Titshege Hi Yehovha Leswaku U Kuma Nchavelelo

“Ingi Xikwembu lexi ku tiyisela ni ku chaveleriwa ku humaka ka xona, xi nga mi nyika n’wina hinkwenu ku anakanya loku fanaka, hi ku landza ntila wa Kriste Yesu.”—VARHOMA 15:5.

1. Ha yini siku rin’wana ni rin’wana ri tisa xilaveko lexi engetelekeke xa nchavelelo?

SIKU rin’wana ni rin’wana leri hundzaka ri tisa xilaveko lexi engetelekeke xa nchavelelo. Hilaha mutsari wa Bibele a vuleke hakona eka malembe ya 1 900 lama hundzeke, “swivumbiwa hinkwaswo swa konya hi ku vaviseka loku fanaka ni ku vaviseka ka ku veleka.” (Varhoma 8:22) Enkarhini wa hina ku “konya” ni ku “vaviseka” swi andze ku tlula rini na rini. Ku sukela eka Nyimpi yo Sungula ya Misava, vanhu va xanisiwe hi ntlhandlamano wa minkitsikitsi leyi vangiwaka hi tinyimpi, vugevenga ni makhombo ya ntumbuluko lawa hakanyingi ma vangiwaka hi ku onha ka vanhu misava.—Nhlavutelo 11:18.

2. (a) I mani loyi a faneleke a voniwa nandzu swinene hikwalaho ka makhombo lawa munhu a langutanaka na wona sweswi? (b) Hi yihi mhaka leyi hi nyikaka xisekelo xa nchavelelo?

² Hikwalaho ka yini ku ri ni ku xaniseka konghasi enkarhini wa hina? Loko yi hlamusela ku hlongoriwa ka Sathana ematilweni endzhaku ka ku velekiwa ka Mfumo hi 1914, Bibele ya hlamula: “Mi ni khombo, n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” (Nhlavutelo 12:12) Vumbhoni lebyi nga erivaleni bya ku hetiseka ka vuprofeta byebyo, byi kombisa leswaku ana se hi fike emakumu ya vulawuri bya Sathana byo homboloka. Mayana ndlela leyi swi chavelelaka ha yona ku tiva leswaku vutomi emisaveni ku nga ri khale byi ta tlhelela eka xiyimo xa byona xo rhula lexi a xi ri kona Sathana a nga si endla leswaku vatswari va hina vo sungula va xandzuka!

3. Hi rini laha vanhu a va nga wu pfumali nchavelelo?

³ Eku sunguleni, Muvumbi wa munhu u nyike mpatswa wo sungula wa vanhu ntanga wo saseka tanihi kaya ra vona. A wu ri endhawini leyi vitaniwaka Edeni, leswi vulaka “Ntsako” kumbe “Ku Tiphina.” (Genesa 2:8, nhlamuselo ya le hansi ya NW) Ku tlula kwalaho, Adamu na Evha va tiphine hi rihanyo leri hetisekeke va ri ni ntshembo wa ku nga fi. Anakanya hi tindhawu to tala leti a va ta va va antswise vuswikoti bya vona eka tona—vurimi, vutshila, vuaki, vuyimbeleri. Nakambe, anakanya hi mintirho hinkwayo ya ntumbuluko leyi a va ta va va yi dyondzile loko va ri karhi va hetisisa ntirho wa vona wo fuma misava ni ku yi endla paradeyisi. (Genesa 1:28) Hakunene, vutomi bya Adamu na Evha a byi ta va byi tele hi ntsako ni ku tiphina, ku nga ri hi ku konya ni ku vaviseka. Handle ko kanakana, a va nga ta wu lava nchavelelo.

4, 5. (a) Ha yini Adamu na Evha va tsandzekile eka ndzingo wo yingisa? (b) Swi tise ku yini leswaku vanhu va lava nchavelelo?

