Vantshwa Lava Anakanyaka Muvumbi Wa Vona

“Anakanya Muv̌umbi wa wena hi masiku ya v̌untŝha bya wena.”—EKLESIASTA 12:1.

1. Hi wahi marito lama vuriweke hi mufana wa malembe ya 11 hi vukhale lama kombisaka leswaku Muvumbi wa hina i wa xiviri eka yena?

SWA tsakisa swinene loko vantshwa va vulavula ni ku endla hi ndlela leyi kombisaka leswaku va anakanya Yehovha Xikwembu a ri munhu wa xiviri loyi va n’wi xiximaka ni ku lava ku n’wi tsakisa! Mufana wa malembe ya 11 hi vukhale u te: “Loko ndzi ri ndzexe ndzi languta hi le fasitereni, ndzi vona vuxongi bya ntumbuluko wa Yehovha. Kutani ndzi anakanya ndlela leyi Paradeyisi yi nga ta va yi saseke ha yona enkarhini lowu taka ni ndlela leyi ndzi nga ta khoma-khoma swiharhi ha yona.” (Esaya 11:6-9) U engeterile a ku: “Loko ndzi ri ndzexe, ndza khongela eka Yehovha. Ndza swi tiva leswaku a nge ndzi hlundzukeli loko ndzi vulavula na yena minkarhi hinkwayo. Ndza swi tiva leswaku minkarhi hinkwayo u va a ndzi langutile.” Xana Muvumbi wa hina i wa xiviri eka wena tanihi laha a nga hakona eka mufana loyi?

Xikwembu I Xa Xiviri Eka Wena Hi Ndlela Yihi?

2. (a) Xana Muvumbi wa wena a nga va wa xiviri eka wena hi ndlela yihi? (b) Hi xihi xiphemu lexi vatswari va nga vaka na xona eku pfuneni ka vana va vona leswaku va twisisa leswaku Xikwembu i munhu wa xiviri?

² Leswaku Yehovha ni switshembiso swa yena a va wa xiviri eka wena, u fanele u rhanga u dyondza hi yena ni vumundzuku byo saseka lebyi a ku nyikaka byona emisaveni leyintshwa ya ku lulama leyi hlamuseriwaka hi Bibele. (Nhlavutelo 21:3, 4) Loko vatswari va wena va ku dyondzisile malunghana ni swilo leswi, u ni xivangelo xo va u tlangela hikuva leswi swa ku pfuna leswaku u yingisa xileriso lexi huhuteriweke, lexi nge: “Anakanya Muv̌umbi wa wena.” (Eklesiasta 12:1, xiitaliki i xerhu.) Malunghana ni ndzetelo wa yena wa le vuhlangini wa vatswari, muntshwa un’wana u te: “Yehovha wa khathala hi xin’wana ni xin’wana evuton’wini minkarhi hinkwayo. Lexi xi ve xona xilotlelo xa mina xo anakanya hi Muvumbi wa mina.” Nhlangwana yin’wana yi te: “Ndzi ta nkhensa vatswari va mina hilaha ku nga heriki hikwalaho ka leswi va ndzi dyondziseke leswaku Yehovha i munhu wa xiviri. Va ndzi kombe ndlela yo n’wi rhandza naswona va ndzi byele hi mayelana ni ntsako wa ku n’wi tirhela nkarhi hinkwawo.”

3, 4. I yini lexi nga ku pfunaka leswaku u anakanya hi Yehovha tanihi munhu wa xiviri?

³ Kambe, vo tala swa va tikela ku anakanya Xikwembu xi ri munhu wa xiviri loyi a va rhandzaka. Xana swi tano ni le ka wena? Muntshwa un’wana u pfuniwe leswaku a anakanya hi Xikwembu xi ri xa xiviri hi nhlamuselo leyi nga eka The Watchtower: “Leswaku miri wa Yehovha Xikwembu wu kule ku fikela kwihi, a hi swi tivi.” Ina, vukulu bya Xikwembu a byi titsheganga hi mpimo kumbe xivumbeko xa xona, hilaha xivulwa lexi landzelaka eka Watchtower yoleyo xi vuleke hakona xi ku: “Vukulu bya xona bya xiviri byi titshege hi ndlela leyi Xikwembu xi nga ha yona,” entiyisweni, i Xikwembu xo tshembeka, xa ntwela-vusiwana, xa rirhandzu, lexi rivalelaka.a (Eksoda 34:6; Deteronoma 32:4; Pisalema 86:5; Yakobo 5:11) Xana u anakanya Yehovha a ri munhu wo tano, munghana la tshembekaka loyi u nga vaka ni vuxaka bya risima na yena?—Esaya 41:8, NW; Yakobo 2:23.

