Swiphiqo Swa Mbango—Leswi Mfumo Wa Xikwembu Wu Nga Ta Swi Endla

“Xiyimo xa xihatla xa maxelo, xi vangela vanhu ni swilo hinkwaswo leswi hanyaka swiphiqo. Swidzedze leswikulu leswi yaka swi va ni matimba hikwalaho ka ku cinca ka maxelo, swi onha makaya ya vanhu ni ku tlhela swi endla leswaku swi tika ku kuma swilo swo tihanyisa emisaveni hinkwayo. Ndhawu leyi ku tshamaka swiharhi swa le lwandle yi ya yi hisa swinene, leswi swi nga endla leswaku swivumbiwa swo tala elwandle swi fa.”—Inger Andersen, matsalana-jenerala wa le hansi wa Nhlangano wa Matiko ni mukongomisinkulu wa Nongonoko wa Mbango wa UN, July 25, 2023.

Xana mifumo yi nga swi kota ku tirhisana leswaku yi tlhantlha swiphiqo leswi, leswi karhataka misava hinkwayo? Xana yi nga swi kota ku endla leswaku swiphiqo leswi swi nga ha vi kona?

Bibele yi vulavula hi mfumo lowu nga ta tlhantlha swiphiqo hinkwaswo swa mbango emisaveni. Yi vula leswaku “Xikwembu xa le tilweni xi ta simeka mfumo,” lowu nga ta fuma ni ku tlhantlha swiphiqo hinkwaswo emisaveni. (Daniyele 2:44) Loko ku fuma mfumo wolowo, vanhu ‘a va nge onhi kumbe ku vavisa’ van’wana hambi ku ri misava.—Esaya 11:9.