Tluka Leri Nga Ni Xihloko-nkulu/Tluka Ro Sungula

Timbhoni Ta Yehovha Ni Dyondzo

Handle ka mfungho, Matsalwa ya Xiheveru lama tshahiweke eka broxara leyi ma huma eka vuhundzuluxeri bya Bibele ya Xitsonga (BX), kasi ya Xigriki ma huma eka vuhundzuluxeri bya Bibele—Mahungu Lamanene (BML). Laha ku humelelaka NW endzhaku ka ku tshaha, swi komba leswaku vuhundzuluxeri bya kona i bya ririmi ra Xinghezi Bya New World Translation of the Holy Scriptures, Nkandziyiso wa 1984

Leswi Nga Endzeni

TLUKA

4 Ndlela Leyi Timbhoni Ta Yehovha Ti Langutaka Dyondzo Ha Yona

10 Minongonoko Ya Dyondzo

14 Ntlhontlho Wa Ku Hambana Ka Vukhongeri

19 Mimpimanyeto Ya Mahanyelo Leyi Faneleke Ku Xiximiwa

27 Xiphemu Xa Vatswari

31 Mahetelelo

Xikongomelo Xa Broxara Leyi

MUTIVI wa filosofi wa Mudachi ku nga Spinoza u tsale a ku: “Ndzi ringete ku ka ndzi nga swi hleki swiendlo swa vanhu, ndzi nga swi rileli, hambi ku ri ku swi venga, kambe ndzi ringete ku swi twisisa.” Tanihi mudyondzisi, u langutane ni ntlhontlho wa ku ringeta ku twisisa mavonelo, swisekelo ni ripfumelo ra swichudeni leswi u swi dyondzisaka, ku katsa ni vadyondzi lava nga vana va Timbhoni ta Yehovha. Minkarhi yin’wana, swichudeni sweswo swi nga teka xiyimo lexi tikombaka xi nga fambisani ni lexi tolovelekeke etimhakeni to karhi. Kambe loko swiendlo swo tano swi vangiwa hi mavonelo ya xichudeni ya vukhongeri ni ya mahanyelo, u fanele ku swi tekela enhlokweni. Broxara leyi yi humesiwa hi Watch Tower Bible and Tract Society (xitirho xa vukandziyisi xa Timbhoni ta Yehovha) naswona yi endleriwe ku ku pfuna leswaku u swi twisisa ku antswa swichudeni swa Timbhoni. Ha tshemba leswaku u ta tinyika nkarhi wa ku yi hlaya hi vukheta.

Ku twisisa tidyondzo ta vukhongeri bya munhu un’wana a swi vuli leswaku u fanele u ti amukela kumbe u ti landzelela, naswona ku tivisa rungula a swi vuli ku hundzula hi nsindziso. Xikongomelo xa broxara leyi a hi ku endla leswaku wena kumbe swichudeni swa wena swi amukela mavonelo ya vukhongeri ya Timbhoni. Lexi hi tsakelaka xona hi leswaku u tiva misinya ya milawu ni tidyondzo leti swin’wana swa swichudeni swa wena swi dyondzisiwaka tona hi vatswari va swona, leswaku swi ku olovela ku twisisa vana va Timbhoni ni leswaku u tirhisana na vona. Ina, leswi vana va dyondzisiwaka swona ni leswi va swi endlaka swi nga tshuka swi nga fambelani minkarhi yin’wana, tanihi leswi n’wana un’wana ni un’wana a dyondzaka ku aka ripfalo rakwe.

Ku fana ni vatswari vo tala, Timbhoni ta Yehovha ti lava leswaku vana va tona va pfuneka swinene exikolweni. Leswaku va endla sweswo, va dyondzisa vana va vona leswaku va tirhisana ni vadyondzisi va vona. Hi hala tlhelo, vatswari lava nga Timbhoni swin’we ni vana va vona va tsaka loko vadyondzisi va va khoma hi ku twisisa ni hi xichavo.

Timbhoni ta Yehovha i Vakreste lava tiviwaka emisaveni hinkwayo. Hambi swi ri tano, minkarhi yin’wana a va twisisiwi. Hikwalaho, hi tshemba leswaku broxara leyi yi ta ku pfuna leswaku u va twisisa ku antswa vana va Timbhoni lava u va dyondzisaka. Ngopfu-ngopfu, hi tshemba leswaku u ta vona leswaku ha yini, eka swiyimo swin’wana, va vula leswaku va ni mfanelo yo endla leswi hambaneke.

