Hinkwerhu Hi Fanele Ku Tihlamulela Eka Xikwembu
“Un’wana ni un’wana wa hina ú ta tihlamulela hi yexe emahlweni ka Xikwembu.”—VARHOMA 14:12.
1. Hi swihi swipimelo leswi a swi vekeriwe ntshunxeko wa Adamu na Evha?
YEHOVHA XIKWEMBU u vumbe vatswari va hina vo sungula, Adamu na Evha, va ri ni ntshunxeko wo tihlawulela. Hambileswi a va nga ringani ni tintsumi, a va ri swivumbiwa leswi tlhariheke leswi kotaka ku endla swiboho swa vutlhari. (Pisalema 8:4, 5) Hambiswiritano, ntshunxeko wolowo lowu va nyikiweke wona hi Xikwembu a wu nga ri mpfumelelo wo tiendlela xin’wana ni xin’wana. A va ri ni vutihlamuleri eka Muvumbi wa vona, naswona vutihlamuleri lebyi byi tlulele ni le ka vatukulu va vona hinkwavo.
2. Hi kwihi ku tengisa loku Yehovha a nga ta ku endla ku nga ri khale, naswona ha yini?
2 Leswi sweswi hi tshinelelaka ku chaputa ka mafambiselo lawa yo biha ya swilo, Yehovha u ta tengisa misava. (Ringanisa Varhoma 9:28.) Ku nga ri khale, vanhu lava nga chaviki Xikwembu va ta boheka ku tihlamulela eka Yehovha Xikwembu hikwalaho ka leswi va onhaka rifuwo ra misava, va herisaka vutomi bya vanhu, naswona ngopfu-ngopfu hikwalaho ko xanisa malandza ya yena.—Nhlavutelo 6:10; 11:18.
3. Hi swihi swivutiso leswi hi nga ta swi kambisisa?
3 Leswi hi langutaneke ni xivono lexi chavisaka, i swa nkoka leswaku hi anakanyisisa hi ku tirhisana lokunene ka Yehovha ni swivumbiwa swa yena eminkarhini leyi hundzeke. Xana Matsalwa ma nga hi pfuna njhani hina hi hexe leswaku hi tihlamulela hi ndlela leyinene eka Muvumbi wa hina? Xana hi swihi swikombiso leswi nga hi pfunaka, naswona hi swihi leswi hi faneleke hi papalata ku swi tekelela?
Tintsumi Ta Tihlamulela
4. Hi swi tivisa ku yini leswaku tintsumi ta tihlamulela eka Xikwembu hikwalaho ka swiendlo swa tona?
4 Swivumbiwa swa Yehovha leswi nga tintsumi le matilweni swa tihlamulela eka yena tanihi hina. Emahlweni ka Ndhambhi ya siku ra Nowa, tintsumi tin’wana hi ku nga yingisi ti teke xiyimo xa miri wa nyama leswaku ti va ni vuxaka bya rimbewu ni vavasati. Leswi a ti ri ni ntshunxeko wo tihlawulela, swivumbiwa leswi swa moya a swi ta tiendlela xiboho lexi, kambe Xikwembu xi lave leswaku ti tihlamulela. Loko tintsumi leti nga yingisangiki ti tlhelele exivandleni xa moya, Yehovha a nga ti pfumelelanga leswaku ti tlhela ti kuma xiyimo xa tona xo sungula. Mudyondzisiwa Yuda u hi byela leswaku ti “pfale[riwe] hilaha ku nga heriki exinyamini lexi chavisaka ku fikela siku lerikulu ra ku avanyisiwa.”—Yuda 6.
5. Xana i ku wa kwihi loku Sathana ni madimona yakwe va langutaneke na kona, naswona mhaka ya ku xandzuka ka vona yi ta lulamisiwa hi ndlela yihi?
