TSHAMANI MI RINDZILE!

Vanhu Vo Ringana 6 Wa Timiliyoni Va Lovile Hikwalaho Ka COVID—Xana Bibele Yi Ri Yini Hi Mhaka Leyi?

Va World Health Organization (WHO) va vula leswaku ku sukela hi ti 23 ta May 2022, ku love vanhu vo ringana 6.27 wa timiliyoni hikwalaho ka COVID-19. Hambiswiritano, eka hungu leri humesiweke hi ti 5 ta May 2022, va WHO va ringanyete leswaku nhlayo ya vanhu lava feke yi le henhla ngopfu. Va vule leswaku hi lembe ra 2020 na 2021, “nhlayo ya vanhu lava dlayiweke hi ntungu wa COVID-19 ni mavabyi man’wana lama fambisanaka na yona . . . a yi ri kwalomu ka 14.9 wa timiliyoni.” Xana Bibele yi ri yini hi mavabyi lawa lama tshovaka mbilu?

Bibele yi profete khale hi mintungu leyi dlayaka

Yesu u vule leswaku “emasikwini yo hetelela” a ku ta va ni “mintungu” leyi tlulelaka.—Luka 21:11; 2 Timotiya 3:1, Bibele Ya Matsalwa Yo Kwetsima Ya Misava Leyintshwa.

Leswi Yesu a swi vuleke swi le ku hetisekeni namuntlha. Leswaku u dyondza swo tala hi mhaka leyi, hlaya nhlokomhaka leyi nge: “What Is the Sign of ‘the Last Days,’ or ‘End Times’?”

Bibele ya hi chavelela

“Xikwembu xa nchavelelo hinkwawo lexi hi chavelelaka emiringweni ya hina hinkwayo.”—2 Vakorinto 1:3, 4.

Vo tala lava loveriweke hi vanhu lava va va rhandzaka va kume nchavelelo eBibeleni. Dyondza swo tala eka nhlokomhaka leyi nge: “U Nga Ri Hlula Njhani Gome?—Leswi U Nga Swi Endlaka” ni leyi nge: “Swilo Swa Nkoka Leswi Nga Pfunaka Lava Feriweke.”

Bibele yi hi nyika xitshunxo emhakeni leyi

“Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona ematilweni.”—Matewu 6:10.

Ku nga ri khale, “Mfumo wa Xikwembu” wu ta endla leswaku ku nga vi na “munhu loyi a tshamaka kona loyi a nga ta ku: ‘Ndza vabya.’” (Marka 1:14, 15; Esaya 33:24) Leswaku u twa swo tala hi Mfumo lowu wa Xikwembu nileswi wu nga ta swi endla, hlalela vhidiyo leyi nge, Mfumo Wa Xikwembu I Yini?

Ha ku rhamba leswaku u twa swo tala hileswi Bibele yi swi dyondzisaka leswaku wena ni ndyangu wa wena mi ta vuyeriwa hi switsundzuxo swa yona swa vutlhari ni hi switshembiso swa yona leswi tsakisaka.