Ndhuna Ya Dzana Ya Tintswalo Ya Murhoma

TINDHUNA ta dzana ta Marhoma a ti ri ni ndhuma yo pfumala tintswalo. Leswi ti averiweke ku rhangela ntlawa wa masocha ya dzana ya nyimpi lama nonon’hwaka, ndhuna ya dzana a yi fanele yi va mulerisi la tiyeke, mutshinyi, naswona, minkarhi yin’wana yi va mudlayi. Hambi swi ri tano, Bibele yi hi byela hi ndhuna ya dzana ya Murhoma ya ntlawa wa Awugusto leyi kombiseke ku hanana ka xiviri ni xinghana eka muapostola Pawulo. I mani vito ra yona? I Yuliyo.

Bibele yi hi tivisa wanuna loyi eka Mintirho ndzima ya 27. Muapostola Pawulo u kombele leswaku Khezari a yingisela xikombelo xakwe le Rhoma. Xisweswo, Pawulo, ni vabohiwa van’wana, va nyikeriwa ‘ndhuna ya masocha leyi a va ku i Yuliyo ya ntlawa wa Awugusto’ leswaku yi va langutela. Va tlutile ku suka eKhezariya, doroba-nkulu ra le hlalukweni leri nga evupela-dyambu-n’walungu bya Yerusalema lowu a wu tirha tanihi yindlu-nkulu ya vuthu ra Rhoma. N’wamatimu Luka u ri: “Hi siku leri tlhandlamaka, hi fika eSidoni; kutani Yuliyo a endlela Pawulo tintswalo, a n’wi pfumelela ku ya vona vanakulobye ni ku longeriwa hi vona.”—Mintirho 27:1-3.

Kambe leswaku ha yini Yuliyo a susumeteleke ku kombisa tintswalo to tano, a swi kombisiwanga eBibeleni. Kumbe a a lerisiwe hi Mufumi Festo, leswaku a khoma Pawulo hi mafundzha yo hlawuleka. Kumbexana hi ku tiva xivangelo xo khomiwa ka Pawulo, Yuliyo a nga ha va a hlamale vurhenha ni vutshembeki bya Pawulo. Eka xiendlakalo xin’wana ni xin’wana, Yuliyo u tikombe a teka Pawulo a nga ri mubohiwa la tolovelekeke.

Hambi swi ri tano, Yuliyo u hlawule ku nga xi yingisi xitsundzuxo xa Pawulo xa ku nga tluti hi le xivandleni lexi va nge i Hlaluko-ro-Saseka. Hi ku hatlisa ngalava yi khomiwe hi moya wa xidzedze lowu laveke ku yi wisela eka rigiyagiya ra ribuwa ra le n’walungwini wa Afrika. (Mintirho 27:8-17) Loko xidzedze lexi xa ha tinyike matimba, Pawulo a yima, a tshembisa vakhandziyi lava a va tshukile a ku a ku na un’we wa vona loyi a a ta lahlekeriwa hi vutomi bya yena; i ngalava ntsena leyi a yi ta lova.’ Kambe endzhakunyana, van’wana va vatluti va ringete ku baleka. Pawulo a ku ka Yuliyo: “Loko vanhu lava va nga tshami engalaveni, a mi nga poni.”—Mintirho 27:21, 22, 30, 31.

Nkarhi lowu, Yuliyo u hlawule ku yingisa Pawulo, kutani vatluti va siveriwa ku baleka. Hi laha Pawulo a vuleke ha kona, ngalava yi be xitsunga xa sava ematini kutani yi fayeka. Hi ku chava leswaku vabohiwa va nga tshuka va balekile, masocha loko ma ri ehandle, ma kunguhate ku dlaya hinkwavo. Nakambe, Yuliyo a nghenelela a sivela vanhu vakwe, a ponisa vutomi bya Pawulo.—Mintirho 27:32, 41-44.

Bibele a yi hi byeli leswaku ku humelele yini hi ndhuna leyi ya dzana ya tintswalo, kumbexana yi kondze yi amukela ripfumelo ra Vukriste. Tintswalo tin’wana ni tin’wana leti a yi ti kombisa a ti paluxa ku tirha ka ripfalo leri humaka eka Xikwembu. (Varhoma 2:14, 15) Hambi swi ri tano, Vakriste va ni tintswalo leti tlulaka ta vumunhu, va kombisa tintswalo leti humaka eka Xikwembu hikwalaho ko va ni moya wa Xikwembu. (Vagalatiya 5:22) Entiyisweni, loko socha ra muhedeni leri nga xi tiviki Xikwembu ri swi kotile ku kombisisa tintswalo, hakunene vanhu va Xikwembu va fanele va susumeteriwa ku ti kombisa!