Siku Ro Ri Tsundzuka

“Ndzi mi byerile swilo leswi leswaku mi va ni ku rhula eka mina. La misaveni, mi ta va ni mahlomulo, kambe tiyani timbilu, ndzi hlurile misava.”—YOHANE 16:33.

1, 2. Hi rihi siku rin’we ematin’wini leri xiyekaka eka masiku hinkwawo man’wana, naswona ha yini?

MISAVA namuntlha yi vula swo tala hi ku rhula. Eku heleni ka Nyimpi ya Vumbirhi ya Misava, ku rhula a ku hlanganisiwa ni Siku ra V-E na Siku ra V-J.a Lembe rin’wana ni rin’wana, Khisimusi yi endla vanhu va ehleketa hi ‘ku rhula emisaveni.’ (Luka 2:14) Kambe ku na siku rin’we ematin’wini hinkwawo ya vanhu leri xiyekaka eka hinkwawo laman’wana. I siku leri Yesu Kriste a vuleke marito lama tshahiweke laha henhla ha rona. Exikarhi ka masiku ya timiliyoni timbirhi ni ku tlula lawa vanhu va ma hanyeke laha misaveni, hi rona siku rin’we leri cinceke ndlela ya vanhu leswaku va pfuneka hi laha ku nga heriki.

² Siku rero ra nkoka a a ku ri Nisan 14 eka khalendara ya Xiyuda. Hi lembe ra 33 ra Nguva ya hina leyi Tolovelekeke, Nisan 14 yi sungule hi ku pela ka dyambu hi April 1. A hi kambisiseni swiendlakalo swa siku rero ra nkoka swinene.

Nisan 14!

3. Yesu u wu tirhisise ku yini nkarhi lowu wo hetelela?

³ Loko nkarhi wa mpimavayeni wu tshinela, nkarhi wun’wana n’weti wo saseka lowu taleke wa vangama tanihi xitsundzuxo xa leswaku Yehova u tiva minkarhi ni tinguva. (Mintirho 1:7) Naswona ku humelela yini ekamareni ra le henhla laha Yesu ni vaapostola vakwe va 12 va hlengeletaneke kona ku tlangela Paseka leyi ya Xiyuda ya lembe na lembe? Loko Yesu a lunghiselela ‘ku suka emisaveni leyi a ya eka Tatana, u kombisa rirhandzu ra yena ku ya fika eku heteleleni.’ (Yohane 13:1) U swi endlisa ku yini sweswo? Hi rito ra nomu na hi xikombiso, Yesu u hambeta a nghenisa timfanelo leti nga ta pfuna vadyondzisiwa vakwe ku hlula misava.

Ku Ambala Ku Titsongahata Ni Rirhandzu

4. (a) Yesu u yi kombisise ku yini mfanelo ya xisekelo eka vadyondzisiwa vakwe? (b) Hi swi tivisa ku yini leswaku Petro u dyondze nkoka wa ku titsongahata?

⁴ Vaapostola a va ha ta susa mavondzo ni ku tinyungubyisa eka vona vini. Kutani Yesu u boha nceka ivi a sungula ku va hlambisa milenge. Leswi a hi ku kombisa vutitsongahati byo vungunya, hi laha swi endliwaka ha kona eRhoma lembe rin’wana ni rin’wana hi mupapa wa Vujagana. Hakunene, a swi tano! Ku titsongaha ka ntiyiso i ku tinyiketela loku humaka eka ‘mianakanyo ya vutitsongahati leyi tekaka van’wana va tlakukile.’ (Vafilipiya 2:2-5) Eku sunguleni, Petro a nga swi twisisi, u ala leswaku Yesu a n’wi hlambisa milenge. Loko a nyikiwe ndzayo, u kombela leswaku Yesu a n’wi hlambisa miri hinkwawo. (Yohane 13:1-10) Hambi swi ri tano, Petro u fanele a dyondzile. Endzhaku ka malembenyana, hi n’wi kuma a tsundzuxa van’wana hi ndlela leyinene. (1 Petro 3:8, 9; 5:5) I swa nkoka swinene namuntlha leswaku hinkwerhu hi tirhela Kriste hi ku titsongahata!—Nakambe vona Swivuriso 22:4; Matewu 23:8-12.

