Amukela Lunghelo Leri Ro Hlawuleka!

PETER a a endle nhluvuko lowunene etidyondzweni takwe ta vutshunguri loko a amukela rungula ra Bibele leri ponisaka. Endzhaku ka loko a thwasile vudokodela ivi a sungula ku tirha exibedlhele, lavakulu eka yena va hambete va n’wi khutaza leswaku a dyondzela vuhandzuri bya fambiselo ra misiha. Leri a ri ri lunghelo leri madokodela yo tala lamantshwa a ma ta ri amukela handle ko kanakana.

Hambiswiritano, Petera u bohe ku ka a nga ri tirhisi lunghelo leri. Ha yini? Xana o ka a nga ri lavi? E-e, hikuva Peter u tinyike nkarhi wa ku anakanyisisa hi lunghelo leri. Endzhaku ko va Mbhoni ya Yehovha leyi tinyiketeleke, leyi khuvuriweke, a a navela ku tirhisa nkarhi wakwe eswiavelweni swo hambana-hambana swa vutirheli bya Vukreste hilaha a nga kotaka hakona. U anakanye leswaku loko a thwasile a va muhandzuri wa fambiselo ra misiha, ntirho wa yena a wu ta teka nkarhi ni matimba ya yena ngopfu. Xana a a hungukile kumbe a a tlharihile leswi a nga wu amukelangiki ntirho lowu wo hlawuleka?

Xiboho xa Peter xi nga ha va xi languteke xi nga ri xa vutlhari eka van’wana. Hambiswiritano u anakanyisise hi matsalwa ya Bibele yo fana na Vaefesa 5:15, 16. Kwalaho muapostola Pawulo u khongotele Vakreste-kulobye a ku: “Loko swi ri tano, xiyani swinene mahanyelo ya n’wina; mi nga hanyi tanihi vanhu lava nga twisisiki nchumu, kambe hanyani tanihi lavo tlhariha. Londzovotani nkarhi lowu mi nga na wona, hikuva masiku lawa hi nga ka wona ma bihile.”

Hi kombela u xiya xiga lexi nge “nkarhi lowu mi nga na wona.” Xi hundzuluxeriwe xi huma eka rito ra Xigriki leri tirhisiweke ko tala eBibeleni, leri kombetelaka enkarhini kumbe enguveni leyi funghiwaka hi swiendlakalo swo karhi kumbe leyi fanelaka xiendlo xo karhi. Pawulo laha u kandziyisa leswaku Vakreste va fanele va va ni nkarhi wa timhaka ta nkoka. Hakunene va fanele va “kota ku hlawula leswi nga swinene ku tlula swin’wana.” (Vafilipiya 1:10) Leyi i mhaka ya ku tiva swilo leswi vaka swo rhanga.

Kutani ke, xana hi xihi xikongomelo xa Xikwembu enkarhini lowu wa hina? Xana ku rhandza ka Xikwembu hi kwihi eka lava va xi rhandzaka? Vuprofeta bya Bibele byi swi veka erivaleni leswaku nkarhi lowu hi hanyaka eka wona i ‘nkarhi wa makumu’ kumbe ‘masiku ya makumu.’ (Daniyele 12:4; 2 Timotiya 3:1) Kreste Yesu u swi veke erivaleni leswi a swi ta va swona swilo swa nkoka enkarhini wa hina. Hi ku kongoma u vule leswaku ku nga si fika makumu ya mafambiselo lawa yo homboloka ya swilo, ‘evhangeli leyi ya mfumo a yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo.’ Kutani hi kona makumu ma nga ta fika.—Matewu 24:3, 14.

Xisweswo hi fanele ku tirhisa nkarhi wun’wana ni wun’wana leswaku hi chumayela mahungu lamanene ya Mfumo ni ku endla vadyondzisiwa. (Matewu 28:19, 20) Tanihi leswi ntirho lowu wu nga taka wu nga ha endliwi nakambe, leri hi rona lunghelo ro hetelala ro endla hinkwaswo leswi hi nga swi kotaka entirhweni lowu wa ku ponisa vutomi. ‘I nkarhi wa ku tsetselela.’ Hakunene, ‘leri i siku ra ku ponisa.’—2 Vakorinto 6:2.

