Ku Basa eMahanyelweni I Vumbhurhi Bya Vuntshwa

“Džaha, ṭakela v̌untŝha bya wena, . . . u famba hi ku ranḍa ka mbilu ya wena, ni ku languta ka mahlo ya wena; kambe tiv̌a leŝaku Šikwembu ši ta ku av̌anyisa e ka ŝeŝo hikwaŝo.”—EKLESIASTA 11:9, 10.

1, 2. (a) Xana Yehova u va navelela yini vantshwa? (b) Ha yini ku ri vuhunguki ku hlongorisa xin’wana ni xin’wana lexi naveriwaka hi mbilu ni mahlo ya wena ke?

“VUNTSHWA, migingiriko ni vuhlangi swi fana ni masiku ya ximun’wana. Ematshan’wini yo vilela . . . hi ku koma ka wona, ringeta ku ma tsakela.” Ku tsale muphati wa Mujarimani wa lembe xidzana ra vu-19. Marito lawa ya xitsundzuxo eka lavantshwa ma phindha lama tsariweke magidi ya malembe emahlweni ebukwini ya Bibele ya Eklesiasta lama nge: “Džaha [kumbe, nhwana], ṭakela v̌untŝha bya wena, mbilu ya wena yi ku ṭakisa hi masiku ya v̌untŝha bya wena, u famba hi ku ranḍa ka mbilu ya wena, ni ku languta ka mahlo ya wena.” (Eklesiasta 11:9) Xisweswo Yehova Xikwembu a nga ali xin’wana ni xin’wana lexi tsakisaka eka vantshwa. U lava leswaku mi tiphina hi xitalo hi matimba ni ntamu wa vuntshwa bya n’wina.—Swivuriso 20:29.

² Kambe, xana leswi swi vula leswaku u nga hlongorisa xihi na xihi lexi naveriwaka hi mbilu ni mahlo ya wena ke? Doo! (Tinhlayo 15:39; 1 Yohane 2:16) Tsalwa ri ya emahlweni ri ku: “Kambe tiv̌a leŝaku Šikwembu ši ta ku av̌anyisa e ka ŝeŝo hikwaŝo [swilo leswi u swi hlawulaka ku anerisa ku navela ka wena].” (Eklesiasta 11:10) Ina, a wu nge yi balekeli mimbuyelo ya swiendlo swa wena; vantshwa, ku fana ni lavakulu, va le hansi ka ku avanyisa ka Yehova.—Varhoma 14:12.

3, 4. (a) Ha yini u hlayisa mpimanyeto lowu tlakukeke wa ku basa emahanyelweni? (b) I nsusumeto wihi lowu nga kona eka wena leswaku u lahlekeriwa hi xiyimo xa wena lexi baseke eka Xikwembu naswona i swivutiso swihi leswi tlakusiwaka?

³ Ku amukela ku avanyisa lokunene ka Xikwembu a ku yisi eka vutomi lebyi nga heriki ntsena kambe eka vuxaka lebyikulu na Xikwembu sweswi. Hambi swi ri tano, u fanele u hlayisa mpimanyeto lowu tlakukeke wa ku basa emahanyelweni. Psalma 24, ndzimana 3 ku ya eka 5, yi swi veka hi ndlela leyi: “I mani l’a nga ta tlhandlukela e nṭhav̌eni ya Yehova? Kambe i mani l’a nga ta ṭhama evukwetsimelweni bya yena? Hi loyi a nga ni ŝandla le’ŝi nga riki na nanḍu, ni mbilu leyi tengeke. Loyi a nga nyiketiki moya wa yena e ku hembela v̌unwa, l’a nga hlambanyiki hi ku šisa. O ta v̌ona ku kateka ka Yehova, ni ku lulama ka Šikwembu ša ku hlayiseka ka yena.” Ina, mi sasekile emahlweni ya Yehova loko mi hlayisa ku basa emahanyelweni.