5. I nawu wihi wa Yesu lowu kombiseke ku hlawuleka ka mfanelo yin’wana ya nkoka?

⁵ Un’wana wa lava va 12 a nga pfuneki hi xitsundzuxo xa Yesu. Yena i Yudasi Iskariyota. Loko swakudya swa Paseka swi ya emahlweni, Yesu wa karhateka emoyeni, a vula leswaku Yudasi i muxengi wakwe ivi a n’wi humesa. Endzhaku ka leswi Yesu u byela vadyondzisiwa vakwe vo tshembeka va 11 a ku: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:34, 35) Lowu i nawu lowuntshwa hakunene, lowu kombisiweke hi xikombiso xa Yesu lexi tlakukeke! Tanihi leswi nkarhi wa rifu ra yena ra gandzelo wu tshinelaka, Yesu u kombisa rirhandzu leri xiyekaka. U tirhisa minete yin’wana ni yin’wana yo hlawuleka leswaku a dyondzisa ni ku khutaza vadyondzisiwa volavo. Endzhakunyana, u kandziyisa nkoka wa rirhandzu, a ku: “Nawu wa mina hi lowu: Hileswaku mi rhandzana, kukotisa leswi na mina ndzi mi rhandzeke. A ku na munhu la nga ni rirhandzu leri tlulaka ra loyi a nyiketaka vutomi bya yena hikwalaho ka vanakulobye.”—Yohane 15:12, 13.

“Ndlela, Ni Ntiyiso, Ni Vutomi”

6. I pakani yihi leyi Yesu a yi khomeleke vadyondzisiwa vakwe va le kusuhi?

⁶ Yesu u byela lavo tshembeka va 11 a ku: “Timbilu ta n’wina ti nga karhateki; pfumelani eka Xikwembu, ni le ka mina mi pfumela. Tindhawu ti tele endlwini ya Tata wa mina; loko a swi nga ri tano, a ndzi ta va ndzi mi byerile; kutani ndzi ya mi lunghisela kona.” (Yohane 14:1, 2) Ndhawu leyi yi ta va “eMfun’weni wa matilo.” (Matewu 7:21) Yesu u boxa ndlela leyi ntlawa lowu wu rhandzanaka wa vadyondzisiwa vo tshembeka wu nga fikelelaka pakani ya wona ha yona. U ri: “Hi mina ndlela, ni ntiyiso, ni vutomi; a ku na munhu loyi a taka eka Tatana, loko ku nga ri ha mina.” (Yohane 14:6) Leswi swi tirha ni le ka vanhu lava va kumaka vutomi lebyi nga heriki emisaveni.—Nhlavutelo 7:9, 10; 21:1-4.

7-9. Ha yini Yesu a tivule “ndlela, ni ntiyiso, ni vutomi”?

⁷ Yesu i “ndlela.” Ndlela leyi nga yoxe yo tshinelela Xikwembu hi xikhongelo i ya ku xi tshinelela hi Yesu Kriste ntsena. Yesu hi yexe u tiyisekisa vadyondzisiwa vakwe leswaku Tatana u ta va nyika hambi ku ri yini lexi va xi kombelaka hi vito ra Yesu. (Yohane 15:16) Swikhongelo leswi yisiwaka eswifanisweni kumbe eka “vakwetsimi” va vukhongeri kumbe leswi taleke hi Ave Marias ni ku yimbelela hi ku phindha-phindha—ku hava ni xin’we xa leswi lexi twiwaka ni ku amukeriwa hi Tatana. (Matewu 6:5-8) Ku engetela kwalaho, malunghana na Yesu, ha hlaya eka Mintirho 4:12: “Vanhu a va nyikiwanga vito rin’wana laha misaveni, ehandle ka vito . . . leri hi faneleke ku ponisiwa ha rona.”

