‘Hi Nxaxamelo Wa Ku Hlula’

NXAXAMELO wa ku hlula a ku ri nkhuvo lowukulu wa ku hlula nala. Kun’wana ka ku dzuneka lokukulu swinene loku Huvo ya Rhoma yi ku nyikeke jenerala loyi a hluleke a ku ri ku yi pfumelela yi tlangela ku hlula ka yona hi nxaxamelo wo tano wa ximfumo, wa nxavo wa le henhla. Muapostola Pawulo u boxe nxaxamelo wa ku hlula kambirhi eka matsalwa ya yena. Hambi swi ri tano, hi nga si xiya marito ya yena ringeta ku vona nxaxamelo wo tano hi mahlo ya mianakanyo. Anakanya mintshungu yi longoloka eswitarateni, loko yi famba hi ku nonoka hi le Via Triumphalis, kutani yi tlhandlukela exintshabyanini lexi rhendzelekaka yi ya etempeleni ya Jupiter ehenhla ka Capitoline Hill ya Rhoma.

“Swinun’hwerisi leswi nun’hwelaka leswi humaka eka swinandzihisi leswi pfurhaka a swi hangalasiwa hi xitalo etitempeleni ni le switarateni, swi tata moya hi ku nun’hwela ka swona,” ku tsale mudyondzi James M. Freeman. “Enxaxamelweni a ku ri ni huvo ni vaaka-tiko lavakulu va tiko, lava xisweswo hi vukona bya vona va dzuniseke muhluri. Swiphangiwa leswi fuweke ngopfu swa nyimpi, tanihi nsuku, silivhere, matlhari ya tinxaka hinkwato, leswi tolovelekeke, mintirho ya vutshila leyi nga tolovelekangiki ni leyi durhaka, ni xin’wana ni xin’wana lexi a xi tekiwa xi ri xa nkoka swinene hi muhluri kumbe vahluriwa, a swi rhwariwa erivaleni ra doroba leri teleke. Vakhotsiwa va nyimpi na vona a va sindzisiwa ku macha enxaxamelweni. Jenerala loyi ku tivisiweke hi ku fundziwa ka yena, a a khandziya kalichi leyi a yi ri ya xivumbeko xo hlawuleka ni leyi a yi kokiwa hi tihanci ta mune. Nguvu ya yena a yi khavisiwe hi nsuku, naswona baji ra yena ri khavisiwe hi swiluva. Evokweni ra yena ra xinene a ku ri rhavi ra murhi, naswona eka ximatsi xa yena a ku ri ni nhonga ya vuhosi; kasi emombyeni wa yena a ku ri ni xirhendzevutana xa murhi wa Delphi. Exikarhi ka minkulungwane ya masocha ni ku phokotela ka vanhu, muhluri a a rhwariwa eswitarateni a yisiwa etempeleni ya Jupiter, laha magandzelo a ma nyikeriwa kona, laha endzhaku ka swona a ku va ni nkhuvo wa vanhu etempeleni.”

Pawulo u tirhise nxaxamelo wa ku hlula hi ku fanekisela loko a tsala papila ra yena ra vumbirhi leri yaka eka Vakriste va le Korinto hi lembe ra 55 ra Nguva ya hina leyi Tolovelekeke. U te: “A ku khensiwe Xikwembu lexi eka Kriste xi hi yisaka [enxaxamelweni wa ku hlula], minkarhi hinkwayo; kutani hi ku tirhisa hina, xi hangalasa hinkwako ku nun’hwela loku nandzihaka ka ku tiva Kriste. Hikuva hi hina hi nga ku nun’hwela loku nandzihaka ka Kriste hi byakwe, loku hangalakaka hi vito ra Xikwembu exikarhi ka lava ponisiwaka ni ka lava lovaka; eka lava lovaka i risema ra rifu; kambe eka lava ponisiwaka, i ku nun’hwela ka vutomi.”—2 Vakorinto 2:14-16.

Laha Pawulo ni Vakriste van’wana lava totiweke va yimeriwa tanihi malandza lama tinyiketeleke ya Xikwembu, “eka Kriste.” Va hlamuseriwa tanihi vana va majaha, vafambisi ni masocha lama landzelaka ntila wa Yehova kutani va rhangeriwa hi yena enxaxamelweni wa ku hlula hi ndlela leyi nun’hwerisiweke. (Vona Xihondzo xo Rindza, July 15, 1990, matluka 10-15.) Ku tirhisiwa loku ko fanekisela ka nxaxamelo wo tano nakambe ku kombisa leswaku lava va alaka mahungu lamanene ya Mfumo wa Xikwembu va langutele rifu. Kambe vona ndlela leyi swi hambaneke ha yona eka valandzeri lava totiweke va Yesu! Va ni ntshembo wa ku poniseriwa evuton’wini bya le tilweni bya ku nga fi na Kriste. Naswona ku vuriwa yini hi vanghana va vona vo tshembeka, lava na vona va tinyiketeleke eka Xikwembu? Va ni ntshembo lowu tsakisaka wa vutomi eparadeyisini ya la misaveni, laha Xikwembu “xi [nga] ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” (Nhlavutelo 21:1-4; Luka 23:43, NW) Xana u xiphemu xa ntshungu lowu wu tsakeke?

Xikombiso lexi hambaneke xa nyikeriwa eka Vakolosa 2:15 (NW), laha Pawulo a tsaleke a ku: “Loko xi paluxe tihulumendhe ni valawuri, [Xikwembu] xi va kombisa erivaleni tanihi lava va hluriweke, xi va kongomisa enxaxamelweni wa ku hlula hi ku tirhisa yona.” Laha tihulumendhe ni valawuri va valala ehansi ka Sathana Diyavulosi va hlamuseriwa tanihi mahlonga ni vakhotsiwa enxaxamelweni wa ku hlula. Yehova Muhluri u va hluvula va sala va nga ambalanga ni ku va kombisa erivaleni tanihi vanhu lava hluriweke. Va hluriwa “hi ku tirhisa yona,” ku nga “mhandzi ya nxaniso” ya Yesu. Rifu ra yena emhandzini ri nyikele xisekelo xo susa ‘tsalwa leri tsariweke hi voko’ (ntwanano wa Nawu) kutani ri endla swi koteka leswaku Vakriste va ntshunxiwa evuhlongeni bya matimba ya vusathana ya munyama. (Vakolosa 2:13, 14) Vona ndlela leyi hi faneleke ku wu tlangela ha yona ntshunxeko wo tano wa Vukriste!