5 Sathana Diyavulosi i mufumi wa tintsumi leti nga yingisangiki, kumbe madimona. (Matewu 12:24-26) Ntsumi leyi yo homboloka yi xandzukele Muvumbi wa yona ivi yi tlhontlha ku lulama ka vuhosi bya Yehovha. Sathana u endle leswaku vatswari va hina vo sungula va dyoha, naswona leswi eku heteleleni swi va vangele rifu. (Genesa 3:1-7, 17-19) Hambileswi Yehovha a pfumeleleke Sathana leswaku a nghena etihubyeni ta le tilweni endzhaku ka nkarhi wolowo, buku ya Bibele ya Nhlavutelo yi vhumbhe leswaku hi nkarhi wa Xikwembu lowu faneleke, munhu loyi wo homboloka a a ta cukumeteriwa laha misaveni. Vumbhoni byi komba leswaku leswi swi humelele endzhakunyana ka loko Yesu Kreste a kume matimba ya Mfumo hi 1914. Eku heteleleni, Diyavulosi ni madimona yakwe va ta heriseriwa makumu. Leswi eku heteleleni mphikamakaneta ya vuhosi yi nga ta va yi lulamisiwile, hi nkarhi wolowo mhaka ya nxandzuko yi ta va se yi lulamisiwile hi ndlela yo lulama.—Yobo 1:6-12; 2:1-7; Nhlavutelo 12:7-9; 20:10.
N’wana Wa Xikwembu Wa Tihlamulela
6. Xana Yesu u byi languta njhani vutihlamuleri byakwe eka Tata wakwe?
6 Mawaku xikombiso lexinene lexi vekiweke hi N’wana wa Xikwembu, Yesu Kreste! Leswi a a ri munhu la hetisekeke loyi a ringana na Adamu, Yesu a a tsakisiwa hi ku endla ku rhandza ka Xikwembu. Nakambe a a swi tsakela ku byarha vutihlamuleri bya ku yingisa nawu wa Yehovha. Malunghana na yena, mupisalema u profete hilaha ku fanelaka a ku: “Šikwembu ša nga, nḍi ṭakela ku endla ku ranḍa ka wena! Kutani nawu wa wena wu le mbilwini ya mina.”—Pisalema 40:8; Vaheveru 10:6-9.
7. Loko a khongela emahlweni ka rifu ra yena, ha yini Yesu a vule marito lama nga eka Yohane 17:4, 5?
7 Ku nga khathariseki ndlela yo biha leyi Yesu a kanetiweke ha yona, u endle ku rhandza ka Xikwembu a tlhela a hlayisa vutshembeki ku fikela loko a fa emhandzini ya nxaniso. Xisweswo u hakele nxavo wa nkutsulo leswaku a kutsula vanhu eka vuyelo lebyi dlayaka bya xidyoho xa Adamu. (Matewu 20:28) Hikwalaho, emahlweni ka rifu rakwe, Yesu hi ku tiyiseka u khongerile a ku: “Ndzi ku dzunisile laha misaveni, hi ku heta ntirho lowu u ndzi nyikeke wona leswaku ndzi wu tirha. Sweswi Tatana, ndzi dzunise emahlweni ka wena hi ku dzuneka loku a ndzi ri na kona eka wena, misava yi nga si va kona.” (Yohane 17:4, 5) Yesu u vule marito lawa eka Tata wakwe wa le tilweni hikuva a a ri karhi a hlula ndzingo wa ku tihlamulela hilaha ku humelelaka naswona u amukeriwe hi Xikwembu.
8. (a) Xana Pawulo u swi kombise njhani leswaku hi fanele hi tihlamulela eka Yehovha Xikwembu? (b) I yini lexi nga ta hi pfuna leswaku hi amukeriwa hi Xikwembu?