⁴ Hambiswiritano, lexi a xi laveka eka Adamu na Evha, a ku ri ku hlakulela rirhandzu leri enteke ni ku tlangela Tata wa vona wa le tilweni la nga ni musa. Rirhandzu ro tano a ri ta va ri va susumetele ku yingisa Xikwembu ehansi ka swiyimo hinkwaswo. (Ringanisa Yohane 14:31.) Lexi vavisaka, vatswari va hina vo sungula va tsandzeke ku yingisa Hosi ya vona Leyikulu ya ntiyiso, Yehovha. Ematshan’weni ya sweswo, va pfumele ku va ehansi ka vulawuri byo biha bya ntsumi leyi dyoheke, Sathana Diyavulosi. I Sathana loyi a ringeke Evha leswaku a dyoha ni ku dya mbhandzu lowu yirisiweke. Kutani Adamu na yena u dyohile loko a dye mbhandzu wa murhi lowu ha wona Xikwembu xi tsundzuxeke kahle xi ku: “Siku u dyaka, u ta fa.”—Genesa 2:17.

⁵ Hi ndlela leyi, mpatswa lowu dyoheke wu sungule ku fa. Loko xi humesa xigwevo xa rifu, Xikwembu xi tlhele xi byela Adamu xi ku: “Misav̌a yi ruketeriwa hikwalaho ka wena. U ta dya ŝa yona hi ku v̌av̌iseka hi masiku hikwawo ya ku hanya ka wena; yi ta ku mirisela mitwa ni mahlohlwe, u ta dya byanyi bya nhov̌a.” (Genesa 3:17, 18) Xisweswo Adamu na Evha va lahlekeriwe hi ntshembo wo endla misava leyi nga rimiwangiki yi va paradeyisi. Leswi se a va hlongoriwile aEdeni, a va boheka ku tirha hi matimba leswaku va kuma swakudya emisaveni leyi a yi rhukaniwile. Leswi vatukulu va vona va tswariweke va ri exiyin’weni xa ku dyoha ni ku fa, va sungule ku va ni xilaveko lexikulu xa nchavelelo.—Varhoma 5:12.

Xitshembiso Lexi Chavelelaka Xi Hetisisiwa

6. (a) Hi xihi xitshembiso lexi chavelelaka lexi Xikwembu xi xi endleke endzhaku ka ku wela ka vanhu exidyohweni? (b) Hi byihi vuprofeta lebyi Lameke a byi vuleke malunghana ni nchavelelo?

⁶ Loko a avanyisa muhlohloteri wa ku xandzuka ka vanhu, Yehovha u tikombise a ri ‘Xikwembu lexi chavelelaka.’ (Varhoma 15:5) U endle tano hi ku tshembisa ku rhumela “mbewu” leyi eku heteleleni a yi ta kutsula vana va Adamu eka vuyelo lebyi nga ni khombo lebyi tisiweke hi ku xandzuka ka Adamu. (Genesa 3:15, NW) Hi ku famba ka nkarhi, Xikwembu xi tlhele xi nyikela swikombiso swa nkutsulo lowu. Hi xikombiso, xi huhutele Lameke, ntukulu-xinguwe wa Adamu hi n’wana wa yena Seta, leswaku a profeta malunghana ni leswi n’wana wa jaha wa Lameke a nga ta swi endla: “Yoloyi o ta hi wisisa e mikaralweni ya hina, ne ntirweni lo’wo tika wa mav̌oko ya hina, lo’wu pfušiweke hikwalaho ka ku ruketeriwa ka misav̌a i Yehova.” (Genesa 5:29) Hi ku pfumelelana ni xitshembiso lexi, mufana loyi u thyiwe Nowa, leswi ku twisisiwaka leswaku swi vula “Ku Wisa” kumbe “Nchavelelo.”

7, 8. (a) Hi xihi xiyimo lexi endleke Yehovha a tisola hi leswi a vumbeke munhu, naswona xana A a tiyimisele ku endla yini hikwalaho ka sweswo? (b) Xana Nowa u hanye hi ku landza nhlamuselo ya vito rakwe hi ndlela yihi?

⁷ Hi nkarhi lowu fanaka, Sathana a a ri karhi a tikumela valandzeri exikarhi ka tin’wana ta tintsumi ta le tilweni. Ti tiambexe mimiri ya vanhu kutani ti teke vatukulu va Adamu va xisati vo saseka leswaku va va vasati va tona. Vuxaka byo tano lebyi nga riki bya ntumbuluko byi endle leswaku vanhu va ya va onhaka swinene ni ku tswala rixaka ra Tinefelimi leri nga xi chaviki Xikwembu, “swihontlovila,” leswi tateke misava hi madzolonga. (Genesa 6:1, 2, 4, 11; Yuda 6) “Kutani Yehova a v̌ona leŝaku ku biha ka v̌anhu ku kurile misav̌eni . . . Kutani Yehova a v̌ilela hi leŝi a nga v̌umba v̌anhu e misav̌eni, a v̌av̌iseka ngopfu e mbilwini ya yena.”—Genesa 6:5, 6.