[Laha Xifaniso Xi Humaka Kona eka tluka 2]

COVER: Pharaoh: The Complete Encyclopedia of Illustration/J. G. Heck. BACK COVER: Pyramids: From the book The Pictorial History of the World; Butterfly: The Complete Encyclopedia of Illustration/J. G. Heck

Ndlela Leyi Timbhoni Ta Yehovha Ti Langutaka Dyondzo Ha Yona

Ku fana ni vatswari hinkwavo, Timbhoni ta Yehovha ta khumbeka hi vumundzuku bya vana va tona. Hikwalaho, dyondzo va yi languta yi ri ya nkoka swinene. “Dyondzo yi fanele ku pfuna vanhu leswaku va va swirho swa vaaka-tiko leswi pfunaka. Yi fanele yi tlhela yi va pfuna leswaku va kurisa ku tlangela ndzhaka ya vona ya ndhavuko ni ku hanya vutomi lebyi enerisaka.”

HI LAHA ntshaho lowu wa The World Book Encyclopedia wu ringanyetaka ha kona, xin’wana xa swikongomelo leswikulu swa ku nghena xikolo i ku letela vana malunghana ni vutomi bya siku na siku, leswi katsaka ku va pfuna leswaku va khathalela swilaveko swa vona swa ndyangu enkarhini lowu taka. Timbhoni ta Yehovha ti pfumela leswaku lebyi i vutihlamuleri byo kwetsima. Bibele hi yoxe yi ri: “Loko munhu a nga pfuni maxaka ya yena, ngopfu-ngopfu lava va nga va ndyangu wa yena wa xiviri, ú landzurile vupfumeri, kutani ú tlula ni vamatiko hi ku biha.” (1 Timotiya 5:8) Malembe lama hetiwaka exikolweni ma pfuna vana leswaku va lunghekela vutihlamuleri lebyi va nga ta va na byona evuton’wini. Hi ku ya hi sweswo, Timbhoni ti languta dyondzo tanihi leyi faneleke ku tekiwa yi ri ya nkoka swinene.

Timbhoni ti tikarhatela ku hanya hi ku landza xileriso xa Bibele: “Xin’wana ni xin’wana lexi mi xi endlaka, xi endleni hi mbilu hinkwayo ya n’wina, onge hi loko mi tirhela Hosi ku nga ri vanhu.” (Vakolosa 3:23, Today’s English Version) Nsinya lowu wa nawu wu tirha eswiphen’wini hinkwaswo swa vutomi bya siku na siku, ku katsa ni le xikolweni. Xisweswo Timbhoni ti khutaza vana va tona leswaku va tirha hi matimba ni ku teka swiavelo swa vona swa xikolo swi ri swa nkoka.

Bibele nakambe yi dyondzisa ku yingisa milawu ya tiko leri munhu a tshamaka eka rona. Kutani loko ku nghena xikolo ku ri mhaka leyi bohaka ku ya fika emalembeni yo karhi, Timbhoni ta Yehovha ti landzelela nawu wolowo.—Varhoma 13:1-7.

Handle ko wu tekela ehansi nkoka wa vuleteri bya vutomi bya siku na siku, Bibele yi kombisa leswaku leyi a hi yona ntsena pakani ya dyondzo naswona a hi yona leyikulu. Dyondzo leyi humelelaka yi fanele yi tlhela yi nyika vana ntsako wa ku hanya ni ku va pfuna leswaku va hanyisana ni vanhu van’wana ni leswaku va va vanhu lava ringaniselaka kahle. Xisweswo, Timbhoni ta Yehovha ti yi teka yi ri ya nkoka ngopfu mhaka yo hlawula swilo leswi endliwaka ehandle ka tlilasi. Ti pfumela leswaku ku wisa lokunene, vuyimbeleri, swintirhwana, vutiolori, ku endzela tilayiburari ni timuziyamu ni swin’wana, swa vuyerisa swinene eka dyondzo leyi ringaneleke. Ku engetela kwalaho, ti dyondzisa vana va tona leswaku va xixima vanhu lava kuleke ni ku lavisisa minkarhi ya ku va pfuna.

Ku Vuriwa Yini Hi Dyondzo Leyi Engetelekeke?

Hikwalaho ka maendlelo lamantshwa ya vutshila, tindlela to kuma ntirho ti tshamela ku cinca. Hikwalaho, vantshwa vo tala va boheka ku tirha etindhawini kumbe emintirhweni leyi va nga leteriwangiki yona. Hikwalaho ka sweswo, matirhelo ya vona ni vuleteri lebyi va nga na byona, ngopfu-ngopfu