Xana Matiko Ma Nga Tirhisana Leswaku Ku Ta Papalatiwa Makhombo Lama Vangiwaka Hi Ku Cinca Ka Maxelo?—Xana Bibele Yi Ri Yini Hi Mhaka Leyi?

Hi Sonto November 20, 2022, Nhlengeletano ya COP27 ya Nhlangano wa Matiko mayelana ni ku Cinca ka Maxelo yi fike emakumu. Hambileswi ku fikeleriweke xiboho xo nyika matiko lama nga evuswetini mali yo ma pfuna ku langutana ni makhombo lama vangiweke hi ku cinca ka maxelo, vo tala va swi xiya leswaku sweswo a swi nge xi herisi lexi vangaka xiphiqo lexi.

• “Ndza tsaka hileswi hi tekeke xiboho xo veka mali etlhelo yo pfuna lava xanisekaka hikwalaho ka ku cinca ka maxelo. Swi le rivaleni leswaku leswi swi ta va swi nga enelanga . . . Pulanete ya hina yi le khombyeni lerikulu lerova loko ku nga songiwi rigogo ra ha tsakama, yi ta onhaka hi ku helela lerova yi nga ha lulamiseki.”—Hi ku vula ka matsalana wa Nhlangano wa Matiko António Guterres hi November 19, 2022.

• “Ku nga ri khale, misava yi nga ha langutana ni ku cinca lokukulu loku nga ni khombo loku nga ta khumba vanhu hinkwavo.”—Hi ku vula ka Mary Robinson khale ka presidente wa le Ireland tlhelo khale ka Khomixinara Lonkulu wa Timfanelo ta Vanhu wa Nhlangano wa Matiko, hi November 20, 2022.

Vantshwa hi vona va karhatekaka ngopfu hi vumundzuku bya pulanete ya hina. Hambiswiritano, xana matiko ma nga swi kota ku tirha swin’we leswaku ma hetisisa xitshembiso xa wona xo teka goza ro lulamisa swiphiqo leswi vangaka ku cinca ka maxelo? Xana Bibele yi ri yini hi mhaka leyi?

Xana matiko ma nga swi kota ku tirha swin’we kutani ma humelela?

Bibele yi vula leswaku hambiloko mimfumo yo kota ku lulamisa swiphiqo swin’wana leswi vangiwaka hi ku cinca ka maxelo kambe a yi nge swi koti ku swi lulamisa hi ku helela. Xiya swivangelo swimbirhi leswi endlaka swi va tano:

• “A swi koteki ku ololoxa nchumu lowu gombonyokeke.”—Eklesiasta 1:15.

  Leswi ri vulaka swona: Mimfumo a yi nge swi koti ku lulamisa swiphiqo hinkwaswo hikuva vanhu a va nga endleriwanga ku tifuma. (Yeremiya 10:23) Hambiloko matiko mo tirhisana, ma ha ta tsandzeka ku lulamisa swiphiqo swa misava.

• “Hikuva vanhu va ta va lava tirhandzaka, varhandzi va mali, . . . lava nga tiyimiselangiki ku pfumelelana ni van’wana.”—2 Timotiya 3:2, 3.

  Leswi ri vulaka swona: Bibele yi profete leswaku vanhu enkarhini wa hina a va ta lava leswi vuyerisaka vona vini naswona a va ta ala ku tirhisana leswaku van’wana va nga vuyeriwi.

Lexi endlaka hi va ni ntshembo

Hambiswiritano, vumundzuku bya pulanete ya hina a byi titsheganga hi switshembiso swa tihulumendhe ta vanhu. Xikwembu xi hi nyike Mufumi wa misava loyi a fanelekaka, Yesu Kreste. Loko yi vulavula hi yena, Bibele yi ri:

• “U ta nyikiwa mfumo. U ta thyiwa Mutsundzuxi Lonene, Xikwembu xa Matimba, Tatana La Nga Riki Na Makumu, Hosana Ya Ku Rhula.”—Esaya 9:6, nhlamuselo ya le hansi.

Yesu i Hosi ya Mfumo wa Xikwembu kumbe hulumendhe ya le tilweni. (Matewu 6:10) U ni matimba ni vutlhari naswona u lava ku hlayisa pulanete ya hina ku katsa ni vanhu lava tshamaka eka yona. (Pisalema 72:12, 16) Ehansi ka vulawuri byakwe, Mfumo wa le matilweni wu ta herisa lava “onhaka misava” naswona wu ta endla leswaku mbango wa hina wu tlhela wu va lowunene.—Nhlavutelo 11:18; Esaya 35:1, 7.

Leswaku u dyondza swo tala mayelana ni leswi nga ta va xitshunxo eka swiphiqo swa ku cinca ka maxelo, hlaya nhlokomhaka leyi nge: “Xana Bibele Yi Ri Yini Hi Vumundzuku Bya Hina Ni Ku Cinca Ka Maxelo?”