Xana Swiharhi Swa Ya eTilweni?
Nhlamulo ya Bibele
Bibele yi hi dyondzisa leswaku eka swivumbiwa hinkwaswo leswi nga kona laha misaveni, ko va nhlayo yitsongo ya vanhu lava nga ta ya etilweni. (Nhlavutelo 14:1, 3) Va ya etilweni leswaku va ya va tihosi tlhelo vaprista swin’we na Yesu. (Luka 22:28-30; Nhlavutelo 5:9, 10) Nhlayo yo tala ya vanhu yi ta pfuxiwa leswaku yi ta hanya eparadeyisini laha misaveni.—Pisalema 37:11, 29.
A ku kona eBibeleni laha ku boxiwaka leswaku swiharhi swi ta ya etilweni naswona a swi boxiwanga hikwalaho ka xivangelo lexi twalaka. Swiharhi a swi nge swi koti ku endla leswi lavekaka leswaku swi faneleka ku ‘vitaneriwa etilweni.’ (Vaheveru 3:1) Leswi lavekaka swi katsa ku va ni vutlhari, ku va ni ripfumelo ni ku yingisa milawu ya Xikwembu. (Matewu 19:17; Yohane 3:16; 17:3) I vanhu ntsena va vumbiweke va ri ni lunghelo ro hanya hilaha ku nga heriki.—Genesa 2:16, 17; 3:22, 23.
Leswaku swivumbiwa swa laha misaveni swi ya etilweni swi fanele swi pfuxiwa. (1 Vakorinto 15:42) Bibele yi vulavula hi ku pfuxiwa ko hlayanyana. (1 Tihosi 17:17-24; 2 Tihosi 4:32-37; 13:20, 21; Luka 7:11-15; 8:41, 42, 49-56; Yohane 11:38-44; Mitirho 9:36-42; 20:7-12) Hambiswiritano, ku pfuxiwa loku i ka vanhu ku nga ri swiharhi.
Xana swiharhi swi na moya?
Doo! Bibele yi vula leswaku vanhu ni swiharhi i moya lowu hanyaka. (Eklesiasta 3:19, 20) Loko wanuna wo sungula Adamu a vumbiwa, a a nga nyikiwanga moya kambe ‘u ve moya lowu hanyaka.’ (Genesa 2:7. Vuhundzuluxeri Bya Misava Leyintshwa) Moya lowu hanyaka wu va kona hikwalaho ka swilo swimbirhi ku nga: “ntshuri wa misava” ni “moya wa vutomi.”
Xana moya wa fa?
Ina, Bibele yi vula leswaku moya wa fa. (Levhitika 21:11, nhlamuselo ya le hansi; Ezekiyele 18:20) Loko swiharhi swi fa, swi tlhelela entshurini ni vanhu va tlhelela entshurini. (Eklesiasta 3:19, 20) Hi marito man’wana loko swivumbiwa leswi swi fa swi va swi herile hi swona.a
Xana swiharhi swa dyoha?
Doo! Ku dyoha swi vula ku hleketa, ndlela leyi u titwaka hayona kumbe ku endla swilo leswi nga fambisaniki ni milawu ya Xikwembu. Leswaku xi dyoha, xivumbiwa xi fanele xi kota ku tiendlela swiboho swa mahanyelo kambe swiharhi a swi na byona vuswikoti byebyo. Hi ntolovelo swi endla swilo hi ku ya hi ndlela leyi swi vumbiweke hayona eka nkarhi lowu swi vekeriweke wona wo hanya. (2 Petro 2:12) Loko nkarhi wa swona wa ku hanya wu hela swa fa hambiloko swi nga dyohi.
Xana swa pfumeleriwa ku khoma swiharhi hi ndlela ya nsele?
Doo! Xikwembu xi nyike vanhu matimba yo lawula swiharhi kambe a xi va nyikanga mpfumelelo wo swi khoma hi ndlela yo biha. (Genesa 1:28; Pisalema 8:6-8) Xikwembu xa khathala hi swiharhi hinkwaswo ku katsa ni swinyenyana leswitsongo. (Yonasi 4:11; Matewu 10:29) Xikwembu xi byele vagandzeri va xona leswaku va khoma swiharhi kahle.—Eksoda 23:12; Deteronoma 25:4; Swivuriso 12:10.