Ku Pfuna Van’wana Leswaku Va Dzunisa Yehovha
1 Rungula ra nkoka leri chumayeriwaka evanhwini emisaveni hinkwayo hi leri nge: “Chavani Xikwembu mi xi vangamisa, hikuva nkarhi wa ku avanyisiwa hi xona wu fikile, gandzelani Loyi a endleke tilo ni misava ni lwandle ni minseledyana ya mati.” (Nhlav. 14:6, 7) Hi nyikiwe lunghelo ra ku hlanganyela eku twariseni ka marito wolawo. Xana i yini leswi vanhu va faneleke va swi tiva malunghana na Yehovha leswaku va n’wi chava ni ku n’wi gandzela?
2 Vito Ra Yena: Vanhu va fanele va kota ku tiva vito ra Xikwembu xi ri xin’we xa ntiyiso exikarhi ka swikwembu swo tala swa mavunwa leswi gandzeriwaka namuntlha. (Det. 4:35; 1 Kor. 8:5, 6) Kahle-kahle, vatsari va Bibele va tirhise vito ra Yehovha leri hlawulekeke hi minkarhi leyi tlulaka 7 000. Hambiloko hi fanele hi kumisisa nkarhi lowu faneleke wa ku byela vanhu vito ra Xikwembu, a hi fanelanga hi chava ku vulavula ha rona kumbe hi papalata ku ri tirhisa. Xikwembu xi rhandza leswaku vanhu hinkwavo va tiva vito ra xona.—Ps. 83:18.
3 Vumunhu Bya Yena: Leswaku vanhu va dzunisa Yehovha, va fanele va swi tiva leswaku i Xikwembu xa muxaka muni. Hi fanele hi va byela hi rirhandzu ra yena leri hlamarisaka, vutlhari bya yena lebyikulu, vululami bya yena lebyi heleleke ni hi matimba yakwe lamakulu swin’we ni musa wa yena, tintswalo ta yena ta rirhandzu ni timfanelo tin’wana takwe leti hlamarisaka. (Eks. 34:6, 7) Nakambe va fanele va dyondza ku chava Xikwembu hi timbilu ta vona hinkwato, va xi xixima, va ri karhi va tsundzuka leswaku va ta kuma vutomi ntsena loko Yehovha a va amukela.—Ps. 89:7.
4 Ku Tshinela Eka Xikwembu: Leswaku vanhu va pona eka vuavanyisi lebyi taka bya Xikwembu, va fanele va va ni ripfumelo eka Yehovha. (Rhom. 10:13, 14; 2 Tes. 1:8) Leswi a swi vuli ku tiva vito ra Xikwembu ni timfanelo ta xona ntsena. Hi fanele hi pfuna vanhu leswaku va tiendlela vuxaka na Yehovha, va tshemba yena hi timbilu ta vona hinkwato. (Swiv. 3:5, 6) Loko va tirhisa leswi va swi dyondzaka, va khongela Xikwembu hi mbilu hinkwayo, ni ku vona ndlela leyi xi va pfunaka ha yona evuton’wini bya vona, ripfumelo ra vona ri ta kula, ri va pfuna leswaku va tshinela eka Yehovha.—Ps. 34:8.
5 Onge hi nga hisekela ku twarisa vito ra Xikwembu ni ku pfuna van’wana leswaku va veka ntshembo wa vona hinkwawo eka xona va tlhela va xi chava. Hi nga swi kota ku pfuna vanhu vo tala leswaku va tiva Yehovha ni ku n’wi dzunisa tanihi ‘Xikwembu xa vona xa ku ponisa.’—Ps. 25:5.