Timbhoni Ta Yehovha—Nhlengeletano Leyi Vitaniwaka Hi Vito Rero

HI OCTOBER 6, 1990, ntshungu wa kwalomu ka vanhu va 5 000 lowu a a wu hlengeletanile le Holweni ya Nhlengeletano ya Timbhoni ta Yehovha eMutini wa Jersey, New Jersey, U.S.A., ku khoma nhlangano wa wona wa lembe na lembe wa Watch Tower Bible and Tract Society, a wu ta kuma xihlamariso. Mutshama-xitulu, John E. Barr, u tivise vayingiseri hi ku humesiwa ka vhidiyo ya timinete ta 55 leyi nge Jehovah’s Witnesses—The Organization Behind the Name. Leyi i vhidiyo yo sungula leyi humesiweke hi Sosayiti, kambe a hi yo hetelela.

Vhidiyo leyi yi komba ndlela leyi vanhu va Yehovha va hleriweke ha yona ku nyikela vumbhoni hi vito ra Xikwembu ni ku hangalasa “mahungu lamanene ya mfumo.” (Matewu 24:14, NW) Ku kombisiwa yindlu-nkulu ya le Brooklyn, New York, ni miako ya le Mapurasini ya Watchtower. Ku humesiwe tikopi to tlula 500 000 hi Xinghezi naswona sweswi ya (kumbe hi ku hatlisa yi ta) kumeka hi tindzimi tin’wana ta 26.a

Vanhu Va Angurise Ku Yini?

Xana vanhu lava nga riki Timbhoni ta Yehovha va te yini hi vhidiyo leyi? N’wamabindzu un’wana u tsarile:

“Khasete leyi ndzi yi vona yi ri na ntikelo swinene. Ndzi nyanyuriwe swinene hi ku hleriwa ka yona lokunene. A ndzi tala ku rivala leswaku i khasete ivi ndzi yi teka tanihi bayiskopo. Khasete leyi yi fanele yi pfuna swinene ku hlamusela xikongomelo xa yindlu-nkulu ya n’wina ya le New York. Ndzi tsaka na n’wina hi ntirho wa n’wina lowu xiyekaka.”—J. J.

Lava va dyondzaka Bibele ni Timbhoni ta Yehovha va pfunekile hi ku languta vhidiyo leyi. Mhaka leyi landzelaka yi ta hlamusela leswaku ha yini:

“Ndzi dyondza Bibele ni jaha rin’wana ra malembe ya 20 hi vukhale, leri nga eka yunivhesiti ya kwala kusuhi. A a ri karhateka hi xiyimo xa misava lexi yaka emahlweni xi biha swinene. Kambe endzhaku ka ku vona khasete leyi, ri vona vamakwerhu lavantshwa, lavanene va le Bethele, lava nga ni xikongomelo xa xiviri evuton’wini, langutelo ra rona hinkwaro ri cincile. U ve kona eka Nhlengeletano ya hina ya Siku yo Hlawuleka ivi a kombela ku dyondza Bibele kambirhi hi vhiki. Xichudeni xin’wana xa Bibele, mudyondzisi wa le xikolweni xa le henhla, xi lombe vhidiyo leswaku xi ya komba maxaka ya xona. A a va anakanya leswaku Timbhoni ta Yehovha ko va nhlengeletano leyi nga nyawuriki, leyi nga tivekiki, leyitsongo. Va hlamarile loko va vona ntirho wa hina wa misava hinkwayo ni ndlela leyi hi humelelaka ha yona, hikwalaho ka Yehovha.”—J. B.

“A ndzi nge swi koti ku phofula ndlela leyi a ndzi tsake ha yona loko wansati loyi ndzi dyondzaka na yena Bibele a sungule ku humesa mihloti ya ntsako ni yo tlangela endzhaku ko vona vhidiyo leyi. A ri karhi a xiririka mihloti u te: ‘Swi nga endlekisa ku yini leswaku munhu a tsandzeka ku vona leswaku leyi i nhlengeletano ya Xikwembu xa ntiyiso, Yehovha? A ndzi nga swi tivi leswaku ku ni vanhu vo fana ni lava.’ Ivi a ku: ‘Ndzi lava ku khuvuriwa.’”—C. D.

