Tiko Leri Hlayisaka Vutshembeki
“Pfulani tinyangwa; a ku nghene tiko le’ro lulama le’ri hlayisaka ku ṭhembeka!”—ESAYA 26:2.
1. Ha yini marito ya Esaya ya “tiko le’ro lulama” ma nga vaka lama hlamarisaka?
NAMUNTLHA, ku ni tinxaka hinkwato ta matiko. Man’wana i ya xidemokrati, man’wana ma lawuriwa hi ntlawa wo karhi wa varhangeri. Man’wana ma fuwile, kasi man’wana ma pfumala. Ku ni nchumu wun’we lowu ma fanaka ha wona: Hinkwawo i xiphemu xa misava leyi Sathana a nga xikwembu xa yona. (2 Vakorinto 4:4) Hi ku ya hi leswi, marito ya Esaya ma nga ha hlamarisa eka van’wana loko a ku: “Pfulani tinyangwa; a ku nghene tiko le’ro lulama le’ri hlayisaka ku ṭhembeka!” (Esaya 26:2) Xana ku vulavuriwa hi tiko ro lulama? Ina, tiko ro lulama ri kona, hikuva vuprofeta byi kombisa leswaku ri kona namuntlha. Xana tiko leri leri nga tolovelekangiki ri nga voniwa njhani?
2. Xana “tiko le’ro lulama” i yini? Hi swi tivisa ku yini?
2 Hi ku ya hi vuhundzuluxeri bya New World Translation bya Esaya 26:2, ku vuriwa leswaku tiko leri ri ‘hlayisa ku tikhoma ko tshembeka.’ King James Version (etlhelo ka phepha) yi hundzuluxela ndzimana leyi yi ku, “tiko ro lulama leri hlayisaka ntiyiso.” Hatimbirhi i tinhlamuselo letinene. Entiyisweni, tiko ro lulama swa olova ku ri vona hikuva hi rona ntsena tiko ra la misaveni leri nga le hansi ka Kreste, Hosi, hikwalaho a hi xiphemu xa misava ya Sathana. (Yohane 17:16) Hi ndlela yoleyo, swirho swa rona swi tiviwa hi ‘ku hlayisa ku tikhoma ka swona lokunene exikarhi ka matiko man’wana.’ Va landzela mahanyelo lama dzunisaka Xikwembu. (1 Petro 2:12) Tlhandla-kambirhi, loko va ri emisaveni, va tshama va ri xiphemu xa “[vandlha ra, NW] Xikwembu lexi hanyaka, mhandze leyikulu ni xiseketelo xa leswi nga ntiyiso.” (1 Timotiya 3:15) Hi ku seketela ntiyiso, va papalata tifilosofi ta vuhedeni leti dyondzisiwaka hi Vujagana, naswona va tikarhatela “ntswamba lowu tengeke wa moya”—Rito ra Xikwembu, Bibele. (1 Petro 2:2) Ku tlula kwalaho, hi ku hiseka va chumayela mahungu lamanene ya Mfumo “eka swivumbiwa hinkwaswo leswi nge hansi ka tilo.” (Vakolosa 1:23) Xana ku nga va kona ku kanakana leswaku tiko leri ri vumbiwa hi masalela ya ‘Israyele wa Xikwembu,’ vandlha ra Vakreste lava totiweke? Nikatsongo!—Vagalatiya 6:16.
