Swivutiso Swa Vahlayi
◼ Xana Vakriste va lembe xidzana ro sungula a va pfumela leswaku ku hela ka mafambiselo ya swilo lama yo biha a ku ta fika exikarhi ka nkarhi wa ku hanya ka vona ke?
Valandzeri va Yesu eka lembe xidzana ro sungula a va hisekela swinene leswaku makumu ya fika. Hi laha hi nga ta swi vona ha kona, van’wana va vona va hetelele hi leswaku makumu ma tshinela hi xihatla. Langutelo ra vona ri lave ku lulamisiwa. Kambe a swi bihanga eka Vakriste, hi nkarhi wolowo kumbe sweswi, ku tshemba hi mbilu hinkwayo leswaku makumu lama vhumbiweke ma fanele ma tekiwa tanihi lama tshinelaka ni ku hanya siku na siku hi ku xalamuka koloko.
Eku hlamuleni ka xivutiso xa vadyondzisiwa va yena ehenhleni ka “xikombiso” xa vukona bya yena, Yesu u va tsundzuxe a ku: “Hitekani ke, hikuva a mi tivi siku leri Hosi ya n’wina yi nga ta ta ha rona.” (Matewu 24:3, 42) Ku xalamuka ko tano a ku fanele ku khumba mintirho ya vona, hikuva Kriste u engeterile a ku: “Tivoneleni leswaku timbilu ta n’wina ti nga tikeriwi hi makolo ni ku pyopya, ni ku vilela hi swa vutomi lebyi, ni leswaku siku rero ri nga mi tshuketi; . . . Hitekani ke, mi khongela minkarhi hinkwayo, leswaku mi kuma matimba ya ku pona eka swilo hinkwaswo leswi swi nga ta humelela, ni ku yima mi tiyile emahlweni ka N’wana-wa-Munhu.”—Luka 21:34-36.
Xiya leswaku Yesu u nyike xitsundzuxo lexi endzhaku ka loko a xaxamete swiendlakalo leswi a swi ta vumba “xikombiso.” Kutani vaapostola a va xalamukiseriwe entiyisweni wa leswaku swilo swin’wana a swi ta humelela hi tlhelo ra matimu emahlweni ka makumu. Kambe ke, mavhiki ma nga ri mangani endzhakunyana, va vutise Yesu la pfuxiweke va ku: “Hosi, xana u ta pfuxa mfumo wa Israyele enkarhini wolowo ke?” U hlamurile a ku: “A swi mi fanelanga ku tiva tinguva, hambi yi ri minkarhi leyi Tatana a nga tihlawulela yona hi vukulukumba bya yena.”—Mintirho 1:6, 7.
Hi nga swi vona eka leswi leswaku valandzeri va Yesu va le kusuhi a va hisekela leswaku makumu ya hatla ya fika lerova va honise leswi a ha ku va byela swona ehenhleni ka vumbhoni bya xiviri lebyi a byi ta humelela hi nkarhi wa ku va kona ka yena emahlweni ka makumu wolawo.
Hi kuma xikombiso xin’wana xa ku hiseka ka vona eka mapapila ya muapostola Pawulo yo ya eka Vakriste va le Tesalonika. Kwalomu ka 50 C.E. u tsarile a ku: “Loko ti ri ta minkarhi ni ta tinguva ta kona, vamakwerhu, a mi faneli ku tsaleriwa nchumu ha tona. Hikuva n’wina hi xiviri, ma swi tiva swinene leswaku Siku ra Hosi ri ta fika kukota khamba leri taka ni vusiku. Hikokwalaho ke, hi nga tshuki hi etlela kukota leswi van’wana va endlisaka swona, kambe a hi hanyanyeni, hi tikhoma.” (1 Vatesalonika 5:1, 2, 6) Van’wana va Vakriste volavo lava totiweke hi moya va teke swoleswo swi vula leswaku vukona bya Yesu (kun’we ni siku ra Yehova ra ku herisa lavo biha) a swi ta hi karhi wolowo, hi ku hatlisa.
Kambe a swi nga ri tano. Entiyisweni, Pawulo u va tsalerile epapileni ra vumbirhi a ku: “Loko ti ri ta ku ta ka Hosi ya hina Yesu Kriste, ni ta ku hlengeletana ka hina, hi ya eka yena, ha mi kombela hi matimba vamakwerhu: Mi nga hatlisi ku pfilunganisiwa emiehleketweni ya n’wina, ni ku tshukisiwa, hambi ku ri hi moya wun’wana, kumbe hi ku vulavula kun’wana, kumbe hi papila rin’wana leri ri nga vuriwaka leswaku ri huma eka hina, ku tiyisa leswaku siku ra Hosi sweswi ri fikile. Mi nga xisiwi hi munhu, ni switsanana, hikuva siku ra kona a ri nga ti, loko ku nga si ta ku gweneha lokukulu, ni loko ku nga si humeseriwa erivaleni Munhu wa ku homboloka.”—2 Vatesalonika 2:1-3.
