U Nga Kanakani!
1 Loko hi tilunghiselela ku ya chumayela hi yindlu ni yindlu, xihinga lexikulu xi nga va ku huma emakaya ya hina hi ya chumayela. Loko hi titwa hi nga faneleki sweswo swi nga hi kanakanisa leswaku hi huma hi ya byela “vanhu va mixaka hinkwayo” ntiyiso. (1 Tim. 2:4) Kambe a hi fanelanga hi kanakana ku chumayela mahungu lamanene. Ha yini?
2 I Rungula Ra Yehovha: Yehovha u tirhise Bibele ku vula rito ra yena. Loko hi yisa rungula leri eka vanhu van’wana, hi vula mianakanyo ya yena, ku nga ri ya hina. (Rhm. 10:13-15) Kahle-kahle loko vanhu va ala rungula ra Mfumo, va ala marito ya Yehovha. Nilokoswiritano, a hi heli matimba. Ha tiyiseka leswaku rungula leri ri ta khumba timbilu ta lava va navelaka leswaku swiyimo swa misava swi hundzuka ni lava va khathalaka hi vumoya bya vona.—Ezek. 9:4; Mat. 5:3, 6.
3 Yehovha Hi Yena A Kokaka Vanhu: Munhu loyi a aleke ku hi lomba ndleve enkarhini lowu hundzeke swi nga ha endleka sweswi a lava ku yingisela hileswi swiyimo swa yena swi cinceke ni leswi mbilu ya yena yi nga ha nonon’hwiki. Yehovha a nga ha amukela munhu wo tano kutani “a n’wi koka.” (Yoh. 6:44, 65) Loko sweswo swi endleka, hi lava ku va hi lunghekele leswaku Yehovha a hi tirhisa, kutani hi landzela nkongomiso wa tintsumi wa ku kuma vanhu vo tano.—Nhlav. 14:6.
4 Xikwembu Xi Hi Nyika Moya Wa Xona: Moya wo kwetsima wu hi pfuna ku vulavula “hi vurhena hi vulawuri bya Yehovha.” (Mint. 14:1-3) Loko ho tsundzuka leswaku hi ni nsusumeto lowu wa matimba swinene evutirhelini bya hina, a hi nge kanakani ku va byela ntiyiso vaakelani, vatirhi-kulorhi, lava hi nghenaka na vona xikolo, maxaka ni swidyondzeki kumbe swigwili.
5 Yesu U Hi Dyondzise Ndlela Leyi Hi Nga Swi Endlaka Ha Yona: Yesu u tirhise swivutiso leswi tlhontlhaka mianakanyo, swifaniso leswi tirhaka ni ku hlamula hi Matsalwa. U hlamusele ntiyiso ku suka embilwini hi ndlela yo olova ni leyi tsakisaka. Leti ta ha ri tindlela leti tirhaka ngopfu ninamuntlha. (1 Kor. 4:17) Swi nga ha va swi nga fani swiyimo leswi hi chumayelaka eka swona, kambe rungula ra Mfumo leri nga ni matimba a ri hundzuki.
6 Hi ni lunghelo ra ku tirhisiwa hi Yehovha leswaku hi pfuna vanhu hi ndlela yo hlawuleka ni ya nkoka. Hi nga kanakani! Onge hi nga va ni xivindzi kutani hi pfumelela Yehovha a “hi pfulela nyangwa ya marito” leswaku hi byela van’wana mahungu lamanene.—Kol. 4:2-4.