Wa Amukeriwa eXikolweni Xa Vutirheli Bya Le Tilweni

EMISAVENI hinkwayo, ematikweni yo tlula 200, swichudeni swa timiliyoni swi karhi swa vuyeriwa eka vuleteri bya Xikolo xa Vutirheli bya le Tilweni xa vhiki ni vhiki. Swichudeni swin’wana i swintshwa. Swin’wana swi ni malembe swi ri karhi swi nghena xikolo lexi. Xikolo lexi xi fambisiwa etindhawini to tala swinene. Ni laha u tshamaka kona, u nga wu kuma nongonoko lowu fanaka, lowu dyondzisaka. Vanhu hinkwavo hi ku siyana ka vona hi malembe, hi mindhavuko ni hi dyondzo, va karhi va kuma vuleteri lebyi bya le tilweni mahala.

Loko xikolo lexi xi sunguriwa emavandlheni ya Timbhoni ta Yehovha hi 1943, xikongomelo xa xona xi andlariwe hi ndlela leyi: “I xa ku lunghiselela ‘vanhu hinkwavo vo tshembeka,’ lava va tweke Rito ra Xikwembu, va ri amukela, leswaku ‘va kota ku dyondzisa van’wana’ . . . hi xikongomelo xo endla un’wana ni un’wana . . . a hlomiseriwa ku antswa ku byela vanhu van’wana hi ntshembo lowu a nga na wona.” (Course in Theocratic Ministry, tl. 4) Xikongomelo xa xikolo lexi xa ha ri xexo ku ta fikela ni namuntlha.

Xana wu kona nchumu wun’wana wo antswa ku tlula lowu, lowu nyiko ya hina yo kota ku vulavula, leyi Xikwembu xi hi nyikeke yona hi nga yi tirhisaka eka wona? Bibele loko yi hlamula yi ri: “Hinkwaswo leswi hefemulaka—a swi dzunise Yah.” (Ps. 150:6) Loko hi endla sweswo hi tsakisa mbilu ya Tata wa hina wa le tilweni. Hi kombisa leswaku timbilu ta hina ta byi tlangela vunene ni rirhandzu ra yena. Hi yona mhaka leyi Vakreste va khutaziwaka leswaku minkarhi hinkwayo va “nyikel[a] eka Xikwembu xitlhavelo xa ku dzunisa nkarhi hinkwawo, ku nga mbhandzu wa milomu leyi endlaka xitiviso xa le rivaleni eka vito ra xona”! (Hev. 13:15) Ha ku amukela tanihi xichudeni eka Xikolo xa Vutirheli bya le Tilweni. Eka xikolo lexi hi ta ku pfuna leswaku u antswisa vuswikoti bya wena byo tirhisa tinyiko ta wena to huma eka Xikwembu, leswaku u dzunisa Yehovha.

Hambileswi exikolweni lexi nyingiso wu taleleke emhakeni ya ku hlaya erivaleni ni vuswikoti byo vulavula ni byo dyondzisa, vuyelo bya vuleteri bya Xikolo xa Vutirheli bya le Tilweni a byi heleli kwalaho. Loko u ri karhi u hlanganyela eka xona, u ta pfuniwa leswaku u hlakulela vutshila bya nkoka, ku fana ni ku hlaya u ri wexe, ku yingisela ni ku tsundzuka, ku dyondza, ku endla vulavisisi, ku kambisisa mhaka hi vukheta ni ku yi hlela, ku vulavula, ku hlamula swivutiso ni ku tsala rungula ra wena. Bibele hi yoxe swin’we ni tibuku leti sekeriweke eBibeleni hi tona leti nga ta tirhisiwa ngopfu eku dyondziseni, eka tinhlamuselo ni minkombiso leyi nga ta endliwa exikolweni. Loko u ri karhi u tata mianakanyo ya wena hi mintiyiso ya risima leyi humaka eRitweni ra Xikwembu, u ta dyondza ku anakanya hi swilo leswi tsakisaka Xikwembu. Sweswo swi ta ku pfuna swinene eka timhaka hinkwato ta vutomi! Malunghana ni ntikelo wa Rito ra Xikwembu, muleteri wa le yunivhesiti wa lembe-xidzana ra vu-20, William Lyon Phelps u tsarile: “Un’wana ni un’wana loyi a nga ni vutivi lebyinene bya Bibele hi nga vula hi tiyisile loko hi ku u dyondzekile. . . . Hi ku vona ka mina hambi munhu a nga ri na yona dyondzo ya le xikolweni xa le henhla kambe a ri ni vutivi bya Bibele, wa antswa ku tlula munhu loyi a nga ni dyondzo ya le henhla kambe a nga ri na byona vutivi bya Bibele.”

Ndlela Yo Vuyeriwa Hi Xitalo

Ina, leswaku u vuyeriwa hi xitalo eka vuleteri lebyi nga kona eka Xikolo xa Vutirheli bya le Tilweni, wena tanihi xichudeni, u fanele u tikarhata. Muapostola Pawulo u khutaze mutirhi-kulobye Timotiya la nga Mukreste a ku: “Anakanyisisa hi swilo leswi; u dzika eka swona, leswaku ku ya emahlweni ka wena ku vonaka eka vanhu hinkwavo.” (1 Tim. 4:15) Xana hi tihi tindlela leti u nga tikarhataka ha tona?