Ku Tswariwa Ka Tiko
3. Hlamusela ndlela leyi “tiko le’ro lulama” ri tswariweke ha yona.
3 Xana “tiko le’ro lulama” ri tswariwe rini? Masungulo ya rona ma profetiwe ebukwini ya Esaya. Eka Esaya 66:7, 8, hi hlaya leswi: “Loko [Siyoni] a nga si twa ku v̌av̌iseka, o v̌elekile; ku lumiwa ku nga si humelela, o v̌elekile ṅwana wa šinuna. . . . [Siyoni u twe ku lumiwa ka ku veleka kutani a veleka vana va yena, NW].” Hi ndlela leyi nga tolovelekangiki, Siyoni, nhlengeletano ya Xikwembu ya le tilweni, a a ta tswala “ṅwana wa šinuna” a nga si twa ku lumiwa ka ku veleka. Hi 1914, Mfumo wa Vumesiya wu simekiwile ematilweni. (Nhlavutelo 12:5) Endzhaku ka sweswo, nyimpi yo sungula ya misava yi funengete matiko yo tala ngopfu, naswona Vakreste lava totiweke va ve ni gome ni nxaniso lowukuku. Eku heteleleni, hi lembe ra 1919, emisaveni ku simekiwe tiko ra moya “ṅwana wa šinuna.” Xisweswo, Siyoni ‘u veleke vana va yena’—swirho leswi totiweke swa ‘tiko lerintshwa ro lulama’—naswona va hlengeletiwile leswaku va endla ntirho wo twarisa vumbhoni lowu yaka emahlweni wu kula.—Matewu 24:3, 7, 8, 14; 1 Petro 2:9.
4. Ha yini tiko ro lulama ra Xikwembu ri boheke ku lwa leswaku ri hlayisa vutshembeki?
4 Ku sukela eku tswariweni ka rona, tiko leri ri langutane ni miringo leyikulu ya vutshembeki bya rona. Ha yini? Loko Mfumo wa le tilweni wu tswariwa, Sathana ni mademona ya yena va cukumeteriwe emisaveni va suka etilweni. Rito lerikulu ri huwelerile ri ku: “Sweswi, ku hlayiseka ka Xikwembu xa hina ni matimba ya xona, ni mfumo wa xona, ni vuhosi bya Mesiya wa xona, swi fikile hikuva loyi a hehlaka vamakwerhu, muhehli loyi a va mangalelaka vusiku ni nhlekanhi emahlweni ka Xikwembu xa hina, ú cukumetiwile a ya wela hansi. Vamakwerhu va n’wi hlurile hi ngati ya Xinyimpfana, ni vumbhoni lebyi va byi humeseke kutani a va tsetselelanga vutomi bya vona ku fikela loko va dlawa.” Sathana u hlundzuke ngopfu hikwalaho ka ku cinca loku ka swiyimo “[a] suka [a] ya lwa ni va rixaka ra [wansati] lava saleke, lava hlayisaka milawu ya Xikwembu ni ku humesa vumbhoni bya Yesu.” Hambi va langutane ni minhlaselo ya Sathana, Vakreste lava totiweke va yime va tiyile. Ku fikela namuntlha, swirho leswi gingiritekaka swa tiko ro lulama ra Xikwembu swi kombisa ripfumelo engatini leyi kutsulaka ya Yesu, naswona swi hambeta swi nyika Yehovha marito yo hlamula muhehli lonkulu hi ku hlayisa vutshembeki ‘hambi swi langutane ni rifu.’—Nhlavutelo 12:1, 5, 9-12, 17; Swivuriso 27:11.
5. Hi rihi langutelo lerinene ra Timbhoni ta manguva lawa leri ti pfuneke leswaku ti hlayisa vutshembeki?
5 Hi 1919, loko ku nyikeriwa ka vumbhoni bya Mfumo wa Xikwembu ka manguva lawa ku sungurile, Swichudeni swa Bibele, hi laha Timbhoni ta Yehovha a ti vitaniwa ha kona enkarhini wolowo, a swi nga ri swingani hi nhlayo kambe a swi tiyile eripfumelweni. Va ve swirho swa masungulo ya ‘tiko ra matimba, ku ponisiwa ku endliwa rirhangu ni xisirhelelo.’ Ntshembo wa vona a wu ri eka “Yehova, Yehova [loyi a nga] ribye ra malembe ya madzanadzana.” (Esaya 26:1, 3, 4) Ku fana na Muxe wa khale, va huwelerile va ku: “Nḍi ta v̌ula v̌ito ra Yehova: Ḍunisani Šikwembu ša hina! Yehova i Ribye le’ro tiya; mitiro ya yena yi hetisekile; hikuv̌a tindlela hikwato ta yena ti lulamile; i Šikwembu šo ṭhembeka, ši nga ri na nanḍu; ši ni v̌unene, ši lulamile.”—Deteronoma 32:3, 4.
