I Yini Leswi Xikwembu Xi Swi Languteleke Eka Hina?
“Hikuva ku rhandza Xikwembu, swi vula ku hlayisa milawu ya xona, naswona milawu leyi ya xona a yi tiki.”—1 YOHANE 5:3.
1, 2. Ha yini swi nga hlamarisi leswi ku nga ni leswi Xikwembu xi swi languteleke eka lava va lavaka ku xi gandzela hi laha ku amukelekaka?
“NDZI enerisekile hi vukhongeri bya mina!” Xana sweswo a hi swona leswi hakanyingi vanhu va swi vulaka? Kambe, entiyisweni xivutiso xi fanele xi va lexi, “Xana vukhongeri bya mina bya xi tsakisa Xikwembu?” Ina, ku na leswi Xikwembu xi swi languteleke eka lava va lavaka ku xi gandzela hilaha ku amukelekaka. Xana sweswo swi fanele swi hi hlamarisa? Doo. A hi nge, u ni kaya ro saseka, leri wa ha ku ri lunghisaka hi ntsengo lowukulu. Xana a wu ta pfumelela un’wana ni un’wana leswaku a tshama eka rona? A swi tano hakunene! Un’wana ni un’wana loyi a lavaka ku tshama eka rona u fanele ku pfumelelana ni swilaveko swa wena.
2 Hilaha ku fanaka, Yehovha Xikwembu u lunghiselele ndyangu wa vanhu, kaya leri ra misava. Ku nga ri khale, ehansi ka vulawuri bya Mfumo wa yena, misava yi ta “lunghisiwa”—yi hundzuriwa yi va paradeyisi yo saseka. Yehovha u ta swi hetisisa leswi. Hi ku lahlekeriwa lokukulu, u nyikele N’wana wakwe loyi a tswariweke a ri yexe, leswaku a endla leswi swi koteka. Hakunene, Xikwembu xi fanele xi langutele swo karhi eka lava va nga ta tshama eka yona!—Pisalema 115:16; Matewu 6:9, 10; Yohane 3:16.
3. Xana Solomoni u swi katsakanye hi ndlela yihi leswi Xikwembu xi swi languteleke eka hina?
3 Xana hi nga swi tivisa ku yini leswi Xikwembu xi swi languteleke? Yehovha u huhutele Hosi Solomoni wo tlhariha leswaku a katsakanya leswi Yena a languteleke swona eka hina. Endzhaku ko xiyisisa hinkwaswo leswi a tikarhateleke swona—ku katsa rifuwo, mintirho yo aka, vuyimbeleri ni rirhandzu ra vavasati—Solomoni u fikelela makumu lawa: “A hi yingiseni makumu ya timhaka hikwato: Tšhav̌a Šikwembu, u hlayisa milawu ya šona, hikuv̌a hi yona fanelo hikwayo ya munhu.” (Xiitaliki i xerhu.)—Eklesiasta 12:13.
“Milawu Leyi Ya Xona A Yi Tiki”
4-6. (a) Hi yihi nhlamuselo leyi kongomeke ya rito ra Xigriki leri hundzuluxeriweke va ku “ndzhwalo”? (b) Ha yini hi nga vulaka leswaku milawu ya Xikwembu a yi tiki?
4 “Hlayisa milawu ya xona.” Kahle-kahle, sweswo hi leswi Xikwembu xi swi langutelaka eka hina. Xana leswi xi swi kombelaka i swikulu ngopfu? Nikatsongo. Muapostola Yohane u hi byela nchumu wun’wana lowu tiyisaka nhlana swinene malunghana ni milawu, kumbe swilaveko swa Xikwembu. U tsarile: “Hikuva ku rhandza Xikwembu, swi vula ku hlayisa milawu ya xona, naswona milawu leyi ya xona a yi tiki.” (Xiitaliki i xerhu.)—1 Yohane 5:3.