⁸ Yesu i “ntiyiso.” Muapostola Yohane u vulavule ha yena a ku: “Rito ri hundzukile munhu la nga aka exikarhi ka hina; kutani hi hlalele ku kwetsima ka yena loku nga tala tintswalo ni ntiyiso, ku nga ku kwetsima loku fanelaka n’wana loyi a nga yexe eka tata wa yena.” (Yohane 1:14) Yesu u ve ntiyiso eka madzana ya vuprofeta eMatsalweni ya Xiheveru hi ku byi hetisisa. (2 Vakorinto 1:20; Nhlavutelo 19:10) U twarise ntiyiso hi ku vulavula ni vadyondzisiwa vakwe ni mintshungu leyi a yi yingisela, loko a kanetana ni vafundhisi va vukanganyisi, na hi xikombiso xa yena xa vutomi.

⁹ Yesu i “vutomi.” Tanihi N’wana wa Xikwembu, Yesu u te: “Loyi a pfumelaka eka N’wana, ú ni vutomi lebyi nga heriki; loyi a nga yingisiki N’wana, a nga ka a nga kumi vutomi, kambe vukari bya Xikwembu byi tshame henhla ka yena.” (Yohane 3:36) Ripfumelo leri kombisiwaka eka gandzelo ra Yesu ri yisa evuton’wini lebyi nga heriki—vutomi lebyi nga riki na ku fa etilweni bya “ntlhambinyana” wa Vakriste lava totiweke ni vutomi lebyi nga heriki eParadeyisini ya la misaveni eka ntshungu lowukulu wa “tinyimpfu tin’wana.”—Luka 12:32; 23:43; Yohane 10:16.

Ku Tiyisela Nxaniso

10. Ha yini hi fanele hi ‘hlula misava,’ naswona Yesu u nyikele xikhutazo xihi emhakeni leyi?

¹⁰ Lava nga ni ntshembo wo hanya emafambiselweni lamantshwa ya Yehova va fanele va langutana ni misava leyi nga “hansi ka matimba ya Lowo biha,” Sathana Diyavulosi. (1 Yohane 5:19) Kutani, mawaku ndlela leyi marito ya Yesu ma khutazaka ha yona eka Yohane 15:17-19! U ri: “Leswi ndzi mi lerisaka swona hi leswaku mi rhandzana. Loko misava yi mi venga, tivani leswaku yi rhangile yi venga mina, yi nga si mi venga. Loko a mi ri va misava, misava a yi ta rhandza swa yona. Kambe leswi mi nga riki va misava, ni leswi ndzi mi hlawuleke eka yona, misava ya mi venga.” Vakriste va ntiyiso va vengiwile ku ta fika elembeni leri ra 1992, naswona ha tsaka swinene hi swikombiso leswinene swa lava va hambetaka va yima va tiyile, va kuma matimba ehansi ka voko ra matimba ra Xikwembu hi ku titsongahata! (1 Petro 5:6-10) Hinkwerhu ka hina hi nga tiyisela miringo hi ku pfumela eka Yesu, loyi a gimetaka bulo ra yena hi marito lawa ma khutazaka: “La misaveni, mi ta va ni mahlomulo, kambe tiyani timbilu, ndzi hlurile misava.”—Yohane 16:33.

Ku Sungula Ntwanano Lowuntshwa

11. I yini leswi Yeremiya a swi profeteke malunghana ni ntwanano lowuntshwa?

¹¹ Emadyambyini wolawo, loko nkhuvo wa Paseka wu ri kusuhi ni ku hela, Yesu u vulavula hi ntwanano lowuntshwa. Muprofeta Yeremiya u vhumbe leswi ka ha sele malembe xidzana, a ku: “V̌onani, ku v̌ula Yehova, ma ta ta masiku lawa nḍi nga ta endla ha wona ntwanano lo’wuntŝha ni yindlu ya Israel ni yindlu ya Yuda. . . . Nḍi ta v̌eka nawu wa mina e šikari ka v̌ona, nḍi wu ṭala e timbilwini ta v̌ona, nḍi v̌a Šikwembu ša v̌ona, v̌ona v̌a v̌a tiko ra mina. . . . Nḍi ta v̌a ṭhikela e ku homboloka ka v̌ona, a nḍi nga ha anakanyi šidyoho ša v̌ona.” (Yeremia 31:31-34) Hi Nisan 14, 33 C.E., gandzelo leri tiyisaka ntwanano lowu lowuntshwa ri ta endliwa!

