Xikolo Xa Gilead Xi Rhumela Ntlawa Wa Xona Wa Vu-100

XIKOLO XA BIBELE XA GILEAD XA WATCHTOWER xi tlange xiphemu xa nkoka eku huweleriweni ka Mfumo wa Xikwembu ka manguva lawa emisaveni hinkwayo. Ku sukela loko Xikolo xa Gilead xi sungule ku letela varhumiwa hi 1943, mathwasana ya xona ma tirhe ematikweni lama tlulaka 200. Hi March 2, 1996, ntlawa wa vu-100 wu thwasile.

Swichudeni swi te exikolweni hi nkarhi lowu a ku we gamboko yo tlakuka ku tlula timitara timbirhi eNtsindza wa Dyondzo wa Watchtower le Patterson, eNew York. A swi hlamarisi leswaku hi siku ra ku thwasisiwa ka vona, gamboko a yi ri karhi yi wa. Hambiswiritano, holo a yi tele, naswona vayingiseri vo tala a va yingisele va ri ePatterson, Wallkill, ni le Brooklyn—ntsengo wa vanhu va 2 878.

Theodore Jaracz, xirho xa Komiti yo Dyondzisa, wa Huvo leyi Fumaka, a a ri mutshama-xitulu. Endzhaku ka ku amukela vaendzi lava humaka eka matiko yo tala hi ku kufumela, u kombele vanhu hinkwavo leswaku va yima kutani va yimbelela risimu 52. Holo a yi pfuma hi ku dzunisa Yehovha loko va yimbelela risimu leri nge “Vito Ra Tata Wa Hina” eka buku leyi nge Yimbelelelani Yehovha Swidzuniso. Loko risimu rero ri hlangana ni marito ya mutshama-xitulu, mayelana ni ku tirhisa dyondzo eku dzunisa Yehovha, swi endle leswaku ku languteriwa nongonoko lowu a wu ta landzela.

Ndzayo Ya Matsalwa Leyi Humaka Eka Vakulukumba

Xiyenge xo sungula xa nongonoko a ku ri tinkulumo to koma leti a ti kongomisiwe eka ntlawa lowu thwasaka, ti nyikeriwa hi malandza ya Yehovha yo hlayanyana lama se ma nga ni nkarhi wo leha ma n’wi tirhela. Richard Abrahamson, xirho xa ndyangu wa yindlu-nkulu, loyi a nga sungula vutirheli bya nkarhi lowu teleke hi 1940, u khongotele ntlawa lowu a ku: “Yanani Emahlweni Mi Pfumelelana Ni Swiyimo.” U va tsundzuxe leswaku ana se va hlangavetane ni minkarhi yo hambana-hambana yo lava leswaku va pfumelelana ni swiyimo evuton’wini bya vona tanihi Vakreste, ku katsa ni tin’hweti ta ntlhanu leti va nga ti heta va ri exikolweni xa Gilead. Kambe, hikokwalaho ka yini va fanele ku ya emahlweni va pfumelelana ni swiyimo?

Xivulavuri xi hlamusele leswaku xiga lexi nga tirhisiwa hi muapostola Pawulo eka 2 Vakorinto 13:11 (NW) “xi vula ntirho lowu yaka emahlweni, ku ya emahlweni hi pfumelela Yehovha a hi aka kumbe a hi tengisa, ku lulamisa laha swi lavekaka, leswaku munhu a kota ku fikelela mimpimanyeto leyi tlakukeke ya Yehovha.” Loko ntlawa lowu thwasaka wu ri eswiavelweni swa wona swa matiko mambe, wu ta hlangavetana ni mintlhontlho leyintshwa ya ripfumelo ra wona. Wu ta fanela ku dyondza ririmi lerintshwa, wu dyondza mikhuva leyintshwa ya vanhu van’wana xikan’we ni mahanyelo ya vona, ni ku titoloveta nsimu leyi hambaneke. Nakambe, va ta hanyisana ni vanhu lava nga ni vumunhu byo hambana-hambana emakaya ya vona ya varhumiwa ni le mavandlheni ya vona lamantshwa. Loko vo tirhisa misinya ya milawu ya Bibele hi vukheta eka swiyimo sweswo hinkwaswo, va tiyimisela ku pfumelelana ni swiyimo, xisweswo, tanihi laha muapostola Pawulo a tsaleke hakona, va ta “hambeta va tsaka.”