5 Rito ra Xigriki leri hundzuluxeriweke va ku “ndzhwalo” hi ku kongoma ri vula “ku tika.” Ri nga ha vula nchumu lowu swi tikaka ku wu fikelela kumbe lowu swi nonon’hwaka ku wu hetisisa. Eka Matewu 23:4, ri tirhisiwa ku hlamusela “mindzhwalo leyo tika,” ku nga milawu ni mindhavuko ya vanhu, leyi vatsari ni Vafarisi a va yi rhwexwa vanhu. (Xiitaliki i xerhu.) Xana wa swi twisisa leswi muapostola Yohane loyi a dyuhaleke a swi vulaka? Milawu ya Xikwembu a hi ndzhwalo wo tika, naswona a swi nge hi nonon’hweli ku va hi yi hlayisa. (Ringanisa Deteronoma 30:11.) Ku hambana ni sweswo, loko hi rhandza Xikwembu, hi fikelela swilaveko swa xona, swi hi endla hi tsaka. Swi hi nyika nkarhi lowunene wo kombisa rirhandzu ra hina eka Yehovha.
6 Leswaku hi kombisa rirhandzu ra hina eka Xikwembu, hi fanele hi swi tiva kahle leswi xi swi languteleke eka hina. Sweswi a hi kambisiseni swilaveko swa ntlhanu swa Xikwembu. Loko hi ri karhi hi endla sweswo, tsundzuka leswi Yohane a swi tsaleke: ‘Milawu ya Xikwembu a yi tiki.’
Nghenisa Vutivi Bya Xikwembu
7. Xana ku ponisiwa ka hina ku titshege hi yini?
7 Xilaveko xo sungula i ku nghenisa vutivi bya Xikwembu. Tsundzuka marito ya Yesu lama rhekhodiweke eka Yohane ndzima 17. A ku ri nkarhi wa vusiku byo hetelela bya vutomi bya Yesu a ri munhu wa nyama. Yesu u hete nkarhi wo tala madyambu wolawo a endla leswaku vaapostola vakwe va lunghekela ku famba ka yena. A a karhateka hi vumundzuku bya vona, vumundzuku bya vona lebyi nga heriki. U tlakusele mahlo yakwe etilweni, a va khongelela. Eka ndzimana 3, ha hlaya: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” Ina, ku ponisiwa ka vona a ku titshege hi ku va va ‘nghenisa vutivi’ bya Xikwembu na Kreste. Sweswo swa tirha ni le ka hina. Leswaku hi ponisiwa, hi fanele ku nghenisa vutivi byo tano.
8. Swi vula yini ‘ku nghenisa vutivi’ bya Xikwembu?
8 Xana swi vula yini ‘ku nghenisa vutivi’ bya Xikwembu? Rito ra Xigriki leri laha ri hundzuluxeriweke va ku ‘ku nghenisa vutivi’ ri vula “ku tiva, ku xiya” kumbe “ku twisisa hi ku helela.” Nakambe, xiya leswaku nhlamuselo leyi nge ‘ku nghenisa vutivi’ yi kombisa leswaku lexi i xiendlo lexi yaka emahlweni. Xisweswo ku nghenisa vutivi bya Xikwembu swi vula ku xi tiva hi vuenti, hayi katsongo, ku aka vunghana lebyinene na xona. Vuxaka lebyi yaka emahlweni ni Xikwembu byi endla leswaku munhu a ya a xi tiva. Endlelo leri ri nga ha ya emahlweni hilaha ku nga heriki, hikuva a hi nge swi koti ku tiva xin’wana ni xin’wana malunghana na Yehovha.—Varhoma 11:33.