Ku Endla Xiboho Xa Vutlhari

Peter—jaha leri ku vulavuriweke ha rona eku sunguleni—u anakanyisise hi xiboho xakwe hi vukheta ivi a xiyisisa leswi a nga swi endlaka ematshan’weni ya sweswo. U swi vonile leswaku a swi ta va swi nga hoxanga ku dyondzela ku va muhandzuri wa fambiselo ra misiha. Kambe i yini lexi a xi ri xa nkoka eka yena? A ku ri ntirho wakwe evutirhelini bya Vukreste, tanihi leswi ntirho lowu wu nga wa xihatla swinene. Hi hala tlhelo a a ri na vutihlamuleri lebyi a a fanele ku hlangavetana na byona. A a tekile kutani a a ri na nsati loyi a a fanele ku n’wi khathalela loyi a a ri entirhweni wa ku chumeyela wa nkarhi hinkwawo. (1 Timotiya 5:8) Nakambe Peter a a fanele ku hakelela tidyondzo takwe. Kutani ke, i yini leswi a nga boha ku swi endla?

Peter u endle xiboho xa ku dyondzela sayense ya xivoninga-ndzeni ni ku kambela hi ndzhundzumelo wa mpfumawulo. Lowu a wu ri ntirho lowu a ta wu endla hi tiawara leti tolovelekeke ta ntirho. Naswona a a ta kuma ku leteriwa hi nkarhi lowu tolovelekeke wa ntirho. I ntiyiso, van’wana va nga ha xi teka xi ri xikhundlha xa le hansi, kambe a xi ta n’wi pfumelela leswaku a va na nkarhi lowu engetelekeke emintirhweni ya moya.

Ku na swin’wana leswi susumeteleke xiboho xa Peter. Hambileswi a a nga soli van’wana lava nga ha vaka va endle xiboho lexi hambaneke ni xa yena, a a swi tiva leswaku ku katseka ngopfu etimhakeni ta nyama swi ni khombo eka Mukreste. Swi nga n’wi vangela leswaku a honisa vutihlamuleri byakwe bya moya. Leswi swi vonaka kahle eka xikombiso xin’wana lexi a xi khumba ntirho.

Muchumayeri un’wana wa Mfumo wa nkarhi hinkwawo a a ri mumpfampfarhuti la leteriweke. A a swi kota ku tihanyisa hi mali leyi a a yi kuma hi ku xavisa swifaniso swa yena. Hambiloko a tirhisa nkarhi wakwe wo tala evutirhelini bya Vukreste bya nkoka, a a swi kota ku tiwundla kahle. Hambiswiritano u sungule ku navela ku ndlandlamuxa vutshila byakwe bya ntivo-vuxongi. U tihlanganise ngopfu ni vanhu va vumpfampfarhuti ni va swa ntivo-vuxongi, kutani a tshika vutirheli bya nkarhi hinkwawo ivi a hetelela a nga ha hlanganyeli hilaha ku heleleke eka timhaka leti khumbaka ntirho wa ku chumayela hi Mfumo. Hi ku famba ka nkarhi u katseke eku tikhomeni loku lwisanaka ni matsalwa, leswi nga hetelela swi n’wi endle a nga ha vi xiphemu xa vandlha ra Vukreste.—1 Vakorinto 5:11-13.

Nkarhi Lowu Wa Hina Wu Hlawulekile

Entiyisweni, tanihi vanhu lava tirhelaka Yehovha sweswi hi lava ku tshama hi tshembekile eka yena. Ha swi tiva leswaku hi hanya enkarhini lowu nga wa nkoka swinene ematin’wini ya vanhu. Leswaku hi kota ku ya emahlweni hi tirhela Xikwembu naswona hi humelela eku langutaneni ni swiyimo swa namuntlha, swi nga ha lava leswaku hi endla mindzulamiso yo hambana-hambana. Leswi hi nga swi fanisa ni nkarhi wa ntshovelo eka murimi. Wolowo i nkarhi wa ntirho wo hlawuleka laha vatirhi epurasini va languteriwaka ku tirha hi matimba ku tlurisa naswona va tirha nkarhi lowu engetelekeke. Ha yini? Hikuva ntshovelo wu fanele wu hlengeletiwa hi nkarhi lowu pimiweke.

Nkarhi lowu saleke wa xiyimiso lexi xo biha xa swilo i wutsongo. Ku tlula rini na rini, sweswi Mukreste wa ntiyiso u fanele ku tikarhata ku landzela xikombiso xa Yesu ivi a famba emintileni ya yena. Vutomi byakwe bya laha misaveni byi kombise kahle leswi a swi ri swa nkoka eka yena. U te: “Hi fanele ku tirha mintirho ya Loyi a ndzi rhumeke, dyambu ri nga si pela; vusiku bya ta, lebyi munhu a nga ta ka a nga ha swi koti ku tirha.” (Yohane 9:4) Hi ku vula leswaku dyambu ri nga si pela, Yesu a a vulavula hi nkarhi wa ku ringiwa, ku beleriwa ni ku fa kakwe, nkarhi lowu vutirheli byakwe bya laha misaveni a byi ta hela ha wona ivi a nga ha swi koti ku hlanganyela entirhweni wa Tata wakwe wa le matilweni.