6. Xana Yehovha u va pfune njhani vanhu vakwe emasikwini ya makumu?
6 Ku sukela kwalaho, tinyangwa ta lunghiselelo ra Mfumo wa Xikwembu ti tshame ti pfulekile tanihi leswi ku rhangeke ku hlengeletiwa masalela ya Vakreste lava totiweke va 144 000 naswona sweswi ntshungu lowukulu wa “tinyimpfu tin’wana” wu hlanganyela eku twariseni ka swikongomelo swa Mfumo wa Yehovha. (Yohane 10:16) Xisweswo, ku nga huweleriwa hi ntsako leswaku: “Oho Yehova! u kurisile tiko; u ri anḍisile; u tiḍunisile, u ṭhinetile kule minḍilakana hikwayo ya tiko.” (Esaya 26:15) Loko hi kambisisa nsimu ya misava namuntlha, hi vona ndlela leyi marito lawa ma nga ya ntiyiso ha yona! Hi matimba ya moya lowo kwetsima, ku nyikeriwe vumbhoni bya Mfumo wa Kreste lowu taka, “ku ya fika emakun’wini ya misava.” (Mintirho 1:8) Mpimo wa ku andza koloko wu nga voniwa eka Xiviko xa Ntirho wa Lembe ra 1994 wa Timbhoni ta Yehovha eMisaveni Hinkwayo, lexi kumekaka eka matluka 12 ku ya ka 15.
Nhlohlorhi Leyintshwa Ya Vahuweleri
7, 8. (a) Hi byihi vumbhoni lebyi kombisaka leswaku vanhu va Xikwembu va ‘anamise matende ya vona’? (b) Loko u languta Xiviko xa Ntirho wa Lembe ra 1994, hi tihi tindhawu leti u vonaka leswaku ti ‘ndlandlamuxa mindzilakana ya tona’ swinene?
7 Xiya tinhla-nkulu tin’wana ta xiviko lexi. Nhlohlorhi ya vahuweleri va Mfumo ensin’wini yi fike eka 4 914 094! Swi tsakisa ngopfu ku vona ku hlengeletiwa loku yaka emahlweni ka “ntshungu lowukulu wa vanhu . . . va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. [Va] yimile emahlweni ka xiluvelo ni le mahlweni ka Xinyimpfana va ambele tinguvu to leha leto basa”! Ina, na vona va tikombise va ri vahlayisi va vutshembeki. “Va hlantswile tinguvu ta vona, va ti basisile hi ngati ya Xinyimpfana,” va vuriwa lava lulameke hi ku kombisa ripfumelo egandzelweni ra nkutsulo ra Yesu.—Nhlavutelo 7:9, 14.
8 Ngopfu-ngopfu ku sukela hi 1919, xirhambo xi hundziseriwe enhlengeletanweni ya Yehovha xi ku: “Anamisa v̌uṭhamo bya nṭonga wa wena, u lehisa tinguv̌u ta tente ya wena: u nga feleli, lehisa tingoti ta wena, tiyisa timhanḍe ta wena.” (Esaya 54:2) Hi ku pfumelelana ni sweswo, ntirho wo chumayela wu ya emahlweni wu nga yimisiwi, hambi ku ri eYukon etikweni leri nga ni gwitsi, ekusuhi na Alaska, laha ntlawa wa maphayona lowu tiyeke wu langutanaka ni ku titimela loku nkarhi wun’wana ku fikaka eka -45° ku ya ka -50° C. Emalembeni ya sweswinyana mintshungu yi khitikanela hi matimba ku tlula rini na rini etikweni ra Yehovha leri hlayisaka vutshembeki. Tinyangwa ti pfuleke hi ku anama leswaku ku nghena vanhu lava va matiko ya Asia lama nga riki ya Vujagana, lava humaka emakhokholweni ya khale ka Vukhomunisi, lava humaka ematikweni yo tala ya le Afrika, ni lama nga ni Vakhatoliki vo tala, yo tanihi Italy, Spain, Portugal na Amerika Dzonga. Vanhu lava balekelaka ematikweni man’wana va pfule nsimu yin’wana. Hi xikombiso, eNghilandi, Timbhoni ti khathalela swilaveko swa mintlawa ya 13 ya tinxaka ta tindzimi timbe.
