Version, leyi humesiweke hi Samuel Bagster and Sons.
19. Vavanuna van’wana va ntshungu lowukulu sweswi va ni vutihlamuleri byihi bya bandlha, naswona Hosi, Yesu Kriste, a nga va veka exiyin’weni xihi hi nkarhi wa ku Fuma ka yena ka Gidi ra Malembe?
19 Leswi hi tsakisaka swinene, tihosana ta nkarhi lowu taka ti le xikarhi ka hina. Ti kumiwa exikarhi ka tinyimpfu tin’wana leti yingisaka rito ra Murisi Lonene, Yesu Kriste. A ti ri karhi ti ri yingisa ngopfu-ngopfu ku sukela hi 1935, loko Nhlavutelo 7:9-17 yi hlamuseriwile entsombanweni wa Timbhoni ta Yehova eWashington, D.C. Namuntlha, magidi ya ntshungu lowu wukulu wa tinyimpfu tin’wana ma tirha tanihi vakulu, kumbe valanguteri, emabandlheni lama tlulaka 57 670 ya Timbhoni ta Yehova ematikweni ya 212 emisaveni hinkwayo. Hi ku tshama ma hlanganile na masalela ya vamakwavo va Yesu va moya lava ha riki emisaveni, vavanuna lava va faneleka ku amukeriwa hi laha ku taleke tanihi vana va xinuna va laha misaveni va Hosi, Yesu Kriste, hi nkarhi wa ku Fuma ka yena ka Gidi ra Malembe ehenhla ka misava leyintshwa leyi tshembisiweke. (2 Petro 3:13) Leswi va nga tano, va nga vekiwa tanihi tihosana ku tirha emisaveni leyintshwa.
20. (a) Hosi yi ta va ni langutelo rihi eka lava yi va vekeke emisaveni? (b) Ntshungu lowukulu wu ta tlhela wu amukela vamani, naswona i nkarhi wihi lowu vekiweke emahlweni ka lava va vuyaka?
20 Hosi, Yesu Kriste, u ta tsaka ku xiya tihosana leti ta ha ku vekiwaka, tanihi leswi sweswi a xiyaka vulanguteri bya tinyimpfu tin’wana leti tshembekaka emabandlheni ya namuntlha ya Timbhoni ta Yehova. Swirho hinkwaswo swa ntshungu lowukulu wa tinyimpfu tin’wana—vavasati kun’we ni vavanuna—swi ta va ni lunghelo leri nyanyulaka ro amukela hinkwavo lava va nga ta twa rito ra Yesu eku feni ivi va pfukela enkarhini wo kuma vutomi lebyi nga heriki eku hetisekeni ka vanhu emisaveni leyi basisiweke leyi nga ta hundzuriwa yi va paradeyisi ya misava hinkwayo. (Yohane 5:28, 29) Vanhu volavo lava rhandziwaka swinene lava pfuxiweke va ta katsa ni vakokwana va xinuna va Yesu Kriste lava kutsuriweke, vavanuna va ripfumelo lava a va tiyimisele ku kombisa ku chava ka vona Yehova Xikwembu hambi ku ri ku yisa eku feni hi ntshembo wo kuma ‘ku pfuxiwa loku antswaka.’ (Vaheveru 11:35) Kambe ku yisiwa evuton’wini lebyi hetisekeke bya vanhu hi nkarhi wa Mfumo wa Gidi ra Malembe wa Hosi ya vona leyi Kutsulaka, Yesu Kriste, i masungulo ntsena. Hi ku tshama va ri ni ku hlangana loku nga tshovekiki ehansi ka Yehova Xikwembu hi nkarhi wa ndzingo wo hetelela ehenhla ka vanhu lava hlengeletiweke eku heleni ka Gidi ra Malembe, va ta tikombisa va ri lava lulameriwaka hi ku faneriwa hi vutomi lebyi nga riki na makumu eParadeyisini tanihi xiphemu xa laha misaveni xa nhlengeletano ya Yehova ya vuako hinkwabyo.—Matewu 25:31-46; Nhlavutelo 20:1–21:1.
[Nhlamuselo ya le hansi]
a Ringanisa 2 Samuel 8:18, nhlamuselo ya New World Translation Reference Bible.
A Wu Ta Hlamurisa Ku Yini Ke?
◻ Yehova u veke nguva yihi ya nkarhi yo katekisa vanhu hinkwavo?
◻ Hi nga pona nhlomulo lowukulu hi ku tshama kun’we evuxakeni byihi?
◻ Swi vula yini eka tinyimpfu ku ‘dya ndzhaka ya mfumo lowu ti lunghiseleriweke wona misava yi nga si tumbuluxiwa’?
◻ Hi nkarhi wa Gidi ra Malembe, hi le ka malunghelo wahi lawa ntshungu lowukulu wu nga hlanganyelaka eka wona?