Ha Yini Timbhoni Ta Yehovha Ti Nga Tlangeli Paseka?

Tidyondzo leti hoxeke leti tolovelekeke

Mavunwa: Timbhoni ta Yehovha a ti tlangeli Paseka hikuva a hi Vakreste.

Ntiyiso: Ha tshemba leswaku Yesu Kreste i Muponisi wa hina naswona hi endla hilaha hi nga kotaka ha kona leswaku hi “landzelerisisa mikondzo yakwe.”—1 Petro 2:21; Luka 2:11.

Mavunwa: A mi pfumeli leswaku Yesu u pfuxiwile eku feni.

Ntiyiso: Ha pfumela eka ku pfuxiwa ka Yesu; sweswo hi swi teka ku ri nchumu wa nkoka swinene eka Vakreste naswona ha swi katsa loko hi chumayela.—1 Vakorinto 15:3, 4, 12-15.

Mavunwa: A mi khathali leswaku vana va n’wina va kayeriwa eka ntsako wa ku tlangeriwa ka holideyi ya Paseka.

Ntiyiso: Ha va rhandza vana va hina—hi endla hilaha hi kotaka ha kona leswaku hi va letela hi tlhela hi va pfuna leswaku va tsaka.—Tito 2:4.

Ha yini Timbhoni ta Yehovha ti nga tlangeli Paseka?

• Ku tlangeriwa ka holideyi ya Paseka a ku sekeriwanga eBibeleni.

• Yesu u lerise leswaku hi tsundzuka rifu rakwe ku nga ri ku pfuxiwa kakwe. Lembe rin’wana ni rin’wana ku va ni Xitsundzuxo xa rifu rakwe hi ku ya hi khalendara ya tin’hweti ta Bibele.—Luka 22:19, 20.

• Ha tshemba leswaku masungulo ya Paseka lama humaka eka mikhuva ya khale ya vuswikoti byo veleka, ma endla leswaku Paseka yi nga amukeleki eka Xikwembu. Xikwembu xi lava “ku tinyiketela loku hlawulekeke” naswona xi khunguvanyisiwa hi vugandzeri lebyi katsaka mikhuva leyi xi nga yi tsakeriki.—Eksoda 20:5; 1 Tihosi 18:21.

Ha tiyiseka leswaku xiboho xa hina xa ku va hi nga tlangeli Paseka xi sekeriwe eBibeleni, leyi hi khutazaka ku tirhisa “vutlhari lebyi pfunaka ni vuswikoti byo ehleketa” ematshan’wini yo landzelela mindhavuko ya vanhu. (Swivuriso 3:21; Matewu 15:3) Loko van’wana va lava ku tiva hi leswi hi swi pfumelaka malunghana ni Paseka, hi burisana na vona nakambe ha xi xixima xiboho xa munhu xa ku hlawula leswi a swi lavaka.—1 Petro 3:15.