Muvumbi Wa Hina La Hlamarisaka Ni Mintirho Yakwe
SWA HLAMARISA! Maboboma lama hobomulanaka ya Iguaçú kumbe Niagara, minkova leyikulu ya Arizona kumbe Hawaii, misoka-lwangu ya Norway kumbe New Zealand—swihlamariso leswi swa ntumbuluko swi humesa marito ya ku dzunisa! Kambe xana swi endliwe hi xiwelo hi loyi a vuriwaka Mana wa Ntumbuluko? E-e, a swi tano! I mintirho leyi hlamarisaka ya Muvumbi Lonkulu, Tatana wa le tilweni la rhandzekaka loyi ha yena Solomoni Hosi ya vutlharhi a tsaleke a ku: “Ši endlile hikwaŝo ŝi sasekile hi nkari wa ŝona, ši v̌ekile ku anakanya ka v̌utomi le’byi nga heriki e timbilwini ta v̌ona; hambi ŝi ri tano, a ku na munhu l’a twisisaka mitiro le’yi endliweke hi Šikwembu e ku sunguleni ka yona e ku yisa eku heteleleni.” (Eklesiasta 3:11) I ntiyiso leswaku vanhu a swi ta va tekela nkarhi lowu nga pimekiki leswaku va lavisisa mintirho hinkwayo leyi hlamarisaka leyi Muvumbi wa hina a tateke vuako ha yona.
Hi ni Muvumbi la Hlamarisaka swonghasi! Naswona ha tsaka swonghasi leswi Xikwembu lexi xa matimba hinkwawo “emasikwini lawa yo hetelela, xi [vulavuleke] na hina hi N’wana, loyi xi n’wi vekeke ku va mudyandzhaka wa swilo hinkwaswo, loyi naswona xi tumbuluxeke tilo ni misava ha yena.” (Vaheveru 1:2) N’wana loyi, ku nga Yesu Kreste, a a tlangela swilo leswi tsakisaka leswi tumbuluxiweke hi Tata wa yena. Nkarhi na nkarhi a a kombetela eka swona loko a kombisa swikongomelo swa Tata wakwe ni loko a byela vayingiseri va yena marito lama khutazaka. (Matewu 6:28-30; Yohane 4:35, 36) “Hi ku pfumela,” vo tala va twisise mhaka ya leswaku swihlamariso swa ntumbuluko swi “tumbuluxiwile hi rito ra Xikwembu.” (Vaheveru 11:3) Vutomi bya hina bya siku na siku byi fanele ku kombisa ripfumelo ro tano.—Yakobo 2:14, 26.
Swivumbiwa swa Xikwembu xa hina swa hlamarisa hakunene. Swi kombisa vutlharhi bya xona, matimba ya xona, vululami bya xona ni rirhandzu ra xona hi ndlela leyi hlamarisaka. Hi xikombiso, xi lunghiselele misava ya hina, xi endla leswaku yi rhendzeleka hi dyambu leswaku xivumbiwa xakwe lexi a xi ta endliwa, ku nga munhu, xi tsakela tinguva leti tsakisaka, hi ku landzelelana ka tona. Xikwembu xi te: “Hi masiku hikwawo ya misav̌a, ku byala ni ku ṭhov̌ela, širami ni mumu, e šimumu ni v̌ušika, e nhlekanhi ni v̌usiku, ŝi nga ka ŝi nga pfumaleki.” (Genesa 8:22) Ku tlula kwalaho, Xikwembu xi tate misava ya hina hi timinerali ta nkoka. Ngopfu-ngopfu xi nyikele mati layo tala, lawa endzhaku a ma ta va xiyenge xa nkoka ni ku wundla vutomi hinkwabyo lebyi nga kona emisaveni.
Hi ‘masiku ya ku tumbuluxa’ ya tsevu lama landzelelanaka, laha rin’wana ni rin’wana ra wona ri nga leha malembe ya gidi, “moya wa Šikwembu” wu hambete wu lunghiselela misava leswaku munhu a ta tshama eka yona. Ku vonakala loku endlaka leswaku hi kota ku vona, moya lowu hi wu hefemulaka, misava leyi hi tshamaka eka yona, swimilana, ku cincana ka vusiku ni nhlikanhi, tihlampfi, tinyanyana, swiharhi—hinkwaswo swi vumbiwe hi ku landzelelana ka swona hi Muvumbi wa hina la Hlamarisaka leswaku swi ta tirhisiwa ni ku tsakeriwa hi munhu. (Genesa 1:2-25) Kunene, hi nga tihlanganisa ni mupisalema hi ku vula hi ku: “Oho Yehova! mitiro ya wena yi tarisile ku yini! U yi endlile hikwayo hi v̌utlhari; misav̌a yi tele rifuwo ra wena.”—Pisalema 104:24.
