Tinhlayo 6:24-26—“Yehovha A A Ku Katekise, A A Ku Hlayise”

“Onge Yehovha a nga mi katekisa a mi sirhelela. Onge Yehovha a nga mi komba leswaku wa mi tsakela hi ku mi komba tintswalo. Onge Yehovha a nga mi komba musa a mi nyika ku rhula.”—Tinhlayo 6:24-26, Matsalwa Yo Kwetsima Ya Misava Leyintshwa.

“Yehovha a a ku katekise, a a ku hlayise; Yehovha a a ku hatimisele mombo wa yena, a a ku endle hi tintswalo. Yehovha a a ku hundzukele mombo wa yena, a a ku nyike ku rhula.”—Tinhlayo 6:24-26, Bibele Ya Xitsonga, Matsalelo lama’ntshwa.

Leswi Tinhlayo 6:24-26 yi vulaka swona

Marito lawa ya tiveka tanihi ya vuprista kumbe nkateko wa Aroni—tanihi leswi Aroni a veke muprista lonkulu wo sungula eIsrayele. (Eksoda 28:1) Marito lawa a ma huma eka Xikwembu. (Tinhlayo 6:22, 23) Xi byele Muxe xi ku: “Byela Aroni ni vana vakwe u ku, ‘Mi ta katekisa Vaisrayele hi ndlela leyi,’” endzhaku ka sweswo Xikwembu xi vule marito lama kumekaka eka Tinhlayo 6:24-26. Vaprista vo tshembeka va xi yingisile xileriso xexo. Va tlhela va xixima vito ra Xikwembu Yehovha.a Eka ndzimana 27 ha hlaya: “Va fanele va vitana vito ra mina eka Vaisrayele leswaku ndzi ta va katekisa.”

“Onge Yehovha a nga mi katekisa a mi sirhelela.” Yehovha u katekisa vagandzeri vakwe hi ku va sirhelela, hi ku va kongomisa ni ku va nyika ntsako. (Swivuriso 10:22) Eka Tinhlayo 6:24-26 (Bibele Ya Xitsonga), rito “ku” ri le ka vun’we. Leswi swi kombisa leswaku Xikwembu a xi nga lavi ku katekisa tiko ra Israyele ntsena kambe a xi lava ni ku katekisa Muisrayele un’wana ni un’wana hi ku kongoma.

‘Onge Yehovha a nga ku komba leswaku wa ku tsakela hi ku ku komba tintswalo.’ Ku kombela Xikwembu leswaku ‘xi hundzukela mombo wa xona’ eka munhu un’wana a ku ri ku kombela leswaku Xikwembu xi n’wi komba tintswalo ni ku n’wi amukela.b Xivulwa lexi xi nga tlhela xi hundzuluxeriwa xi ku : “Onge Yehovha a nga ku tsakela.” (Tinhlayo 6:25, New International Reader’s Version) Yehovha u lunghekele ku komba vanhu vakwe musa, ntwelavusiwana ni tintswalo.—Esaya 30:18

“Onge Yehovhac a nga tlakusela xikandza xakwe eka n’wina a mi nyika ku rhula.” Yehovha u ‘tlakusela xikandza xakwe’ eka lava n’wi gandzelaka hi ku va komba rirhandzu ni ku va nyika ku rhula. Hi ku ya hi buku yin’wana, “rito ra Xiheveru leri vulaka ku rhula (xalomu) a ri vuli ntsena leswaku a ku na timholovo kambe ri tlhela ri vula ku va ni ntsako ni ntshamiseko wa xiviri ni lowu khumbaka vuxaka bya munhu ni Xikwembu.”

Leswaku Vaisrayele va kota ku vuyeriwa hi mikateko leyi nga eka tindzimana leti, a va fanele va yingisa Yehovha. (Levhitika 26:3-6, 9) Loko va n’wi yingisa, a a endla leswi a va tshembiseke swona. Leswi swi endleke hi nkarhi wa ku fuma ka tin’wana ta tihosi ta vona to fana na Solomoni na Hezekiya.—1 Tihosi 4:20, 25; 2 Tikronika 31:9, 10.

Hambileswi swi nga boheki leswaku loko Vakreste va khongela va landzela marito ya nkateko wolowo, va nga kombisa ku titwa hilaha ku fanaka loko va khongelela van’wana eka Xikwembu kumbe loko va khutaza Vakrestekulobye. (1 Vatesalonika 5:11, 25) Yehovha a nga cinci. Mikarhi hinkwayo u lava ku katekisa ni ku sirhelela vagandzeri vakwe vo tshembeka. Ku tiva leswaku Yehovha u tlakusela ‘‘xikandza’’ xakwe eka vanhu vakwe, swi endla leswaku Vakreste va ntiyiso va va ni ku rhula.

Mongo wa Tinhlayo 6:24-26

Tindzima to sungula ta khume ta buku ya Tinhlayo, ti vulavula hi swileriso leswi Xikwembu xi nyikeke Vaisrayele loko va dzime matende ekusuhi ni Ntshava ya Sinayi loko va ya eTikweni leri Tshembisiweke. Hi nkarhi lowu Vaisrayele va tshameke ematendeni ku ringana lembe,Yehovha u va endle va va tiko a tlhela a va nyika milawu leyi tivekaka tanihi ntwanano wa Nawu.

Yehovha u byele Muxe ndlela leyi Aroni ni vana vakwe—lava a va hlawuriwe ku va vaprista —a va fanele va katekisa Vaisrayele hayona. (Tinhlayo 6:22, 23) Endzhaku, Aroni ni vatukulu vakwe va tirhise marito lama nga eka Tinhlayo 6:24-26 ku katekisa tiko. Eku heteleleni swi ve mukhuva eka vaprista ku kombela nkateko loko va heta ku nyikela magandzelo etempeleni siku rin’wana ni rin’wana.

Hlalela vhidiyo leyi yo koma leswaku u vona xingheniso xa buku ya Tinhlayo.