“Hi humelerile swinene hi ku tirhisa vhidiyo leyi eka swichudeni swa Bibele. Matolo nuna wa xin’wana xa swichudeni swa Bibele swa nsati wa mina a a hi endzerile. A a kaneta swinene. U vone vhidiyo. Endzhakunyana u vutise swivutiso ivi a suka a ri ni Bibele ni buku yo dyondza Bibele leyi nge U Nga Hanya Hi Masiku aParadeyisini eMisaveni. U tshame a hisa tibuku hinkwato ta Bibele ta nsati wakwe!”—D. H.

Hambi ku ri vantshwa va kume vhidiyo leyi yi tsakisa swinene, hi laha swiviko leswi landzelaka swi kombisaka ha kona:

“Ndzi ni malembe ya tsevu na hafu. Ndzi rhandza xiyenge lexiya xa Tibibele ni loko mabokisi ma famba hi ku hatlisa swinene.”—K. W.

“Vana va hina va vule leswaku yi tlula minongonoko hinkwayo leyi va tshameke va yi vona eka TV.”—R. C.

“Endzhaku ko vona vhidiyo ra vumbirhi, xifanyetana xa hina xa ntlhanu wa malembe, lexi a xi nyikele nyingiso swinene, xi vutisile, ‘Xana hi nga swi kota ku yi languta siku rin’wana ni rin’wana?’ Xinhwanyetana xa hina xa malembe manharhu xi nghenelerile xi ku, ‘Ndzi lava ku ya eBethele ndzi ya endla tibuku!’”—M. E.

“Vana va mina, Robin na Shannan, va malembe ya 12 na 9, va hamba va tlanga khaseke leyi hi ku phindha-phindha. Xinhwanyetana xa mina endzhaku ko vona khasete leyi xi te, ‘Ndza swi rhandza ku ya ensin’wini. Ka tsakisa.’ Vhidiyo leyi yi ve ni nkucetelo lowu kongomeke evuton’wini bya ndyangu wa hina. Vona ndlela leyi swi phyuphyisaka ha yona ku pfulela nongonoko wa thelevhixini lowu u wu tivaka leswaku a wu na khombo loko u wu languta!”—N. B.

“Ndzi ni malembe ya 131/2. Vhidiyo leyintshwa yi ndzi endle ndzi vona ndlela leyi ndzi ma honisaka ha yona malunghiselelo lama hlamarisaka ya Yehovha. I lunghelo ku va un’wana wa vanhu va Xikwembu.”—K. W.

“Ndzi ni malembe ya 16, naswona vhidiyo leyi yi ndzi pfune leswaku ndzi kandziyisa emianakanyweni ya mina leswaku lowu i ntirho wa misava hinkwayo lowu endliwaka sweswi.”—A. M.

“Vana va hina va vula leswaku nongonoko lowu tolovelekeke wa TV a wa ha tsakisi eka vona hikwalaho ko vona ndlela leyi swihungasi swa le tilweni swi tsakisaka ha yona. Nakambe yi engetele ku navela ka vona ku nghenela ntirho wa nkarhi hinkwawo.”—L. M.

Hambi lava va nga ni malembe yo tala va ri Timbhoni ta Yehovha va tsakisiwe swinene hi leswi va swi voneke.

“Loko vhidiyo leyi yi tsakisa hi ndlela leyi eka hina tanihi vanhu va Yehovha, xana vanhu van’wana va ta titwisa ku yini ha yona? Leswi mafambiselo lawa ma yaka ma nonon’hwa swinene, ndzi tirhisa awara enkarhini wa mina, ndzi endzela Bethele ndzi ri ekamareni ra mina ro tshama eka rona!”—K. B.

“Loko ndzi heta ku vona ndlela leyi nchumu wun’wana ni wun’wana wu endliwaka hi vukheta ha yona, ndzi titwe ndzi lava ku ya ekamareni ra mina, ndzi ya vukarha tibuku ta mina ta Bibele.”—L. P.

Na wena, hi ku khutaza leswaku u tinyika nkarhi wo languta vhidiyo leyi nge Jehovah’s Witnesses—The Organization Behind the Name. Yi ta ku endla leswaku u languta vutomi hi ndlela yin’wana, yi ta ku pfuna ku tiyiseka leswaku ku ni vumundzuku lebyi hlayisekeke.

[Nhlamuselo ya le hansi]