‘Yanani eMahlweni Mi Endla Leswi’
9. (a) Xana nhlayo ya lava veke kona eXitsundzuxweni hi 1994 yi kombisa yini? (b) Hi wahi matiko lama nga ni nhlayo leyi hlamarisaka ya lava veke kona eXitsundzuxweni?
9 Yinhla-nkulu yin’wana ya xiviko xa lembe i nhlayo ya lava veke kona eXitsundzuxweni. Emahlweninyana ka ku fa kakwe, Yesu u simeke Xitsundzuxo xa rifu rakwe kutani a byela valandzeri vakwe a ku: “Yanani emahlweni mi endla leswi hi ku ndzi tsundzuka.” (1 Vakorinto 11:24) Hi 1994 a swi nyanyula ku vona vanhu va 12 288 917—ku tlula nhlayo ya vahuweleri lava hisekaka yi andzisiwe kambirhi—va hlengeletana hi ku yingisa xileriso xexo, van’wana va hlanganyela eku dyeni kasi van’wana va ri vahlaleri. Ematikweni man’wana xiringaniso xa lava veke kona eXitsundzuxweni a xi ri ehenhla swinene eka xa vahuweleri. Vahuweleri va 4 049 va le Estonia, Latvia na Lithuania va tsakele ku va ni vanhu va 12 876 eXitsundzuxweni, ku tlula nhlayo ya vahuweleri yi andzisiwe kanharhu. Naswona eBenin, i vanhu va 16 786 lava veke kona eXitsundzuxweni, nhlayo ya vahuweleri a yi lava ku nghena ka ntlhanu eka yona. Vandlha rin’wana leri nga ni vahuweleri va kwalomu ka 45, lava veke kona a va ri 831!
10. (a) Hi byihi vutihlamuleri lebyi nhlayo leyikulu ya lava veke eXitsundzuxweni yi hi nyikaka byona? (b) Hlamusela leswi swi nga ha endlekaka loko loyi a veke kona eXitsundzuxweni a kuma mpfuno wun’wana.
10 Timbhoni ta Yehovha ta tsaka leswi vanhu vo tala swonghasi lava tsakelaka va hlanganyeleke na tona eka xiendlakalo xexo xo hlawuleka. Sweswi va lava ku va pfuna leswaku va endla nhluvuko lowu yaka emahlweni eku twisiseni ka ntiyiso ni ku wu rhandza. Van’wana va nga ha angula hi laha Alla wa le Russia a anguleke ha kona. Alla a a dyondza ni makwerhu wa xisati la nga phayona ro hlawuleka kambe nhluvuko wakwe a wu nga nyawuli, kutani dyondzo ya yena yi tshikiwile. Hambi swi ri tano, Alla u xi amukerile xirhambo xa ku va kona eXitsundzuxweni. Nhlangano wolowo, lowu wu nga wa nkoka swinene, wu n’wi khumbe ngopfu. Loko a tlhelela ekaya, u cukumete swifaniso swakwe hinkwaswo kutani a khongela Yehovha leswaku a n’wi pfuna. Endzhaku ka masiku mambirhi makwerhu loyi wa phayona u endzele Alla, a ta twa leswaku u xi tsakele njhani Xitsundzuxo. Ku sungule bulo leri humelelaka. Dyondzo ya Alla yi tlhele yi sunguriwa. Ku nga ri khale se a a hlanganyela entirhweni wo nyikela vumbhoni. Ntokoto lowu wu kombisa ntikelo wa maendzo yo tlhelela eka lava vaka kona eXitsundzuxweni. Vo tala swi nga ha endleka va angula ku fana na Alla.