9. Hi nga dyondza yini malunghana na Yehovha eka buku ya ntumbuluko?
9 Xana hi nga byi nghenisisa ku yini vutivi malunghana ni Xikwembu? Ku ni tibuku timbirhi leti nga hi pfunaka. Yin’wana ya kona i buku ya ntumbuluko. Swilo leswi Yehovha a swi tumbuluxeke—leswi hanyaka ni leswi nga hanyiki—swi hi endla hi vona leswaku i munhu wa muxaka muni. (Varhoma 1:20) Xiya swikombiso swin’wana. Ku pfuma ka boboma lerikulu ra mati, huwa ya mati hi nkarhi wa xidzedze, ku vona matilo lama nga ni tinyeleti evusikwini lebyi nga riki na mapapa—xana swilo leswi a swi hi dyondzisi swona leswaku Yehovha i Xikwembu xa “matimba la’makulu”? (Esaya 40:26) N’wana la hlekelelaka loko a hlalela ximbyanyana xi ri karhi xi rhendzeleka xi lava ku luma ncila wa xona, kumbe n’wana wa ximanga loko a ri karhi a tlanga hi bolo ya wulu—xana sweswo a swi kombisi swona leswaku Yehovha i “Xikwembu lexi tsakeke,” naswona u tshama a tsakile? (1 Timotiya 1:11, NW) Nantswo wa swakudya swo nandziha, nun’hwelo wo tsakisa wa swiluva leswi nga endhawini leyi tlhumeke hi byanyi, mivala yo xonga ya phaphatana ra rivovo, mpfumawulo wa miloti ya tinyenyana hi ximun’wana, ku angarhiwa lokunene hi murhandziwa wa wena—xana swilo swo tano a swi hi endli hi vona leswaku Muvumbi wa hina i Xikwembu xa rirhandzu, lexi lavaka leswaku hi tiphina hi vutomi?—1 Yohane 4:8.
10, 11. (a) Hi swihi swilo leswi hi nga ta ka hi nga swi dyondzi malunghana na Yehovha ni swikongomelo swakwe eka buku ya ntumbuluko? (b) I tinhlamulo ta swivutiso swihi leti kumekaka eBibeleni ntsena?
10 Hambiswiritano, a hi swilo hinkwaswo malunghana na Yehovha, leswi hi nga swi dyondzaka eka buku ya ntumbuluko. Hi xikombiso: Vito ra Xikwembu i mani? Ha yini xi tumbuluxe misava ni ku veka vanhu eka yona? Ha yini Xikwembu xi pfumelela vubihi? Xana vumundzuku byi hi khomele yini? Leswaku hi kuma tinhlamulo ta swivutiso sweswo, hi fanele hi ya eka buku yin’wana leyi nyikaka vutivi bya Xikwembu—ku nga Bibele. Eka yona, Yehovha u paluxa swilo malunghana na yena n’wini, ku katsa ni vito rakwe, vumunhu byakwe ni swikongomelo swakwe—rungula leri hi nga ta ka hi nga ri kumi eka xihlovo xin’wana.—Eksoda 34:6, 7; Pisalema 83:18; Amosi 3:7.
11 EMatsalweni, Yehovha u tlhela a nyika vutivi bya nkoka malunghana ni van’wana lava hi faneleke hi va tiva. Hi xikombiso, Yesu Kreste i mani, naswona u hetisisa xiphemu xihi eku hetisekeni ka swikongomelo swa Yehovha? (Mintirho 4:12) Sathana Diyavulosi i mani? Xana u hambukisa vanhu hi tindlela tihi? Xana hi nga swi papalatisa ku yini ku hambukisiwa hi yena? (1 Petro 5:8) Tinhlamulo leti ponisaka vutomi ta swivutiso leswi ti kumeka eBibeleni ntsena.
12. U nga swi hlamusela njhani leswaku a hi ndzhwalo ku nghenisa vutivi malunghana ni Xikwembu ni swikongomelo swa xona?
12 Xana i ndzhwalo ku nghenisa vutivi byo tano malunghana ni Xikwembu ni swikongomelo swa xona? Nikatsongo! Xana wa yi tsundzuka ndlela leyi u titweke ha yona ro sungula, loko u dyondze leswaku vito ra Xikwembu i Yehovha, leswaku Mfumo wa yena wu ta kondletela Paradeyisi emisaveni leyi, leswaku u nyikele hi N’wana wakwe la rhandzekaka leswaku a va nkutsulo wa swidyoho swa hina, kun’we ni mintiyiso yin’wana ya risima? Xana a swi nga fani ni ku susa xifunengeto xa ku pfumala vutivi ni ku sungula ku vona swilo kahle ro sungula? Ku nghenisa vutivi malunghana ni Xikwembu a hi ndzhwalo. Swa tsakisa!—Pisalema 1:1-3; 119:97.
