Xana Xikwembu Xi Tirhise Evolution Ku Tumbuluxa Swivumbiwa Swo Hambanahambana?

Nhlamulo ya Bibele

Doo. Bibele yi swi veka erivaleni leswaku Xikwembu xi tumbuluxe vanhu swin’we ni “mixaka” yo hambanahambana ya swiharhi ni swimilana.a (Genesa 1:12, 21, 25, 27; Nhlavutelo 4:11) Yi vula leswaku vanhu va tinxaka hinkwato va huma eka Adamu na Evha, vatswari va hina vo sungula. (Genesa 3:20; 4:1) Bibele a yi yi seketeli mhaka ya leswaku Xikwembu xi tirhise Evolution ku tumbuluxa swivumbiwa swo hambanahambana. Kambe, Bibele a yi kanetani na swona leswi van’wasayense va swi vulaka, swa leswaku ku ni ku hambana exikarhi muxaka wo karhi wa swivumbiwa.

• Xana Xikwembu xi tirhise evolution?

• Xana Bibele ya pfumelelana na evolution?

• Hi nga ku yini hi mhaka ya ku va swimilana ni swiharhi swi kota ku cinca swi fambisana ni ndhawu leyi swi nga eka yona?

Xana Xikwembu xi tirhise evolution?

Vanhu lava tshembaka leswaku Xikwembu xi tirhise evolution ku tumbuluxa swivumbiwa swo hambanahambana va ni mavonelo yo hambana hi mhaka leyi. Hi ku ya hi Encyclopædia Britannica, sweswo swi seketela mhaka ya leswaku “ku tihundzukela ka swilo i ndlela leyi Xikwembu xi yi tirhiseke ku tumbuluxa swivumbiwa swo hambanahambana.”

Dyondzo ya leswaku Xikwembu xi tirhise evolution ku tumbuluxa swivumbiwa swo hambanahambana yi katsa mavonelo lama landzelaka:

• Swivumbiwa hinkwaswo swi huma eka nchumu wun’we lowu a wu ri kona khale swinene.

• Xivumbiwa xo karhi xi nga cinca xi va lexi hambaneke ekule ni lexo sungula.

• Hi ndlela yo karhi Xikwembu hi xona xi endlaka leswaku ku va ni ku cinca koloko.

Xana Bibele ya pfumelelana na evolution?

Dyondzo ya leswaku Xikwembu xi tirhise evolution ku tumbuluxa swivumbiwa swo hambanahambana yi ringanyeta leswaku rungula ra Bibele eka Genesa leri vulavulaka hi ku tumbuluxa a hi ntiyiso lowu heleleke. Hambiswiritano, Yesu u vule leswaku rungula ra Genesa i matimu lama nga ntiyiso. (Genesa 1:26, 27; 2:18-24; Matewu 19:4-6) Bibele yi vula leswaku loko Yesu a nga si ta emisaveni a a tshama etilweni ni Xikwembu naswona u tirhe na xona ku vumba “swilo hinkwaswo.” (Yohane 1:3) Hikwalaho, dyondzo ya leswaku Xikwembu xi tirhise evolution ku tumbuluxa swivumbiwa swo hambanahambana ya kanetana ni tidyondzo ta Bibele.

Hi nga ku yini hi mhaka ya ku va swimilana ni swiharhi swi kota ku cinca swi fambisana ni ndhawu leyi swi nga eka yona?

Bibele a yi hlamuseli leswaku eka muxaka wo karhi ku nga va ni ku hambana ko tani hi kwihi. Naswona a yi kanetani ni ntiyiso wa leswaku muxaka wo karhi wa swiharhi ni wa swimilana leswi tumbuluxiweke hi Xikwembu swi nga va ni ku hambana loko swi ri karhi swi tswala kumbe loko swi tolovela ndhawu leyintshwa. Hambiswiritano, loko van’wana va vona ku cinca loku swiharhi ni swimilana swi vaka na kona loko swi tolovela ndhawu leyintshwa va ehleketa leswaku i evolution kambe hambiswiritano a ku na vutomi lebyintshwa lebyi vumbekaka.