Dyandza Lerikulu—Xana Bibele Yi Ri Yini Hi Mhaka Leyi?

“Chayina yi vike ku hisa lokukulu ni ximumu xa vunharhu lexi nga riki na mpfula naswona a ku nga se tshama ku vikiwa xo fana na xona.”—The Guardian, September 7, 2022.
“Eka malembe ya ntlhanu lama nga ta landzela, ku ringanyetiwa leswaku swiphemu swin’wana swa Afrika swi ta xaniseka hikwalaho ka dyandza lerikulu.”—UN News, August 26, 2022.
“Ku vikiwa leswaku ku ni dyandza lerikulu eka matiko yo tlula hafu ya le Yuropa naswona a ku se tshama ku va ni dyandza ro fana na rona eka malembe ya 500 lama hundzeke.”—BBC News, August 23, 2022.

Vativi vo tala va ringanyeta leswaku dyandza ro tano ri ta ya emahlweni ri nyanya. Xana hi ta kala hi va ni vumundzuku lebyinene? Xana Bibele yi ri yini hi mhaka leyi?

Dyandza ni vuprofeta bya le Bibeleni

Bibele yi profete hi leswi endlekaka namuntlha:

“Ku ta va ni ku kayivela ka swakudya . . . etindhawini to hambanahambana.”—Luka 21:11.

Dyandza ri endla leswaku ku va ni ku kayivela ka swakudya. Ku kayivela koloko ka swakudya, ku xaniseka ni rifu leri vangiwaka hi ku kayivela ka swakudya, swi hetisisa vuprofeta bya le Bibeleni.—Nhlavutelo 6:6, 8.

Leswi endlaka dyandza ri ya ri nyanya

Bibele yi hi byela xivangelo lexi twalaka lexi endlaka dyandza ri ya ri nyanya. Yi ri:

“Munhu la fambaka a nga ka a nga ma kongomisi magoza yakwe.”—Yeremiya 10:23.

Leswi swi vula leswaku vanhu a va nge humeleli loko va ‘kongomisa magoza ya vona’ kumbe ku tilawula. Hakanyingi swiboho swa vona swo biha swi endla leswaku ku va ni dyandza ni ku kayivela ka mati.

Van’wasayense vo tala va vula leswaku migingiriko ya vanhu, hi yona leyi endlaka leswaku ku va ni ku hisa loku nga lawulekiki loku endlaka leswaku dyandza ri ya ri andza emisaveni hinkwayo.
Swiendlo swa vanhu va makwanga ni lava vekaka milawu handle ko ehleketa hi vumundzuku, swi endla ku tsemeleriwa misinya, ku thyakisiwa mati, moya ni ku nga tirhisiwi kahle ka swicelwa naswona sweswo swi endla ku va ni mati lama nga basangiki.

Hambiswiritano, Bibele yi hi nyika ntshembo.

Xana ku ni ntshembo hi vumundzuku?

Bibele yi tshembisa leswaku Xikwembu xi ta lulamisa swiphiqo leswi hi nga na swona swa mati. Njhani?

1. Xikwembu xi ta “lovisa lava onhaka misava.” (Nhlavutelo 11:18) Xi ta herisa leswi endlaka leswaku ku va ni ku kayivela ka mati, vanhu vo homboloka ni lava nga ni makwanga, lava swiendlo swa vona swi onhaka ntumbuluko.—2 Timotiya 3:1, 2.
2. “Misava leyi tshweke hi mumu yi ta va xidziva lexi nga ni tinhlanga.” (Esaya 35:1, 6, 7) Xikwembu xi ta lunghisa ku onhaka loku vangiweke hi dyandza kutani xi endla misava leyi yi va paradeyisi leyi nga ni mati yo tenga.
3. “U hlayisa misava, U endla leswaku yi nona yi tlhela yi va ni swakudya swo tala.” (Pisalema 65:9) Hikwalaho ko katekisiwa hi Xikwembu, misava yi ta tala hi swakudya swa kahle naswona yi ta va ni mati yo tenga lama nga ta enela vanhu hinkwavo.