⁴ Kambe, ku ni nsusumeto lowu hambetaka eka n’wina leswaku mi lahlekeriwa hi xiyimo xa n’wina lexi baseke eka Xikwembu. Loko masiku lawa ya makumu ma ya eku heleni ka wona, ku ni ntungu wa mikhuva yo biha ni minkucetelo ya thyaka. (2 Timotiya 3:1-5) Mphikamakaneta yo hlayisa ku basa emahanyelweni a yi si tshama yi kurisa xileswi eka vantshwa. Xana u hlangavetana ni mphikamakaneta leyi hi laha ku humelelaka ke? Xana u ta hambeta u endla tano?

Mphikamakaneta Leyi U Kongomaneke Na Yona

5. I minkucetelo yihi ya thyaka leyi endlaka swi nonon’hwa ku hlayisa xiyimo lexi baseke emahlweni ka Xikwembu?

⁵ Swilo swo tihungasa swi hlasela vantshwa hi swilo leswi susumetelaka leswi nga swinene etlhelo ivi swi dzunisa leswi swi thyakeke swinene. Hi xikombiso, loko ku humesiwe yin’wana ya minxaxamelo ya tibayiskopo ta vukari lebyi chavisaka, muxopaxopi un’wana wa tibayiskopo u tsarile: “Ku tlhandlamana ka vuxaka bya rimbewu loku chavisaka, ku dlaya loku chavisaka ni swilo leswi nyenyetsaka hi xitalo i ndzhendzeleko wa bayiskopo leyi. Loko yi pimanisiwa ni leti vahlaleri va tshameke va ti vona, yi ta va mfungho wun’wana lowukulu wa ku ehla ka mpimanyeto wa . . . leswi languteriweke eka tibayiskopo.” Leswi katsiweke eka tibayiskopo to tano i tinsimu leti nga ni marito lama boxaka ta rimbewu ni minongonoko ya thelevhixini leyi dzunisaka vuxaka bya rimbewu lebyi nga riki enawini. Xana u nga tipaluxa eka minkombiso yo tano ya tibayiskopo ya “[vusopfa] lebyi bya ku tlurisa mpimo” ivi u hlayisa xiyimo xa wena xa ku basa emahlweni ka Xikwembu ke? (1 Petro 4:4) Hi laha Swivuriso yi vulaka ha kona: “Šana munhu a nga okela makala e šifuv̌eni, tinguv̌u ta yena ti nga tŝhi-ke?”—Swivuriso 6:27.

6. I ntshikilelo wihi lowu vantshwa va kongomanaka na wona wo huma eka tintangha ta vona?

⁶ Nsusumeto eka wena leswaku u lahlekeriwa hi xiyimo lexi baseke eka Xikwembu nakambe wu huma eka xihlovo xin’wana—tintangha ta wena. Wanhwana wa malembe ya 17 hi vukhale u te: “Ndzi ve ni vuxaka bya rimbewu ro sungula hikwalaho ka swivangelo leswi hoxeke: hi mhaka ya leswi xigangu xa mina xi sindziseke naswona hi mhaka ya leswi ndzi anakanyeke leswaku un’wana ni un’wana a a swi endla.” A nga kona la lavaka ku hlekiwa. I swa ntumbuluko ku lava ku rhandziwa hi van’wana. Kambe loko u yimela mahanyelo lamanene ya Bibele, vantshwa van’wana va nga ha ku hlekula. Ku navela ku faneleka, ku amukeriwa hi tintangha ta wena, ku nga ku susumetela leswaku u endla xin’wana lexi u xi tivaka leswaku xi hoxile.—Swivuriso 13:20.

7. Ha yini ku lwisana ni minkucetelo ya thyaka swi nonon’hwa ngopfu-ngopfu eka vantshwa, kambe i yini leswi magidi ya vantshwa enhlengeletanweni ya Yehova ma tikombiseke ma ri swona?

