‘Minkarhi Ya Ku Vuyeteriwa’ Yi Kwala Nyongeni!
Emahlweninyana ka ku va Yesu a tlhandlukela etilweni, van’wana va vadyondzisiwa va yena vo tshembeka va n’wi vutisile: “Hosi, xana u vuyetela mfumo eIsrayele hi nkarhi lowu?” Nhlamulo ya Yesu yi kombise leswaku a ku ta hundza nkarhi wo karhi Mfumo wu nga si ta. Hi nkarhi wolowo, valandzeri vakwe a va ta va ni ntirho lowukulu wo wu endla. A va fanele va va timbhoni ta Yesu “eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.”—Mintirho 1:6-8.
XIAVELO xexo a xi nga ta endliwa hi masiku ma nga ri mangani, mavhiki ma nga ri mangani kumbe tin’hweti ti nga ri tingani. Kambe, vadyondzisiwa a va ha yima-yimanga, va sungule ku chumayela. Kambe a va yi rivalanga mhaka ya ku vuyeteriwa. Muapostola Petro u vulavule ha yona entshungwini lowukulu lowu a wu hlengeletane eYerusalema, a ku: “Hundzukani mi hundzuluka leswaku ku hlanguriwa swidyoho swa n’wina, leswaku tinguva ta ku phyuphyisiwa ti ta ta ti huma eka Yehovha hi xiviri ni leswaku a rhuma Kreste la hlawuleriweke n’wina, Yesu, loyi tilo, hakunene, ri faneleke ri n’wi tamela ku fikela eminkarhini ya ku vuyeteriwa ka swilo hinkwaswo leswi Xikwembu xi vulavuleke ha swona hi nomu wa vaprofeta va xona vo kwetsima va nkarhi wa khale.”—Mintirho 3:19-21.
‘Minkarhi leyi ya ku vuyeteriwa’ a yi ta tisa “tinguva ta ku phyuphyisiwa” leti humaka eka Yehovha. Ku vuyeteriwa loku ku vuriweke ka ha ri emahlweni a ku ta ta hi tindlela timbirhi. Yo sungula, a ku ta va ni ku vuyeteriwa loku phyuphyisaka hi tlhelo ra moya, loku yaka emahlweni sweswi. Ya vumbirhi, a ku ta landzeriwa hi ku simekiwa ka paradeyisi ya xiviri emisaveni.
Ku Sungula Ka Nkarhi Wa Ku Vuyeteriwa
Hilaha muapostola Petro a kombeteleke hakona eka ntshungu wolowo eYerusalema, tilo ri ‘tamele Yesu.’ Leswi swi ve tano ku fikela hi 1914, loko Yesu a teka matimba yakwe ya vuhosi kutani a sungula ku fuma a ri Hosi leyi hlawuriweke ya Xikwembu. Hi nkarhi wolowo, Petro u vule ka ha ri emahlweni leswaku Yehovha u ta “rhuma” N’wana wakwe hi mongo wa leswaku A a ta pfumelela Yesu ku hetisisa xiavelo xakwe tanihi munhu wa nkoka eswikongomelweni swa Xikwembu. Bibele yi hlamusela xiendlakalo xa kona hi ririmi ro fanekisela: “Kutani [nhlengeletano ya Xikwembu ya le tilweni yi] veleka n’wana, wa xinuna, [Mfumo wa Xikwembu emavokweni ya Yesu Kreste] loyi a nga ta risa matiko hinkwawo hi nhonga ya nsimbi.”—Nhlavutelo 12:5.
Kambe matiko a ma nga tiyimiselanga ku titsongahatela vulawuri bya Kreste. Entiyisweni, ma hlasele vafumiwa vakwe lava tshembekaka va laha emisaveni, lava namuntlha va tiviwaka tanihi Timbhoni ta Yehovha. Ku fana ni vaapostola, handle ko kanakana Timbhoni ti byarhe “ntirho wa ku nyikela vumbhoni mayelana na Yesu.” (Nhlavutelo 12:17) Ku kanetiwa ka ntirho lowu wu endliwaka hi Vakreste lava vo tshembeka ku hangalake ku suka eka tiko rin’wana ku ya eka rin’wana. Hi 1918, swirho leswi nga ni vutihlamuleri leswi a swi tirha eyindlu-nkulu ya Sosayiti ya Watch Tower le Brooklyn, eNew York, swi yisiwe ehubyeni hi swihehlo swa mavunwa kutani swi gweviwa ku tshama nkarhi wo leha ekhotsweni swi nga fanelanga. Hi xinkarhana, a swi vonaka onge ntirho wo nyikela vumbhoni wa manguva lawa “ku ya fika endhawini ya le kule swinene ya misava” a wu nge humeleli.—Nhlavutelo 11:7-10.