⁸ Yehovha a a tiyimisele ku herisa misava yoleyo yo homboloka hi ndhambi ya misava hinkwayo, kambe u rhange hi ku byela Nowa leswaku a aka ngalava yo hlayisa vutomi. Xisweswo, rixaka ra vanhu ni tinxaka ta swiharhi ti ponisiwile. Mawaku ndlela leyi Nowa ni ndyangu wakwe va faneleke va ntshunxeke ha yona endzhaku ka Ndhambi loko va huma engalaveni va nghena emisaveni leyi basisiweke! Wa nga vona ndlela leyi a swi chavelela ha yona ku kuma leswaku ku rhukaniwa ka misava ku herisiwile, ku endle leswaku ntirho wa vurimi wu olova swinene! Hakunene, vuprofeta bya Lameke byi hetisekile, naswona Nowa u hanye hi ku ya hi nhlamuselo ya vito rakwe. (Genesa 8:21) Tanihi nandza wa Xikwembu la tshembekaka, Nowa a a ri xitirho lexi tiseke ‘nchavelelo’ wo karhi eka vanhu. Hambiswiritano, nkucetelo wo biha wa Sathana ni tintsumi takwe leti nga madimona, a wu helanga hi nkarhi wa Ndhambi, hikuva vanhu va ya emahlweni va konya hi ku tikeriwa hi xidyoho, vuvabyi ni rifu.

Un’wana La Tlulaka Nowa Hi Vukulu

9. Xana Yesu Kreste u tikombe a ri mupfuni ni muchaveleri wa vanhu lava hundzukaka hi ndlela yihi?

⁹ Eku heteleleni, eku heleni ka malembe ya kwalomu ka 4 000 ya matimu ya munhu, Mbewu leyi tshembisiweke yi fikile. Hi ku susumetiwa hi rirhandzu lerikulu ro rhandza vanhu, Yehovha Xikwembu u rhumele N’wana wakwe la tswariweke a ri swakwe emisaveni leswaku a ta fa tanihi nkutsulo wa vanhu lava dyoheke. (Yohane 3:16) Yesu Kreste u tisa ntshunxeko lowukulu eka vadyohi lava hundzukaka lava kombisaka ripfumelo eka rifu rakwe ra gandzelo. Hinkwavo lava nyiketelaka vutomi bya vona eka Yehovha kutani va va vadyondzisiwa lava khuvuriweke va N’wana wa yena va kuma ku phyuphya ni nchavelelo lowu nga heriki. (Matewu 11:28-30; 16:24) Ku nga khathariseki ku nga hetiseki ka vona, va kuma ntsako lowukulu hi ku tirhela Xikwembu hi ripfalo leri baseke. Mayana ndlela leyi swi chavelelaka ha yona ku tiva leswaku loko va hambeta va kombisa ripfumelo eka Yesu, va ta nyikiwa vutomi lebyi nga heriki! (Yohane 3:36; Vaheveru 5:9) Loko va endla xidyoho lexikulu hikwalaho ka ku tsana ka vona, va ni mupfuni, kumbe muchaveleri, ku nga Hosi Yesu Kreste la pfuxiweke eku feni. (1 Yohane 2:1, 2) Hi ku vula xidyoho xexo ni ku teka magoza ya Matsalwa ya leswaku va papalata ku va vaendli va xidyoho, va kuma ntshunxeko, hi ku tiva leswaku ‘Xikwembu xa tshembeka naswona xi lulamile lerova xi ta va rivalela xidyoho xa vona.’—1 Yohane 1:9; 3:6; Swivuriso 28:13.

