Vakreste Ni Nyimpi—Xana Bibele Yi Ri Yini Hi Mhaka Leyi?

Hilaha hi swi voneke hakona eka nyimpi ya le Ukraine, varhangeri vo tala va vukhongeri bya Vukreste va hlohlotela tinyimpi. Xiya ndlela leyi vafundhisi va ri seketelaka hayona tlhelo ro karhi eka tinyimpi:

• “Hi ba mandla hi vuyelela swinene ni ku tlhela hi tlangela eka tinhenha ta hina leti sirheleleke tiko ra Ukraine eka valala . . . Timbilu ta hina ti tshama ti ri na n’wina naswona ha mi katsa eswikhongelweni ni ku tlhela hi mi seketela mikarhi hinkwayo.”—Hilaha mubixopo Epiphanius wo sungula wa le Kyiv a vuleke hakona eka The Jerusalem Post ya March 16, 2022.

• “Murhangeri wa Kereke ya le Rhaxiya ya Orthodox u khome nhlengeletano ni masocha hi Sonto, laha a va hlohloteleke leswaku hi vona ntsena eRhaxiya lava nga salaka va sirhelela tiko tanihi leswi masocha ya le Moscow ma yaka emahlweni ma hlomela ku ya enyimpini eUkraine.”—Reuters, April 3, 2022.

Xana Vakreste va fanele va katseka enyimpini? Xana Bibele yi ri yini hi mhaka leyi?

Leswi Bibele yi swi vulaka

Bibele yi vula leswaku lava landzelaka Yesu Kreste hi ku helela a va katseki eka tinyimpi.

• “Tlherisela banga ra wena endhawini ya rona, hikuva hinkwavo lava khomaka banga va ta dlayiwa hi banga.”—Matewu 26:52.

  Xana munhu loyi a seketelaka nyimpi kumbe ku lwa enyimpini u va a yingisa marito ya Yesu hakunene?

• “Ndzi mi nyika nawu lowuntshwa wa leswaku mi rhandzana; tanihi leswi ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina loko mi rhandzana.”—Yohane 13:34, 35.

  Xana munhu loyi a seketelaka tinyimpi u va a kombisa rirhandzu leri Yesu a vuleke leswaku valandzeri vakwe va ta tiviwa ha rona?

Leswaku u kuma swo tala hi mhaka leyi, hlaya nhlokomhaka leyi nge: “Xana Tinyimpi Ta Fambisana Ni Vukreste?”

Vakreste ni tinyimpi namuntlha

Xana swa twala ku vula leswaku Vakreste va fanele va papalata ku katseka eka swa tinyimpi namuntlha? Ina. Bibele yi vula leswaku emikarhini ya hina, leyi vuriwaka ‘masiku yo hetelela’ a ku ta va ni vanhu lava humaka ematikweni hinkwawo lava ‘a va nga ta dyondza nyimpi,’ ku nga leswi swi fambisanaka ni tidyondzo ta Yesu.—Esaya 2:2, 4.

• Leswaku u kuma swo tala hi mhaka leyi, hlaya Xihondzo xo Rindza lexi nga ni nhlokomhaka leyi nge: “Xana Xikwembu Xi Ri Yini Hi Nyimpi?”

Ku nga ri khale, Yehovhaa “Xikwembu xa ku rhula,” u ta tirhisa mfumo wakwe wa le matilweni leswaku a ponisa vanhu “eku tshikileriweni ni le madzolongeni.”—Vafilipiya 4:9; Pisalema 72:14.

• Leswaku u vona ndlela leyi a nga ta swi endla hayona, hlalela vhidiyo leyi nge: Mfumo Wa Xikwembu I Yini?