Khisimusi eVuxeni

• KWALOMU KA MALEMBE YA 200 lama hundzeke, xidyondzi lexi dumeke xa le Korea xi endzele le Peking, eChayina. Loko xi langute xifaniso lexi a xi ri esilin’ini ya kereke, xi vone xifaniso xa Mariya a tlakule n’wana wa yena Yesu. Malunghana ni xifaniso lexi, lexi hlamarisaka xi vule leswi:

“Wansati u xinge n’wana la langutekaka a vabya, wa malembe ya ntlhanu kumbe ya tsevu. A a vonaka a nga ri na matimba, onge a nge swi koti ku languta n’wana wa yena la terisaka vusiwana. Naswona le ndzhaku swinene a ku ri ni swipuku swo tala ni vana lava nga ni timpapa va ri karhi va haha-haha. Loko ndzi ri karhi ndzi swi honolerile kwale henhla, a swi vonaka onge swi ta ndzi wela nkarhi wihi na wihi. Hikwalaho ko chava, ndzi tlakuse voko leswaku ndzi swi qhavulela.”

MHAKA leyi yi humelele khale swinene endzhaku ka ku sungula ka Ndzhundzunuko eYuropa, endzhaku swinene ka nguva ya munyama eMalembeni ya le Xikarhi. Kambe eka vanhu vo tala va le Vuxeni, Vukreste a byi nga tolovelekanga ku fana ni xifaniso xexo. Xiyimo xi cincile hakunene! Hi nguva yin’wana ni yin’wana ya Khisimusi, ku kombisiwa swifaniso swa n’wana, Yesu. Vanhu va le vuxeni se va swi toloverile swifaniso swo tano, naswona switarata swo tala kwalaho swi fana ni leswi nga le Yuropa.

Hi madyambu ya November 25, 1998, loko ku sele n’hweti leswaku ku va Khisimusi, patu lerikulu ra le Paris, ku nga Champs Élysées ri voningiwa hi timboni to tlula 100 000 leti nga emirhini ya 300 leyi nga epatwini rolero leri tivekaka. Kasi, exitarateni lexikulu xa doroba ra Seoul, eKorea, ku kombisiwa nsinya wa Khisimusi lowukulu exitolo lexikulu naswona wu sungula ku voninga nivusiku eka ntsindza wolowo. Ku nga ri khale switarata swa wona swi khavisiwa hi swikhaviso swa Khisimusi.

Thelevhixini, xiya-ni-moya ni maphepha-hungu swi vulavula hi minongonoko leyi fambisanaka ni Khisimusi siku na siku. Hi ku susumetiwa hi moya wa Khisimusi, tiko hinkwaro ri va leri khomekaka hi ku hoyozela ku hela ka lembe. Tikereke ta le Seoul, leti ku tala ka tona ku hlamarisaka vaendzi vo tala, ta khavisiwa hi xihatla. Xisweswo, Korea ni matiko man’wana ya le Vuxeni ma ngheniwe hi moya wa Khisimusi hi nkarhi lowu United States yi nga khomeka hi ku tlangela Siku ro Nkhensa eku heleni ka November.

Matiko yo tala ya le Vuxeni a ma tekiwi ma ri ya Vujagana. Hi xikombiso, ko va 26,3 wa tiphesente ta vaaki va le Korea lava tivulaka Vakreste. EHong Kong i 7,9 wa tiphesente, eTaiwan i 7,4 wa tiphesente kasi eJapani ko va 1,2 wa tiphesente. Kahle-kahle, vanhu vo tala va le Vuxeni a hi Vakreste, kambe va vonaka va nga lwisani ni ku tlangela Khisimusi. Entiyisweni, hakanyingi va vonaka va yi hisekela swinene ku tlula vanhu va le Vupela-dyambu. Hi xikombiso, Hong Kong ri dume hi ku tlangela ka rona lokukulu Khisimusi, hambileswi vo tala va vaaki va rona va nga Mabudha kumbe Matao. Hambi ku ri eChayina, laha ku ngo va vanhu va 0,1 wa tiphesente ntsena lava tivulaka Vakreste, Khisimusi yi ya yi tlangeriwa swinene.

Ha yini Khisimusi yi tlangeriwa swinene le Vuxeni? Ha yini vanhu lava nga tekiki Yesu tanihi Mesiya va hlanganyela eku tlangeleni ka Khisimusi, leyi vo tala lava tivulaka Vakreste va yi langutaka tanihi siku ra yena ra ku velekiwa? Xana Vakreste va ntiyiso va fanele va tekelela langutelo ra vona hi Khisimusi? Hi ta kuma tinhlamulo loko hi ri karhi hi kambisisa ndlela leyi Khisimusi yi veke ni ndhuma ha yona le Korea, ku nga tiko ra khale swinene ra le Vuxeni.