10. Xana hi dyondza yini eka mahlori lawa Yesu a ma endleke loko a ha ri emisaveni?

¹⁰ Loko a ha ri emisaveni, Yesu nakambe u tlhele a phyuphyisa vanhu hi ku ntshunxa lava nga ni madimona, hi ku tshungula vuvabyi bya tinxaka-nxaka na hi ku pfuxa vafi lava rhandzekaka a va tlherisela evuton’wini. Ina, mahlori wolawo a ma vuyerisa swa xinkarhana, tanihi leswi lava va kumeke nkateko wo tano endzhaku va dyuharile va tlhela va fa. Hambiswiritano, Yesu a a kombetela eka mikateko ya nkarhi lowu taka leyi nga heriki leyi a nga ta yi chululela vanhu hinkwavo. Leswi sweswi a nga Hosi ya matimba ya le tilweni, hi ku hatlisa u ta endla leswikulu ku tlula ku hlongola madimona ntsena. U ta ma nghenisa ekheleni swin’we ni murhangeri wa wona, Sathana, va nga ha koti ku endla nchumu. Kutani ku Fuma ka Gidi ra Malembe loku kwetsimaka ka Kreste ku ta sungula.—Luka 8:30, 31; Nhlavutelo 20:1, 2, 6.

11. Ha yini Yesu a tivule “Hosi ya Savata”?

¹¹ Yesu u vule leswaku a ri “Hosi ya Savata,” naswona vutshunguri bya yena byo tala a byi endliwa hi siku ra Savata. (Matewu 12:8-13; Luka 13:14-17; Yohane 5:15, 16; 9:14) Hikwalaho ka yini a endle tano? Phela, Savata a yi ri xiphemu xa Nawu wa Xikwembu lowu xi wu nyikeke Vaisrayele naswona xisweswo wu tirhe tanihi “ndzhuti ntsena wa leswo saseka leswi nga ta humelela.” (Vaheveru 10:1) Masiku ya tsevu lawa ku tirhiwaka ha wona ma hi tsundzuxa malembe ya 6 000 lama hundzeke lawa ha wona munhu a ri hlonga ra vulawuri bya Sathana lebyi tshikilelaka. Siku ra Savata eku heleni ka vhiki ri hi tsundzuxa ku wisa lowu chavelelaka loku vanhu va nga ta ku kuma hi nkarhi wa ku Fuma ka Gidi ra Malembe ka Nowa Lonkulu, Yesu Kreste.—Ringanisa 2 Petro 3:8.

12. Hi yihi mintokoto leyi chavelelaka leyi hi nga yi langutelaka?

¹² Wa nga vona ntshunxeko lowu vafumiwa va laha misaveni va mfumo wa Kreste va nga ta va na wona eku heteleleni, loko va tikuma va ntshunxeke hilaha ku heleleke eka nkucetelo wo biha wa Sathana! Nchavelelo lowu engetelekeke wu ta va kona loko ku vabya ka vona ka le mirini, ka mintlhaveko ni ka mianakanyo ku ta tshunguriwa. (Esaya 65:17) Kutani, anakanya hi nyanyuko lowu va nga ta va na wona loko va sungula ku amukela varhandziwa va vona lava va vuyaka eku feni! Hi tindlela leti Xikwembu “xi ta sula mihloti hinkwayo emahlweni ya vona.” (Nhlavutelo 21:4) Loko vuyelo bya gandzelo ra nkutsulo ra Yesu byi ya byi tirhisiwa, vafumiwa lava yingisaka va Mfumo wa Xikwembu va ta hetiseka, va ntshunxeka hi ku helela eka vuyelo hinkwabyo byo biha bya xidyoho xa Adamu. (Nhlavutelo 22:1-5) Kutani, Sathana u ta ntshunxiwa swa “nkarhinyana.” (Nhlavutelo 20:3, 7) Vanhu hinkwavo lava seketelaka hi ku tshembeka vuhosi bya Yehovha byo luluma, va ta nyikiwa vutomi lebyi nga heriki. Anakanya ntsako lowu nga hlamuselekiki swonghasi ni ntshunxeko lowu nga ta va kona loko va “ntshunxiwa . . . evuhlongeni bya leswo bola”! Xisweswo vanhu lava yingisaka va ta tiphina hi “ku ntshunxeka loko kwetsima loku nga ka vana va Xikwembu” hilaha ku heleleke.—Varhoma 8:21.