⁷ Ku lwisana ni minkucetelo leyi swa nonon’hwa ngopfu-ngopfu hi nkarhi wa ‘ku baleka ka vuntshwa,’ loko ku navela ka rimbewu ku ri kukulu. (1 Vakorinto 7:36) A swi hlamarisi loko nhlengeletano yin’wana ya vulavisisi yi hetelele hi ku: “I muntshwa la hlawulekeke loyi a nga vangiki ni vuxaka bya rimbewu emahlweni ka vukati eka malembe ya 19.” Kambe, magidi ya n’wina vantshwa enhlengeletanweni ya Yehova mi tikombise mi hlawulekile. Mi kongomana ni mphikamakaneta leyi kahle naswona mi hlayisa ku basa emahanyelweni.

8. Ha yini vantshwa van’wana va Vukriste va pfumelele malangutelo ya thyaka ya misava ma va khumba naswona ku va ni vuyelo byihi?

⁸ Hambi swi ri tano, leswi twisaka ku vava vantshwa vo tala va Vakriste va pfumelele swiyimo swa misava swa mahanyelo yo biha leswaku swi va namarhela. Hambi loko va nga tivula lava rhandzaka leswinene, a va swi vengi swilo leswo biha; kumbe, a va swi vengi ngopfu. (Psalma 97:10) Etimhakeni tin’wana, va tikomba va swi rhandza. Hi laha Psalma 52:3 yi swi vekaka ha kona: “U ranḍa le’ŝo biha e ku tlula le’ŝinene, ni mav̌unwa e ku tlula rito le’ro lulama.” Van’wana va ala hi laha ku kongomeke hambi ku ri nkongomiso wa nhlengeletano ya Yehova etimhakeni to tanihi ku gangisana, ku tirivatisa ni mahanyelo. Hikwalaho, hakanyingi va tisa nhlomulo eka vona ni le ka vatswari va vona. Nakambe va lahlekeriwa hi ku saseka ka vona emahlweni ya Xikwembu.—2 Petro 2:21, 22.

Mpfuno Eku Hlangavetaneni Ni Mphikamakaneta Leyi

9. I yini lexi lavekaka ku langutana ni mphikamakaneta yo tshama u basile emahanyelweni?

⁹ Xana u nga langutana njhani ni mphikamakaneta ya ku tshama u basile emahanyelweni ke? Mupisalema u vutise xivutiso lexi fanaka a ku: “E džaha ri ta tengisa ku yini ku famba ka yena šana?” Kutani a nyika nhlamulo a ku: “Hi loko a ku šašameta ni rito ra wena.” (Psalma 119:9) Ina, wa wu lava nkongomiso wo huma eRitweni ra Xikwembu. Naswona Tatana wa le tilweni u endle leswaku nhlengeletano yakwe yi lunghiselela nkongomiso wo tano ku ku pfuna ku lwisana ni mintshikilelo ya thyaka ya misava leyi.

10, 11. (a) I tibuku tihi leti lunghiseleriweke ku pfuna vantshwa ku tshama va basile emahanyelweni? (b) Vantshwa van’wana va pfunisiwe ku yini hi minxaxamelo ya “Young People Ask . . . ”? (c) Wena hi wexe u pfunekise ku yini eka minxaxamelo ya “Young People Ask . . . ”?

