Ntirho Wo Phalala Hi Lembe Ra 2022—Rirhandzu Ra Vumakwerhu Ri Ya eMahlweni

Bibele yi vule khale leswaku emikarhini ya hina ku ta va ni tinyimpi, ku tsekatseka ka misava, mintungu ni ‘swilo swin’wana leswi chavisaka.’ (Luka 21:10, 11) Vuprofeta byebyo byi ye emahlweni byi hetiseka hi lembe ra ntirho ra 2022.a Hi xikombiso, nyimpi ya le Ukraine ya ha ya emahlweni naswona yi khumba timiliyoni ta vanhu vo tala. Matiko yo tala a ma ha ri eku hlakarheleni eka ntungu wa COVID-19. Nakambe vanhu vo tala va weriwe hi timhangu ta ntumbuluko to tanihi ku tsekatseka ka misava loku veke kona eHaiti ni swidzedze leswi onheteleke swinene eAmerika Xikarhi, Philippines ni le dzongavuxa bya Afrika. Xana Timbhoni ta Yehovha ti va pfune njhani lava khumbekeke?

Hi lembe ra ntirho ra 2022, nhlangano wa hina wu humese mphalalo eka vanhu lava weriweke hi timhangu ta kwalomu ka 200! Hi tirhise mali leyi a yi lava ku fika kwalomu ka 12 miliyoni wa tidolara eka mphalalo.b Xiya ndlela leyi mali ya minyikelo yi tirhisiweke hayona leswaku ku pfuniwa lava weriweke hi timhangu timbirhi.

Ku tsekatseka ka misava eHaiti

Hi ti 14 ta August 2021, ku ve ni ku tsekatseka ka misava ka mpimo wa 7.2 edzongeni wa le Haiti. Lexi twisaka ku vava ku love Timbhoni tinharhu, ku nga vamakwerhu vambirhi vaxisati ni makwerhu un’we wa xinuna. Lava poneke, va we va pfuka leswaku va tiyisela ku vava emirini ni le mintlhavekweni loku vangiweke hi ku tsekatseka loku. Makwerhu loyi a vuriwaka Stephane u ri: “Ku fe vanhu vo tala edorobeni hinkwaro lerova vhiki ni vhiki, a ku ri ni swilahlo swo tala leswi heteke tinh’weti to tlula timbirhi.” Makwerhu un’wana loyi a vuriwaka Éliézer u ri: “Timbhoni to tala a ti nga ri na makaya, swiambalo, tintangu kumbe swilo swin’wana leswi a ti swi lava. Ku ringana tinh’weti, vo tala a va ha tsemeke nhlana hikwalaho ka ku tsekatseka ka misava loku veke kona.”

Nhlangano wa hina wu songe rigogo ra ha tsakama leswaku wu pfuneta. Rhavi ra le Haiti ri phalale hi mabokisi yo tlula 53 ya swakudya ni hi matende, swiponci ni tisolara to chajisa tifoni. Nakambe hi lembe ra ntirho ra 2022, makaya yo tlula 100 ma tlhele ma akiwa kumbe ku lunghisiwa. Mali leyi tlulaka miliyoni wa tidolara yi tirhisiwile eka mphalalo lowu.

Vamakwerhu va swi tlangela swinene. Lorette u te: “Ku tsekatseka ka misava ku onhe yindlu ni bindzu ra hina. A hi nga ri na swakudya. Kambe nhlangano wa Yehovha a wu hi lahlanga, wu hi pfunile hi swilo hinkwaswo leswi a hi swi lava.” Micheline u ri: “Ku tsekatseka ka misava ku onhe kaya leri mina ni vana va mina vambirhi a hi tshama eka rona. A ndzi nga ha tivi ta mina handle ko khongela ndzi kombela mpfuno naswona Yehovha u ndzi hlamule hi ku tirhisa nhlangano wakwe. Sweswi hi ni yindlu leyi akiweke kahle. Ndzi tiyimisele ku endla hinkwaswo leswi ndzi nga swi kotaka leswaku ndzi kombisa ku khensa eka Yehovha.”

Varhangeri va kwalaho va wu xiyile mphalalo wa hina. Murhangeri wa holo ya le dorobeni lerikulu ra L’Asile u te: “Ndza mi bumabumela swinene hileswi mi teke mi ta pfuneta hi xihatla. Ndza mi khensa hikuva mi kombise xichavo lexikulu eka valawuri. Swa ndzi tsakisa ku vona leswaku a mi lavi mali. Kambe mi lava ku pfuna vanhu. Mi endla tano hikwalaho ka rirhandzu.”

