‘Xana Ndzi Wa Nkoka Eka Xikwembu?’

“XANA Ndzi Wa Nkoka? Xana Xikwembu Xa Khathalela?” Hi leswi yi hlayekisaka xiswona nhloko-mhaka leyi nga eka Christianity Today. Mutsari wa nhloko-mhaka ya kona Philip Yancey u ri: “Hakanyingi ntirho-vutomi wa mina tanihi mutsari wa tibuku a wu rhendzeriwe hi xiphiqo xo karhateka. Ndzi tivutise swivutiso leswi fanaka hi ku phindha-phindha, onge hi loko ndzi tinwaya mbanga ya khale leyi nga horiki. Ndzi twa vahlayi va tibuku ta mina, leti nga ni nhlomulo va ri karhi va seketela ku kanakana loku ndzi nga na kona.”

Kumbexana na wena wa tivutisa loko Xikwembu xi ri ni mhaka ni vutomi bya wena. Oho, kumbexana u tolovelane na yona Yohane 3:16, leyi vulaka leswaku “Xikwembu xi rhandzile misava swonghasi, xi ko xi nyika N’wana wa xona la nga un’we.” Kumbe u nga ha va u yi hlayile Matewu 20:28, leyi vulaka leswaku Yesu a a tele ku “nyiketa vutomi bya yena ku kutsula lavo tala.” U nga ha tama u vutisa, ‘Xana Xikwembu xa ndzi vona? Xana xa ndzi khathalela tanihi munhu?’ Ku ni xivangelo lexinene xo tshemba leswaku xa khathalela, hilaha hi nga ta swi vona ha kona.