MAHANYELO YA VAKRESTE

Ndlela Leyi Vatekani Va Nga Byi Tiyisaka Ha Yona Vukati Bya Vona

Abrahama na Sara va vekele vatekani xikombiso lexinene hikuva a va rhandzana va tlhela va xiximana. (Gn 12:11-13; 1Pe 3:6) Leswi a swi vuli swona leswaku swilo a swi va fambela kahle mikarhi hinkwayo, na vona a va boheka ku tiyisela miringo. I yini leswi vatekani va nga swi dyondzaka eka xikombiso lexinene xa Abrahama na Sara?

Burisana ni murhandziwa wa wena. U nga holovisi nkataku hi leswi a vuleke marito lama tlhavaka hikwalaho ka leswi a khunguvanyekeke. (Gn 16:5, 6) Tiendleleni nkarhi wo dzumba swin’we. Byela nkataku leswaku wa n’wi rhandza u tlhela u swi kombisa na hi swiendlo. Ku tlula hinkwaswo, rhangisani Yehovha evukatini bya n’wina, hi ku dyondza, ku khongela ni ku gandzela Yehovha swin’we. (Ekl 4:12) Vukati lebyi tiyeke byi vangamisa Yehovha, Musunguri wa vukati.

HLALELANI VHIDIYO LEYI NGE, KU TIYISA VUXAKA BYA VATEKANI KUTANI MI HLAMULA SWIVUTISO LESWI LANDZELAKA:

I yini leswi a swi kombisa leswaku vuxaka bya Shaan na Kiara a byi hohloka?
Hikwalaho ka yini ku burisana ku ri ka nkoka evukatini?
Xikombiso xa Abrahama na Sara xi va pfune njhani Shaan na Kiara?
I yini leswi Shaan na Kiara va swi endleke leswaku va tiyisa vukati bya vona?
Hikwalaho ka yini nuna ni nsati va nga fanelanga va ehleketa leswaku swilo swi to tshamela ku khuluka evukatini bya vona?

Xifaniso: Vhidiyo ‘Ku Tiyisa Vuxaka Bya Vatekani.’ Shaan na Kiara va teke goza ro tiyisa vukati bya vona. 1. Va tshame esofeni va siya xipeyisi exikarhi. 2. Va khomane hi mavoko. 3. Va ri karhi va tirha nsimu swin’we. — Tiyisa vukati bya wena!