Xitirho Lexintshwa Xo Pfuna Vanhu Ku Dyondza Swilaveko Swa Xikwembu

“KU TWISISEKA ka yona, ku pakanisa ka yona ni ndlela leyi yi endliweke ha yona swi ta tisa vuyelo lebyi hlamarisaka. Tinhloko-mhaka ti vekiwe hi ndlela yo olova ni leyi tsakisaka leyi munhu un’wana ni un’wana wa mbilu leyinene, loyi a nga eku lavisiseni, a nga ta susumeteleka ku vula a ku, ‘Hakunene Xikwembu xi kona la xikarhi ka n’wina.’” (1 Vakorinto 14:25) Sweswo swi vule hi un’wana wa Timbhoni ta Yehovha wa le Thailand loko a hlamusela broxara leyintshwa leyi nge, I Yini Leswi Xikwembu Xi Swi Languteleke Eka Hina? Yi humesiwe hi Sosayiti ya Watch Tower eNtsombanweni wa Muganga wa “Varhumiwa Va Ku Rhula Ka Xikwembu” hi 1996/97.

Broxara leyi ya muvala lowu heleleke ya matluka ya 32, yi endleriwe ku dyondzisa Bibele. Yi ni tidyondzo ta xisekelo ta Bibele. Mhaka yi vekiwe hi ndlela leyi twisisekaka naswona yi ba nhloko ya mhaka, yi swi veka erivaleni leswi Xikwembu xi swi languteleke eka hina. Vahlayi a swi nga va nonon’hweli ku yi twisisa. Xana u nga yi fambisa njhani dyondzo ya Bibele hi broxara leyi leyintshwa?

Tirhisa swivutiso. Ku ni swivutiso emasungulweni ya dyondzo yin’wana ni yin’wana. Endzhaku ka xivutiso xin’wana ni xin’wana ku ni swiangi leswi nga ni tinomboro ta tindzimana leti u nga ta kuma tinhlamulo eka tona. Swivutiso leswi swi nga ha tirhisiwa tanihi swipfuneti swo dyondzisa emahlweni ka dyondzo ni le ku endleni ka mpfuxeto. Hi xikombiso, eku sunguleni ka dyondzo ya Bibele ya le kaya, u nga ha vutisa xichudeni swivutiso leswi leswaku u kuma mavonelo ya xona. Ematshan’weni yo lava ku endla ndzulamiso wa tinhlamulo tin’wana ni tin’wana leti hoxeke hi xihatla, yana emahlweni ni dyondzo. Emakumu ka dyondzo, u nga ha tlhela u vutisa swivutiso leswaku u vona loko enkarhini lowu xichudeni xi swi kota ku swi hlamula hi ku pfumelelana ni Bibele.

Pfula matsalwa. Eka dyondzo yin’wana ni yin’wana, swivulwa swo koma swa mintiyiso ya Bibele swi fambisana ni matsalwa lama swi seketelaka. Tanihi leswi ku kombisiweke matsalwa yo tala ntsena kambe ma nga tshahiwanga, i swa nkoka ku khutaza xichudeni leswaku xi pfula matsalwa lawa eBibeleni ya xona. Xi fanele xi hlaya ni ku anakanyisisa hi Rito ra Xikwembu emahlweni ko va xi ri tirhisa evuton’wini bya xona.—Yoxuwa 1:8.