Loko swi koteka, vana kona eka Xikolo xa Vutirheli bya le Tilweni vhiki ni vhiki. Yi tirhise hi vutlhari buku leyi nge Vuyeriwa Eka Vuleteri Bya Xikolo Xa Vutirheli Bya Le Tilweni. Tsala vito ra wena endhawini leyi endleriweke rona, eka tluka leri nga ni vito ra buku. Tana ni buku leyi minkarhi hinkwayo loko u ta exikolweni. Buku-mpfuno leyi yi tlhela yi va ni ndhawu leyi eka yona u nga tsalaka rungula ro karhi. Loko u ri karhi u hlaya kutani u kuma tinhla ta nkoka leti u vonaka leswaku ti ta ku pfuna, ti khwatihate. Ndhawu leyikulu leyi nga ematlhelo yi tirhisele ku tsala tinhla leti u ti dyondzaka exikolweni.

U ta kuma xiyimiso lexi landzeleriwaka eXikolweni xa Vutirheli bya le Tilweni, xona xi kandziyisiwa xi ri xoxe. Xiyimiso xexo xi ta tlhela xi hlamusela ndlela leyi xikolo xi nga ta fambisiwa ha yona. Loko u swi lava u nga ha hlayisa xiyimiso lexi ebukwini leyi leswaku u ta hatla u xi kuma loko u xi lava.

Loko u ri karhi u lunghiselela tinkulumo ta xikolo ta vhiki ni vhiki, u nga rivali leswaku Bibele hi yona buku-mpfuno leyikulu. Tinyike nkarhi wa ku hlaya tindzimana tihi na tihi ta Bibele leti ti vekeriweke vhiki rero. Loko u swi kota ku hlaya rungula ra tinkulumo letin’wana, ka ha ri emahlweni, na swona swi ta ku pfuna swinene.

Hi nkarhi wa xikolo swi nga ha endleka ku va ni nkarhi lowu vayingiseri va komberiwaka leswaku va vula xo karhi. Wu tirhise kahle nkarhi lowu. Ku hoxa rito eka mabulo yo tano swi ta ku pfuna swinene leswaku u kota ku tsundzuka leswi u swi twaka ni ku swi tirhisa evuton’wini bya wena n’wini.

Nakambe, swichudeni hinkwaswo swi ta wu kuma nkarhi wo nyikela tinkulumo kumbe ku endla minkombiso emahlweni ka vandlha. Yi tirhise kahle minkarhi yo tano. Tikarhatele ku antswisa mfanelo yihi na yihi ya ku vulavula leyi u averiweke ku tirhela eka yona. U ta nyikiwa ndzayo leswaku yi ku pfuna ku endla nhluvuko. Yi amukele hi mandla mambirhi ndzayo yoleyo. Ebukwini ya wena, tsala swiringanyeto swo karhi malunghana ni leswi u nga swi endlaka leswaku wena hi wexe u endla nhluvuko. Tanihi leswi swi tikaka leswaku munhu a tivona hi ndlela leyi vanhu van’wana va n’wi vonaka ha yona, swiringanyeto leswinene leswi sekeriweke eBibeleni ni ndzayo leyi nyikeriwaka swi nga ku pfuna swinene leswaku u endla nhluvuko. Leswi swi nga ku pfuna hambiloko se u ri ni malembe yo tala u ri karhi u hlanganyela eka xikolo lexi.—Swiv. 1:5.

Xana u nga swi tsakela ku endla nhluvuko hi ku hatlisa? Sweswo swi nga koteka loko wo tinyiketela swinene. Ri hlaye ka ha ri emahlweni rungula leri nga ta hlanganisiwa eka tinkulumo hinkwato leti nga ta nyikeriwa hi xichudeni xin’wana ni xin’wana. Loko ku tshuka ku laveka xivulavuri xo yimela la nga riki kona, u ta swi kota ku nyikela nkulumo ya kona, sweswo swi ta ku nyika ntokoto lowu engetelekeke. Loko van’wana va nyikela tinkulumo, rhiya ndleve leswaku va ti nyikela njhani. Hi dyondza eka van’wana.

Ku tlhandlekela kwalaho, loko swiyimo swi ku pfumelela, u nga hatlisisa nhluvuko wa wena hi ku rhanga emahlweni u tihlayela buku-mpfuno leyi. Loko se u swi tiva kahle leswi swi nga eka tidyondzo ta 15 leti landzelaka, yana emahlweni ni “Nongonoko Wo Antswisa Vuswikoti Byo Vulavula Ni Byo Dyondzisa,” lowu sungulaka eka tluka 78. Xo sungula, hlaya dyondzo yin’wana ni yin’wana kutani u titoloveta yona hi ku tirhisa xikambelo lexi fambisanaka na yona. Leswi u swi dyondzaka swi tirhise loko u ri ensin’wini. Leswi swi nga wu antswisa swinene nhluvuko wa wena tanihi xivulavuri ni mudyondzisi wa Rito ra Xikwembu.

Vuleteri bya Xikolo xa Vutirheli bya le Tilweni byi ta ku endla u lunghekela swilo leswi swi nga swa nkoka swinene evuton’wini. Leswi ana hi hanyaka hikwalaho ka ku rhandza ka Xikwembu, ku xi dzunisa ku endla leswaku hi hetisisa xikongomelo xa vukona bya hina. Yehovha Xikwembu u faneriwa hi ku dzunisiwa ka xiyimo lexi tlakukeke swinene. (Nhlav. 4:11) Vuleteri lebyi hi byi kumaka exikolweni byi ta hi pfuna leswaku hi kota ku endla sweswo, hi kota ku anakanya hi ndlela leyi hlutekeke, hi endla swilo hi vutlhari ni ku byela van’wana mintiyiso leyi humaka eRitweni ra Xikwembu leri huhuteriweke.