Xiviko Xa Vahuweleri Va Mfumo

“Milawu Ya Wena Hinkwayo I Ntiyiso”

EMAHLWENINYANA ka rifu ra yena, Muxe u khongotele vanhu va Israyele leswaku va yingisa milawu hinkwayo ya Yehovha. U te: “Hlayisani timbilwini ta ṅwina e marito lawa hikwawo, lawa nḍi endlaka v̌umboni namuntlha ha wona e mahlweni ka ṅwina; mi ta ma lerisela v̌ana v̌a ṅwina, v̌a ta yingisa ni ku endla hi marito hikwawo ya nawu lowu. Hikuv̌a a hi rito [ra] hav̌a e ka ṅwina; kambe i v̌utomi bya ṅwina.”—Deteronoma 32:46, 47.

Endzhaku ka madzana-dzana ya malembe, mupisalema u kandziyise nkoka wa tidyondzo hinkwato ta Xikwembu loko a te: “Wena Yehova, u kusuhi, ni ku lerisa ka wena hikwaku hi lo’kunene.” (Pisalema 119:151) Hi lembe-xidzana ro sungula, Yesu hi yexe u kombise nkoka wa “marito hinkwawo lama humaka enon’weni wa Xikwembu.” (Matewu 4:4) Naswona ehansi ka nkongomiso wa Xikwembu muapostola Pawulo u tsale leswaku “Matsalwa lawa hinkwawo ma huhutiwile hi Xikwembu, ma pfuna.”—2 Timotiya 3:16.

Swi le rivaleni, leswaku Yehovha Xikwembu u langutele leswaku vagandzeri va yena hinkwavo va teka marungula lama hundziseriwaka eka hina hi matluka ya Rito ra yena, ma ri ya nkoka. A ku na ndzimana ni yin’we eBibeleni leyi nga riki ya nkoka. Hi yona ndlela leyi Timbhoni ta Yehovha ti titwaka ha yona hi Rito ra Xikwembu, hilaha swi kombisiweke hakona hi ntokoto lowu landzelaka wa le Mauritius.

Nkul. D—— a a tshama eximutanini lexi nga xoxe, laha a tirha ku rindza ni vusiku. I khale a ri karhi a lava ndlela yo lulama ya ku gandzela Xikwembu. Nivusiku loko a ri eku rindzeni, u sungule ku hlaya Bibele. Eku heteleleni, u ti kume a yi hlaye hinkwayo. U dyondze leswaku vito ra Xikwembu i Yehovha—vito leri humelelaka ko tala eBibeleni ya yena ya Xihindi. U kume buku ya Nhlavutelo yi tsakisa ngopfu swinene.

Kutani a tivutisa loko ku ri ni vukhongeri lebyi landzelaka Bibele hinkwayo ka yona. U xiye leswaku vukhongeri lebyi a byi toloverile, a byi landzela ntsena swiyenge swo karhi swa Bibele. Vukhongeri byin’wana a byi amukela Matsalwa ya Xiheveru kambe byi ala Matsalwa ya Vukreste ya Xigriki. Vukhongeri byin’wana a byi honisa Matsalwa ya Xiheveru, byi teka Matsalwa ya Vukreste ya Xigriki ku ri wona ntsena lama nga ni ntikelo.

Siku rin’wana Nkul. D—— u vone vatekani lava a va neriwa hi mpfula kutani a va rhambela ekaya ra yena leswaku va ta kuma vutumbelo. A va ri Timbhoni ta Yehovha. Nsati wa Mbhoni a a khome buku leyi nge Nhlavutelo—Ku Chaputa Ka Yona Loku Hlamarisaka Ku Tshinele!a Hi ku hatlisa Nkul. D—— u kombele buku yoleyo eka vona. Timbhoni ti vone onge timhaka ta vuprofeta bya Nhlavutelo ti tika ngopfu leswaku a nga ti twisisa, hiloko ti n’wi nyika buku yin’wana ematshan’weni ya yona. Kambe Nkul. D—— a sindzisa leswaku u lava buku ya Nhlavutelo.

Loko a kume kopi ya yena, u yi hlaye hi xihatla. Kutani a amukela dyondzo ya Bibele eka Timbhoni ta Yehovha. Hi ku hatlisa u tsakisiwe hileswaku Timbhoni a ti yi xixima swinene Bibele hinkwayo. U sungule ku va kona nkarhi hinkwawo eminhlanganweni, eHolweni ya Mfumo ya Timbhoni ta Yehovha, laha hinkwawo Matsalwa ya Xiheveru ni Matsalwa ya Vukreste ya Xigriki ma dyondziwaka hi vukheta. Sweswi i muhuweleri wa Mfumo naswona i xirho lexi khuvuriweke xa vandlha ra Vukreste.

[Nhlamuselo ya le hansi]