Kandziyisa swifaniso. Broxara leyi yi ni swifaniso swa xiviri ni leswi pfapfarhutiweke—leswi tlulaka 50. Swifaniso leswi a swi endleriwanga ku koka mahlo ntsenakambe swi tlhela swi pfuneta ku dyondzisa. Hi xikombiso, tidyondzo timbirhi to hetelela (yin’wana ni yin’wana yi tata tluka rin’we, eka matluka lama vandzamaneke) lama nga ni xihloko lexi nge “Ku Pfuna Van’wana Leswaku Va Endla Ku Rhandza Ka Xikwembu” ni lexi nge “Xiboho Xa Wena Xo Tirhela Xikwembu.” Swifaniso leswi nga eka matluka lawa mambirhi swi kombisa nhluvuko wa moya wa munhu un’we, swi n’wi kombisa a ri eku nyikeleni ka vumbhoni bya xitshuketa, a hlanganyela entirhweni wa yindlu na yindlu ni loko a ri eku tinyiketeleni ivi a hetelela hi ku khuvuriwa. Hi ku pfuna xichudeni leswaku xi xiya swifaniso leswi, u xi pfuna leswaku xi vona magoza lama lavekaka loko xi lava ku tirhela Xikwembu.

Ku vuriwa yini hi loko munhu la tsakelaka a nga swi koti kahle ku hlaya kumbe a nga koti ku hlaya nikatsongo? Sosayiti yi le ku endleni ka leswaku broxara leyi leyintshwa yi kumeka hi tikhasete hi tindzimi to hlayanyana. Khasete leyi yi ni rungula ra broxara ku katsa ni matsalwa yo tala lama kombisiweke. Yi rhekhodiwe hi mukhuva lowu: Ku hlayiwa xivutiso xo sungula, ivi xi landzeriwa hi ku hlayiwa ka ndzimana (kumbe tindzimana) leti hlamulaka xivutiso lexi kun’we ni matsalwa man’wana lama kombisiweke. Endzhaku ka sweswo ku hlayiwa xivutiso lexi landzelaka ivi xi landzeriwa hi ndzimana ni matsalwa lama hlamulaka xona, sweswo-sweswo. Xichudeni xi nga ha yingisela khasete leyi loko xi ri karhi xi lunghiselela dyondzo. Khasete yi nga ha tirhisiwa loko ku ri karhi ku fambisiwa dyondzo.

Lava a va ri kona entsombanweni a va ri ni nkhinkhi wo tirhisa broxara leyi leyintshwa evutirhelini bya nsimu. Hi xikombiso, masiku ma nga ri mangani endzhaku ka loko maphayona mambirhi (vachumayeri va nkarhi hinkwawo) ya le United States ma kume broxara leyi, ma yi fambisele mpatswa wa vanhu lava ha riki vantshwa lowu a ma hamba ma wu endzela. Loko mpatswa lowu wu languta nxaxamelo wa leswi nga endzeni, dyondzo leyi nge “Swiendlo Leswi Xikwembu Xi Swi Vengaka” yi koke nyingiso wa wona. Nhlangwana yi te: “Minkarhi hinkwayo ndzi dyondzisiwe leswaku Xikwembu a xi vengi nikatsongo—xi rhandza hinkwaswo. Leyi ndzi ta sungula hi yona ndzi yi hlaya.” Loko maphayona lamambirhi ma tlhelela evhikini leri landzeleke, nhlangwana leyi yi te: “A ndzi ri karhi ndzi hlaya broxara leyintshwa. Swa tika swinene ku endla hinkwaswo leswi hi faneleke hi swi endla. Yehovha a nga tsaki hi hina—a hi tekananga. Kambe se hi endle xiboho. Hi endle malunghiselelo ya leswaku hi tekana hi Ravuntlhanu la taka.” Loko va ri karhi va angarhana ni mpatswa lowu wa maphayona, va engeterile va ku: “Hi kombela ku khomeriwa hikwalaho ka leswi hi nga swi kotangiki ku va ni dyondzo ya nkarhi na nkarhi, kambe xiboho lexi xi hi rhule ndzhwalo lowukulu.”

Tikarhatele ku tirhisa broxara leyintshwa leyi nge, Leswi Xi Swi Languteleke. I xitirhisiwa lexinene xo pfuna van’wana leswaku va dyondza swilaveko swa Xikwembu.

[Swifaniso leswi nga eka tluka 17]

Xana u ta yi tirhisa njhani broxara leyintshwa?