John Barr, un’wana wa swirho swa ntlhanu swa Huvo leyi Fumaka leswi swi nga va ni xiphemu eka nongonoko lowu, u hlawule xihloko xa yena eka 1 Vakorinto 4:9. U tsundzuxe vayingiseri va yena leswaku Vakreste va xiyiwa hi tintsumi ni vanhu. U te: “Ku tiva leswi, swi kandziyisa nkoka wa mahanyelo ya Mukreste evuton’wini, ngopfu-ngopfu loko a xiya leswaku leswi a swi vulaka ni ku swi endla, swi nga n’wi endla a funghiwa hi lava va n’wi languteke, hambiloko a voniwa kumbe a nga voniwi. Ndzi tshemba leswaku mi ta va mi endla kahle loko mi tshama mi tsundzuka leswi, n’wina hinkwenu vamakwerhu va xinuna ni va xisati lava rhandzekaka va ntlawa lowu wa vu-100 wa Gilead, loko mi ya eswiavelweni swa n’wina leswi nga eka swiphemu swo hambana-hambana swa misava.”

Makwerhu Barr u byele swichudeni leswi swa 48, ku hamba swi tsundzuka leswaku, loko swi ri karhi swi pfuna lava fanaka ni tinyimpfu ku dyondza ntiyiso, “tintsumi ta Xikwembu ta tsaka swinene loko mudyohi hambi a ri un’we a hundzuka.” (Luka 15:10) Loko a kombetela eka 1 Vakorinto 11:10, u kombise leswaku langutelo ra munhu malunghana ni malunghiselelo ya le tilweni a ri khumbi vamakwerhu va xinuna kumbe va xisati lava hi va vonaka ntsena, kambe ri khumba ni tintsumi leti hi nga ti voniki. Hikwalaho i swa nkoka ku va ni mavonelo lama anameke ya xiyimo lexi emiehleketweni!

Xirho xin’wana xa Huvo leyi Fumaka, Gerrit Lösch, loyi hi yexe a nga thwasana ra Xikolo xa Gilead, u vulavule hi matsalwa yo fana na Pisalema 125:1, 2; Zakariya 2:4, 5; na Pisalema 71:21 ku komba leswaku Yehovha u ‘rhendzela vanhu va yena.’ U va sirhelela hi matlhelo hinkwawo. Xana Xikwembu xi ta hlayisa vanhu va xona ntsena hi nkarhi wa nhlomulo lowukulu? Xivulavuri xi hlamule xi ku: “A swi tano hikuva ‘Yehovha ana i rirhangu ra nḍilo lowo wu rhenḍelaka,’ i nsirhelelo eka vanhu va yena. Lembe ra le ndzhaku ka nyimpi ra 1919 ri kume masalela ya Israyele wa moya ma tiyimisele ku huwelela mahungu lamanene ya Mfumo hi ku hiteka emisaveni hinkwayo tanihi vumbhoni eka vanhu va matiko hinkwawo. A va ri vayimeri va Yerusalema wo fanekisela wa le tilweni. Yehovha u tiyisekisa leswaku u ta va nsirhelelo wa vayimeri lava va ri ntlawa enkarhini lowu wa makumu. Xisweswo xana i mani loyi a nga swi kotaka ku va sivela? A ku na munhu.” Vona ndlela leyi sweswo swi va tiyisekisaka ha yona, vona swin’we ni lava va tirhisanaka na vona eku endleni ka ku rhandza ka Xikwembu!

Ulysses Glass, xirho-nkulu xa vadyondzisi va xikolo, u khutaze ntlawa wolowo leswaku ‘wu kuma ndhawu ya wona enhlengeletanwini ya Yehovha ya misava hikwayo.’ Ndhawu eka mhaka leyi, i xiyimo kumbe ntirho lowu hi ku hlawuleka wu fanelaka vuswikoti bya munhu kumbe mfanelo ya yena. U te: “N’wina varhumiwa va mundzuku mi kume ndhawu ya n’wina eka nhlengeletano ya Timbhoni ta Yehovha ya misava hinkwayo. Kambe, hambileswi swi nga swa nkoka sweswi, i masungulo ntsena ya vutomi bya n’wina tanihi varhumiwa.” Va fanele va tinyiketela eku tirhiseni vuswikoti bya vona ni ku fanelekela swiavelo swa vona leswo hlawuleka leswi Yehovha ni nhlengeletano yakwe a va va avele swona.