Entiyisweni, evutirhelini byakwe bya malembe manharhu na hafu, Yesu u tirhise nkarhi wa yena wun’wana a endla mahlori ni ku hanyisa lava vabyaka. Hambiswiritano u tirhise nkarhi wa yena wo tala eku chumayeleni ka rungula ra Mfumo ni ku “tivisa lava bohiweke leswaku va ta ntshunxiwa” evukhongerini bya mavunwa. (Luka 4:18; Matewu 4:17) Yesu a a tikarhata evutirhelini byakwe nakambe u tirhise nkarhi wun’wana a letela vadyondzisiwa vakwe leswaku va ta kota ku aka ehenhla ka xisekelo lexi a nga va vekela xona kutani va ya mahlweni ni ntirho wa ku chumayela hilaha ku humelelaka. Yesu u tirhise nkarhi wun’wana ni wun’wana leswaku a yisa swilaveko swa Mfumo emahlweni naswona u lave vadyondzisiwa vakwe leswaku va endla hilaha ku fanaka.—Matewu 5:14-16; Yohane 8:12.

Ku fana na Yesu, hina tanihi valandzeri vakwe va manguva lawa hi fanele ku languta xiyimo xa vanhu hilaha Yehovha Xikwembu a xi langutaka hakona. Nkarhi wa xiyimiso lexi xa swilo wa hela kutani hi musa Xikwembu xi lava leswaku hinkwavo va va na lunghelo ra ku ponisiwa. (2 Petro 3:9) Xisweswo, xana a swi nga ta va vutlhari ku yi vekela etlhelo mintirho leyin’wana leswaku hi kota ku endla ku rhandza ka Yehovha? (Matewu 6:25-33) Ngopfu-ngopfu enkarhini wo hlawuleka ku fana na lowu, swin’wana swa swilo leswi hi ntolovelo swi nga langutiwaka swi ri swa nkoka swi nga ha tekiwa swi nga ri swa nkoka swinene evuton’wini bya hina tanihi Vakreste.

Xana u kona exikarhi ka hina la nga tisolaka hikuva a rhangise ku rhandza ka Xikwembu evuton’wini byakwe? Nikantsongo, hikuva vutomi bya ku titsona bya Mukreste byi vuyerisa hi ndlela leyi hlamarisaka. Hi xikombiso Yesu u byele vadyondzisiwa vakwe a ku: “Ndzi tiyisile ndzi ri ka n’wina un’wana ni un’wana la tshikeke muti wa yena kumbe makwavo wa xinuna kumbe wa xisati kumbe mana wa yena, kumbe tata wa yena kumbe vana, kumbe masimu, hikwalaho ka mina ni hikwalaho ka Evhangeli, ú ta nyikiwa swilo leswi ka dzana eminkarhini ya sweswi: hi leswaku tindlu, ni vamakwavo, ni vamanana, ni vana, masimu, swin’we ni ku xaniseka, kutani eminkarhini leyi taka, ú ta nyikiwa vutomi lebyi nga heriki.”—Marka 10:29, 30.

A nga kona na un’we la nga ringanisaka vuyelo lebyi tsakeriwaka hi lava va tirhisaka nkarhi wa vona leswaku va dzunisa Yehovha ni ku huwelela rungula ra Mfumo ni mali yo karhi. Va kuma mikateko yo tala swinene! Leswi swi katsa vanghana va ntiyiso, ku aneriseka hi ku endla ku rhandza ka Xikwembu, ku amukeriwa hi Xikwembu ni ntshembo wa vutomi lebyi nga heriki. (Nhlavutelo 21:3, 4) Tanihi Timbhoni takwe i nkateko wonghasi ku pfuna vanhu hi tlhelo ra moya ivi hi tisa ku dzuneka evitweni ra Yehovha lero kwetsima! Handle ko kanakana ku ‘londzovota nkarhi lowu hi nga na wona’ i ndlela ya vutlhari ni leyi vuyerisaka. Ku tlula rini na rini, sweswi i nkarhi wa ku hlanganyela eku huweleleni ka mahungu lamanene ya Mfumo wa Xikwembu. Xana u ta ri amukela lunghelo leri ro hlawuleka ni ku khomelela eka rona?

[Nhlamuselo ya le hansi]