Ku Fikelela Mimpimanyeto Ya Xikwembu
13, 14. (a) Loko hi ri karhi hi nghenisa vutivi malunghana ni Xikwembu, hi yihi mindzulamiso leyi hi faneleke hi yi endla evuton’wini bya hina? (b) Hi swihi swiendlo leswi thyakeke, leswi Xikwembu xi lavaka leswaku hi swi fularhela?
13 Loko hi ri karhi hi nghenisa vutivi bya Xikwembu, hi sungula ku swi lemuka leswaku hi boheka ku endla mindzulamiso evuton’wini bya hina. Leswi swi hi tisa eka xilaveko xa vumbirhi. Hi fanele hi fikelela mimpimanyeto ya Xikwembu ya mahanyelo lamanene ni ku amukela ntiyiso wa xona. Ntiyiso i yini? Xana swi ni mhaka hakunene eka Xikwembu leswaku i yini leswi hi swi pfumelaka, ni leswi hi swi endlaka? Swi le rivaleni leswaku vanhu vo tala namuntlha a va ehleketi tano. Xiviko lexi humesiweke hi Kereke ya le Nghilandhi hi 1995 xi ringanyete leswaku ku tshama swin’we mi nga tekananga a swi fanelanga swi langutiwa swi ri xidyoho. “Marito lama nge ‘ku tshama swin’we hi vudyoho’ ma khomisa tingana naswona a ma pfuni nchumu,” hi ku vula ka bixopo wa kereke yin’wana.
14 Kutani, “ku tshama swin’we hi vudyoho” a ka ha ri xidyoho ke? Handle ko gega, Yehovha u hi byela ndlela leyi a titwaka ha yona hi ku tikhoma ko tano. Rito ra yena, ku nga Bibele, ri ri: “Ku tekana a ku ve loku xiximiwaka hi vanhu hinkwavo, vukati byi nga onhiwi hi ku kanganyisana, hikuva Xikwembu xi ta avanyisa timbhisa ni vaoswi.” (Vaheveru 13:4) Vuxaka bya rimbewu emahlweni ka vukati byi nga ha va byi nga ri xidyoho eka vafundhisi ni vangheni va kereke lava nga riki na mhaka, kambe i xidyoho lexikulu emahlweni ka Xikwembu! Swi tano ni hi vuoswi, vuxaka bya rimbewu exikarhi ka maxaka ya le kusuhi, ni vusodoma. (Levhitika 18:6; 1 Vakorinto 6:9, 10) Xikwembu xi lava leswaku hi fularhela swiendlo swo tano, leswi xi swi langutaka swi thyakile.
15. Swilaveko swa Xikwembu swi yi katsa njhani ndlela leyi hi va khomaka ha yona van’wana, ni leswi hi pfumelaka eka swona?
15 Hambiswiritano, ku fularhela swiendlo leswi Xikwembu xi swi tekaka swi ri xidyoho a hi swona ntsena leswi lavekaka. Swilaveko swa Xikwembu swi tlhela swi khumba ndlela leyi hi khomaka van’wana ha yona. Endyangwini, xi lava leswaku wanuna ni wansati va rhandzana ni ku xiximana. Xikwembu xi lava leswaku vatswari va khathalela swilaveko swa vana va vona hi tlhelo ra swilo leswi vonakaka, ra moya ni ra mintlhaveko. Xi byela vana leswaku va yingisa vatswari va vona. (Swivuriso 22:6; Vakolosa 3:18-21) Naswona ku vuriwa yini hi leswi hi pfumelaka swona? Yehovha Xikwembu u lava leswaku hi papalata tidyondzo ni mikhuva leyi humaka evugandzerini bya mavunwa, kumbe leyi nga pfumelelaniki ni ntiyiso lowu tengeke lowu dyondzisiwaka eBibeleni.—Deteronoma 18:9-13; 2 Vakorinto 6:14-17.