8 Ku hambana na Yesu Kreste munhu la hetisekeke, hina a hi hetisekanga. Hambiswiritano, hi ni vutihlamuleri eka Xikwembu. Muapostola Pawulo u te: “Xana wena u avanyisela yini makwenu xana? Naswona u solela yini makwenu? Kasi hinkwerhu hi ta humelela emahlweni ka xiluvelo xa Xikwembu ku avanyisiwa. Hikuva eMatsalweni, Hosi yi ri: ‘Mina ndza hanya, hikokwalaho vanhu hinkwavo va ta ndzi nkhinsamela, hinkwavo va ta ku, ndzi Xikwembu.’ Hi mukhuva wolowo, un’wana ni un’wana wa hina ú ta tihlamulela hi yexe emahlweni ka Xikwembu.” (Varhoma 14:10-12) Leswaku hi kota ku endla tano kutani hi amukeriwa hi Yehovha, hi rirhandzu u hi nyike ripfalo ni Rito ra yena leri huhuteriweke, ku nga Bibele, leswaku swi hi kongomisa eka leswi hi swi vulaka ni leswi hi swi endlaka. (Varhoma 2:14, 15; 2 Timotiya 3:16, 17) Ku ma tirhisa hi ku helela malunghiselelo ya Yehovha ya moya ni ku landzela ripfalo ra hina leri leteriweke hi Bibele swi ta hi pfuna leswaku hi amukeriwa hi Xikwembu. (Matewu 24:45-47) Moya lowo kwetsima wa Yehovha, kumbe matimba lama tirhaka, i xihlovo xin’wana xa matimba ni nkongomiso. Loko hi endla hi ku pfumelelana ni nkongomiso wa moya ni nkongomiso wa ripfalo ra hina leri leteriweke hi Bibele, hi kombisa leswaku a hi ‘sandzi Xikwembu,’ lexi eka xona hi nga ta tihlamulela hikwalaho ka swiendlo swa hina hinkwaswo.—1 Vatesalonika 4:3-8; 1 Petro 3:16, 21.
Ku Tihlamulela Ka Matiko
9. Xana Vaedomu a va ri vamani, naswona ku humelele yini hi vona hikwalaho ka ndlela leyi va khomeke Israyele ha yona?
9 Matiko ma ni vutihlamuleri eka Yehovha. (Yeremiya 25:12-14; Sofoniya 3:6, 7) Anakanya hi mfumo wa khale wa Edomu, lowu a wu ri edzongeni wa Lwandle leri Feke ni le n’walungwini wa Nsonga-nkulu wa Aqaba. Vaedomu a va ri Vasemayiti, a va ri maxaka ya Vaisrayele. Hambileswi tata wa Vaedomu a a ri Esawu ntukulu wa Abrahama, Vaisrayele a va pfumeleriwanga ku tsemakanya hi le Edomu hi “gonḍo” loko va ha ri endleleni yo ya eTikweni leri Tshembisiweke. (Tinhlayo 20:14-21) Hi malembe-xidzana yo tala vulala bya Vaedomu byi kurile byi va rivengo lerikulu eka Vaisrayele. Eku heteleleni, Vaedomu a va fanele va tihlamulela hikwalaho ka leswi va hlohloteleke Vababilona leswaku va lovisa Yerusalema hi 607 B.C.E. (Pisalema 137:7) Hi lembe-xidzana ra vutsevu B.C.E., mavuthu ya Babilona lawa a ma fambisiwa hi Hosi Nabonidus ma hlule Edomu, naswona ri hundzuke rhumbi, hilaha Yehovha a leriseke hakona.—Yeremiya 49:20; Obadiya 9-11.
