I Mani Loyi A Nga Ta Ponisa Vaakatiko?—Bibele Yi Ri Yini Hi Mhaka Leyi?

Nhlangano Wa Matiko wu te:

• Ku sukela hi October 7 ku ya eka October 23, 2023, nyimpi ya le Gaza le Israyele yi endle leswaku ku dlayiwa vanhu vo tlula 6 400 naswona 15 200 wa vona va vavisekile, vo tala va vona i vaakatiko. Ku engetela kwalaho, madzana ya magidi ya sindzisiwe ku suka emakaya ya vona.

• Ku sukela hi September 24, 2023, nyimpi ya Russia na Ukraine yi endle leswaku ku dlayiwa vaakatiko va 9 701 naswona va 17 748 va vavisekile eUkraine.

Bibele yi nyikela ntshembo wihi eka lava va xanisekaka hikwalaho ka nyimpi?

Lexi endlaka hi va ni ntshembo

Bibele yi vula leswaku Xikwembu xi ta “herisa tinyimpi emisaveni hinkwayo.” (Pisalema 46:9) Xi ta tirhisa mfumo wa le tilweni ku herisa mifumo hinkwayo ya vanhu. (Daniyele 2:44) Mfumo wa Xikwembu wu ta tisa ntshunxeko eka vanhu hinkwavo.

Xiya leswi Yesu Kreste, Hosi ya Mfumo wa Xikwembu yi nga ta swi endla:

• “Yi ta pfuna swisiwana leswi kombelaka mpfuno, ni lava pfumalaka ni un’wana ni un’wana la nga riki na mupfuni. Yi ta va ni musa eka swisiwana ni lava pfumalaka, yi ta sirhelela vutomi bya swisiwana. Yi ta swi ponisa eku tshikileriweni ni le madzolongeni.”—Pisalema 72:12-14.

Hi ku tirhisa Mfumo wa xona, Xikwembu xi ta swi herisa hi ku helela ku xaniseka ni maxangu leswi vangiweke hi nyimpi ni madzolonga.

• “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona. Swilo swo sungula swi hundzile.”—Nhlavutelo 21:4.

Ku nga ri khale, Mfumo wa Xikwembu wu ta tisa ku cinca lokukulu emisaveni. Bibele yi vule leswaku ku ta va ni “tinyimpi ni swiviko swa tinyimpi” leswi hi swi vonaka swi humelela namuntlha. (Matewu 24:6) Swiendlakalo leswi ni swin’wana, swi kombisa leswaku hi hanya “emasikwini yo hetelela” ya ku fuma ka vanhu.—2 Timotiya 3:1.