“Hi Nga Tshiki Ku Hlengeletana”
11-13. (a) Hi xihi xiphemu xa ku tikhoma hi ku tshembeka ka tiko ro lulama? (b) Ha yini Vakreste va fanele va va kona eminhlanganweni?
11 Xitsundzuxo i nhlangano wo hlawuleka swinene eka khalendara ya Timbhoni ta Yehovha, kambe a swi vuli leswaku hi wona ntsena lowu nga kona. Vhiki na vhiki Timbhoni ta Yehovha ti hlengeletana swin’we hi ku landza marito ya muapostola Pawulo: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana, kukota leswi van’wana va toloveleke ku endla swona, kambe hi khongotelana, ngopfu-ngopfu leswi mi vonaka leswaku siku ra Hosi ri ya ri tshinela.” (Vaheveru 10:24, 25) Va hlanganyela ni tiko ro lulama ra Yehovha leri voniwaka hi ku tikhoma ka rona hi ku tshembeka. Ku tikhoma hi ku tshembeka ku katsa ku va kona eminhlanganweni nkarhi hinkwawo.
12 Swi le rivaleni leswaku leswi swi twisisiwa kahle ePhilippines, laha xiringaniso xa tiko hinkwaro xa lava vaka kona eminhlanganweni ya Sonto xi nga tiphesente ta 125, ta nhlayo ya vahuweleri. Nakambe swi twisisiwa kahle ni hi ntlawa wa Timbhoni swin’we ni vanhu lava tsakelaka va le Argentina. Va tshama empfhukeni wa tikhilomitara ta kwalomu ka 20 ku suka eHolweni ya Mfumo. Kambe, mulanguteri wa xifundzha u vika leswaku handle ka loko va vabya, ku hava ni un’we wa vona loyi a xwaka eminhlanganweni. Va famba tiawara timbirhi hi xikocikari kumbe hi timbhongolo, naswona hi xixika va famba mpfhuka lowu emunyameni wa vusiku loko va tlhelela ekaya.
13 Tanihi leswi makumu ya mafambiselo lawa ya swilo ma tshinelaka, vutomi byi ya byi nonon’hwa, swiphiqo swa andza, naswona ku va kona eminhlanganweni nkarhi na nkarhi swi nga ha tika. Kambe eka swiyimo swo tano, hi ni xilaveko lexikulu ku tlula rini na rini xa swakudya swa moya ni vunghana lebyi kufumelaka, leswi swi kumekaka ntsena eminhlanganweni yo tano.
“U Hiseka”
14. Ha yini Timbhoni ta Yehovha ti endla vutirheli bya tona hi xihatla, naswona hi byihi vuyelo lebyi kombisaka leswi?
14 N’wexemu, Kereke ya Khatoliki eItaly yi vule leswaku ntirho wa Timbhoni ta Yehovha i “ku hundzula vanhu hi nsindziso.” Kambe, entiyisweni ku hava lexi endliwaka hi nsindziso entirhweni wa Timbhoni. Ematshan’wini ya sweswo, vutirheli bya tona i xikombiso xa rirhandzu leri enteke eka vaakelani va tona. Nakambe i xikombiso xa ku yingisa marito ya Pawulo: “Twarisa Rito, u hiseka hi nkarhi wa kona hambi ku nga ri hi nkarhi wa kona.” (2 Timotiya 4:2) Ku xiya xihatla xa leswi, swi susumetela Timbhoni ta Yehovha leswaku ti hiseka evutirhelini bya tona, hi laha swi kombisiwaka ha kona hi leswi ti heteke tiawara ta 1 096 065 354 hi 1994 ti ri karhi ti chumayela eka vaakelani, ti endla maendzo yo vuyela ni ku fambisa tidyondzo ta Bibele ta vhiki na vhiki ta 4 701 357. Vo tala va swi kotile ku nghenela ntirho wa vuphayona, leswi kombisaka leswaku moya wa vuphayona wu kona naswona wu tiyile. Xiringaniso xa maphayona ya 636 202 emisaveni hinkwayo xi kombisa leswi.