12. Yesu u wu sungurise ku yini ntwanano lowuntshwa, naswona wu hetisisa yini?

¹² Yesu u byela lava va 11 vo tshembeka leswaku u swi navela ngopfu ku dya Paseka leyi na vona. Kutani u teka xinkwa, a nkhensa, a xi phema, kutani a va nyika xona, a ku: “Leswi i miri wa mina, [lowu nyiketiwaka hikwalaho ka n’wina; endlani leswi hi ku ndzi anakanya].” Hi ndlela leyi fanaka, u hundzisela xinwelo xa vhinyo yo tshwuka eka vona, a ku: “Xinwelo lexi i ntwanano lowuntshwa engatini ya mina, leyi halatiwaka hikwalaho ka n’wina.” (Luka 22:15, 19, 20) Ntwanano lowuntshwa wu endliwa wu tirha hi “ngati ya nkoka” ya Yesu, ya nkoka swinene ku tlula ngati ya xiharhi leyi halatiwaka leswaku yi tiyisekisa Nawu wa ntwanano wa Israyele! (1 Petro 1:19; Vaheveru 9:13, 14) Lava va nghenisiweke eka ntwanano lowuntshwa va rivaleriwa swidyoho hi laha ku heleleke. Hikwalaho, va nga fanelekela ku va lava 144 000, lava amukelaka ndzhaka leyi nga heriki tanihi Israyele wa moya.—Vagalatiya 6:16; Vaheveru 9:15-18; 13:20; Nhlavutelo 14:1.

“Hi Ku Ndzi Anakanya”

13. (a) Hi fanele hi anakanyisisa ha yini hi nkarhi wa Xitsundzuxo? (b) I vamani ntsena lava faneleke va dya swifanekiselo, naswona hikwalaho ka yini?

¹³ Xitsundzuxo xa lembe na lembe xa vu-1 960 xa rifu ra Yesu xi ta va hi April 17, 1992. Tanihi leswi siku leri ri tshinelaka, hi fanele hi anakanyisisa hi hinkwaswo leswi gandzelo leri hetisekeke ra Yesu ri swi hetisisaka. Lunghiselelo leri ri tlakusa vutlhari ni rirhandzu ra Yehova leri enteke eka vanhu. Vutshembeki bya Yesu lebyi nga solekiki ku ya fikela eka rifu leri khomisaka gome, byi lwela Yehova ehenhleni ka xisandzu xa Sathana xa leswaku swivumbiwa swa Yena swa vanhu a hi swinene naswona swi nga ka swi nga humeleli loko swi ri endzingweni. (Yobo 1:8-11; Swivuriso 27:11) Hi ngati ya yena ya gandzelo, Yesu u yimela ntwanano lowuntshwa, ndlela ya Yehova yo hlawula “rixaka leri hlawuriweke, . . . vaprista va Hosi, . . . tiko leri hlawulekeke, vanhu lava nga va va Xikwembu hi xiviri.” Loko va ha ri emisaveni, va “twarisa mintirho leyo saseka” ya Xikwembu xa vona, Yehova, loyi ‘a va humeseke emunyameni va ta eku vonakaleni ka yena loku hlamarisaka.’ (1 Petro 2:9; ringanisa Eksoda 19:5, 6.) Hi laha ku faneleke, hi vona ntsena va dyaka swifanekiselo swa Xitsundzuxo lembe na lembe.