10. Xana Vamowabu va va khomise ku yini Vaisrayele, naswona Xikwembu xi avanyise Mowabu hi ndlela yihi?
10 Mowabu na rona a ri ponanga. Mfumo wa Vamowabu a wu ri en’walungwini wa Edomu ni le vuxeni bya Lwandle leri Feke. Loko Vaisrayele va nga si nghena eTikweni leri Tshembisiweke, Vamowabu a va va khomanga hi malwandla, swi le rivaleni leswaku a va va nyika vuswa ni mati ntsena leswaku va kuma mali. (Deteronoma 23:3, 4) Balaka Hosi ya Mowabu, u xave muprofeta Balama leswaku a ya rhukana Israyele, naswona vavasati va Vamowabu va tirhisiwe ku kanganyisa vavanuna va Vaisrayele leswaku va va ni mahanyelo yo biha ni ku gandzela swifaniso. (Tinhlayo 22:2-8; 25:1-9) Hambiswiritano, Yehovha a nga ri banga hi makatla rivengo ra Vamowabu eka Vaisrayele. Hilaha ku profetiweke hakona, Mowabu ri endliwe rhumbi hi mavoko ya Vababilona. (Yeremiya 9:25, 26; Sofoniya 2:8-11) Ina, Xikwembu xi endle leswaku Mowabu ri byarha vutihlamuleri bya rona.
11. Xana Mowabu na Amoni ma fanisiwe ni miti yihi, naswona vuprofeta bya Bibele byi kombisa yini mayelana ni mafambiselo lawa yo biha ya swilo?
11 A hi Mowabu ntsena leri a ri fanele ku tihlamulela eka Xikwembu kambe na Amoni. Yehovha a a vhumbhile a ku: “Moab o ta kotisa Sodoma, v̌ana v̌a Amon v̌a kotisa Gomora, yi nga nḍaka ya mitwa, ni migodi ya munyu, ni mananga hi laha ku nga heriki.” (Sofoniya 2:9) Matiko ya Mowabu na Amoni ma herisiwile, hilaha Xikwembu xi heriseke miti ya Sodoma na Gomora hakona. Hi ku ya hi Geological Society of London, vakambisisi va vula leswaku va kume tindhawu ta marhumbi ya Sodoma na Gomora eribuweni ra le vuxeni ra Lwandle leri Feke. Vumbhoni byihi na byihi lebyi tshembekaka lebyi nga ha kumekaka emhakeni leyi byi nga ha seketela vuprofeta bya Bibele lebyi kombisaka leswaku mafambiselo lawa yo biha ya swilo lama nga kona sweswi, na wona ma ta avanyisiwa hi Yehovha Xikwembu.—2 Petro 3:6-12.
12. Hambileswi Israyele a ri fanele ri tihlamulela eka Xikwembu hikwalaho ka swidyoho swa rona, xana a ku vhumbhiwe yini mayelana ni masalela ya Vayuda?
12 Hambileswi Israyele a ri rhandziwa swinene hi Yehovha, a ri fanele ri tihlamulela eka Xikwembu hikwalaho ka swidyoho swa rona. Loko Yesu Kreste a te rixakeni ra Israyele, vunyingi byi n’wi landzurile. I masalela ntsena lama kombiseke ripfumelo kutani ma va valandzeri va yena. Pawulo u tirhise vuprofeta byin’wana eka masalela lawa ya Vayuda loko a tsale a ku: “Esaya wa huwelela hi ta Israele, a ku: ‘Hambiloko ntsengo wa Vaisraele wu kotisa sava ra lwandle, ku ta ponisiwa masalela ntsena; hikuva Hosi yi ta hetisa mhaka ya yona emisaveni, yi yi tsema hi ku hatlisa.’ Swi fana ni leswi Esaya a nga rhanga a swi vula, loko a te: ‘Loko Hosi ya matimba hinkwawo a yi nga hi siyelanga vatukulu, a hi ta va hi hundzukile hi fana na Sodoma, a hi ta va hi ringanisiwile na Gomora.’” (Varhoma 9:27-29; Esaya 1:9; 10:22, 23) Muapostola u nyike xikombiso xa vanhu va 7 000 va le nkarhini wa Eliya lava va nga n’wi nkhinsamelangiki Bali, ivi a ku: “Swa ha ri tano ni namuntlha: Ku ni masalela ya vanhu lava Xikwembu xi va hlawuleke hi tintswalo.” (Varhoma 11:5) Masalela wolawo a ma vumbiwa hi vanhu lava hi voxe a va ri ni vutihlamuleri eka Xikwembu.