15, 16. (a) Xana lavantshwa ni lavakulu va wu kombise njhani moya wa vuphayona? (b) Loko u languta matiko yo karhi eka Xiviko xa Ntirho wa Lembe ra 1994, hi kwihi laha u vonaka tinhlayo leti xiyekaka ta maphayona?
15 Exikarhi ka maphayona wolawo ku ni vantshwa vo tala. Van’wana va le United States sweswi va tirha tanihi maphayona ya nkarhi hinkwawo va ha ri exikolweni xa le henhla, nsimu ya vona leyikulu i vadyondzi-kulobye. Vantshwa lava va kume leswaku vuphayona i ndlela leyinene ngopfu yo tisirhelela eka swidzidzirisi, ku tikhoma loko biha, madzolonga, leswi andzeke eswikolweni swo tala swa tiko rero. Vantshwa van’wana vo tala va endle vuphayona byi va pakani ya vona loko va tshika xikolo. Irina, wa le Ukraine, a a phayona nkarhinyana loko a ha ri exikolweni xa le henhla leswaku a tilunghiselela ku phayona loko a hetile. Loko a heta xikolo, ndyangu wa ka vona wu tshembise ku n’wi pfuna hi swilaveko swa timali leswaku a kota ku yimela ndyangu wa ka vona entirhweni wa vuphayona bya nkarhi hinkwawo. Hi tlhelo ra ikhonomi, swilo a swi olovi eUkraine. Kambe Irina u ri: “Ndza swi tiva leswaku ndzi endla ntirho lowu vulaka vutomi eka mina swin’we ni le ka hinkwawo lava ndzi va chumayelaka.” Hakunene swa tsakisa ku vona vantshwa vo tarisa xileswi namuntlha lava anakanyaka ku fana na Irina. Xana yi kona ndlela yo antswa ku tlula leyi, yo ‘tsundzuka Muvumbi wa vona Lonkulu emasikwini ya vujaha ni vunhwana bya vona’?—Eklesiasta 12:1.
16 Maphayona yo tala se ma dyuharile. Un’wana wa vona u vika leswaku enkarhini wa nyimpi ya vumbirhi ya misava, tatana ni buti wa yena va dlayiwile loko va lwa enyimpini, kasi manana ni sesi wa yena va duvuriwe eximutanini lexi a va tshama eka xona. Endzhaku ka sweswo ku fe jaha ra yena. Sweswi, emalembeni ya yena ya vudyuhari ni ku karhatiwa hi vuvabyi, evandlheni ra Vukreste, Yehovha, u n’wi nyike ndyangu lowukulu swinene ku tlula lowu wu n’wi lahlekeleke. Naswona u tsakela ku pfuna van’wana hi ku va phayona ra nkarhi hinkwawo.
17, 18. Xana un’wana ni un’wana a nga wu kombisa njhani moya wa vuphayona, ku nga khathariseki leswaku i phayona kumbe e-e?
17 I ntiyiso leswaku a hi hinkwavo lava nga vaka maphayona. Yehovha u tsakela ku amukela vukhume bya hina hinkwabyo, leswinene leswi hi nga swi nyikelaka, ku nga khathariseki leswaku i yini. (Malakiya 3:10) Hakunene, hinkwerhu hi nga hlakulela moya wa maphayona lawa ma hisekaka ni ku endla hinkwaswo leswi swiyimo swa hina swi hi pfumelelaka ku swi endla ku ya emahlweni ni ku chumayela mahungu lamanene.