14. Timiliyoni ta vahlaleri ti fuwisiwa hi ndlela yihi?

¹⁴ Eka Xitsundzuxo xa n’wexemu, lava veke kona va ve 10 650 158 emisaveni hinkwayo, kambe exikarhi ka vona i vanhu va 8 850 ntsena—ehansi ka n’we-xa-khume xa phesente yin’we ya lava va dyeke swifanekiselo. Kutani, nkhuvo lowu wu ti pfunisa ku yini timiliyoni ta vahlaleri? Wa ti pfuna swinene! Hambi leswi va nga dyiki, va fuwisiwa hi tlhelo ra moya hi vunghana lebyi bya vumakwerhu lebyikulu bya misava hinkwayo, loko va twa hi ta swilo hinkwaswo swo hlamarisa leswi Yehova a swi hetisisaka hi gandzelo ra N’wana wakwe.

15. Xana van’wana handle ka vatotiwa va pfunekisa ku yini hi gandzelo ra Yesu?

¹⁵ Ku tlula kwalaho, muapostola wa hi byela eka 1 Yohane 2:1, 2: “Hi ni muyimeri eka Tatana, a nga Yesu Kriste la lulameke. Hi yena mhamba ya swidyoho swa hina, naswona ku nga ri ya swidyoho swa hina ntsena, kambe ni swa vanhu va misava hinkwayo.” Ina, gandzelo ra Yesu, hambi leswi ri sungulaka ri pfuna ntlawa wa Yohane, lowu nghenisiweke eka ntwanano lowuntshwa, ri tlhela ri endla leswaku swidyoho swa “misava hinkwayo” swi rivaleriwa. I “gandzelo ra ndzivalelo” ra swidyoho swa vanhu hinkwavo va misava lava pfumelaka engatini ya Yesu leyi halatiweke, leyi va pfulelaka ntshembo lowu tsakisaka wa vutomi lebyi nga heriki emisaveni ya paradeyisi.—Matewu 20:28.

“EMfun’weni Wa Tata Wa Mina”

16. (a) Yesu ni vadyandzaka kun’we na yena sweswi va vonaka va hlanganyela eka yini? (b) Ku laveka yini namuntlha eka masalela lama totiweke ni ntshungu lowukulu?

¹⁶ Loko a ya emahlweni a khutaza vaapostola vakwe, Yesu u kombetela eka siku leri a nga ta nwa leswi humesiweke hi mihandzu ya vhinyo leyintshwa hi ndlela yo fanekisela ni vadyondzisiwa vakwe eMfun’weni wa Tatana wakwe. (Matewu 26:29) Wa va byela: “Hi n’wina lava mi tiyiseleke na mina emiringweni ya mina. Hi laha Tatana wa mina a ndzi nyikeke mfumo ha kona, na mina ndzi mi nyika wona; eMfun’weni wa mina, mi ta dya ni ku nwa mi ri na mina, kutani mi ta tshama eswiluvelweni, mi avanyisa tinyimba ta Israyele leta 12.” (Luka 22:28-30) Tanihi leswi Yesu a tekeke matimba ya Mfumo ematilweni hi 1914, hi nga ha gimeta hi leswaku nhlayo leyikulu ya vadyandzhaka swin’we na Yesu, lava hlengeletiweke eka malembe xidzana yo tala, ana se va pfuxiwile, ‘ku tshama na yena eswiluvelweni.’ (1 Vatesalonika 4:15, 16) Siku ra leswaku tintsumi ti tshika “timheho ta mune” ta “nhlomulo lowukulu” ri tshinela hi ku hatlisa! Enkarhini wolowo, ku funghiwa ka Vaisrayele va moya va 144 000 ni ku hlengeletiwa ka timiliyoni ta ntshungu lowukulu ku ta va ku hetiwile. Lava hinkwavo va fanele va hlayisa vutshembeki, hi laha Yesu a endleke ha kona leswaku va amukela hakelo ya vutomi lebyi nga heriki.—Nhlavutelo 2:10; 7:1-4, 9.

17 na bokisi. (a) Loko mutotiwa a lahliwa tanihi la nga tshembekiki, kahle-kahle i mani loyi a nga n’wi sivaka? (b) Swihloko swa Watchtower hi 1938 swi humese ku vonakala kwihi loku tsakisaka eku akeni ka nhlengeletano ya le misaveni ni ku ndlandlamuka ka yona ndzhakunyana?

