Yingisa Marito Lama Hlawulekisiweke

¹ A hi hinkwaswo leswi vuriwaka hi munhu swi lavaka ku tekeriwa enhlokweni. Kambe loko Xikwembu xi vulavula, i swa nkoka ku rhiya ndleve. (Det. 28:1, 2) Ha nkhensa leswi vatsari lava huhuteriweke va tsaleke “marito lama hlawulekisiweke ya Xikwembu” leswaku hi vuyeriwa. (Rhom. 3:2) Ntsombano lowu taka wa muganga wu ta hi nyika nkarhi wa nkoka wo twa marito lawa loko ma hlayiwa ni ku hlamuseriwa. Xana u nga swi kotisa ku yini ku rhiya ndleve swinene?

² Fika Ka Ha Ri Ni Nkarhi Mixo Wun’wana Ni Wun’wana: Anakanya ntsako lowu Vaisrayele va veke na wona loko va byeriwe leswaku va fanele va ya hlangana na Yehovha eNtshaveni ya Sinayi leswaku va ta yingisa Nawu wa yena! (Eks. 19:10, 11, 16-19) Loko u ri ni langutelo leri fanaka mayelana ni ku kuma ndzetelo wa Yehovha entsombanweni wa muganga, u ta endla malunghiselelo ya ku fika ka ha ri ni nkarhi siku rin’wana ni rin’wana. A hi nge swi koti ku yingisela nongonoko hinkwawo, loko hi hlwela ku fika ivi hi kavanyeta van’wana hi ku famba-famba hi lava laha hi nga ta tshama kona. Tinyangwa ta laha ntsombano wu nga ta va kona ti ta pfuriwa hi 7:00 nimixo, naswona xiyimiso xi ta sungula hi 9:00 nimixo siku rin’wana ni rin’wana.

³ Hambi ku ri van’wana lava fikeke hi nkarhi, va va va nga si tshamiseka loko xiyimiso xi sungula. Sweswo swi vangiwa hi yini? Va rindzela mutshama-xitulu a vula risimu ro pfula, ku va kona va tshikaka ku bula ni vanghana va vona ivi va sungula ku ya laha va nga ta tshama kona. Hi fanele hi xiya leswaku loko ku sele timinete ti nga ri tingani leswaku xiyimiso xin’wana ni xin’wana xi sungula, mutshama-xitulu u ta va a tshame exitejini, loko vuyimbeleri bya Mfumo byale mahlweni ka xiyimiso byi ri eku tlangeni. Hi yona ndlela ya ku hi tsundzuxa leswaku hi fanele hi tshamiseka! Kutani, loko ku vuriwa risimu ro pfula ha rona, hi ta va hi lunghekele ku hlanganyela eku yimbeleleleni Yehovha swidzuniso.

⁴ Rhiyani Ndleve Tanihi Ndyangu Lowu Nga Ni Vun’we: Loko marito lama hlawulekisiweke ma hlayeriwa Vaisrayele lava hlengeletaneke, mindyangu ku katsa ni “vana,” a va fanele va yingisela va tlhela va dyondza. (Det. 31:12) Emintsombanweni ya hina, vana a va fanelanga va ‘tshikiwa va tiendlela ku rhandza.’ (Swiv. 29:15) Vatswari, hlelani ku tshama swin’we tanihi ndyangu—ku katsa ni vana va n’wina va kondlo-a-ndzi-dyi. Vatswari van’wana va sungula ku yisa vana eswihambukelweni loko se ku yimbeleriwa risimu ro pfula. Hambiswiritano, mukhuva lowu a wu dyondzisi vana leswaku tinsimu ni swikhongelo swa vugandzeri bya hina i swa nkoka. Loko swi koteka, swi nga antswa ngopfu ku ya eswihambukelweni ku nga si sungula xiyimiso!