Vutshila Bya Xikwembu Eku Tumbuluxeni
Loko “siku” ra vutsevu ra ku tumbuluxa ri tshinelela makumu ya rona, Xikwembu xi endlile wanuna, endzhaku xi vumba mupfuni wa yena, ku nga wansati. Koloko ku ve ku chaputa ka vutshila ka ntumbuluko wa laha misaveni, loku hlamarisaka swinene ku tlula swivumbiwa hinkwaswo leswi vonakaka leswi ana se a swi vumbiwile! Pisalema 115:16 ya hi byela: “Loko ma ri matilo, i matilo ya Yehova, e misav̌a o yi nyikile v̌ana v̌a v̌anhu.” Hi laha ku faneleke, Yehovha u endle leswaku hina vanhu hi va hi ndlela leyi hi nga kotaka ku tsakela ni ku tirhisa leswi a swi vumbeke ku sungula emisaveni. Hi fanele hi ma tlangela swinene mahlo ya hina—lama rharhanganeke swinene ku tlula khamera leyinene—lama nga vonaka misava leyi nga ni swilo swa mihlovo leswi hi rhendzeleke! Hi ni tindleve—leti tlulaka fambiselo rihi ni rihi ra mpfumawulo leri endliweke hi munhu—leswaku hi kota ku tsakela mabulo, vuyimbeleri ni risimu lero xonga ra tinyanyana. Hi ni tirhelo ra ntumbuluko ra ku vulavula, ku katsa ni ririmi leri endlaka swilo swo hambana-hambana. Switwi swa ririmi, swi hlangane ni xitwi xa hina xa ku nun’hwetela, na swona swi endla leswaku hi tiphina hi ku dya swakudya swo hambana-hambana. Naswona hi swi tlangela swonghasi loko hi khumbiwa hi voko ra rirhandzu! Kunene, hi nga nkhensa Muvumbi wa hina, hi laha mupisalema a endleke ha kona loko a ku: “Nḍa ku nkhensa hikwalaho ka mahlori ya šiv̌umbeko ša mina. Mitiro ya wena ya hlamarisa, [moya-xiviri] wa mina wa ŝi tiv̌a ŝinene ngopfu.”—Pisalema 139:14.
Tintswalo Ta Rirhandzu Ta Muvumbi Wa Hina
Mupisalema u tsarile a ku: “Ḍunisani Yehova, hikuv̌a o lulamile. . . . Hi yena l’a endleke ŝihlamariso le’ŝikulu, a ri ŝakwe, hikuv̌a tintŝalo ta yena [ta rirhandzu] hi le’ti nga heriki!” (Pisalema 136:1-4) Tintswalo teto ta rirhandzu sweswi ti n’wi susumetela ku endla swilo leswi hlamarisaka ku tlula swivumbiwa hinkwaswo leswi ha ha ku swi hlamuselaka. Ina, hambi loko a wisile eku vumbeni ka swilo leswi vonakaka, u vumba swilo swa moya. Leswi u swi endla tanihi nhlamulo ya ntlhontlho lowo homboloka lowu wu kongomisiweke eka yena. Hi ndlela yihi ke?
Wanuna ni wansati vo sungula a va vekiwe eparadeyisini leyinene ya Edeni. Hambi swi ri tano, ntsumi leyi xandzukeke, ku nga Sathana, yi tiendle xikwembu, yi endla leswaku mpatswa wolowo wa vanhu wu xandzukela Yehovha. Hikwalaho ka vululami bya xona, Xikwembu xi va gwevele rifu, vuyelo bya kona ku va leswaku vana va vona, rixaka hinkwaro ra vanhu, ri va exiyin’weni xa vudyoho, xa ku fa. (Pisalema 51:5) Mhaka ya Bibele malunghana na Yobo yi kombisa leswaku Sathana u ntlhontlhe Xikwembu, a vula leswaku ku hava munhu loyi a nga hlayisaka vutshembeki eka xona loko a ringiwa. Kambe Yobo u kombise leswaku Sathana i muhembi lonkulu, hi laha malandza man’wana layo tala lama tshembekaka ya Xikwembu ma endleke ha kona eminkarhini ya ku tsariwa ka Bibele ni ku ta fika esikwini ra hina. (Yobo 1:7-12; 2:2-5, 9, 10; 27:5) Yesu, tanihi munhu la hetisekeke, u veke xikombiso lexinene xa ku hlayisa vutshembeki hi ndlela leyi nga ringanisiwiki na nchumu.—1 Petro 2:21-23.
Xisweswo, Yesu u te, “[Sathana] mufumi wa misava leyi . . . a nga na matimba ehenhla ka mina.” (Yohane 14:30) Hambi swi ri tano, ku ta fikela namuntlha, “misava hinkwayo yi le hansi ka matimba ya Lowo biha.” (1 Yohane 5:19) Loko a kanete leswaku vuhosi bya Yehovha byi lulamile, Sathana u nyikiwe malembe ya kwalomu ka 6 000 leswaku a kombisa loko vulawuri bya yena ehenhla ka vanhu byi ta humelela. U hluleke hi ndlela leyi vavisaka swinene, hi laha swiyimo leswi nyanyaka ku biha swi hambetaka swi kombisa ha kona! Yehovha, Xikwembu xa hina xa rirhandzu ku nga ri khale xi ta susa vandla leri ri hombolokeke ra misava, xi tiyisa vuhosi bya xona lebyi lulameke ehenhla ka misava. Sweswo swi ta tisa ntshunxeko lowu tsakisaka eka vanhu lava lavaka vulawuri lebyo rhula, lebyi lulameke!—Pisalema 37:9-11; 83:17, 18.
Hambi swi ri tano, a swi nga heleli kwalaho! Tintswalo ta Xikwembu ta rirhandzu ti ta tlhela ti kombisiwa hi ku ya hi marito ya Yesu lama nga eka Yohane 3:16 leyi nge: “Xikwembu xi rhandzile misava [ya vanhu] swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.” Ku nyikiwa ka vanhu ntshembo wa vutomi lebyi nga heriki emisaveni ku katsa ku vumbiwa ka swilo leswintshwa. Xana hi swihi ke? Xana swi va pfunisa ku yini vanhu lava kololaka? Xihloko xa hina lexi landzelaka xi ta swi hlamusela.