13. Ha yini Vakreste hinkwavo va ntiyiso va lava nchavelelo lowu Xikwembu xi wu nyikelaka?

¹³ Sweswi, ha ha ya emahlweni hi khomiwa hi ku konya ni ku vaviseka loku tolovelekeke eka vanhu hinkwavo lava hanyaka exikarhi ka mafambiselo lawa yo biha ya Sathana. Ku andza ka vuvabyi ni ku pfilunganyeka ka mintlhaveko, ku khumba vanhu va tinxaka hinkwato, ku katsa ni Vakreste vo tshembeka. (Vafilipiya 2:25-27; 1 Vatesalonika 5:14) Ku engetela kwalaho, tanihi Vakreste hakanyingi hi langutana ni ku hlekuriwa ni ku xanisiwa loku Sathana a hi hlaselaka ha kona hikwalaho ka leswi hi ‘yingisaka Xikwembu tanihi hi mufumi ku tlula vanhu.’ (Mintirho 5:29) Xisweswo, loko hi ta swi kota ku tiyisela ku endla ku rhandza ka Xikwembu ku fikela emakun’wini ya misava ya Sathana, hi lava nchavelelo, mpfuno ni matimba lama xi ma nyikelaka.

Ndhawu Yo Kuma Nchavelelo Eka Yona

14. (a) Hi xihi xitshembiso lexi Yesu a xi endleke hi vusiku bya le mahlweni ka rifu rakwe? (b) I yini lexi lavekaka loko hi ta vuyeriwa swinene eka nchavelelo wa moya lowo kwetsima wa Xikwembu?

¹⁴ Hi vusiku bya le mahlweni ka rifu rakwe, Yesu u swi veke erivaleni eka vadyondzisiwa va yena vo tshembeka leswaku ku nga ri khale u ta va siya kutani a tlhelela eka Tata wakwe. Leswi swi va karhatile ni ku va vavisa. (Yohane 13:33, 36; 14:27-31) Hi ku xiya xilaveko xa vona xa nchavelelo lowu hambetaka, Yesu u tshembisile: “Ndzi ta kombela Tatana, kutani yena ú ta mi nyika Muchaveleri un’wana, loyi a nga ta va na n’wina hilaha ku nga heriki.” (Yohane 14:16) Laha Yesu a vulavula hi moya lowo kwetsima wa Xikwembu, lowu chululeriweke ehenhla ka vadyondzisiwa vakwe endzhaku ka 50 wa masiku a pfuxiwile eku feni.a Hi xikombiso, moya wa Xikwembu wu va chavelerile loko va langutane ni miringo ni ku va tiyisa leswaku va ya emahlweni va endla ku rhandza ka Xikwembu. (Mintirho 4:31) Hambiswiritano, mpfuno wolowo a wu fanelanga wu tekiwa tanihi nchumu lowu tiendlekelaka. Leswaku a vuyeriwa swinene, Mukreste un’wana ni un’wana u fanele a hambeta a khongelela mpfuno wa nchavelelo lowu Xikwembu xi wu nyikaka hi ku tirhisa moya wa xona lowo kwetsima.—Luka 11:13.

15. Hi tihi tin’wana ta tindlela leti Yehovha a hi nyikaka nchavelelo ha tona?

¹⁵ Ndlela yin’wana leyi Xikwembu xi nyikelaka nchavelelo ha yona i ku tirhisa Rito ra xona, ku nga Bibele. Pawulo u tsarile: “Hinkwaswo leswi tsariweke hi lava khale, swi tsariwile leswaku hi dyondza ha swona, ni leswaku hi va ni ku langutela, hikwalaho ka ku tiyisela ni ku chaveleriwa loku hi ku kumaka eMatsalweni.” (Varhoma 15:4) Leswi swi kombisa xilaveko xa hina xo dyondza ni ku anakanyisisa nkarhi na nkarhi hi swilo leswi tsariweke eBibeleni ni le tibukwini leti sekeriweke eBibeleni. Nakambe hi fanele hi va kona nkarhi na nkarhi eminhlanganweni ya Vukreste, laha ku nyikeriwaka timhaka leti chavelelaka leti humaka eRitweni ra Xikwembu. Xin’wana xa swikongomelo-nkulu swa ku hlengeletana ko tano i ku khutazana.—Vaheveru 10:25.