⁴ Yesu u pfune valandzeri vakwe vo sungula leswaku va tiphina hi ku va ni vuxaka ni Xikwembu. Xisweswo, loko muapostola Yohane a tsala mayelana ni ku langutela ka yena ku pfuxeriwa evuton’wini bya le tilweni, Yohane u te: “Hi ta fana na [Xikwembu], hikuva hi ta [xi] vona hi xiviri xa [xona].” (1 Yohane 3:2; 1 Vakorinto 15:44) Namuntlha vantshwa na vona va nga pfuniwa ku anakanya Xikwembu leswaku i munhu wa xiviri, loyi va nga swi kotaka ku n’wi tiva ku antswa hambileswi va nga ta ka va nga n’wi voni hi xiviri. Jaha rin’wana ri te: “Vatswari va mina va ndzi pfunile leswaku ndzi anakanya Yehovha hi ku ndzi vutisa swivutiso swo tala, swo tanihi leswi, ‘Xana Yehovha a a ta vula yini? A wu ta hlamusela njhani hi marito ya wena n’wini? Xana sweswo swi vula yini?’” Xana swivutiso swo tanihi leswi a swi hi endli hi anakanya hi vuxaka bya hina bya munhu hi xiyexe ni Xikwembu?

Leswi Ku Anakanya Swi Vulaka Swona

5. Hi swihi swikombiso swa Bibele leswi kombisaka leswaku ku anakanya hi munhu un’wana swi katsa leswi tlulaka ku tsundzuka vito ra yena?

⁵ Ku yingisa xileriso lexi nge: “Anakanya Muv̌umbi wa wena,” swi vula ku tlula ku ehleketa ntsena hi Yehovha. Swi katsa ku teka goza, ku endla leswi tsakisaka yena. Loko xigevenga xi kombele Yesu xi ku: “Ndzi anakanye, loko u nghena eMfun’weni wa wena,” a xi lava leswaku Yesu a endla leswi engetelekeke ku tlula ku tsundzuka vito ra xona. A xi lava leswaku Yesu a teka goza, a xi pfuxa eku feni. (Luka 23:42, xiitaliki i xerhu.) Hilaha ku fanaka, mubohiwa Yosefa a a langutele leswaku a endleriwa xo karhi loko a kombela mucheleri wa vhinyo wa Faro leswaku a n’wi anakanya eka Faro. Nakambe loko Yobo a kombele Xikwembu a ku: “Nḍi anakany[e],” Yobo a a kombela leswaku enkarhini wun’wana lowu taka, Xikwembu xi ta teka goza ro n’wi pfuxa eku feni.—Yobo 14:13, xiitaliki i xerhu; Genesa 40:14, 23.

6. Xana rito ra Xiheveru leri vulaka ku “anakanya” ri hlamusela ku rhandza nchumu wo karhi kumbe munhu la tsundzukiwaka hi ndlela yihi?

⁶ Buku yin’wana yi vula leswaku rito ra Xiheveru leri hundzuluxeriweke va ku, “anakanya” hakanyingi ri vula “rirhandzu ra mianakanyo swin’we ni xiendlo lexi fambisanaka ni ku tsundzuka.” Nhlamuselo ya “rirhandzu” eka rito “anakanya” hi nga yi xiya eka marito lama huweleriweke hi “v̌unyingi” lebyi a byi ri emananga: “[Hi anakanya, NW] tinhlampfi leti hi ṭhamaka hi ti dya ntsena e Egipta.” Hilaha Yobo a kombeleke hakona leswaku Xikwembu xi n’wi anakanya hi rirhandzu, xisweswo Hezekiya, Nehemiya, Davhida ni mupisalema un’wana loyi vito ra yena ri nga boxiwangiki na vona va kombele leswaku Yehovha a va anakanya hi rirhandzu hi ku tsundzuka vutshembeki bya vona.—Tinhlayo 11:4, 5; 2 Tihosi 20:3; Nehemiya 5:19; 13:31; Pisalema 25:7; 106:4.

