“Lunghekela Ntirho Wun’wana Ni Wun’wana Lowunene”

¹ Loko Yesu a sungula tsima rakwe lerintshwa ro chumayela, u tinyike nkarhi wo letela vadyondzisiwa vakwe. (Mat. 10:5-14) Hambileswi hinkwerhu hi nga ni swo tala swo swi endla, ku heta nkarhinyana hi lunghiselela leswi hi nga ta swi vula entirhweni wa yindlu ni yindlu swi ta hi pfuna leswaku hi va ni ntshovelo lowunene.—2 Kor. 9:6.

² Ndlela Yo Lunghiselela: Leswaku hi lunghiselela kahle swi lava hi rhanga hi hlaya nkandziyiso lowu hi nga ta wu fambisa. Hi fanele hi tlhela hi ehleketa hi vanhu va le nsin’wini ya hina. I yini leswi va karhatekaka ha swona? Hi byihi vukhongeri lebyi nga tala endhawini yoleyo? Hi nga ha tirhisa swiringanyeto leswi nga eka Vutirheli Bya Hina Bya Mfumo ni leswi nga ebukwini leyi nge Ku Hlamulana.

³ Ku rhiya ndleve loko ku endliwa minkombiso eka Nhlangano wa Ntirho swi ta hi pfuna. Loko hi ya hi tolovela ku tirhisa swingheniso swa hina a hi nge he boheki ku heta nkarhi wo leha hi ri eku lunghiseleleni. Hambiswiritano, loko hi nga si ya ensin’wini swi ta hi fambela kahle loko hi tinyika nkarhi wa ku titoloveta swingheniso leswi hi swi lunghiseleleke. Hi fanele kamba minkwama ya hina loko yi ri ni hinkwaswo leswi hi nga ta swi tirhisa.

⁴ I yini leswi nga ta hi pfuna ku tsundzuka swingheniso swa hina? Ku titoloveta swona hi rito leri twalaka swi ta hi pfuna leswaku hi tsundzuka leswi hi nga ta swi vula. Van’wana va tsakela ku titoloveta swona eka dyondzo ya vona ya ndyangu. Van’wana va vone swi pfuna ku tsala xingheniso xo koma exiphephanini kutani va xi hlayanyana loko va nga si nghena emutini.

⁵ Ndlela Leyi Swi Pfunaka Ha Yona: Loko hi lunghiselele kahle swi ta hi fambela kahle naswona hi ta tiphina ensin’wini. Swi ta hi pfuna leswaku hi nga chuhi ngopfu loko hi fika emutini. Nakambe swi ta hi pfuna leswaku hi rhiya ndleve loko n’wini wa muti a ri eku vulavuleni ematshan’weni yo ehleketa hileswi hi nga ta swi vula. Ku engetela kwalaho, ku wu tiva kahle nkandziyiso lowu hi nga ta wu fambisa swi hi pfuna leswaku hi wu vulavulela hi ku hiseka.

⁶ Matsalwa ma hi khutaza leswaku hi “lunghekela ntirho wun’wana ni wun’wana lowunene.” (Tito 3:1) A ku na ntirho wun’wana wo antswa ku tlula ku chumayela mahungu lamanene. Loko hi lunghiselela kahle hi kombisa xichavo eka n’wini wa muti la yingiselaka ni le ka Yehovha Xikwembu lexi hi yimelaka xona.—Esa. 43:10.