Munhu Wa Mona

RIRIMI ra Xiheveru ri na rimitsu rin’we ntsena eka rito “mavondzo.” Loko ri kombetela eka vanhu va nyama lava nga ni vudyoho, Xiheveru xi nga ha ri hundzuluxela ri va “mona” kumbe “mphikizano.” (Genesa 26:14; Eklesiasta 4:4) Kambe, ririmi ra Xigriki ri ni marito yo tala yo vula “mavondzo.” Rito zeʹlos, ku fana ni muringani wa rona wa Xiheveru, ri nga ha kombetela eka mavondzo yo lulama ni yo biha. Rito rin’wana ra Xigriki, phthoʹnos, ri vula mavondzo yo biha ntsena. Eka New World Translation, ri hundzuluxeriwa minkarhi hinkwayo ri va “mona.”

Xana rito phthoʹnos a ri tirhisiwa njhani eka Xigriki xa khale? The Anchor Bible Dictionary yi ri: “Ku hambana ni munhu wa makwanga, munhu loyi a nga ni phthonos a hi minkarhi hinkwayo a lavaka nhundzu ya un’wana leyi a yi navelaka; ntsena a nga lavi leswaku loyi un’wana a va na yona. Wa hambana ni munhu la phikizanaka ni van’wana hikuva xikongomelo xakwe, ku hambana ni xa loyi a phikizanaka ni van’wana, a hi ku hlula kambe i ku sivela van’wana ku hlula.”

Munhu wa mona hakanyingi a nga swi vona leswaku langutelo ra yena hi rona ri nga xivangelo-nkulu xa swiphiqo swakwe. Xihlamusela-marito lexi fanaka xi vula leswaku “yin’wana ya swihlawulekisi swa phthonos, hi leswaku munhu wa kona a nga tivoni. Munhu la nga ni phthoneros, loko a komberiwa ku hlamusela xivangelo xa xiendlo xakwe, minkarhi hinkwayo u byela van’wana kumbe yena n’wini u tibyela leswaku lava a va hlaselaka va faneriwa hi swona ni leswaku i xiyimo lexi xo homboloko lexi n’wi endlaka a va sandza. Loko a vutisiwa leswaku swi kotekisa ku yini leswaku a vulavula hi munghana hi ndlela leyi a vulavulaka ha yona, u ta vula leswaku u sandza hikwalaho ka leswi a rhandzaka munghana wakwe.”

Matewu na Marka vatsari va Evhangeli va tirhisa rito ra Xigriki phthoʹnos ku hlamusela nsusumeto wa lava va veke ni xandla eku dlayiweni ka Yesu. (Matewu 27:18; Marka 15:10) Ina, a va susumetiwa hi mona. Ntlhaveko wo tano lowu nga ni khombo hi wona wu endleke vagwinehi va venga khale ka vamakwavo hi ndlela yo biha. (1 Timotiya 6:3-5) A swi hlamarisi leswi vanhu va mona va siveriwaka ku nghena eMfun’weni wa Xikwembu! Yehovha Xikwembu u vurile leswaku hinkwavo lava yaka emahlweni va “tele mavondzo” va “lulameriwa hi rifu.”—Varhoma 1:29, 32; Vagalatiya 5:21.

[Swifaniso leswi nga eka tluka 7]

U nga tshuki u pfumelela mona wu onha vutomi bya wena