16. Hlamusela leswaku hikwalaho ka yini ku nga ri ndzhwalo ku fikelela mimpimanyeto ya Xikwembu ya mahanyelo lamanene, ni ku amukela ntiyiso wa xona.
16 Xana i ndzhwalo eka hina ku fikelela mimpimanyeto ya Xikwembu ya mahanyelo lamanene ni ku amukela ntiyiso wa xona? Loko hi languta vuyelo bya kona a swi tano—vukati lebyi wanuna ni wansati va rhandzanaka ni ku tshembana, ematshan’weni ya vukati lebyi hahlukaka hi mhaka ya ku pfumala ku tshembana; makaya lawa vana va titwaka va rhandziwa ni ku laviwa hi vatswari va vona, ematshan’weni ya mindyangu leyi vana va titwaka va nga rhandziwi, va honisiwa ni ku ka va nga laviwi; ripfalo leri baseke ni rihanyo lerinene, ematshan’weni ya ku tivona nandzu ni miri lowu hlakatiweke hi AIDS, kumbe vuvabyi byin’wana lebyi tluletiwaka hi rimbewu. Hakunene, swilaveko swa Yehovha a swi hi tsoni nchumu lexi hi xi lavaka leswaku hi tsakela vutomi!—Deteronoma 10:12, 13.
Xixima Vutomi Ni Ngati
17. Yehovha u byi languta njhani vutomi ni ngati?
17 Loko u ri karhi u endla vutomi bya wena byi fambisana ni mimpimanyeto ya Xikwembu, u sungula ku twisisa ndlela leyi vutomi byi nga bya risima swinene ha yona. Sweswi a hi buleni hi xilaveko xa Xikwembu xa vunharhu. Hi fanele hi xixima vutomi ni ngati. Vutomi i bya risima eka Yehovha. Swi fanerile, hikuva hi yena Xihlovo xa vutomi. (Pisalema 36:9) Phela, hambi byi ri vutomi bya n’wana la nga si tswariwaka, loyi a nga endzeni ka mana wakwe, i bya risima eka Yehovha! (Eksoda 21:22, 23) Ngati yi yimela vutomi. Hikwalaho, ngati na yona ya kwetsima emahlweni ka Xikwembu. (Levhitika 17:14) Kutani, a swi hlamarisi leswi Xikwembu xi langutelaka leswaku hi languta vutomi ni ngati hilaha xona xi swi langutaka hakona.
18. Langutelo ra Yehovha hi vutomi ni ngati ri vula yini eka hina?
18 I yini leswi lavekaka eka hina malunghana ni ku xixima vutomi ni ngati? Leswi hi nga Vakreste, a hi swi lavi ku nghenisa vutomi bya hina ekhombyeni hikwalaho ko lava ku titsakisa ntsena. Ha khathala hi vuhlayiseki bya hina, hikwalaho ha tiyiseka leswaku timovha ta hina ni makaya ya hina swi hlayisekile. (Deteronoma 22:8) A hi ri tirhisi fole, a hi yi ncakunyi betheli nati kumbe ku tirhisa swidzidzirisi leswi godzombelaka kumbe leswi onhaka mianakanyo, hikwalaho ko lava ku titsakisa. (2 Vakorinto 7:1) Hikwalaho ka leswi hi yingisaka Xikwembu loko xi ku hi ‘tshika ngati,’ a hi pfumeli leswaku ngati yi pomperiwa emimirini ya hina. (Mintirho 15:28, 29) Hambileswi hi byi rhandzaka vutomi, a hi nge ringeti ku ponisa vutomi bya hina hi ku tlula nawu wa Xikwembu, xisweswo hi kavanyeta ku langutela ka hina vutomi lebyi nga heriki!—Matewu 16:25.