Hambiswiritano, hi 1919, swirho swa le yindlu-nkulu leswi khotsiweke swi ntshunxiwile kutani endzhakunyana ku suriwa swihehlo hinkwaswo swa mavunwa leswi a swi hehliwa ha swona. A swa ha dyanga nkarhi, hi ku hatlisa swi sungule ntirho wa moya wa ku vuyetela. Ku sukela hi nkarhi wolowo, vanhu va Yehovha va humelerile hi tlhelo ra moya hi mpimo lowu nga si tshamaka wu va kona.
Ku sunguriwe tsima lerikulu ro dyondzisa vanhu va tinxaka hinkwato ku hlayisa swilo leswi Kreste a leriseke valandzeri vakwe leswaku va swi endla. (Matewu 28:20) Mawaku ndlela leyi a swi phyuphyisa ha yona ku vona vanhu lava tshameke va kombisa timfanelo ta vuharhi va cinca langutelo ra vona! Va hluvule vumunhu bya khale, lebyi a byi humesa mikhuva yo fana ni “ku hlundzuka,” “mavulavulelo ya nhlambha,” ni “mavulavulelo lama thyakeke,” kutani va ambala vumunhu lebyintshwa, “lebyi hi vutivi lebyi kongomeke byi endliwaka byi va byintshwa hi ku ya hi xifaniso xa [Xikwembu lexi] byi tumbuluxeke.” Hi mianakanyo ya moya, marito ya muprofeta Esaya ma hetiseka ni sweswi: “Mhisi [munhu loyi a a ri ni timfanelo to fana ni ta mhisi] yi ta tshama nkarhinyana ni xinyimpfana xa xinuna [munhu loyi a voyameleke eka ku rhula], yingwe yi ta etlela ni ximbutana, rhole ni xinghalana ni xifuwo lexi wundliweke kahle swi ta tshama swin’we.”—Vakolosa 3:8-10; Esaya 11:6, 9.
Ku Vuyeteriwa Kun’wana Ku Kwala Nyongeni!
Ku tlhandlekela eka ku vuyeteriwa loku nga kona eparadeyisini ya moya namuntlha, nkarhi lowu ha wona pulanete ya hina yi nga ta va paradeyisi ya xiviri wu tshinela hi ku hatlisa. Ndhawu leyitsongo emisaveni a yi ri paradeyisi loko Yehovha a veka vakokwa wa hina, ku nga Adamu na Evha entangeni wa Edeni. (Genesa 1:29-31) Hi yona mhaka leyi hi nga vulavulaka hi Paradeyisi yi ri leyi vuyeteriweke. Kambe, loko sweswo swi nga si humelela, vukhongeri lebyi nga xi chaviki Xikwembu byi fanele byi susiwa emisaveni. Sweswo swi ta endliwa hi swirho swa politiki swa misava leyi. (Nhlavutelo 17:15-18) Kutani swirho swa politiki ni swa mabindzu swin’we ni vaseketeri va swona, swi ta lovisiwa. Emakumu, valala vo hetelela va Xikwembu—Sathana Diyavulosi ni madimona yakwe—va ta pfaleriwa ku ringana malembe ya gidi—ku nga ku leha ka nkarhi wa tsima ra ku vuyeteriwa. Hi nkarhi wolowo, “mananga ni ndhawu leyi nga riki na mati swi ta khana, ni timbala ta le kwandzasini ti ta tsaka, ti rhumbuka kukota safroni.” (Esaya 35:1) Misava hinkwayo yi ta va yi wisile. (Esaya 14:7) Hambi ku ri vanhu va timiliyoni lava feke va ta pfuxiwa emisaveni. Hinkwavo va ta kuma vuyelo bya ku vuyeteriwa bya gandzelo ra nkutsulo. (Nhlavutelo 20:12-15; 22:1, 2) Emisaveni a ku nge he vi na vanhu lava nga mabofu, lava feke tindleve kumbe lava lamaleke. “Ku hava munhu la tshamaka kona la nga ta ku: ‘Ndza vabya.’” (Esaya 33:24) Endzhakunyana ka ku hela ka Ku Fuma Ka Kreste Ka Gidi Ra Malembe, Diyavulosi ni madimona yakwe va ta ntshunxiwa swa xinkarhana naswona va ta vona ndlela leyi xikongomelo xa Xikwembu hi misava xi nga ta va xi hetiseke ha yona ku fikela enkarhini wolowo. Eku heteleleni, va ta loviseriwa makumu.—Nhlavutelo 20:1-3.
Loko misava yi fika eku heleni ka malembe ya gidi ya ku vuyeteriwa, “hinkwaswo leswi hefemulaka” swi ta dzunisa Yehovha, naswona swi ta endla tano hilaha ku nga heriki. (Pisalema 150:6) Xana u ta va exikarhi ka swona? U nga va exikarhi ka swona.