Leswi a swi nga vuli leswaku va fanele va nga vileli hi vukona bya Yesu ni ku hela ka mafambiselo. Lembe rin’wana ni rin’wana loko ri hundza, xitsundzuxo xa Yesu xi ve lexi nga rivalekiki: “Hitekani ke, hikuva a mi tivi siku leri Hosi ya n’wina yi nga ta ta ha rona.”
Xisweswo, kwalomu ka malembe ya ntlhanu endzhaku ko tsala Vatesalonika va Vumbirhi, Pawulo u tsarile a ku: “Hi wona nkarhi wa n’wina wa ku pfuka evurhongweni; hikuva namuntlha, ku ponisiwa ku kusuhi ku tlula siku hi pfumeleke. Vusiku byi hundzile, dyambu ri lava ku huma. Hikokwalaho, a hi cukumeteni mintirho ya munyama, kutani hi hakarha matlhari ya ku vonakala.” (Varhoma 13:11, 12) Endzhaku ka malembe man’wana ya ntlhanu, Pawulo u tsundzuxe Vakriste va Vaheveru a ku: “Swa fanela leswaku mi tiyisela, leswaku mi ta kota ku endla ku rhandza ka Xikwembu, mi ta amukela leswi xi nga mi tshembisa swona. Hikuva, hi laha matsalwa ma vulaka ha kona, ‘ka ha sele nkarhinyana ntsena, kutani loyi a taka ú ta fika; a nga ka a nga hlweli.’” (Vaheveru 10:36, 37) Kutani eka ndzimana leyi landzelaka yo hetelela ya Nhlavutelo, muapostola Yohane u tsarile a ku: “Yena loyi a tivisaka ntiyiso wa swilo leswi u ri: ‘Hakunene ndza ta sweswi-sweswi.’ Amen, tana Hosi Yesu!”—Nhlavutelo 22:20.
Hi laha ku nga kanakanisiki, le ndzhaku hi nkarhi wolowo Mukriste a a nga vi la nga twisisiki loko a vona onge makumu a ma ta fika hi nkarhi wa ku hanya ka yena. Naswona loko o fa hi mhangu kumbe hi maendlelo ya ntumbuluko makumu ma nga si fika, a a ta va a hanye hi mianakanyo leyi tiyeke ya ku hatlisa loku Yesu ni Matsalwa lama huhuteriweke va swi kombiseke.
Leswi hinkwaswo swa tirha eka hina swinene, eka awara leyi yo hetelela leyi hi hanyaka eka yona. Loko hi kombetela eka marito ya Pawulo, hi nge kaneti leswaku ‘sweswi ku ponisiwa ka hina ku kusuhi ku tlula nkarhi lowu Vakriste vo sungula va veke vapfumeri ni ku tlula nkarhi lowu hina hi hexe hi veke vapfumeri ha wona. Vusiku byi hundzile, dyambu ri lava ku huma.’
Hi kote ku vona vumbhoni byo tala swinene bya le rivaleni eka matimu ya ku sukela eka Nyimpi yo Sungula ya Misava, vumbhoni lebyi kombetaka leswaku hi le ku heteleleni ka mafambiselo ya swilo. Ematshan’wini yo khomeka hi ku vhumba leswaku makumu ma ta humelela rini, hi fanele hi khomeka hi ku chumayela mahungu lamanene, loku nga ponisaka vutomi bya hina ni vutomi bya van’wana vo tala.—1 Timotiya 4:16.
Hi na swivangelo swo tala swo langutela leswaku ku chumayela loku ku ta hetiwa enkarhini wa hina. Xana leswi swi vula leswaku ku nga si fika n’hweti yintshwa, lembe rintshwa, kume ra malembe lerintshwa, lembe xidzana lerintshwa? A ku na munhu loyi a swi tivaka, hikuva Yesu u vule leswaku ‘hambi ku ri tintsumi ta le matilweni’ a ti nga swi tivi sweswo. (Matewu 24:36) Ku tlula kwalaho, a hi fanelanga hi lava ku tiva, loko hi ri karhi hi endla leswi Hosi yi hi lerisaka ku tshama hi ri karhi hi swi endla. Leswi swi nga swa nkoka ngopfu hi leswaku ku rhandza ni ntirho wa Xikwembu swi endliwa ni leswaku hi va ni ku hlanganyela loku taleke eka swona. Xisweswo hi nga “pona eka swilo hinkwaswo leswi nga ta humelela, ni ku yima [hi] tiyile emahlweni ka N’wana-wa-Munhu.”—Luka 21:36.