Hilaha Yesu a profeteke hakona, “vukona” bya yena tanihi Hosi ya le tilweni byi vonake hi swiendlakalo leswikulu emisaveni—ku nga nyimpi, tindlala, ku tsekatseka ka misava ni mintungu. (Matewu 24:3-8; Luka 21:11) Swiendlakalo sweswo swi nyika vumbhoni lebyikulu bya ntiyiso wa leswaku hakunene lembe ra 1914 hi rona leri Mfumo wa Xikwembu wa le tilweni wu sunguleke ku fuma ha rona ni leswaku ri ve ku sungula ka ‘masiku ya makumu’ ya mafambiselo lawa yo biha ya swilo.—2 Timotiya 3:1-5.

XIVUMBIWA xa moya lexi vuriwaka Mikayele a xi boxiwi ko tala eBibeleni. Hambiswiritano, loko ku vulavuriwa ha xona xi boxiwa xi ri eku endleni ka swo karhi. Ebukwini ya Daniyele, Mikayele u lwa ni tintsumi leto homboloka; epapileni ra Yuda u kanetana na Sathana; naswona eka Nhlavutelo u lwa na Diyavulosi ni madimona yakwe. Leswi Mikayele a lwelaka vulawuri bya Yehovha a tlhela a lwa ni valala va Xikwembu, u hanya hi ku ya hi nhlamuselo ya vito rakwe leyi nge “I Mani La Fanaka Ni Xikwembu?” Kahle-kahle Mikayele loyi i mani?

Minkarhi yin’wana vanhu va tiviwa hi mavito man’wana. Hi xikombiso, mupatriyaka Yakobo u tiviwa hi vito ra Israyele, kasi muapostola Petro u tiviwa hi ra Simoni. (Genesa 49:1, 2; Matewu 10:2) Hilaha ku fanaka, Bibele yi kombisa leswaku, Mikayele i vito rin’wana ra Yesu Kreste loko a nga si ta laha misaveni ni loko se a fambile. A hi kambisiseni Matsalwa leswaku hi kumisisa mhaka leyi.

Ntsumi leyikulu. Rito ra Xikwembu loko ri vulavula hi Mikayele ri ri i “ntsumi leyikulu.” (Yudha 9) Xiya leswaku Mikayele u vitaniwa ntsumi leyikulu. Leswi swi vula leswaku i yin’we ntsena ntsumi yo tano. Kahle-kahle rito leri nge “ntsumi leyikulu,” eBibeleni ri humelela ri ri eka vun’we, a ku kona laha ri humelelaka ri ri evunyingini. Tlhandlakambirhi, Yesu u ni xikhundlha xa ku va ntsumi leyikulu. Malunghana na Hosi Yesu Kreste la pfuxiweke, 1 Vatesalonika 4:16 yi ri: “Hosi hi yoxe yi ta xika hi le tilweni hi rito ro lerisa, hi rito ra ntsumi leyikulu.” Xisweswo rito ra Yesu ri hlamuseriwa ri ri ra ntsumi leyikulu. Hikwalaho, tsalwa leri ri vula leswaku Yesu hi byakwe hi yena Mikayele ntsumi leyikulu.

Murhangeri wa Vuthu. Bibele yi vula leswaku “Mikayele ni tintsumi ta yena va lwa ni dragona . . . ni tintsumi ta yona.” (Nhlavutelo 12:7) Xisweswo, Mikayele i Murhangeri wa vuthu ra tintsumi leto tshembeka. Nakambe Nhlavutelo yi hlamusela Yesu a ri Murhangeri wa vuthu ra tintsumi leto tshembeka. (Nhlavutelo 19:14-16) Muapostola Pawulo na yena u vulavule hi ku kongoma hi “Hosi Yesu” na hi “tintsumi takwe ta matimba.” (2 Vatesalonika 1:7; Matewu 16:27; 24:31; 1 Petro 3:22) Kutani ke, Bibele yi vulavula hi Mikayele ni “tintsumi takwe” na Yesu ni “tintsumi takwe.” (Matewu 13:41) Leswi eRitweni ra Xikwembu ku nga riki kona laha ku vulavuriwaka hi mavuthu mambirhi ya tintsumi to tshembeka ta le tilweni—lerin’wana ri rhangeriwe hi Mikayele naswona lerin’wana ri rhangeriwe hi Yesu—swa twala ku gimeta hi leswaku Mikayele a ku na un’wana handle ka Yesu Kreste loko a ri exikhundlheni xakwe xa le tilweni.a

BUKU ya Nhlavutelo yi tamele marito man’wana lama fanekiselaka swo karhi. (Nhlavutelo 1:1) Hi xikombiso, yi vulavula hi wansati loyi a tsariweke vito leri nge “Babilona Lonkulu” emombyeni wakwe. Wansati loyi ku vuriwa leswaku u tshame ehenhla ka “mintshungu ni matiko.” (Nhlavutelo 17:1, 5, 15) Leswi a nga riki kona wansati wa xiviri la nga swi endlaka sweswo, swi vula leswaku Babilona Lonkulu ku fanele ku ri wo fanekisela. Kutani, xana nghwavava leyi yo fanekisela yi yimela yini?

Eka Nhlavutelo 17:18, wansati loyi wo fanekisela u hlamuseriwa a ri “muti lowukulu lowu nga ni mfumo ehenhla ka tihosi ta