18 Hi xikombiso, eAustralia, April 16 a ri endliwe siku ro hlawuleka ra ku nyikela vumbhoni exitarateni. A ri sekeriwe kahle hi vahuweleri swin’we ni maphayona, hi laha swi kombisiweke ha kona hi nhlohlorhi leyintshwa ya vahuweleri va 58 780 n’hweti yoleyo. Ku tlula kwalaho, ku hangalasiwe timagazini leti engetelekeke ta 90 000 leti tlulaka leti fambisiweke n’wexemu hi n’hweti leyi fanaka. Esikwini leri ro hlawuleka, makwerhu un’wana wa xisati u fambisele wanuna un’wana timagazini, kutani loko a tsala vito ra yena ni adirese leswaku a ta n’wi endzela tanihi leswi a kombisa ku tsakela, u kume leswaku a va ri maxaka! Kahle-kahle a ku ri muzala wakwe loyi se a swi endla 30 wa malembe va nga si vonana. Sweswo entiyisweni swi fanele swi yise eka maendzo yo vuyela lama tsakisaka!
Hlayisa Vutshembeki Ku Ya Fika eMakumu
19. Ha yini swi ri swa xihatla leswaku tiko ro lulama ra Yehovha ri hlayisa vutshembeki ku fikela emakumu?
19 I swa xihatla leswaku hinkwavo lava nga etikweni ro lulama ra Xikwembu va hlayisa vutshembeki tanihi leswi misava ya Sathana yi tshinelaka emakun’wini ya yona. Ku nga ri khale, tiko ro kwetsima ra Yehovha ri ta twa xirhambo lexi nge: “Yana, tiko ra mina, u nghena e makamereni ya wena, u pfala nyangwa e nḍaku ka wena; tumbela hi nkari, v̌ukari byi ko byi hunḍa.” Misava leyi leyi nga ni nandzu wa ngati a yi nge ku balekeli ku avanyisa ka Xikwembu. “Hikuv̌a, v̌onani, Yehova o huma e v̌uakweni bya yena ku ta enḍela ku dyoha ka v̌aaki v̌a misav̌a, kutani misav̌a yi ta yimbula ngati leyi yi funḍiweke hi yona, a yi nga ha fihli v̌adlayiwa v̌a yona.” (Esaya 26:20, 21) Onge un’wana ni un’wana wa hina a nga yima a tiyile tanihi Mukreste la hlayisaka vutshembeki loyi a fambisanaka ni tiko ra Yehovha ro lulama. Kutani hi ta tsakela ku kuma vutomi lebyi nga heriki exivandleni xa laha misaveni kumbe xa le tilweni xa Mfumo wa Kreste.
Wa Tsundzuka Xana?
◻ Xana “tiko le’ro lulama” ri tswariwe rini?
◻ Ha yini vanhu va Xikwembu va boheke ku tiyisela emasikwini lawa ya makumu?
◻ I yini lexi kombisiwaka hi nhlayo leyi tlakukeke ya vahuweleri ni tiawara leti hetiwaka evutirhelini, leswi hi swi vonaka eka Xiviko xa Ntirho wa Lembe ra 1994?
◻ Ha yini swi ri swa nkoka swinene ku va kona eminhlanganweni tanihi leswi misava leyi yi tshinelaka emakun’wini ya yona?
◻ Ha yini hinkwavo lava hlanganyelaka ni tiko ro lulama ra Xikwembu va fanele ku hlayisa vutshembeki?
[Chati leyi nga eka tluka 12-15]
XIVIKO XA NTIRHO WA LEMBE RA 1994 WA TIMBHONI TA YEHOVHA EMISAVENI HINKWAYO
(See bound volume)
[Xifaniso lexi nga eka tluka 18]
Vahlayisi va vutshembeki etikweni ro lulama ra Yehovha va ta kuma vutomi lebyi nga heriki hi ku hetiseka