16. Xana malunghiselelo ya Xikwembu ya ku hi chavelela ma fanele ma hi susumetela ku endla yini?

¹⁶ Papila ra Pawulo leri yaka eka Varhoma ri ya emahlweni ri kombisa vuyelo lebyinene lebyi hi byi kumaka hi ku tirhisa malunghiselelo ya Xikwembu lama chavelelaka. Pawulo u tsarile: “Ingi Xikwembu lexi ku tiyisela ni ku chaveleriwa ku humaka ka xona, xi nga mi nyika n’wina hinkwenu ku anakanya loku fanaka, hi ku landza ntila wa Kriste Yesu, ku endlela leswaku hinkwenu mi va mbilu yin’we ni nomo wun’we, mi dzunisa Xikwembu, Tata wa Hosi ya hina Yesu Kriste.” (Varhoma 15:5, 6) Ina, hi ku tirhisa swinene malunghiselelo ya Xikwembu lama chavelelaka, hi ta fana swinene ni Murhangeri wa hina la nga ni xivindzi, Yesu Kreste. Leswi swi ta hi susumetela ku hambeta hi tirhisa milomu ya hina leswaku hi dzunisa Xikwembu entirhweni wa hina wa ku nyikela vumbhoni, eminhlanganweni ya hina, eka mabulo ya hina swin’we ni vapfumeri-kulorhi ni le swikhongelweni swa hina.

eMinkarhini Ya Miringo Leyikulu

17. Xana Yehovha u n’wi chavelele njhani N’wana wakwe, naswona ku ve ni vuyelo byihi?

¹⁷ Yesu u khomiwe hi “ku kanakana lokukulu” ni “gome lerikulu” hi vusiku bya le mahlweni ka rifu rakwe leri twisaka ku vava. (Matewu 26:37, 38) Hi loko a siya vadyondzisiwa va yena a ya ekulenyana ivi a khongelela mpfuno eka Tata wakwe. “Ú yingisiwile hikwalaho ka xichavo xa yena.” (Vaheveru 5:7) Bibele yi vika leswaku “ntsumi yo huma etilweni yi humelela eka [Yesu], yi n’wi tiyisa.” (Luka 22:43) Ndlela ya xivindzi ni vurhena leyi Yesu a langutaneke ni vakaneti vakwe ha yona i vumbhoni bya leswaku ndlela ya Xikwembu ya ku chavelela N’wana wa xona a yi tirha swinene.—Yohane 18:3-8, 33-38.

18. (a) Hi wihi nkarhi lowu a wu tika swinene evuton’wini bya muapostola Pawulo? (b) Xana hi nga va chavelela njhani vakulu lava tirhaka hi matimba, lava nga ni ntwela-vusiwana?

¹⁸ Muapostola Pawulo na yena a a langutane ni minkarhi ya miringo yo tika. Hi xikombiso, vutirheli byakwe aEfesa a byi fambisana ni “mihloti, ni miringo leyi yi [n’wi] humeleleke hi ku tshamiwa xikungu hi Vayuda.” (Mintirho 20:17-20) Eku heteleleni, Pawulo u sukile aEfesa endzhaku ka loko vaseketeri va xikwembu-kati Artemi va pfuxe dzolonga emutini hikwalaho ka ntirho wa yena wo chumayela. (Mintirho 19:23-29; 20:1) Loko Pawulo a ri karhi a ya en’walungwini emutini wa Trowasi, xilo xin’wana a xi n’wi vilerisa swinene. Loko dzolonga ri nga si humelela aEfesa, a a kume xiviko lexi nga tsakisiki. Vandlha lerintshwa ra le Korinto a ri hlaseriwe hi ku avana, naswona a ri pfumelela vuoswi. Kutani loko a ri aEfesa, Pawulo u tsale papila ra ndzayo ya matimba a ri ni ntshembo wa ku lulamisa xiyimo lexi. Leswi a swi nga olovi eka yena ku swi endla. Eka papila ra yena ra vumbirhi u swi paluxile leswi a ku: “Ndzi mi tsalerile, ndzi ri karhi ndzi twa ku vava ngopfu, hi mbilu leyi karhatekaka swinene, ni mihloti leyo tala.” (2 Vakorinto 2:4) Ku fana na Pawulo, vakulu lava nga ni ntwela-vusiwana, a swi va oloveli ku nyika ndzayo ni xisolo, hi mhaka ya leswi na vona va ku tivaka swinene ku tsana ka vona. (Vagalatiya 6:1) Kutani, onge hi nga va lava chavelelaka eka lava rhangelaka exikarhi ka hina hi ku amukela ndzayo ya rirhandzu, leyi sekeriweke eBibeleni.—Vaheveru 13:17.