¹⁷ Ku vuriwa yini loko van’wana lava totiweke va tsandzeka ku hlayisa vutshembeki? Enkarhini lowu wo hetelela, handle ko kanakana nhlayo ya vanhu volavo lava nga tshembekiki yi ta va yitsongo. Kahle-kahle, musivi wihi na wihi a nge humi eka lava va ha ku khuvuriwaka, kambe exikarhi ka lava tiyiseleke na Yesu emiringweni ya yena hi malembe yo tala ya ntirho wo tshembeka. Miseve yo vangama ya ku vonakala ka moya loku humeke eka The Watchtower hi va-1920 na va-1930 yi kombisa leswaku ku hlengeletiwa ka masalela ya lava totiweke a ku hetiwa enkarhini wolowo. Lava ‘hlantswaka tinguvu ta vona ni ku ti basisa hi ngati ya Xinyimpfana,’ ku sukela enkarhini wolowo va na ntshembo lowu hambaneke wo tsakisa. Ha Kriste, moya wa Yehova wu va yisa “eswihlobyeni swa mati ya vutomi” emisaveni ya Paradeyisi.—Nhlavutelo 7:10, 14, 17.

Xikhongelo Xa Matimba Swinene

18. I tidyondzo tihi ta matimba leti hi ti dyondzaka eka xikhongelo xa Yesu eka Yohane ndzima 17?

¹⁸ Yesu u gimeta nkhuvo wa yena wa Xitsundzuxo ni vadyondzisiwa vakwe hi ku endla xikhongelo xa matimba swinene lexi rhekhodiweke eka Yohane 17:1-26. U sungule hi ku khongelela leswaku Tata wa yena a n’wi katekisa tanihi leswi a hlayisaka vutshembeki ku ya fika emakumu. Hi ndlela leyi Yehova u ta tlhela a dzunisiwa, vito ra yena ri ta kwetsimisiwa—ri susiwa xisandzu hinkwaxo. Hikuva hakunene, munhu la hetisekeke, Yesu, wa swi kombisa leswaku swivumbiwa swa vanhu swa Xikwembu swi nga swi kota ku tshembeka, hambi swi ri ehansi ka ndzingo lowukulu. (Deuteronoma 32:4, 5; Vaheveru 4:15) Nakambe, rifu ra Yesu ra gandzelo ri nyika nkarhi lowunene eka vatukulu va Adamu. Yesu u ri: “Vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” I swa nkoka swonghasi ku kuma vutivi lebyi kongomeke hi Yehova Xikwembu na N’wana wakwe, Xinyimpfana xa Xikwembu, loyi a nyikeleke vutomi bya yena ku lwela Yehova ni leswaku vanhu va ponisiwa! (Yohane 1:29; 1 Petro 2:22-25) Xana wa ri tlangela gandzelo rero ra rirhandzu lerova u tinyiketela eka Yehova ni ntirho wa yena wa risima hi ku helela?

19. Masalela ni ntshungu lowukulu va nga byi tsakela njhani vun’we lebyi hlawulekeke?

¹⁹ Nakambe, Yesu u khongela eka Tata wakwe la Kwetsimaka leswaku A langutela vadyondzisiwa tanihi leswi va tikombisaka va nga ri xiphemu xa misava, va namarhela rito ra Yena tanihi ntiyiso, naswona va hlayisa vun’we lebyi hlawulekeke na Tatana ni N’wana. Xana xikhongelo lexi a xi hlamuriwanga hi ndlela leyi hlamarisaka ku fikela esikwini ra namuntlha tanihi leswi masalela lama totiweke ni ntshungu lowukulu va tirhaka swin’we hi vun’we eka swiboho swa rirhandzu, va ri karhi va hlayisa vukala-tlhelo ehenhla ka misava, vukari bya yona ni vuhomboloki bya yona? I ya risima swinene marito ya Yesu yo gimeta eka Tata wakwe, Yehova! Yesu u te: “Ndzi ku tivisile eka vona; ndza ha ta ku tivisa, leswaku rirhandzu leri u ndzi rhandzeke ha rona, ri va ka vona, na mina ndzi va ka vona.”—Yohane 17:14, 16, 26.