¹⁰ Hi malembe layo tala tibuku to tala ti lunghiseleriwile ngopfu-ngopfu ku ri ni vantshwa emianakanyweni, to tanihi buku leyi nge Your Youth—Getting the Best out of It. Ku sukela hi 1982, nxaxamelo wa “Young People Ask . . . ” eka magazini wa Awake! wu nyikele xitsundzuxo lexi pfunaka swinene etimhakeni to tanihi swifaniso leswi nga ambalangiki, tibuku ta rirhandzu ni ku tikhoma lokunene hi nkarhi wa ku gangisana. Xana marungula yo tano ya va pfunile vantshwa hakunene ke? Xiya xikombiso. Tinhloko-mhaka to hambana-hambana eka nxaxamelo lowu ti hlamusele mukhuva wa ku tlangisa swirho swa mbeleko, ti kombisa leswaku mukhuva lowu wu pfuxa ‘ku navela ka rimbewu’ naswona hi ku olova wu nga vangela munhu ku wela evunghwavaveni.a (Vakolosa 3:5) Swiringanyeto leswi pfunaka swi nyikeriwile mayelana ni ndlela yo lwisana ni mukhuva lowu ni ndlela yo langutana ni ku tsandzeka ha yona. Loko va hlamula malunghana ni swihloko leswi, vantshwa van’wana va tsarile: “A ndzi ri ni xiphiqo xa ku tlangisa swirho swa mbeleko ku sukela loko ndzi ri ni malembe ya 12 hi vukhale. Sweswi ndzi ni malembe ya 18 naswona ndza antswa hakantsongo-ntsongo, ndzi nkhensa swihloko swa n’wina.” “Leswi ndzi yingiseke switsundzuxo leswi swihloko swi swi nyikeleke, ndzi tikuma ndzi ri eka xiyimo lexi antswaka xa mianakanyo. Ndzi titwa ndzi basile ku tlula nkarhi lowu hundzeke.”

¹¹ Swi lava nkarhi ku hlaya ni ku dyondza rungula ro tano, kambe ku endla tano swi ta ku pfuna ku tshama u basile emahanyelweni. Xana u yi tirhisa hi laha ku taleke mhaka yoleyo leyi kandziyisiweke? Mayelana ni xihloko lexi nge “Vuxaka Bya Rimbewu eMahlweni Ka Vukati—Ha yini Byi Nga Fanelanga?”b eka “Young People Ask . . . ” nhwanyana un’wana, xichudeni xa Bibele hi nkarhi wolowo, u tsarile a ku: “Ndza yi tiva mintlhaveko yo vava, ya ku tivona nandzu ni ya mavondzo leyi vaka kona endzhaku ka vuxaka bya rimbewu ra le mahlweni ka vukati naswona ndza tisola swinene. Siku rin’wana ni rin’wana ndzi nkhensa Yehova hi ku amukela ka yena ni ku rivalela ka yena. Ndza tshemba leswaku xihloko xa n’wina xi ta pfuna van’wana va nga si endla hi laha ndzi endleke ha kona. Swa vavisa hakunene. Sweswi ndza yi twisisa mhaka leyi ha yona Yehova Xikwembu a lavaka leswaku hi ‘tshika vuoswi.’”—1 Vatesalonika 4:3.

12. I yini lexi nga ta hi susumetela ku lava ku tsakisa Yehova ke?

¹² Leswi swi hi tisa eka xin’wana lexi nga ta ku pfuna ku langutana ni mphikamakaneta leyi hi ndlela leyi humelelaka: U fanele u twisisa leswaku Yehova i Hosi Leyikulu ya Vuako Hinkwabyo naswona u fanele ku yingisiwa. (Nhlavutelo 4:11) Hambi swi ri tano, hi nkarhi lowu fanaka i Tatana wa le matilweni la nga ni rirhandzu naswona u hi navelela leswinene. (Swivuriso 2:20-22; Esaya 48:17) Milawu ya yena i ya ku hi sirhelela, hayi ku hi tshikilela. Xisweswo ku yi yingisa i vutlhari. (Deuteronoma 12:5, 6) Ku twisisa kahle mhaka leyi ha yona Yehova a kandziyisaka ku basa emahanyelweni swi ta ku pfuna ku vona vuxongi bya xiviri eka swona ivi swi ku susumetela ku lava ku n’wi tsakisa.—Psalma 112:1.