7. Loko hi anakanya Xikwembu hi rirhandzu, xana leswi swi ta khumba mahanyelo ya hina hi ndlela yihi?

⁷ Xisweswo hi nga tivutisa, ‘Xana hi anakanya Muvumbi wa hina hi rirhandzu ni ku papalata xin’wana ni xin’wana lexi nga ha n’wi twisaka ku vava?’ Muntshwa un’wana u te: “Manana u ndzi pfunile leswaku ndzi lemuka leswaku Yehovha u ni mintlhaveko, naswona ku sukela evuhlangini bya mina, a ndzi swi xiya leswaku swiendlo swa mina a swi n’wi khumba.” (Pisalema 78:40-42) Un’wanyana u te: “A ndzi swi tiva leswaku swiendlo swa mina swi nga ha pfuna kumbe swi sivela ku hlamuriwa ka mphikamakaneta leyi Sathana a yi endleke eka Yehovha. Ndzi lave leswaku mbilu ya Yehovha yi tsaka, sweswo swi ndzi pfunile naswona swa ha ndzi pfuna ni namuntlha.”—Swivuriso 27:11.

8. (a) Xana hi loko hi lava yini lexi nga ta kombisa leswaku hi anakanya Yehovha hi rirhandzu? (b) I swivutiso swihi leswi vantshwa va nga ta swi anakanyisisa hi vutlharhi?

⁸ Ina, emisaveni leyi yo homboloka, a hi minkarhi hinkwayo swi olovaka ku anakanya Yehovha hi ku hlanganyela hi ku helela entirhweni lowu n’wi tsakisaka ngopfu. Kambe swi nga va swinene swonghasi loko wo tekelela Timotiya muntshwa wa lembe-xidzana ro sungula—swin’we ni magidi ya vantshwa lava chavaka Xikwembu namuntlha—hi ku nghenela ntirho wa Vukreste wa nkarhi hinkwawo u va mutirheli la nga phayona! (Mintirho 16:1-3; 1 Vatesalonika 3:2) Hambiswiritano, xivutiso xi nga ha tlakuka, Xana u ta swi kota ku tiwundla evutirhelini bya vuphayona? Nakambe loko u nghenela vukati, xana u ta va u ri na byona vutshila byo wundla va ndyangu wa wena? (1 Timotiya 5:8) Leswi i swivutiso swa nkoka, naswona i swa nkoka leswaku u anakanyisisa swinene ha swona.

Dyondzo Leyi Nga Ni Xikongomelo

9. Hi xihi xiboho lexi vantshwa va langutaneke na xona malunghana ni dyondzo ya misava?

⁹ Leswi vutomi byi yaka byi rharhangana, dyondzo leyi engetelekeke yi nga ha laveka leswaku u ta kuma ntirho lowu u faneleke ku tiwundla ha wona entirhweni wa vuphayona. U nga ha va u swi xiyile leswaku hambi van’wana lava nga ni dyondzo ya le yunivhesiti va boheke ku engetela tidyondzo ta vona leswaku va kuma vutshila lebyintshwa lebyi languteriwaka hi vathori namuntlha. Hikwalaho, xana i dyondzo yo tanihi kwihi leyi n’wina vantshwa lava lavaka ku tsakisa Xikwembu mi faneleke mi yi kuma? Xiboho xi fanele xi endliwa hi mfanelo hi ku anakanya xileriso lexi huhuteriweke lexi nge: “Anakanya Muv̌umbi wa wena.”