Nkulumo yo hetelela eka xiphemu lexi xa nongonoko a yi nyikeriwa hi Wallace Liverance, xirho xa vadyondzisi va le Gilead, loyi a nga tirha malembe ya 17 eBolivia. U vutise ntlawa lowu wa swichudeni a ku: “Xana mi ta ringa Xikwembu?” Xana leswi a va ta swi endlisa ku yini? Tiko ra Israyele ri ringe Xikwembu hi ndlela leyi hoxeke. (Deteronoma 6:16) Xivulavuri xi te: “swi le rivaleni leswaku ku ringa Xikwembu hi ku vilela kumbe hi ku n’unun’uta, kumbexana hi ku nga eneriseki hi ndlela leyi xi endlaka swilo ha yona, a swi lulamanga.” U va khongotele a ku: “Loko mi fika eswiavelweni swa n’wina leswintshwa, lwanani ni mboyamelo wolowo.” Xisweswo, xana hi yihi ndlela leyi kongomeke ya ku ringa Xikwembu? Makwerhu Liverance u te: “I ku kholwa leswi xi swi vulaka, u endla hi ku kongoma leswi xi swi vulaka, kutani u siyela xona leswaku xi fikelela makumu.” Tanihi laha Malakiya 3:10 yi vulaka hakona, Yehovha u rhamba vanhu va yena, u ri: “Mi nḍi ringa ha kona.” U tshembise leswaku loko vo tisa evuhlayiselweni bya tempele ku avanyisa ka vona ka vukhume hi vutshembeki, a a ta va katekisa. Xivulavuri xi vutisile xi ku: “Hikwalaho ka yini mi nga languti xiavelo xa n’wina xa vurhumiwa hi ndlela leyi fanaka? Yehovha u rhandza leswaku mi humelela eka xona, hikwalaho n’wi ringeni. Tshamani eka swiavelo swa n’wina. Endlani mindzulamiso leyi xi lavaka leswaku mi yi endla. Tiyiselani. Mi vona loko a nga ta mi katekisa.” Lexi i xitsundzuxo lexinene swonghasi eka hinkwavo lava tirhelaka Yehovha!

Endzhaku ka risimu nongonoko wu cince wu suka eka tinkulumo wu ya eka mimbulavurisano leyi tsakisaka.

Mintokoto Leyi Tirhaka Ya Le Nsin’wini

Mark Noumair, xirho lexintshwa xa vadyondzisi va le Gilead, u rhambe swichudeni leswaku swi vula mintokoto leyi swi nga yi kuma ensin’wini loko swi ri exikolweni. Leswi swi kandziyise nkoka wo antswisa vuswikoti bya hina evutirhelini bya nsimu, ni ku nyiketa vayingiseri tindlela leti tirhaka, leti va nga ti tirhisaka.

Hi nkarhi wa swona wa xikolo, swichudeni swa ntlawa lowu wa le Gilead swi vuyeriwe ngopfu, hikuva swi hlangane ni swirho swa Tikomiti ta Marhavi, swo huma eka matiko ya 42, leswi naswona a swi te eka vuleteri byo hlawuleka eNtsindza wa Dyondzo ePatterson. Vunyingi bya swona swi thwase kona eGilead emalembeni lama nga hundza. Enongonokweni lowu, mbulavurisano wu endliwe ni vayimeri va ntlawa wa vu-3, wa vu-5, wa vu-51 ni wa vu-92 ku katsa ni vayimeri va Xikolo xa Gilead lexi Pfunetaka xa le Jarimani. Marito ya vona a ma vuyerisa swonghasi!