Swikombiso Swa Vutihlamuleri Bya Munhu Hi Xiyexe
13. Xana ku humelele yini hi Kayini loko Xikwembu xi lave leswaku a tihlamulela hikwalaho ko dlaya makwavo Avele?
13 Bibele yi boxa timhaka to tala malunghana ni vutihlamuleri bya munhu hi xiyexe eka Yehovha Xikwembu. Hi xikombiso, anakanya hi Kayini n’wana wa mativula wa Adamu. Yena ni makwavo Avele va humesele Yehovha magandzelo. Gandzelo ra Avele a ri amukeleka eka Xikwembu, kambe ra Kayini a ri nga amukeleki. Loko a vitaniwe leswaku a tihlamulela hikwalaho ko dlaya makwavo hi ndlela ya tihanyi, hi ku sihalala Kayini u hlamule Xikwembu a ku: “Šana hi mina mulanguteri wa makweru ke?” Hikwalaho ka xidyoho xa yena, Kayini u hlongoriwile “a ya ṭhama e tikweni ra Nod, e v̌ušeni [bya] Eden.” A nga kalanga a kombisa ku hundzuka loku humaka embilwini hikwalaho ka vugevenga bya yena, a a vilerisiwa ntsena hi nxupulo wa yena lowu n’wi faneleke.—Genesa 4:3-16.
14. Xana vutihlamuleri bya munhu hi xiyexe eka Xikwembu byi kombisiwe njhani emhakeni ya muprista lonkulu Heli ni vana va yena?
14 Vutihlamuleri bya munhu hi xiyexe eka Xikwembu nakambe byi kombisiwa emhakeni ya Heli, muprista lonkulu wa Israyele. Vana va yena Hofini na Finiyasi, a va ri vaprista lava tirhelaka, kambe n’wamatimu Josephus u vula leswaku, “a va ri ni nandzu wa vuhomboloki evanhwini, ni wa ku delela Xikwembu, naswona a va nga byi papalati vubihi byihi na byihi.” Vanhu lava “la’v̌o biha” a va nga ri na mhaka na yena Yehovha, a va ri ni mukhuva wo yiva swilo swo kwetsima, naswona a va ri ni nandzu wo endla manyala. (1 Samuwele 1:3; 2:12-17, 22-25) Leswi Heli a ri tata wa vona tlhelo muprista lonkulu wa Israyele, a ku ri mfanelo yakwe ku va tshinya, kambe ematshan’weni ya sweswo u lo va holovelanyana. Heli u ‘xixime vana va yena ku tlula Yehovha.’ (1 Samuwele 2:29) Yindlu ya Heli yi xupuriwile. Vana lava havambirhi va fe siku rin’we ni tata wa vona, naswona eku heteleleni nxaxamelo wa vona wa vuprista wu helele makumu. Xisweswo mhaka yi fike emakumu.—1 Samuwele 3:13, 14; 4:11, 17, 18.
15. Ha yini Yonatani n’wana Hosi Sawulo a nyikiwe hakelo?
15 Xikombiso lexi hambaneke hi ku helela xi vekiwe hi Yonatani n’wana Hosi Sawulo. Endzhakunyana ka loko Davhida a dlaye Goliyadi, “moya wa Yonatan wu namarela moya wa Davida,” kutani va endle ntwanano wa xinakulobye. (1 Samuwele 18:1, 3) Kumbexana, Yonatani a a swi xiyile leswaku moya wa Xikwembu a wu sukile eka Sawulo, kambe ku hisekela ka yena vugandzeri bya ntiyiso a ku hungutekanga. (1 Samuwele 16:14) Yonatani a nga byi kanakananga nikatsongo vulawuri bya Davhida lebyi a nyikiweke byona hi Xikwembu. Yonatani u xiye vutihlamuleri byakwe eka Xikwembu, naswona Yehovha u n’wi nyike hakelo hikwalaho ka mahanyelo ya yena lama xiximekaka hi ku tiyisekisa leswaku nxaxamelo wa ndyangu wa yena wu hambeta wu va kona ku ya fika eka switukulwana swo tala.—1 Tikronika 8:33-40.
