Nkambisiso Wa Mahungu

Nhlohlotelo Wa Sathana

Endzhaku ko endla vulavisisi ehenhleni ka nhlohlotelo wa Sathana eka vuyimbeleri bya rock lebyi tsakeriwaka swinene, mutsari wa tinyuziphepha wa Toronto, Tom Harpur, eka The Sunday Star wa tsala a ku: “Ndzi fanele ku kombisa lexi xi nga ha vaka xitsundzuxo xa matimba ehenhleni ka leswi swi humelelaka. . . . A ndzi si tshama ndzi vona nchumu wo hombolokisa xisweswo. Tinsimu ti tele hi mianakanyo ya rihuhu, rifuwo, mademona, ngati, ku sandza, vukari bya tinxaka hinkwato, ku katsa ni ku pfinya, ku tivavisa, ku dlaya ni ku tisunga. Rifu ni ku lovisiwa, vuprofeta bya ku onha, ku fularheriwa ka hinkwaswo leswi lulameke ni ku amukeriwa ka hinkwaswo leswi biheke ni ku homboloka—leti i tinhloko-mhaka.”

Leswi humelelaka xikan’we ni ku tlakuka ka vuyimbeleri bya vusathana i ku engeteleka ka ntirho wa mihivani ya vukhongeri wa vusathana eUnited States ni le Canada. Loko yi vika hi seminara ya sweswinyana ya maphorisa eOntario, The Globe and Mail, nyuziphepha ya Canada, yi vula leswaku mihivani ya vukhongeri ya vusathana ya “katseka eka magandzelo ya swiharhi, mintirho ya le masirheni yo pfanganisa ku kwetsima ni manyala ni ku khomiwa loko biha ka vana ka mihivani.” Phorisa James Bradley wa Washington, D.C., u hlanganise madzana ya milandzu ya ku khomiwa loko biha ka vana ni vugevenga bya mihivani bya Vusathana. Hi laha swi tshahiweke ha kona eka The Globe and Mail, phorisa Bradley u tlhandlekela leswaku hi malembe ya ntlhanu lama hundzeke, swiviko swa mihivani ya ku khomiwa loko biha ka vana swi hume eka “madzana ya vana, madzana ya vakondleteri ni vadyondzisi.”

Loko a kombetela “emasikwini ya makumu” ya mafambiselo ya namuntlha ya swilo lama hombolokeke, muapostola Yohane u tsarile a ku: “Diyavulosi ú xikele ka n’wina a karihile ngopfu, hi ku tiva leswaku nkarhi wa yena wu komile.” (2 Timotiya 3:1; Nhlavutelo 12:12) Nhlohlotelo wa Sathana, “ndhuna leyi fumaka mimoya ya le henhla empfhukeni,” wu hangalasa vuyimbeleri bya misava leyi lebyi tolovelekeke. (Vaefesa 2:2) Hi yo mhaka leyi muapostola Pawulo a tsundzuxeke Vakriste-kulobye ku ‘yima va tiyile va lwisana ni marhengu ya Diyavulosi.’—Vaefesa 6:11.

“A Ri Lawuleki”

Loko mutsutsumi wa xisati wa malembe ya 28 hi vukhale a biwile ni ku pfinyiwa eCentral Park ya Doroba-nkulu ra New York, timiliyoni ta vanhu a ti hlamarisiwile ni ku hela matimba. Xivangelo a ku ri xihi ke? Ku hlasela ka vuharhi ni ka tihanyi ku endliwile hi ntlawa wa vana va kondlo-a-ndzi-dyi lava “mianakanyo ya vona ya ntsako lowu hombolokeke endzhaku ka sweswo ni ku nga khathali ka vona hi ku xaniseka loku vangiweke hakunene swi chavisaka,” ku vika New York Post. Van’wana va vantshwa lava nga ni vutihlamuleri eka vugevenga lebyo biha swinene va vikiwe va ri lava nga ni malembe ya 14. Hi ku hlamarisiwa hi ku hlasela loku, mutsari un’wana wa Post u pfumerile leswaku misava yi ve “vandla leri nga layiwangiki, leri tianerisaka, leri godzomberiweke hi swidzidzirisi, leri nga ni mianakanyo ya rimbewu, leri nga ni mindyangu leyi hohlokeke, leyi nga ni rihuhu ra vukari” leri nga “lawulekiki naswona xivutiso hi lexi nge: ha yini ke?”

Kahle-kahle, rixaka leri ra vukari lebyi nga ringanisiwiki hi rona leri ri vhumbiweke hi muapostola Pawulo eka 2 Timotiya 3:1-5. Kwalaho u hlamusele leswaku ‘masiku ya makumu’ a ma ta funghiwa hi vanhu lava ‘nga ni vutianakanyi, makwanga, ku tikukumuxa ni ku tivona.’ Ku tlula kwalaho, “va ta va lava rhukanaka, lava nga yingisiki vatswari va vona, lava pfumalaka ku nkhensa, ni lava nga riki va vukhongeri; va ta va lava nga riki na musa, lava nga riki na tintswalo, valumbeti, lava nga ni vukari, ni lava nga ni mona; va ta venga leswinene; va ta va lava kanganyisaka, lava nga khathaliki, ni lava taleke hi ku tikukumuxa; va ta rhandza ntsako ematshan’wini ya Xikwembu.” (Today’s English Version) Xana misava leyi ya vukari yi ta tshama “yi nga lawuleki” hi laha ku nga heriki? E-e! Yesu u te: “Kutaku loko swilo sweswo swi sungula ku humelela, tsakani, mi yimisa tinhloko, hikuva ku kutsuriwa ka n’wina ku kusuhi.”—Luka 21:28.