⁵ Loko hi hatla hi etlela vusiku byin’wana ni byin’wana, hi tlhela hi papalata ku dya ngopfu ninhlikanhi, swi ta hi pfuna leswaku hi kota ku yingisela. Rhiya ndleve eka leswi xivulavuri xi swi vulaka. U nga pfumeleli mianakanyo ya wena yi tsendzeleka. Pfula Bibele ya wena loko matsalwa ma ri karhi ma hlayiwa. Tsala tinhla hi ku komisa. Loko nkulumo ha yin’we yi ri karhi yi nyikeriwa, anakanyisisa hi leswi xivulavuri xi swi vuleke, u tlhela u anakanyisisa hi ndlela leyi u nga ta ri tirhisa ha yona rungula leri. Nimadyambu, bulani hi nongonoko tanihi ndyangu. Hi tihi tinhla leti un’wana ni un’wana a ti tsakeleke? Hi yihi ndlela leyinene leyi ndyangu wa ka n’wina wu nga tirhisaka rungula leri ha yona?

⁶ Xixima Rito Ra Xikwembu: Mintsombano yi hi nyika nkarhi lowunene wa ku burisana ni vanghana ni ku tiphina hi xinakulobye lexinene ni van’wana. Hi ku fika ka ha ri ni nkarhi, hi ta kuma nkarhi wa ku bula nongonoko wu nga si sungula. Hambiswiritano, van’wana va dya mabulo loko nongonoko wu ri karhi wu ya emahlweni, hi xihoxo va anakanya leswaku leswi ku nga endhawini leyikulu, a va kavanyeti munhu. Hambiloko ku ri minhlangano leyi nga ni vanhu vo tala, swa fanela ku rhiya ndleve ku fana niloko hi ri eminhlanganweni eHolweni ya Mfumo. Ku tirhisiwa ka tiselfoni, swiciyoti, tikhamera ta vhidiyo ni to teka swifaniso a swi fanelanga swi kavanyeta van’wana hi nkarhi wa nongonoko.

⁷ Loko Muxe a ri eku nyikiweni ka Nawu lowu humaka eka Yehovha, “a nga dyanga xinkwa naswona a nga nwanga mati.” (Eks. 34:28) Hilaha ku fanaka, a swi fanelanga ku dya kumbe ku nwa loko xiyimiso xa ntsombano xi ri karhi xi ya emahlweni. Handle ka loko ku ri ni swiyimo swo tika leswi vangiwaka hi mavabyi, yimela ‘nkarhi lowu vekeriweke’ sweswo.—Ekl. 3:1.

⁸ Emintsombanweni yin’wana, ka ha ri ni xiphiqo lexi vangiwaka hi vamakwerhu vo hlayanyana swin’we ni vana lava yingayingaka etiphasejini ni le rivaleni ra ntsombano loko nongonoko wu ri karhi wu ya emahlweni. Varindzi va ta komberiwa ku byela vanhu vo tano leswaku va tlhela va ya tshama etindhawini ta vona. Vatirhi va ku tirhandzela lava tirhaka etindzawulweni to hambana-hambana, va fanele va ya tshama ni vayingiseri loko ntirho lowu va wu endlaka wu herile. Handle ka loko vatirhi va ku tirhandzela va byeriwe ku endla ntirho wun’wana lowu swi bohaka leswaku wu endliwa hi nkarhi wa xiyimiso, va fanele va tshama etindhawini ta vona, va yingisela tinkulumo. A va fanelanga va tshama etindzawulweni ta vona, va bula hi leti ni letiya loko nongonoko wu ri karhi wu ya emahlweni. Vatswari a va fanelanga va pfumelela vana va vona ku famba-famba va rholela thyaka loko xiyimiso xi ri karhi xi ya emahlweni. Hi musa varindzi va ta kombela vana lava endlaka tano leswaku va tlhelela eka vatswari va vona.

⁹ A hi swi lavi ku va lava ‘tlanyaleke eku tweni ka hina’ loko hi yingisa Rito ra Xikwembu. (Hev. 5:11) Kutani a hi kombiseni xichavo lexi faneleke hi ku rhiya ndleve swinene loko marito ya Yehovha lama hlawulekisiweke ma hlamuseriwa entsombanweni wa hina wa muganga lowu taka.