13. Xana u nga swi hlamusela njhani leswaku nawu wa Yehova lowu yirisaka vuoswi wu ni ku hi navelela leswinene ke?

¹³ Xiya yinhla ya leswaku Xikwembu xi hikele vuxaka bya rimbewu evukatini naswona xi yirisa vuoswi hi ku helela. (Vaheveru 13:4) Xana ku yingisa nawu lowu ku ku tsona swo karhi leswinene ke? Xana Tatana wa le tilweni wa rirhandzu a nga endla nawu leswaku a ku tsona ku tiphina hi vutomi ke? Doo! Languta leswi humelelaka evuton’wini bya tintangha ta wena leti honisaka milawu ya Xikwembu ya mahanyelo. Tinyimba leti nga laviwiki hakanyingi ti va susumetela ku susa makhwiri kumbe, minkarhi yin’wana, ku nghenela vukati va ha ri swihlangi. Eminkarhini yo tala swi vula ku kurisa n’wana u ri hava nuna. Ku tlula kwalaho, vantshwa lava oswaka va ‘dyohela mimiri ya vona vini’ naswona va tipaluxa eka vuvabyi lebyi tluletiwaka hi rimbewu. (1 Vakorinto 6:18) Naswona loko muntshwa loyi a tinyiketeleke eka Yehova a oswa, mimbuyelo ya mintlhaveko yi nga va ni khombo. Ku ringeta ku tumbeta ku biwa hi ripfalo ra ku tivona nandzu ku nga vanga ku tsana ni vusiku bya nkelunkelu. (Psalma 32:3, 4; 51:3) Kutani ke, xana a swi le rivaleni leswaku nawu wa Yehova wo sivela ku oswa wu endleriwe ku ku sirhelela ke? Ku ni mpfuno wa xiviri eku hlayiseni ka mahanyelo lama tengeke!

14. Mayelana ni ku vula leswaku ku nghenela vukati eka malembe ya kondlo-a-ndzi-dyi i nsirhelelo, hlamusela ndlela leyi hi faneleke ku teka marito ya Pawulo eka 1 Vakorinto 7:9 na 7:36 ha yona.

¹⁴ Kavula, a swi olovi ku namarhela milawu leyi tiyeke ya Xikwembu ehenhleni ka mahanyelo. Hikwalaho ka leswi, vantshwa van’wana va hetelele hi ku vula leswaku nsirhelelo wo antswa i ku nghenela vukati loko va ha ri emalembeni ya vona ya kondlo-a-ndzi-dyi. Va vula leswaku, ‘xana 1 Vakorinto 7:9 a yi vuli leswaku: “Kambe loko va tsandzeka ku tikhoma, a va teke kumbe ku tekiwa, hikuva swa antswa ku teka kumbe ku tekiwa, ku tlula ku hisiwa hi ku navela”?’ Kambe, langutelo ro tano a hi ra vutlhari. Marito ya Pawulo a ma kongomisiwanga eka vana va kondlo-a-ndzi-dyi kambe eka lava va ‘hundzeke ku baleka ka vuntshwa.’ (1 Vakorinto 7:36) Hakanyingi lava nga eku balekeni ka vuntshwa a va si kula emintlhavekweni ni le moyeni lerova va nga langutana ni mintshikilelo ni vutihlamuleri lebyi nga kona evukatini. Journal of Marriage and the Family yi vika leswaku: “Vanhu lava hatliselaka ku nghenela vukati va tokota ku aneriseka loku nga nyawuriki evukatini hikuva va pfumala malunghiselelo ya ku hetisisa xiphemu xa vukati. Ku hetisisa xiphemu hi ndlela leyi tsaneke ku hunguta ku aneriseka, leswi swi vangaka ku tsekatseka ka vukati.” Kutani nhlamulo yi ri, a hi ku nghenela vukati wa ha ri ntsongo, kambe i ku hlayisa ku titshamela wexe loku tengeke ku kondza u va ni timfanelo hinkwato leti lavekaka ku endla vukati lebyi humelelaka.

Tihlayise U Basile!

