Xana Armagedoni Yi Ta Sungula eIsrayele?—Bibele Yi Ri Yini Hi Mhaka Leyi?

Bibele yi hlamusela Armagedoni tanihi nyimpi ya misava hinkwayo laha mifumo hinkwayo ya vanhu yi nga ta lwa ni Xikwembu, ku nga ri nyimpi ya le ndhawini yo karhi ntsena.

• “Mimoya leyi humaka eka madimona . . . yi ya eka tihosi ta misava hinkwayo yi ya ti hlengeleta leswaku ti ta lwa nyimpi ya siku lerikulu ra Xikwembu xa Matimba Hinkwawo. . . . Hiloko mimoya leyi nga basangiki yi hlengeleta tihosi endhawini leyi vuriwaka Armagedoni hi Xiheveru.”—Nhlavutelo 16:14, 16.

Rito “Armagedoni” ri huma eka rito ra Xiheveru Har-Magedoni, leri vulaka “Ntshava ya Megido.” Megido a ku ri doroba eIsrayele wa khale. Hikwalaho ka xivangelo xexo, vanhu van’wana va tshemba leswaku Armagedoni yi ta lweriwa eIsrayele. Hambiswiritano, xifundzha xa Megido kumbe tindhawu tin’wana ta le Middle East a hi tikulu lerova “tihosi ta misava hinkwayo” swin’we ni mavuthu ya tona ya nyimpi swi nga ringana eka tona.

Buku ya Nhlavutelo yi tsariwe hi ku “tirhisa swikombiso” kumbe ririmi ro fanikisela. (Nhlavutelo 1:1) Armagedoni a yi kombeteli eka ndhawu yo karhi ya xiviri, kambe yi kombetela xiyimo xa misava hinkwayo laha matiko ma nga ta hlengeletana ro hetelela leswaku ma lwisana ni vulawuri bya Xikwembu.—Nhlavutelo 19:11-16, 19-21.