Ku Tihlamulela eVandlheni Ra Vukreste
16. Xana Tito a a ri mani, naswona ha yini ku nga vuriwaka leswaku u tiendlele vito lerinene eka Xikwembu?
16 Matsalwa ya Vukreste ya Xigriki ma bumabumela vavanuna ni vavasati vo tala lava tiendleleke vito lerinene. Hi xikombiso, a ku ri ni Mukreste wa Mugriki loyi a a vitaniwa Tito. Ku ringanyetiwe leswaku u ve Mukreste hi nkarhi wa riendzo ro sungula ra Pawulo ra vurhumiwa ro ya eKipra. Tanihi leswi Vayuda ni vaproselita lava humaka eKipra swi nga ha endlekaka va ve eYerusalema hi nkarhi wa Pentekosta ya 33 C.E., Vukreste byi nga ha va byi fike exihlaleni lexi endzhakunyana ka kwalaho. (Mintirho 11:19) Hambiswiritano, Tito u tikombe a ri un’wana wa vatirhi-kulobye vo tshembeka va Pawulo. U fambe na Pawulo na Barnaba eriendzweni ro ya eYerusalema kwalomu ka 49 C.E., loko ku tlhantlhiwa mphikamakaneta leyikulu ya ku yimba. Mhaka ya leswaku Tito a a nga yimbanga yi engetele ntikelo eka mhaka ya Pawulo ya leswaku vanhu lava hundzukeleke eka Vukreste a va nga fanelanga va va ehansi ka Nawu wa Muxe. (Vagalatiya 2:1-3) Vutirheli lebyinene bya Tito bya bumabumeriwa eMatsalweni, naswona Pawulo u tsale papila leri huhuteriweke hi Xikwembu ri ya eka yena. (2 Vakorinto 7:6; Tito 1:1-4) Swi le rivaleni leswaku ku ya fika emakumu ka pfhumba ra yena ra laha misaveni, Tito u hambete a tiendlela vito lerinene eka Xikwembu.
17. Xana Timotiya u tiendlele vito ra njhani, naswona xikombiso lexi xi nga hi khumbha hi ndlela yihi?
17 Timotiya a a ri munhu un’wana la tiendleleke vito lerinene ngopfu eka Yehovha Xikwembu. Hambileswi Timotiya a a ri ni swiphiqo swo karhi swa rihanyo, u kombise ‘ripfumelo handle ka vukanganyisi’ naswona u ‘tirhe na Pawulo leswaku va yisa mahungu lamanene emahlweni.’ Hikwalaho muapostola u byele Vakreste-kulobye va le Filipiya a ku: “Ndzi hava un’wana loyi a fanaka na [Timotiya], loyi a hisekelaka ku mi pfuna hi mbilu hinkwayo ya yena.” (2 Timotiya 1:5; Vafilipiya 2:20, 22; 1 Timotiya 5:23) Hambiloko hi langutane ni ku tsana ka vumunhu ni miringo yin’wana, na hina hi nga va na rona ripfumelo leri nga riki na vukanganyisi naswona hi nga tiendlela vito lerinene ngopfu eka Xikwembu.