10. Hi yihi dyondzo leyinene ngopfu leyi hi nga yi kumaka?

¹⁰ Ina, u nga ha lava ku kuma ni leyi hambi valawuri vo tala va misava va yi vonaka yi ri dyondzo leyinene—ku nga leyi kumiwaka hi ku dyondza Rito ra Xikwembu hi vukheta. Johann Wolfgang von Goethe, mutsari wa Mujarimani u te: “Loko [vanhu] va ya va tlhariha, va fanele nakambe va tirhisa Bibele ngopfu leswaku yi va masungulo tlhelo xitirho xa dyondzo.” Ina, dyondzo ya Bibele yi ta ku endla leswaku u hlomela vutomi hi ndlela leyinene ku tlula dyondzo yihi na yihi yin’wana!—Swivuriso 2:6-17; 2 Timotiya 3:14-17.

11. (a) Hi wihi ntirho wa nkoka ngopfu lowu hi nga wu endlaka? (b) Ha yini muntshwa un’wana a hlawule ku kuma mpimo wo karhi wa dyondzo?

¹¹ Tanihi leswi vutivi bya Xikwembu byi nyikaka vutomi, ntirho wa risima lowu u nga wu endlaka namuntlha i ku avela van’wana vutivi byebyo. (Swivuriso 3:13-18; Yohane 4:34; 17:3) Hambiswiritano, leswaku u endla leswi hilaha ku humelelaka, u fanele u va la dyondzisiweke tindlela tin’wana ta nkoka. U fanele u kota ku anakanya kahle, ku vulavula khwatsi, ku hlaya ni ku tsala kahle—vutshila lebyi dyondzisiwaka exikolweni. Hikwalaho endla tidyondzo ta wena ta xikolo hi ku tiyimisela, hilaha Tracy, muntshwa wa le Florida, U.S.A. a endleke hakona, loyi a fundzhiweke loko a thwasa exikolweni xa le henhla. U phofule ntshembo wakwe a ku: “Minkarhi hinkwayo a ndzi tivekele pakani yo va nandza wa nkarhi hinkwawo wa Xikwembu xa mina Yehovha, naswona ndza tshemba leswaku dyondzo ya mina yi ta ndzi pfuna leswaku ndzi fikelela pakani leyi.”

12. Loko u hlawula dyondzo ya misava, yi nga pfuna leswaku ku hetisisiwa xikongomelo xihi?

¹² Xana u tshama u ehleketa leswaku ha yini u nghena xikolo? Xana xa nkoka ngopfu i ku ku hlomisa leswaku u va mutirheli wa Yehovha la humelelaka? Loko swi ri tano, u fanele ku anakanyisisa hi leswaku dyondzo ya wena yi xi hetisisa swinene ku fikela kwihi xikongomelo lexi. Endzhaku ko burisana ni vatswari va wena, xiboho xa leswaku u fanele u ya emahlweni u kuma dyondzo handle ka leyi yi laviwaka hi nawu xi nga ha endliwa. Dyondzo yo tano leyi engetelekeke yi nga ha ku pfuna leswaku u kuma ntirho lowu u nga ta tiwundla ha wona ivi wu ku nyika nkarhi ni matimba leswaku u hlanganyela hi xitalo entirhweni wa Mfumo.—Matewu 6:33.

13. Xana Vakreste vambirhi va Marhaxiya lava laveke dyondzo yo engetela va kombise xikongomelo xa vona evuton’wini hi ndlela yihi?

¹³ Van’wana lava hambetaka ni dyondzo yo engetela va nghenela vutirheli bya nkarhi hinkwawo loko hi hala tlhelo va ya emahlweni ni ku nghena xikolo. Anakanya hi Nadia na Marina, vanhwanyana va malembe ya kondlo-a-ndzi-dyi va le Moscow, eRussia. Havambirhi va khuvuriwe hi April 1994 naswona va sungule ku va vatirheli lava nga maphayona ya nkarhinyana. Endzhakunyana ka ku thwasa exikolweni xa le henhla va nghenele dyondzo ya ntivo-tinkonta ya malembe mambirhi. Hi May 1995 va sungule vuphayona bya nkarhi hinkwawo, kambe va kume xiyimo xa A hi avhareji, eka tidyondzo ta vona ta ntivo-tinkonta. Ku engetela kwalaho, havambirhi a va swi kota ku fambisa tidyondzo ta Bibele ta 14 hi avhareji vhiki rin’wana ni rin’wana loko hi hala tlhelo va ri karhi va nghena xikolo. Vanhwanyana lava va ni ntshembo wa leswaku dyondzo ya vona ya ntivo-tinkonta yi ta va pfuna leswaku va kuma ntirho lowu fanelekaka, leswaku va ta tiwundla evutirhelini bya nkarhi hinkwawo.