15. I mimpimanyeto yihi leyi tiyeke leyi lavekaka loko u ta tshama u basile emahanyelweni?

¹⁵ Muapostola Pawulo u tsarile a ku: “Loko swi ri tano, dlayani leswi swi nga swa misava eka n’wina, hi leswaku vuoswi, ni swa thyaka, ni ku hisekela [rimbewu].” (Vakolosa 3:5) Ina, mimpimanyeto leyikulu ya laveka; u fanele u tiyimisela ku tshama u basile emahanyelweni. Loko yi hlamusela riendli leri hundzuluxeriweke ku “dlayani,” The Expositor’s Bible Commentary yi ri: “Ri ringanyeta leswaku a hi nge fihli kumbe ku lawula swiendlo ni malangutelo ya hina yo biha ntsena. Hi fanele hi swi susa, hi herisa ndlela ya khale ya vutomi hi ku helela. ‘Ku tsema hi ku helela’ ku nga phofula matimba ya rona. . . . Nhlamuselo ya riendli ni matimba ya rona swi ringanyeta xiendlo xa matimba, lexi vavaka xa ku tiyimisela ka munhu hi xiyexe.”—Ringanisa Matewu 5:27-30.

16. Ku tshama u basile emahanyelweni, ha yini u fanele ku tirha hi matimba ku tihlayisa u basile emianakanyweni naswona u nga humelerisa ku yini ku endla tano?

¹⁶ Kambe, xana u nga swi kotisa ku yini ku ‘tsema’ kumbe ‘ku herisa’ swiendlo ni malangutelo lama nga basangiki ya mahanyelo hi ku helela ke? Yesu u kombise rimitsu ra xiphiqo loko a te: “Hikuva endzeni, etimbilwini ta vanhu, hi kona ku humaka miehleketo leyo biha, . . . vuoswi, . . . [vumbhisa], ni mavondzo.” (Marka 7:21, 22) Mbilu yo fanekisela yi katsa vuswikoti byo anakanya, hi yona mhaka leyi yi yelanisiwaka ni “miehleketo.” Kutani ke, leswaku u tshama u basile, u fanele u lwela ku tihlayisa u basile emianakanyweni. Njhani? Tanihi leswi mianakanyo yi wundliwaka hi switwi, u fanele ku tivonela eka leswi u swi langutaka hi mahlo ya wena, u papalata tibuku, minongonoko ya TV kumbe tibayiskopo leti kombisaka kumbe ti khutazaka vunghwavava. Nakambe, u fanele u tivonela eka leswi u swi yingisaka hi tindleve ta wena, u papalata tinsimu leti tameleke marito lama hlamuselaka rimbewu. Swi lava xivindzi leswaku u teka xiyimo xo tano, ngopfu-ngopfu emahlweni ka tintangha ta wena, kambe ku endla tano swi ta ku pfuna ku tshama u basile emahanyelweni naswona u hlayisa ku tixixima.

17. Ha yini mahanyelo lama thyakeke ma nga fanelanga ku vuriwa exikarhi ka n’wina?

¹⁷ Muapostola Pawulo nakambe u tsundzuxile a ku: “Mi vahlawuriwa va Xikwembu, kutani vuoswi, ni thyaka hinkwaro, ni makwanga, a swi laveki, ni ku kumbuka swi nga kumbukiwi exikarhi ka n’wina.” (Vaefesa 5:3; nakambe vona ndzimana 12.) Kutani mahanyelo lama thyakeke a ma fanelanga ku kumbukiwa, hi leswaku, ku anakanya ha wona kumbe ma tirhisiwa tanihi bulo ro hlekisa ha rona. Ha yini? Hi laha mudyondzi wa Bibele William Barclay a swi vekeke ha kona: “Ku vulavula hi xilo, ku hlekisa ha xona, ku bula ha xona minkarhi hinkwayo i ku xi nghenisa emianakanyweni, ni ku tshineta ku xi endla hi xiviri.” (Yakobo 1:14, 15) Swi lava ku tiyimisela ka xiviri ku ‘vehela tomu tanihi xisirhelelo enonweni wa wena,’ ngopfu-ngopfu loko vantshwa van’wana va vula nhlamba kumbe va tirhisa ririmi leri thyakeke ku hlamusela maendlelo ya rimbewu. (Psalma 39:1) Kambe hi ku tshama u lulamile naswona u basile, u ta tsakisa mbilu ya Yehova.—Psalma 11:7; 27:11.