18. Xana Lidiya a a ri mani, naswona i moya wa njhani lowu a wu kombiseke?
18 Lidiya a a ri wansati la chavaka Xikwembu loyi swi nga rivaleni leswaku u tiendlele vito lerinene eka Xikwembu. Yena ni vandyangu wakwe a va ri exikarhi ka vanhu vo sungula le Yuropa lava amukeleke Vukreste hikwalaho ka ntirho wa Pawulo le Filipiya kwalomu ka 50 C.E. Lidiya u velekeriwe eTiyatira, kumbexana a a ri Muyuda wa muproselita, kambe swi nga ha endleka leswaku a ku ri ni Vayuda va nga ri vangani naswona ku nga ri na sinagoga eFilipiya. Yena swin’we ni vavasati van’wana lava tinyiketeleke a va hlengeletana ekusuhi ni nambu loko Pawulo a vulavula na vona. Hikwalaho, Lidiya u ve Mukreste naswona u sindzise Pawulo ni vanghana va yena leswaku va tshama na yena. (Mintirho 16:12-15) Malwandla lawa Lidiya a ma kombiseke ma ha ri xihlawulekisi xa Vakreste va ntiyiso.
19. Xana hi yihi mintirho leyinene leyi ha yona Dorkasi a tiendleleke vito lerinene eka Xikwembu?
19 Dorkasi a a ri wansati un’wana loyi a tiendleleke vito lerinene eka Yehovha Xikwembu. Loko a file, Petro u ye eYopa hi ku komberiwa hi vadyondzisiwa lava a va tshama kwale. Vavanuna vambirhi lava hlanganiseke Petro “va n’wi [yise] endlwini ya le henhla; tinoni hinkwato ti n’wi rhendzela, ti ri karhi ti rila, ti n’wi komba tinguvu ni swiambalo leswi Dorkasi a a swi rhunga loko a ha hanya.” Dorkasi u tlheriseriwe evuton’wini. Kambe, xana u fanele ku tsundzukiwa ntsena hikwalaho ka moya wakwe wo hanana? E-e. A a ri “mudyondzisiwa” naswona entiyisweni na yena a a hlanganyela entirhweni wo endla vadyondzisiwa. Hilaha ku fanaka vavasati lava nga Vakreste namuntlha va ‘tele mintirho leyinene ni ku hanana.’ Nakambe va swi tsakela swinene ku hlanganyela hi ku hiseka eku twariseni ka mahungu lamanene ya Mfumo ni ku endla vadyondzisiwa.—Mintirho 9:36-42; Matewu 24:14; 28:19, 20.
20. Hi swihi swivutiso leswi hi nga ha tivutisaka swona?
20 Bibele yi swi veka erivaleni leswaku matiko ni vanhu va fanele va tihlamulela eka Yehovha Hosi Leyikulu. (Sofoniya 1:7) Hikwalaho loko hi tinyiketerile eka Xikwembu hi nga ha tivutisa, ‘Xana ndzi ma languta njhani malunghelo ni vutihlamuleri lebyi ndzi nyikiweke hi Xikwembu? Xana ndzi tiendlela vito rihi eka Yehovha Xikwembu na Yesu Kreste?’
Hi Tihi Tinhlamulo Ta Wena?
◻ Xana u nga swi kombisa njhani leswaku tintsumi ni N’wana wa Xikwembu va tihlamulela eka Yehovha?
◻ Hi swihi swikombiso leswi nga eBibeleni leswi kombisaka leswaku matiko ma tihlamulela eka Xikwembu?
◻ Xana Bibele yi ri yini malunghana ni ku tihlamulela ka munhu hi xiyexe eka Xikwembu?
◻ I vamani vanhu van’wana lava boxiweke eBibeleni lava tiendleleke vito lerinene eka Yehovha Xikwembu?
[Xifaniso lexi nga eka tluka 10]
Yesu Kreste u tiendlele vito lerinene eka Tata wa yena wa le tilweni
[Xifaniso lexi nga eka tluka 15]
Ku fana na Dorkasi, namuntlha vavasati va Vakreste va tiendlela vito lerinene eka Yehovha Xikwembu
[Laha Xifaniso Xi Humaka Kona eka tluka 13]
The Death of Abel/The Doré Bible Illustrations/Dover Publications, Inc.