Va vule ndlela leyi varhumiwa va nga titwa ha yona loko va vona nhlayo ya vadzunisi va Yehovha yi kula eswiavelweni swa vona, ku suka eka nhlayo yo ka yi nga nyawuli ku ya eka makume-kume wa magidi. Va vule ndlela leyi va nga hoxa xandla ha yona eku hundziseni ka mahungu lamanene ma ya emakaya lama nga akelanangiki eTintshaveni ta Andes, ni miti leyi kumekaka laha xihlovo xa mati ya Nkova wa Amazon xi nga kona. Va hlamusele ndlela leyi va nyiketaka ha yona vumbhoni eka vanhu lava nga tiviki ku hlaya. Va vule ndlela leyi va nga lwa hi matimba ha yona ku dyondza ririmi lerintshwa ni leswaku mathwasana lawa, swi nga ma teka nkarhi wo tanihi kwihi ku kota ku nyikela vumbhoni ni ku veka tinkulumo hi ririmi ro fana ni Xichayina. Va tlhele va endla minkombiso ya swingheniso hi Xipaniya ni Xichayina. Va kandziyise leswaku varhumiwa va humelela kahle, loko va nga dyondzi ririmi ra ndhawu ntsena, kambe va tlhela va dyondza ni mahanyelo ya vanhu va kona. Va vulavule ni hi swiyimo swo tika, leswi hakanyingi swi nga kona ematikweni lama sweleke, kutani va ku: “Varhumiwa va fanele va tsundzuka leswaku swiyimo leswi hi xitalo swi vangiwa hi leswi vanhu va kona va khomiwaka hi ndlela yo biha. Murhumiwa u endla kahle loko a titwa ku fana na Yesu—a a ri ni ntwela vusiwana eka vanhu lava a va fana ni tinyimpfu leti nga riki na murisi.”

Endzhaka ka risimu, nongonoko wu ye emahlweni hi nkulumo ya A. D. Schroeder, xirho xa Huvo leyi Fumaka. U ve ni lunghelo ra ku va un’wana wa vadyondzisi vo sungula loko Xikolo xa Gilead xi sungula hi 1943. U hlawule xihloko lexi nge “Ku Tlakusa Yehovha Tanihi Hosi Leyikulu,” xi ri lexi fanelaka ku pfala nongonoko. Nhlamuselo leyi kokaka ya Makwerhu Schroeder ya Pisalema 24, yi endle leswaku vayingiseri hinkwavo va xiya leswaku i lunghelo lerikulu ku tlakusa Yehovha tanihi Hosi Leyikulu.

Endzhaku ka ku avela tidiploma, ni risimu ro pfala, Karl Klein wa Huvo leyi Fumaka u pfale hi xikhongelo lexi khumbaka mbilu. Mayana nongonoko lowu dyondzisaka ni ku phyuphyisa swonghasi emoyeni!

Hi masiku lama nga landzela endzhaku ka ku thwasisiwa, swirho swa 48 swa ntlawa lowu wa vu-100 swi sungule ku teka riendzo ro ya eswiavelweni swa swona swa vurhumiwa ematikweni ya 17. Kambe a ri nga ri ro sungula va endla vutirheli lebyi. Ana se a va ri ni rhekhodo leyi eneleke ya vutirheli bya nkarhi hinkwawo bya Vukreste. Loko va tsarisa eGilead, a va ri ni avhareji ya 33 wa malembe hi vukhale naswona a va tinyiketele malembe ya 12 evutirhelini bya nkarhi hinkwawo. Van’wana va vona va tshame va va swirho swa ndyangu wa kaya ra Bethele ra misava hinkwayo ra Sosayiti ya Watch Tower. Van’wana va tshame va va valanguteri lava famba-fambaka. Nhlayo yo karhi ya swichudeni leswi, ana se a yi tshame yi hlanganyela eka muxaka wo karhi wa vutirheli bya le matikweni ya le handle—eAfrika, eYuropa, eAmerika Dzonga, swihlala swa le lwandle, ni le ka mintlawa ya vanhu va tindzimi timbe ematikweni ya ka vona. Kambe sweswi va joyina vunyingi bya varhumiwa lava tsakelaka ku vula va ku: ‘Hi ta tirha kun’wana ni kun’wana emisaveni, laha hi lavekaka kona.’ Ku navela loku humaka etimbilwini ta vona i ku tirhisa vutomi bya vona leswaku va tlakusa Yehovha.

[Bokisi leri nga eka tluka 27]

Tinhlayo Ta Ntlawa:

Nhlayo ya matiko lama yimeriweke: 8

Nhlayo ya matiko lama va averiweke eka wona: 17

Nhlayo ya swichudeni: 48

Malembe: 33,75

Xiringaniso xa malembe entiyisweni: 17,31

Xiringaniso xa malembe evutirhelini bya nkarhi hinkwawo: 12,06

[Xifaniso lexi nga eka tluka 26]

Ntlawa Wa Vu-100 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku sukela emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.