18. (a) Ku wina nyimpi yo lwisana ni mahanyelo lama thyakeke, ha yini swi nga anelanga ku ala mianakanyo ni ku vulavula loku thyakeke? (b) U nga pfunekisa ku yini eka xitsundzuxo xa Pawulo eka Vafilipiya?

¹⁸ Ku wina nyimpi yo lwisana ni mahanyelo lama thyakeke, a swi anelanga ku ala mianakanyo ni ku vulavula loku thyakeke. Xivuriso xa Xichayina xi ri: “Mianakanyo leyi nga riki na nchumu yi amukela swiringanyeto hinkwaswo.” (Ringanisa Matewu 12:43-45.) Pawulo u xiye xilaveko xo tata miehleketo hi mianakanyo leyi tengeke, leyi baseke. Hikwalaho, u khutaze Vafilipiya a ku: “Hinkwaswo leswi nga ntiyiso, hinkwaswo leswi chavisekaka, hinkwaswo leswi lulameke, hinkwaswo leswi tengeke, hinkwaswo leswi tsakisaka, hinkwaswo leswi nkhensekaka, ni loko ku ri swin’wana leswi nga ni vunene kumbe ku dzuneka, swilo leswi hinkwaswo, tshamani mi ri karhi mi swi anakanya [‘swi endleni mhaka yo anakanyisisiwa hi vukheta’c].”—Vafilipiya 4:8.

19. Ha yini u dyondza Rito ra Xikwembu hi ku chivirika naswona leswi swi ta ku pfunisa ku yini leswaku u tshama u basile emahanyelweni?

¹⁹ Leswi swi vula ku dyondza Rito ra Xikwembu hi ku chivirika. (Yoxuwa 1:8; Psalma 1:2) Swi ta tiyisa mianakanyo ni mbilu ya wena naswona swi ta ku pfuna ku aka vuxaka lebyikulu bya munhu hi xiyexe na Yehova. Xisweswo u ta va eka xiyimo xo antswa swinene ku lwisana ni miringo yo nghenela ku tikhoma loku thyakeke. Entiyisweni a wu nge ringeti ku tisa xisandzu evitweni ra Yehova ni tingana endyangwini wa ka n’wina ni le bandlheni. Ematshan’wini ya sweswo, u ta tirhisa matimba ni migingiriko ya vuntshwa bya wena hi ndlela leyi u nga ta ka u nga tisoli endzhaku. Ina, u ta landzelela ndlela ya ku basa emahanyelweni, hakunene i vumbhurhi bya vantshwa lava va kumiwaka va tirhela Yehova!—Swivuriso 3:1-4.

[Tinhlamuselo ta le hansi]

Vantshwa—A Mi Ta Hlamurisa Ku Yini?

◻ Ha yini u fanele ku hlayisa mpimanyeto lowu tlakukeke wa ku basa emahanyelweni?

◻ I minsusumeto yihi leyi endlaka swi tika ku hlayisa xiyimo lexi baseke eka Xikwembu?

◻ I yini lexi nga ku pfunaka ku langutana ni mphikamakaneta yo tshama u basile emahanyelweni?

◻ Hi yihi mimpimanyeto leyi tiyeke leyi lavekaka loko u ta tihlayisa u basile?

[Xifaniso lexi nga eka tluka 13]

Vo tala lava va ha riki eku balekeni ka vuntshwa i vantsongo swinene ku khathalela vutihlamuleri bya vutswari