Ku Lavisisa Lava Fanelekaka
1. Hi nga swi kombisa njhani leswaku ha ri tlangela swinene lunghelo leri hi nga na rona ro chumayela?
1 Loko Yesu a chumayela u endle matshalatshala lamakulu leswaku a chavelela vanhu lavo rhula hi mahungu lamanene. (Esa. 61:1, 2) Tanihi vayimeri va Kreste namuntlha, hi ni lunghelo ro n’wi tekelela loko hi ri karhi hi wa hi pfuka leswaku hi lavisisa vanhu lava fanelekaka ensin’wini ya hina.—Mat. 10:11; 2 Kor. 5:20.
2. Leswaku Pawulo a a pfumelelana ni swiyimo swi vonake njhani, naswona ku ve ni vuyelo byihi?
2 Pfumelelana Ni Swiyimo: Muapostola Pawulo a a tolovele ku rhanga a ya esinagogeni a ya chumayela Vayuda ni maproselita. (Mint. 14:1) Le Filipiya, Pawulo na Silasi a va famba va lava vanhu laha ‘a va ehleketa leswaku ku ni ndhawu ya xikhongelo.’ Loko va fika va sungule ku chumayela ntshungu wa vavasati naswona un’wana wa vona, loyi ku nga Lidiya, u amukele ntiyiso hi ku hatlisa.—Mint. 16:12-15.
3. Handle ko tirha nsimu hi yindlu ni yindlu, hi kwihi kun’wana laha hi nga chumayelaka kona?
3 Ku engetela ensin’wini ya n’wina leyi mi yi tirhaka hi yindlu ni yindlu, xana mi nga chumayela vanhu lava kumekaka eswitichini swa swo famba ha swona, etiphakeni, emintirhweni, eswitarateni leswi nga ni vanhu vo tala swin’we ni le tindhawini ta mabindzu leti nga ensin’wini ya n’wina? Kumbexana mi nga ha chumayela ni vanhu lava tshamaka emiakweni leyi swi nga oloviki ku nghena eka yona hi ku tirhisa mapapila kumbe riqingho. Ku va ni vuxiyaxiya ni ku pfumelelana ni swiyimo swa le nsin’wini ya n’wina, swi ta mi pfuna leswaku “mi va ni swo tala swo swi endla entirhweni wa Hosi.”—1 Kor. 15:58.
4. Loko vandlha ra hina ri ri ni nsimu yitsongo, i yini leswi hi nga swi endlaka leswaku hi tiphina hi ku chumayela?
4 Vahuweleri vo tala va ndlandlamuxe ntirho wa vona wo chumayela hi ku rhurhela emavandlheni man’wana, van’wana va rhurhele emavandlheni ya le tikweni leri va tshamaka eka rona kumbe ematikweni man’wana. Van’wana va dyondze ririmi rin’wana leswaku va ta chumayela vanhu lava humaka ematikweni man’wana.
5. Hi fanele hi wu languta njhani nkarhi lowu hi hanyaka eka wona, naswona hi fanele hi tiyimisela ku endla yini?
5 Hinkwerhu ka hina hi fanele hi tsundzuka leswaku “nsimu i misava.” (Mat. 9:37; 13:38) Leswi makumu ya mafambiselo lawa ya swilo se ma nga kwala nyongeni, un’wana ni un’wana wa hina u fanele a kambisisa swiyimo swakwe, vuswikoti byakwe ni malunghelo lama nga n’wi pfulekelaka leswaku a ndlandlamuxa ntirho wakwe wo chumayela. Yehovha wa hi tiyisekisa leswaku loko hi rhangisa timhaka ta Mfumo, u ta ma katekisa matshalatshala ya hina yo ndlandlamuxa ntirho wa hina wo chumayela.—Mat. 6:33.