Xidzedze Lexi Vuriwaka Ana Xi Hlasele Emalawi Ni Le Mozambhiki

Hi ti 24 ta January, 2022, Xidzedze lexi vuriwaka Ana xi onhe swinene eMozambhiki kutani xi famba hi le vupeladyambu ku ya fika eMalawi. Xidzedze lexi xi nise mpfula ya matimba ni moya lowukulu lowu a wu hunga hi rivilo ra 100 wa tikhilomitara hi awara (62 mph). Xi wise tintambhu ta gezi, xi onha mabuloho ni ku vanga mati lama khulukaka hi matimba.

Timbhoni to tlula 30 000 eMalawi ni le Mozambhiki ti weriwe hi Xidzedze lexi. Makwerhu Charles loyi a pfuneteke eka ntirho wo phalala u te: “Ndzi tshoveke mbilu ni ku hela matimba loko ndzi vona ku xaniseka ni ku lahlekeriwa ka vamakwerhu.” Xiyimo xi nyanyise hi ku khukhuriwa ka swakudya ni mavele lawa a va ri na wona. Vo tala va lahlekeriwe hi makaya ya vona. Lexi twisisaka ku vava, makwerhu un’wana u feriwe hi nsati ni swinhwanyetana swimbirhi lava nga nwela loko xikepe xa vona xa xilamulelamhangu xi mbombomela.

Xidzedze lexi, a xi chavisa swinene. Hi matakuxa ya 1:00, ndyangu wa ka Sengeredo eNchalo le Malawi, wu twe mpfumawulo wo chavisa wa ku khuluka ka mati. Milambu yimbirhi a yi ri eku khulukeni! Makwerhu Sengeredo u teke xiboho xa leswaku va baleka endlwini. Xi ve xiboho xa vutlhari hikuva hi ku tsopeta ka tihlo, xidzedze xi wise yindlu. Nhundzu ya vona swi nga endleka yi onhakile kumbe yi khukhuriwile. Ndyangu wu ye eHolweni ya Mfumo leyi a va tolovele ku famba timinete ta 30. Kambe sweswi swi va tekele tiawara timbirhi. Va fike va tsakamile ni ku karhala kambe a va hlayisekile.

Marhavi ya le Malawi ni le Mozambhiki ma sungule ntirho wo phalala hi xihatla. Ma kongomise valanguteri va miganga ni vakulu leswaku va kambisisa swilaveko swa vamakwerhu lava weriweke hi xidzedze ni ku va chavelela. Tikomiti to hlayanyana ta ntirho wo phalala (Disaster Relief Committees [DRC]) ti nyikiwe ntirho wo langutela ku phalala naswona ti nambe ti sungula ku pfuna vamakwerhu hi swakudya ni hi swin’wana leswi a va swi lava. Ku tirhisiwe tidolara to tlula 33 000 eka ku pfuna vanhu naswona tidolara ta 300 000 ti tirhisiwe eka ku lunghisa makaya ni ku tlhela ma akiwa.

Va DRC va tirhise mali hi vutlhari, sweswo a swi ri swa nkoka hikuva swilo se a swi durha swinene. Hi xikombiso, eku sunguleni ka tinh’weti ta nkombo ta mphalalo, nxavo wa mugayo lowu ku nga wona swakudya swa nkoka eMalawi, a wu tlakuke hi tiphesente ta 70. Nxavo wa petirolo na wona a wu tlakukile. Vamakwerhu va xave swakudya ni nhundzu yo tala yo aka leswaku va hlayisa mali. Swi endle va hunguteriwa nxavo ni ku papalata ku hakela mali yo tala yo layicha nhundzu.

Ntirho wo phalala wu khumbe timbilu ta vanhu va Yehovha. Makwerhu Felisberto wa le Mozambhiki u te: “A ndzi se tshama ndzi vona nhlangano lowu nyikeleke hi swilo swo tala hi ndlela leyi, swo tanihi: Nhundzu yo aka, swo famba hi swona, vatirhi vo aka, swakudya ni nkongomiso wa rirhandzu. Ntirho lowu wo phalala a ku ri xikombiso xa rirhandzu ra xiviri ra vumakwerhu leri Yesu a vulavuleke ha rona eka Yohane 13:34, 35.” Noni leyi vuriwaka Ester ya le Malawi leyi yindlu ya yona a yi wile, yi te: “A ndzi nga ha ri na ntshembo hikuva a ndzi nga ri na mali yo aka yindlu yin’wana. Kambe loko vamakwerhu va ndzi akela yindlu, a ndzi titwa onge hiloko se ndzi ri eparadeyisini.”

Leswi hi tshinelaka emisaveni leyintshwa, hi langutele ku vona timhangu to tala. (Matewu 24:7, 8) Hambiswiritano, ha yi khensa minyikelo ya n’wina ya rirhandzu naswona ha tshemba leswaku vanhu va Yehovha va ta kuma mphalalo lowu lavekaka. Tindlela to nyikela ti hlamuseriwe eka donate.jw.org. Ha khensa swinene ku hanana ka n’wina.