19. Hlamusela ndlela leyi hi vuyeriwaka ha yona loko hi xixima vutomi ni ngati.
19 Xana i ndzhwalo eka hina ku teka vutomi ni ngati swi ri leswi kwetsimaka? Nikatsongo! Anakanya ha swona. Xana i ndzhwalo ku papalata khensa ya mahahu leyi vangiwaka hi ku dzaha fole? Xana i ndzhwalo ku hambana ni ku godzomberiwa emianakanyweni, ni le mirini hi swidzidzirisi leswi nga ni khombo? Xana i ndzhwalo ku papalata ku ngheniwa hi AIDS, vuvabyi bya xivindzi, kumbe vuvabyi byin’wana lebyi nga vangiwaka hi mpompelo wa ngati? Kunene, ku papalata mikhuva ni swiendlo swo tano leswi onhaka, swi pfuna hina.—Esaya 48:17.
20. Xana ndyangu wun’wana wu vuyeriwe njhani hi ku va ni langutelo ra Xikwembu hi vutomi?
20 Xiya ntokoto lowu. Emalembeni yo hlayanyana lama hundzeke, wansati la nga Mbhoni loyi a a ri ni nyimba ya kwalomu ka tin’hweti tinharhu ni hafu, madyambu man’wana u sungule ku huma ngati kutani a tsutsumiseriwa exibedlhele. Endzhaku ka loko dokodela a n’wi kamberile, u n’wi twe a byela un’wana wa vaongori leswaku va fanele va n’wi xixisa nyimba leyi a ri na yona. Hi ku tiva ndlela leyi Yehovha a byi langutaka ha yona vutomi bya n’wana la nga si tswariwaka, u ale ku xixa nyimba, a byela dokodela a ku: “Loko a hanya, n’wi tshikeni!” A a hamba a huma ngati minkarhi yin’wana, kambe endzhaku ka tin’hweti ti nga ri tingani, u tswale n’wana wa mufana la hanyeke kahle, nkarhi wa yena wu nga si fika, loyi sweswi a nga ni malembe ya 17 hi vukhale. U hlamuserile: “N’wana wa hina u byeriwe hinkwaswo leswi, naswona u vula leswaku wa tsaka hikuva a nga cukumetiwanga. Wa swi tiva leswaku ku tirhela ka hina Yehovha, hi kona ntsena loku endleke leswaku a tama a ha hanya.” Hakunene, ku va ni langutelo ra Xikwembu malunghana ni vutomi a ku nga ri ndzhwalo endyangwini lowu!
Ku Tirha Ni Vanhu Va Yehovha Lava Hlelekeke
21, 22. (a) I vamani lava Yehovha a lavaka leswaku hi n’wi tirhela hi ri swin’we na vona? (b) Vanhu va Xikwembu lava hlelekeke va nga voniwa njhani?
21 A hi hina ntsena lava hi bohekaka ku endla mindzulamiso leswaku vutomi bya hina byi fambisana ni mimpimanyeto ya Xikwembu. Yehovha u ni vanhu emisaveni leyi, naswona u langutele leswaku hi n’wi tirhela swin’we na vona. Leswi swi hi tisa eka xilaveko xa vumune. Hi fanele hi tirhela Yehovha swin’we ni nhlengeletano yakwe leyi kongomisiwaka hi moya.
22 Kambe, xana vanhu va Xikwembu lava hlelekeke va nga voniwa njhani? Hi ku ya hi mimpimanyeto leyi vekiweke eMatsalweni, va ni rirhandzu ra xiviri exikarhi ka vona, va yi xixima swinene Bibele, va dzunisa vito ra Xikwembu, va chumayela hi Mfumo wa xona naswona a hi xiphemu xa misava leyi leyi hombolokeke. (Matewu 6:9; 24:14; Yohane 13:34, 35; 17:16, 17) Ku ni nhlengeletano yin’we ntsena ya vukhongeri emisaveni leyi, leyi nga ni mimfungho leyi ya Vukreste bya ntiyiso—Timbhoni ta Yehovha!
