Timbhoni Ta Yehovha eMisaveni Hinkwayo—Colombia

COLOMBIA i tiko ro hlawuleka ra le Amerika Dzonga. Lwandle ra Atlilantika ni ra Pacific ma vandzakane ni ribuwu ra tiko leri ra tintshava. Ku hisa ka le hansi eribuweni ni le timbaleni ku hambanile ni ku titimela ka le maninginingini lama khubumetiweke hi gamboko ya Tintshava ta Andes.a

Hambi leswi Colombia ri dumeke hi nsuku ni tiemeralda, vanhu hi vona va nga rifuwo ra rona ra risima swinene. Namuntlha, Yehovha u tata yindlu yakwe ya moya hi swidzuniso. Vagandzeri vo saseka, lava rhandzekaka va khitikanela eka yona eswiphen’wini hinkwaswo swa misava, ku katsa ni le Colombia.—Hagayi 2:7.

Valanguteri Va Mabindzu Va Tsakile

Hi Sonto, November 1, 1992, ku ve siku ra ku nyikeriwa ka hofisi yintshwa ya rhavi ni ndhawu yo gandlisela eka yona ya Sosayiti ya Watch Tower eFacatativá, tikhilomitara ta 42 ku ya en’walungu-vupela-dyambu bya Bogotá. Maendzo yo vona rhavi ma ve ni nkucetelo lowunene ngopfu eka vaendzi. Muendzi un’wana loko a tlhelela efemeni leyi a tirhaka eka yona, hi ku nyanyuka u khongotele mufambisi wakwe leswaku a ya vona ni ku xiya nhlengeletano leyi ‘hlamarisaka, leyi hlelekeke ni vatirhi lava tiyimiseleke ku tirha.’ Eriendzweni ra vona leri landzeleke, valanguteri va kombise ku tsakela ka xiviri ivi va vutisa swivutiso swo tala.

Valanguteri lava va lave ku rhumela vakongomisi va vona, tindhuna ni varhangeri—kahle-kahle, vatirhi va vona hinkwavo—va ta vona ndhawu leyi. Vhiki rin’wana ni rin’wana a va hlela leswaku vatirhi vo sukela eka 15 ku ya eka 25 va ya valanga ku kondza loko vatirhi hinkwavo va 1 300 va xiye vutshila bya nhlengeletano yo tano.

Madzana-dzana ya vatirhi va vona va valange miako ya rhavi naswona va hlalele vhidiyo leyi nge Jehovah’s Witnesses—The Organization Behind the Name. Va tsakisiwe hi vukulu bya nhlengeletano ni ndlela leyi ntirho wo chumayela ta Mfumo wu endliwaka ha yona emisaveni hinkwayo, va hlamarisiwe hi thekinoloji ya vutshila leyi tirhisiwaka entirhweni wa Sosayiti. Loko va suka, vo tala a va twiwa va vula leswaku va titwa onge hi loko va ‘suka eParadeyisini va tlhelela emisaveni leyi nga hlelekangiki.’

Ntiyiso Wu Fikelela Tinxaka Hinkwato

Vanhu va tinxaka hinkwato va fikeleriwa hi mahungu lamanene. (1 Timotiya 2:3, 4) Hi xikombiso, khale ka mutsari wa vuyimbeleri tlhelo murhangeri wa ntlawa wa vuyimbeleri bya matimba bya rock u amukele ntiyiso wa Bibele, u cince vutomi byakwe naswona hi xihatla u ve phayona ra nkarhi hinkwawo. Endzhakunyana u hlawuriwe ku va nandza wa vutirheli. Vanhu vo hlayanyana lava a va ri swirho swa ntlawa wa vapfukeri va dyondze ku veka ripfumelo ra vona ni ntshembo wa vona eMfun’weni wa Yehovha. Sweswi va gingiriteka eku chumayeleni ka rungula ra misava leyintshwa leyi nga ni ku rhula.

Lava va godzomberiweke hi swidzidzirisi ni lava va swi hangalasaka handle ka nawu na vona va amukele ntiyiso. Jaha rin’wana leri sweswi ri nga Mbhoni a ri ri mulanguteri wa ndhawu leyi ku byariwaka swidzidzirisi eka yona ni ndhawu ya vukambisiselo bya khokheyini enhoveni ku ringana malembe ya ntlhanu loko ri nga si tshika vutomi byo tano. Ri kume ntsako hi ku dyondza hi minsinya ya milawu ya Bibele ni ku yi tirhisa. Dyondzo leyinene ya Bibele yi susumetele vabohiwa lava voniweke nandzu wo dlaya leswaku va khongela hi ku tiyimisela leswaku Yehovha a va rivalela swidyoho swa vona ni leswaku a va amukela tanihi malandza ya yena.

Leswi swi endliwa hi leswi vanhu va tinxaka hinkwato va amukelaka rungula ra Mfumo. EColombia, ku fana ni kun’wana, Yehovha u tata yindlu yakwe hi swidzuniso.

[Nhlamuselo ya le hansi]

[Bokisi leri nga eka tluka 8]

XIVIKO XA TIKO

Lembe Ra Ntirho Ra 1993

NHLOHLORHI YA LAVA NYIKELEKE VUMBHONI: 60 854

MPIMANYISO: Mbhoni yin’we eka vanhu va 558

LAVA VA VEKE KONA EXITSUNDZUXWENI: 249 271

XIRINGANISO XA VAHUWELERI VA MAPHAYONA: 8 487

XIRINGANISO XA TIDYONDZO TA BIBELE: 100 927

NHLAYO YA LAVA KHUVURIWEKE: 5 183

NHLAYO YA MAVANDLHA: 751

HOFISI YA RHAVI: FACATATIVÁ

[Xifaniso lexi nga eka tluka 9]

Vatirhi va le hofisini ya rhavi ni varhumiwa hi 1956

[Xifaniso lexi nga eka tluka 9]

Xifaniso lexi tekiweke emoyeni xa hofisi ya rhavi