14. Ku nga khathariseki leswaku hi hlawula dyondzo ya misava ku fikela kwihi, hi wihi nchumu lowu faneleke wu va wa nkoka ngopfu evuton’wini bya hina?

¹⁴ Loko u lava dyondzo ya misava leyi tlulaka leyi yi laviwaka hi nawu, hi vutlharhi kambisisa xivangelo xa wena xo va u lava ku endla tano. Xana i ku lava ku tiendlela vito ni ku kuma rifuwo leri vonakaka? (Yeremiya 45:5; 1 Timotiya 6:17) Kumbe, xana pakani ya wena i ku tirhisa dyondzo yo engetela leswaku u hlanganyela hi xitalo entirhweni wa Yehovha? Lydia, muntshwa loyi a hlawuleke ku kuma dyondzo leyi engetelekeke, u phofule langutelo lerinene etimhakeni ta moya, a hlamusela a ku: “Van’wana va lava dyondzo ya le henhla ivi va pfumelela ku rhandza swilo leswi vonakaka ku va kavanyeta, naswona va cukumete Xikwembu. Eka mina, vuxaka bya mina na Xikwembu i nchumu wa nkoka swinene.” Onge hinkwerhu hi nga va ni langutelo leri lerinene!

15. Hi wahi masungulo yo hambana-hambana ya dyondzo lawa a ma ri kona exikarhi ka Vakreste va lembe-xidzana ro sungula?

¹⁵ Xa nkoka ngopfu, Vakreste va lembe-xidzana ro sungula a va ri ni masungulo yo hambana-hambana ya tidyondzo. Hi xikombiso, vaapostola Petro na Yohane a va langutiwa “va ri vanhu ntsena, lava ni ku dyondza va nga dyondzangiki” hikwalaho ka leswi a va nga leteriwanga kona eswikolweni swa varhabi. (Mintirho 4:13) Hi tlhelo lerin’wana, muapostola Pawulo a a kume leswi nga ringanisiwaka ni dyondzo ya yunivhesiti namuntlha. Kambe, Pawulo a nga tirhisanga dyondzo yoleyo leswaku a tilavela nyingiso; ematshan’weni ya sweswo, a yi ri mpfuno loko a chumayela vanhu va swiyimo swo hambana-hambana swa vutomi. (Mintirho 22:3; 1 Vakorinto 9:19-23; Vafilipiya 1:7) Hilaha ku fanaka, Manaheme loyi a “dyondzeke na Heroda mufumi wa muganga,” a a ri un’wana wa lava a va rhangela evandlheni ra Antiyoka.—Mintirho 13:1, NW.

Ha Yini U Fanele U Tirhisa Mali Ya Wena Hi Vutlharhi?

16. (a) Hikwalaho ka yini swi nga ha tikaka ku anakanya Muvumbi wa hina loko hi ri ni xikweleti? (b) Xana xin’wana xa swifaniso swa Yesu xi wu paluxa njhani nkoka wo anakanyisisa hi nga si tirhisa mali?