20. Ha yini Nisan 14, 33 C.E., ri ri siku ro ri tsundzuka hakunene?

²⁰ Loko a ya entangeni wa Getsemane, Yesu u tlhela a va ni ku hlangana ko koma, loku akaka ni vadyondzisiwa va yena. Kutani valala va yena va le ka yena! Marito ma tsandzeka ku hlamusela gome ra nyama ra Yesu, ku rila ka yena loku hlomulaka mbilu hi xisandzu lexi tisiweke eka Yehova, ni xikombiso xa yena xa vutshembeki eka hinkwaswo leswi. Yesu u tiyisela ku ya fika emakumu, ni vusiku ni xiphemu lexikulu xa nhlikanhi esikwini rero. U swi kombisa kahle leswaku Mfumo wakwe a hi xiphemu xa misava. Kutani hi ku hefemula ka yena ko hetelela, u huwelerile: “Swi hetisekile.” (Yohane 18:36, 37; 19:30) Nyimpi ya yena yo hlula misava yi herile. Nisan 14, 33 C.E., hakunene i siku ro ri tsundzuka!

[Nhlamuselo ya le hansi]

A Wu Ta Hlamula Njhani?

◻ I yini leswi Yesu a swi dyondziseke malunghana ni ku titsongahata ni rirhandzu?

◻ Yesu u ve “ndlela, ni ntiyiso, ni vutomi” hi ndlela yihi?

◻ Hi xihi xikongomelo xa ntwanano lowuntshwa?

◻ I vun’we ni rirhandzu rihi leswi hlanganyeriwaka hi masalela lama totiweke ni ntshungu lowukulu?

[Bokisi leri nga eka tluka 20]

Vutlhari Bya Solomoni Lonkulu

Swihloko leswi nge “Organization” eminkandziyisweni ya The Watchtower ya June 1 na June 15, 1938, swi simeke lunghiselelo ra xisekelo ra le tilweni leri Timbhoni ta Yehova ti ri landzelaka ni namuntlha. Swi chapute nguva leyi xiyekaka ya ku lulamisiwa ka dyondzo ni nhleleko loku sunguleke hi 1919. (Esaya 60:17) Loko yi ringanisa nkarhi wolowo wa malembe ya 20 ni malembe ya 20 lawa Solomoni a akeke tempele ni Yindlu ya hosi eYerusalema ha wona, The Watchtower yi te: “Matsalwa ma kombisa leswaku, endzhaku ka malembe ya 20 ya nongonoko wa Solomoni wo aka . . . , u nghenele nongonoko wo aka wa tiko hinkwaro. (1 Tih. 9:10, 17-23; 2 Tikr. 8:1-10) Kutani ku te hosi ya xisati ya Xeba ‘yi huma eswiphen’wini swa le kule swa misava ku ta twa vutlhari bya Solomoni.’ (Mat. 12:42; 1 Tih. 10:1-10; 2 Tikr. 9:1-9, 12) Leswi swi ringanyeta xivutiso lexi: I yini leswi nga ta humelela eka vanhu va Yehova emisaveni enkarhini lowu taka? Hi ntshembo lowu tiyeke hi ta rindza, naswona hi ta swi vona.” Ntshembo wolowo a wu nga ri wa mavunwa. Ehansi ka nhlengeletano ya le tilweni, nongonoko lowukulu wo aka wa moya wa misava hinkwayo wu hlengelete ntshungu lowukulu lowu tlulaka timiliyoni ta mune. Tanihi hosi ya xisati ya Xeba, lava va huma eswiphen’wini swa le kule swa misava ku ta twa vutlhari bya Solomoni Lonkulu, Kriste Yesu—lebyi va nyikiwaka byona hi ku tirhisa “nandza la tshembekaka, wo tlhariha.”—Matewu 24:45-47.