19. Ha yini Pawulo a suke eTrowasi a ya eMakedoniya, naswona xana u hetelele a wu kumise ku yini nchavelelo?

¹⁹ Loko a ri aEfesa, Pawulo a nga tsalelanga vamakwavo va le Korinto ntsena, kambe u tlhele a rhumela na Tito leswaku a ya va pfuna, a a n’wi lerise ku vuya a ta n’wi byela leswaku va angule njhani eka papila rero. Pawulo a tiyimisele ku hlangaveta Tito eTrowasi. Loko a ri kwalaho Pawulo u katekisiwe hi malunghelo yo endla vadyondzisiwa. Kambe leswi a swi swi kotanga ku susa ku vilela kakwe hikuva Tito a a nga si fika. (2 Vakorinto 2:12, 13) Hiloko a teka riendzo a ya eMakedoniya, hi ntshembo wo hlangana na Tito kwale. Ku karhateka ka Pawulo ku engeteriwe hi ku kanetiwa ka vutirheli byakwe. Wa hlamusela: “Loko ndzi fikile eMakedoniya, a ndzi kumanga ku wisa nikutsongo; a ndzi ri eku xanisekeni matlhelo hinkwawo: a ndzi rhendzeriwe hi timholovo, hala ni hala, kutani a ndzi ri ni ku chava embilwini. Kambe Xikwembu lexi chavelelaka lava heleke matimba, xi ndzi chavelerile hi ku fika ka Tito.” (2 Vakorinto 7:5, 6) Mawaku nchavelelo wonghasi loko Tito eku heteleleni a fikile ku ta byela Pawulo malunghana ni n’wangulo lowunene wa Vakorinto eka papila rakwe!

20. (a) Hilaha swi veke hakona eka Pawulo, hi yihi ndlela yin’wana ya nkoka leyi Yehovha a nyikaka nchavelelo ha yona? (b) I yini leswi nga ta kambisisiwa eka xihloko lexi landzelaka?

²⁰ Ntokoto wa Pawulo wa chavelela eka malandza ya Xikwembu namuntlha, lawa yo tala ya wona na wona ma langutanaka ni miringo leyi ma endlaka ma “hel[a] matimba,” kumbe ma “khomiwa hi gome.” (Phillips) Ina, ‘Xikwembu lexi nyikaka nchavelelo’ xi tiva swilaveko swa hina ha un’we-un’we naswona xi nga hi tirhisa leswaku hi chavelelana, hilaha Pawulo a kumeke nchavelelo hakona eka xiviko xa Tito, xa moya wa ku hundzuka wa Vakorinto. (2 Vakorinto 7:11-13) Eka xihloko xa hina lexi landzelaka, hi ta kambisisa n’wangulo lowunene wa Pawulo eka Vakorinto ni ndlela leyi wu nga hi pfunaka ha yona leswaku hi nyikela chavelelo wa Xikwembu namuntlha hi ndlela leyi humelelaka.

[Nhlamuselo ya le hansi]

Xana U Nga Hlamula?

◻ Xana swi tise ku yini leswaku vanhu va lava nchavelelo?

◻ Xana Yesu u tikombise a ri lonkulu eka Nowa hi ndlela yihi?

◻ Ha yini Yesu a tivule “Hosi ya Savata”?

◻ Xana Xikwembu xi wu nyikela njhani nchavelelo namuntlha?

[Mepe/Xifaniso lexi nga eka tluka 10]

(Leswaku u vona rungula leri hleriweke hi ku helela, vona nkandziyiso wa kona)

Pawulo u kume nchavelelo lowukulu eka xiviko xa Tito malunghana ni Vakorinto

MAKEDONIYA

Filipiya

GREECE

Korinto

ASIYA

Trowasi

Efesa