¹⁶ Loko u tsandzeka ku tirhisa mali ya wena hi vutlharhi, swi nga ha ku tikela ku anakanya Muvumbi wa wena hi ku endla leswi n’wi tsakisaka. Hikuva loko wo va ni xikweleti, ku nga ha vuriwa leswaku u ni mulawuri un’wana. Bibele ya hlamusela: “Lomba mali kutani u va hlonga ra mulombisi.” (Swivuriso 22:7, Today’s English Version) Xin’wana xa swifaniso swa Yesu xi kandziyisa nkoka wa ku va hi ehleketisisa hi nga si tirhisa mali. Yesu u te: “Xana i mani exikarhi ka n’wina, la nga rhangiki hi ku tshama hansi loko a lava ku aka xihondzo, a hlaya leswi a nga ta humesa swona, ku vona loko mali ya yena yi ta ringana ku heta ntirho xana? Loko a nga endlanga sweswo, ú ta aka masungulo ntsena, kutani swi ya n’wi tsandza ku heta; hinkwavo lava nga ta swi vona va ta sungula ku n’wi hleka.”—Luka 14:28, 29.

17. Ha yini hakanyingi swi tika ku lawula ndlela leyi hi tirhisaka mali ha yona?

¹⁷ Hikwalaho, hi vutlharhi u ta ringeta ku hanya hi nsinya wa nawu wa Matsalwa wa ‘ku nga vi ni nandzu eka munhu na un’we, loko wu nga ri wa ku rhandzana.’ (Varhoma 13:8) Kambe leswi swa tika ku swi endla, ngopfu-ngopfu loko u langutane ni mphakelo lowu hambetaka wa swilo leswintshwa leswi vanavetisi va vulaka leswaku u fanele ku va na swona hakunene. Mutswari un’wana loyi a ringeteke ku pfuna vana va yena leswaku va tirhisa vutlharhi, u te: “Hi hete nkarhi wo tala hi burisana hileswi ku pfumala ni ku lava swi vulaka swona.” Hi ntolovelo swikolo swi tsandzekile ku dyondzisa timhaka to tanihi leti, swi nyikela ndzetelo lowu nga nyawuriki wa ndlela yo hlayisa mali hi mukhuva lowunene. Mukondleteri un’wana wa vanhu u te: “Hi thwasa exikolweni xa le henhla hi tiva ngopfu isosceles triangle ku tlula ku hlayisa mali.” Hikwalaho, xana u ta pfuniwa ha yini leswaku u tirhisa mali hi vutlharhi?

18. Hi xihi xilotlelo xo tirhisa mali hi vutlharhi, naswona ha yini?

¹⁸ Ku yingisa xikhutazo lexi nge, “Anakanya Muv̌umbi wa wena,” i xilotlelo lexi yisaka eka tirhiselo ra mali ya wena hi vutlharhi. Hikuva loko u yingisa xileriso xexo, xa nkoka eka wena i ku tsakisa Yehovha naswona rirhandzu ra wena hi yena hi rona ri lawulaka ndlela leyi u yi tirhisaka ha yona mali ya wena. Hikwalaho, u ta ringeta leswaku u nga pfumeleli ku navela ka wena n’wini leswaku ku nghenelela eku tinyiketeleni ka wena eka Xikwembu hi moya-xiviri hinkwawo. (Matewu 16:24-26) U ta lwela ku hlayisa tihlo ra wena ri ri “rinene,” hileswaku, ri languta kahle eMfun’weni wa Xikwembu ni ku endla ku rhandza ka xona. (Matewu 6:22-24, BX) Xisweswo u ta kota ku twisisa xitsundzuxo xa Xikwembu lexi nge, “ḍunisa Yehova hi rifuwo ra wena” tanihi lunghelo leri tsakisaka.—Swivuriso 3:9.

