Eminkarhini ya khale ku teka riendzo hi milenge a swi dya nkarhi naswona munhu a a sala a karhele nakambe swi nga endleka a swi durha ku tlula ku famba hi xikepe. Kambe tindhawu to tala a ti lava leswaku u famba hi milenge loko u ya eka tona.
Munhu a a famba tikhilomitara ta kwalomu ka 30 hi siku. A a hisiwa hi dyambu, a neriwa hi mpfula a tlhela a biwa hi xirhami naswona a a va ekhombyeni ro hlaseriwa hi swigevenga. Muapostola Pawulo u vula leswaku u ve “emaendzweni ko tala, emakhombyeni ya milambu, emakhombyeni ya swigevenga.”—2 Kor. 11:26.
Magondzo yo tala ya le Mfun’weni wa Rhoma a ma endliwe kahle. Emagondzweni lamakulu a ku ri ni tindlu ta vafambi leti a ti kumeka eka mpfhuka wa riendzo ra siku. Nakambe eka hafu ya mpfhuka wolowo a ku ri ni switolo leswi vafambi a va xava swilo leswi va swi lavaka. Vatsari va nkarhi wolowo va vula leswaku tiyindlu ta vafambi ni switolo swa kona a swi thyakile naswona a swi tshama swi tele hi vanhu, a swi hisa naswona a swi tele hi madzedze. Tindhawu teto a ti nga rhandzeki hikuva a ti rhandziwa hi vanhu lava nga xiximekiki. Vini va tona a va tolovele ku yivela vaendzi naswona tinghwavava a ti kumeka eka tona.
A swi kanakanisi leswaku Vakreste a va ringeta hi matimba ku papalata tindhawu teto. Kambe a va ti tirhisa loko va ri ematikweni lawa va nga riki ni maxaka kumbe vanghana.