23, 24. Hi nga swi kombisa njhani leswaku a hi ndzhwalo ku tirhela Yehovha swin’we ni vanhu vakwe lava hlelekeke?
23 Xana i ndzhwalo ku tirhela Yehovha swin’we ni vanhu va yena lava hlelekeke? Hakunene, a swi tano! Ku hambana ni sweswo, i lunghelo ra risima ku va ni rirhandzu ni nseketelo wa ndyangu wa misava hinkwayo wa vamakwerhu va xinuna ni va xisati va Vukreste. (1 Petro 2:17) Anakanya u ponile loko xikwekwetsu xi tshovekile, naswona u tikuma u ri ematini, u ri karhi u ringeta ku hlambela. Laha se u titwaka leswaku a wu nge he swi koti ku ya emahlweni u tiyisela, ku fika voko ri ku khoma ri ri exikwekwetsini lexi ponisaka vanhu. Ina, va kona van’wana lava poneke! Loko mi ri eka xikwekwetsu lexi ponisaka lava nga ematini, mi siyerisana ku tluta mi ya eribuweni, mi tlakula vaponi van’wana endleleni.
24 Xana a hi le xiyin’weni lexi fanaka? Hi humesiwe “ematini” lama nga ni khombo ya misava leyi yo homboloka hi ya nghena eka “xikwekwetsu lexi ponisaka vanhu” xa nhlengeletano ya Yehovha ya laha misaveni. Eka yona, hi tirha hi vun’we hi kongome “etimbuweni” ta misava leyintshwa yo lulama. Loko mintshikilelo ya vutomi yi hi heta matimba endleleni, mayana ndlela leyi hi wu nkhensaka ha yona mpfuno ni nchavelelo wa vanghana va ntiyiso va Vukreste!—Swivuriso 17:17.
25. (a) Hi byihi vutihlamuleri lebyi hi nga na byona eka lava ha riki “ematini” ya misava leyi yo homboloka? (b) Hi xihi xilaveko xa Xikwembu lexi ku nga ta buriwa ha xona eka xihloko lexi landzelaka?
25 Ku vuriwa yini hi van’wana—vanhu va timbilu letinene lava ha riki “ematini”? Hi ni vutihlamuleri byo va pfuna leswaku va ta enhlengeletanweni ya Yehovha, a swi tano ke? (1 Timotiya 2:3, 4) Va lava ku pfuniwa leswaku va dyondza leswi Xikwembu xi lavaka swona. Leswi swi hi tisa eka xilaveko xa Xikwembu xa vuntlhanu. Hi fanele hi va vahuweleri lava tshembekaka va Mfumo wa Xikwembu. Leswi leswi swi katsaka swona, ku ta buriwa ha swona eka xihloko lexi landzelaka.
Wa Tsundzuka Xana?
◻ Ha yini milawu ya Xikwembu yi nga tiki?
◻ Xana hi byi nghenisa njhani vutivi bya Xikwembu?
◻ Hikwalaho ka yini ku nga ri ndzhwalo ku fikelela mimpimanyeto ya Xikwembu ya mahanyelo lamanene, ni ku amukela ntiyiso wa xona?
◻ Langutelo ra Xikwembu hi vutomi ni ngati ri vula yini eka hina?
◻ I vamani lava Xikwembu xi lavaka leswaku hi xi tirhela hi ri swin’we na vona, naswona va nga voniwa njhani?
[Swifaniso leswi nga eka tluka 18]
Hi dyondza hi Yehovha ebukwini ya ntumbuluko ni le Bibeleni
[Xihlovo Xa Kona]
Crocodile: By courtesy of Australian International Public Relations; bear: Safari-Zoo of Ramat-Gan, Tel Aviv