Vantshwa Lava Faneriwaka Hi Ku Tekeleriwa

19. Vantshwa va le minkarhini ya khale va kombise ku anakanya Muvumbi wa vona hi ndlela yihi?

¹⁹ Lexi tsakisaka, vantshwa vo tala, va nkarhi lowu hundzeke ni va sweswi, va anakanye Muvumbi wa vona. Samuwele lontsongo u namarhele ntirho wa yena wa le tabernakeleni ku nga khathariseki nkucetelo wo biha wa lava a a tirha na vona. (1 Samuwele 2:12-26) Mukanganyisi wa xisati la kokaka mahlo, nkata Potifaro, a a nga ta n’wi kanganyisa muntshwa Yosefa leswaku a endla vumbhisa. (Genesa 39:1-12) Hambileswi Yeremiya a a ri “šihlangi” u chumayele hi xivindzi a ri karhi a langutane ni nkaneto lowukulu. (Yeremiya 1:6-8) Xinhwanyetana xa Muisrayele handle ko chava xi kongomise ndhuna ya matimba ya Muasiriya leswaku yi ya lava mpfuno le Israyele, laha a yi ta ya dyondza hi Yehovha. (2 Tihosi 5:1-4) Muntshwa Daniyele ni vanakulobye vakwe va hlayise vutshembeki bya vona loko va ringiwa ehenhleni ka milawu ya Xikwembu hi swakudya. Nakambe vantshwa, Xadraka, Mexaka na Abedi-Nego va hlawule ku cukumetiwa ekheleni ra ndzilo ku tlula ku tshova vutshembeki bya vona eka Xikwembu hi ku gandzela xifaniso.—Daniyele 1:8, 17; 3:16-18; Eksoda 20:5.

20. Vantshwa vo tala namuntlha va anakanye Muvumbi wa vona hi ndlela yihi?

²⁰ Namuntlha vantshwa lava tlulaka 2 000 va malembe ya 19 ku ya ka 25 va tirha eyindlu-nkulu ya misava hinkwayo ya Timbhoni ta Yehovha le Ntsindza wa New York, U.S.A. Lava i xiphemu lexitsongo xa makume ya magidi ya vantshwa lava anakanyaka Muvumbi wa vona emisaveni hinkwayo. Ku fana na Yosefa wa nkarhi wa khale, va ale ku landzula mahanyelo ya vona lama baseke. Vo tala va yingise Xikwembu ku tlula munhu loko va sindzisiwe ku hlawula loyi va nga ta n’wi tirhela. (Mintirho 5:29) Hi 1946 le Poland, Henryka Zur wa malembe ya 15 hi vukhale, u xanisiwile loko a ale ku endla xiendlo xa vukhongeri bya swifaniso. Un’wana wa vaxanisi va yena u te: “U nga va ni ripfumelo eka xin’wana ni xin’wana lexi u xi lavaka, ntsena endla mfungho wa xihambano xa Khatoliki.” Hikwalaho ka leswi a aleke, u koka-kokiwile a yisiwa ekhwatini ivi a baleseriwa, ntshembo wa yena lowu tiyeke wa vutomi lebyi nga heriki wu nga tsekatsekanga!b

21. Hi xihi xirhambo lexi ku nga vutlharhi ku xi amukela, naswona hi byihi vuyelo bya kona?

²¹ Mayana ndlela leyi mbilu ya Yehovha yi tsakeke ha yona hi vantshwa lava n’wi anakanyeke hi malembe-xidzana! Xana u ta xi angula xirhambo xakwe lexi nge: “Anakanya Muv̌umbi wa wena”? Hakunene u faneriwa hi ku anakanyiwa hi wena! Siku rin’wana ni rin’wana anakanya hi leswi a ku endleleke swona ni leswi a nga ta swi endla, kutani u amukela xirhambo xa yena: “Ṅwana nga, tlhariha, u ṭakisa mbilu ya mina, nḍi ta kuma rito e ku hlamula la’v̌a nḍi rukanaka.”—Swivuriso 27:11.

[Tinhlamuselo ta le hansi]

Wa Tsundzuka Xana?

◻ Vantshwa va nga pfuniwa ku anakanya leswaku Xikwembu i munhu wa xiviri hi ndlela yihi?

◻ Swi vula yini ku anakanya Muvumbi wa wena?

◻ Hi xihi xikongomelo lexi dyondzo ya hina yi faneleke yi xi hetisisa?

◻ Ha yini swi ri swa nkoka swinene ku tirhisa mali ya hina hi vutlharhi?

◻ Hi vahi vantshwa lava u faneleke ku va tekelela?

[Xifaniso lexi nga eka tluka 17]

Xana u tshama u ehleketa leswaku ha yini u nghena xikolo?

[Xifaniso lexi nga eka tluka 18]

Xana u dyondza ndlela yo tirhisa mali hi vutlharhi?