Swikombo Swa Mikandziyiso Leyi Nga Eka Xibukwana Xa Nhlengeletano Ya Mahanyelo Ni Ntirho Wa Hina Wo Chumayela
MARCH 7-13
LESWI HI SWI DYONDZAKA EBIBELENI | 1 SAMUWELE 12-13
“Ku Tikukumuxa Swi Endla Munhu A Khoma Hi Tingana”
Ku Tikukumuxa Ku Vangela Tingana
17 Loko u swi twa ro sungula, swiendlo swa Sawulo swi nga ha vonaka swi ri swinene. Phela, vanhu va Xikwembu a va ri “mahlomulweni lamakulu,” “a va tikeriwa,” va rhurhumela hikwalaho ka xiyimo xa vona lexi chavisaka. (1 Samuwele 13:6, 7) Entiyisweni, a swi hoxanga ku teka goza loko swiyimo swi lava leswaku u endla tano. Kambe, tsundzuka leswaku Yehovha wa swi kota ku vona timbilu a tlhela a xiya swikongomelo swa hina. (1 Samuwele 16:7) Hikwalaho, swi nga ha endleka a vone swilo swin’wana malunghana na Sawulo leswi nga boxiwangiki hi ku kongoma eBibeleni. Hi xikombiso, Yehovha a nga ha va a vone leswaku ku hela mbilu ka Sawulo a ku vangeriwa hi manyunyu. Kumbexana Sawulo a a nyangatsiwa swinene hileswaku yena—hosi ya tiko ra Israyele hinkwaro—a a fanele a rindzela un’wana loyi a a n’wi teka tanihi muprofeta la dyuhaleke, loyi a nga ni xinamu! Phela, Sawulo a a vona onge vulongeta bya Samuwele byi endle leswaku a va ni mfanelo ya ku tiendlela yena ni ku honisa swileriso leswi kongomeke leswi a nyikiweke swona. Vuyelo byi ve byihi? Samuwele a nga ri ndhundhuzelanga goza leri tekiweke hi Sawulo. Ku hambana ni sweswo, u holovele Sawulo, a ku: “Mfumo wa wena a wu nge khomeleli . . . hikuva wena a wu swi hlayisanga leswi Yehovha a ku leriseke swona.” (1 Samuwele 13:13, 14) Ku tikukumuxa ku tlhele ku vangela tingana.
Yehovha U Teka Ku Yingisa Ka Wena Ku Ri Ka Nkoka
8 Xiviko xa le Bibeleni xa Hosi Sawulo xi kandziyisa nkoka wa ku yingisa. Loko Sawulo a sungula ku fuma a a titsongahata, ‘a ri ntsongo ematihlweni ya yena.’ Kambe, endzhaku ka nkarhi, swiboho swa yena swi sungule ku lawuriwa hi ku tikukumuxa ni mianakanyo ya mavunwa. (1 Samuwele 10:21, 22; 15:17) Siku rin’wana, Sawulo a a fanele a ya lwa ni Vafilista. Samuwele u byele hosi leswaku yi n’wi rindza leswaku a ta endlela Yehovha switlhavelo ni ku yi nyika swileriso leswi engetelekeke. Kambe, Samuwele u hlwerile, hiloko vanhu va sungula ku hangalaka. Loko Sawulo a vona sweswo u “nyikel[e] xitlhavelo xo hisiwa.” Sweswo a swi n’wi tsakisanga Yehovha. Loko Samuwele a hetelele a fikile, hosi yi tiyimelerile hileswi yi nga yingisangiki, yi vula leswaku leswi Samuwele a hlweleke, yi ‘tisindzise’ ku nyikela xitlhavelo xo hisiwa leswaku yi ta tsakeriwa hi Yehovha. Eka Hosi Sawulo, ku nyikela xitlhavelo xolexo a swi ri swa nkoka swinene ku tlula ku yingisa nkongomiso lowu a wu kumeke wa leswaku a rindza Samuwele leswaku a ta endla xitlhavelo xexo. Samuwele u n’wi byele leswi: “U endle vuphukuphuku. A wu xi hlayisanga xileriso xa Yehovha Xikwembu xa wena lexi a ku leriseke xona.” Ku nga yingisi Yehovha ku vangele Sawulo leswaku a lahlekeriwa hi vuhosi bya yena.—1 Samuwele 10:8; 13:5-13.
Endla Ndzavisiso
Xana U Ta Wu Landzela Nkongomiso Wa Yehovha Wa Rirhandzu?
15 Kumbexana Vaisrayele a va anakanya leswaku va nga tshemba hosi leyi nga munhu ku tlula ndlela leyi va tshembaka Yehovha ha yona. Loko ku ri leswaku a va anakanya sweswo, a va landzela “swilo leswi nga riki swa xiviri.” Leswi va tshembeke nchumu wun’we lowu nga riki wa xiviri, a swi ta olova leswaku va tshemba swilo swin’wana swo tala “leswi nga riki swa xiviri” leswi humaka eka Sathana. Hi xikombiso, hosi leyi nga munhu a yi ta va kucetela ku gandzela swifaniso. Vanhu lava gandzelaka swifaniso va ehleketa leswaku va nga tshemba swikwembu leswi endliweke hi ntsandza kumbe hi ribye hileswi va kotaka ku swi vona ni ku swi khumba. A va n’wi tshembi Yehovha, Xikwembu lexi nga vonakiki, lexi tumbuluxeke swilo hinkwaswo. Kambe muapostola Pawulo u vule leswaku swifaniso “a hi nchumu.” (1 Kor. 8:4) Swifaniso a swi voni, a swi twi, a swi vulavuli naswona a swi koti ku endla nchumu. Hikwalaho i vuphukuphuku ku swi gandzela hileswi hi kotaka ku swi vona ni ku swi khumba. Swifaniso a swi nge swi koti ku pfuna vanhu. I “swilo leswi nga riki swa xiviri,” naswona lava va swi tshembaka “va ta fana na swona.”—Ps. 115:4-8.
MARCH 14-20
LESWI HI SWI DYONDZAKA EBIBELENI | 1 SAMUWELE 14-15
“Ku Yingisa Swi Tlula Magandzelo”
Yehovha U Teka Ku Yingisa Ka Wena Ku Ri Ka Nkoka
4 Leswi a nga Muvumbi, xilo xin’wana ni xin’wana lexi vonakaka lexi hi nga na xona i xa Yehovha. Loko swi ri tano, xana xi kona lexi hi nga n’wi nyikaka xona? Ina, hi nga n’wi nyika nchumu wa risima swinene. I yini nchumu wa kona? Nhlamulo hi nga yi kuma eka xitsundzuxo lexi landzelaka: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” (Swivuriso 27:11) Hi nga nyika Xikwembu ku yingisa ka hina. Hambileswi swiyimo swa hina ni ndlela leyi hi kurisiweke ha yona swi hambanaka, loko hi yingisa, un’wana ni un’wana wa hina a nga nyikela nhlamulo eka xihehlo xo biha xa Sathana Diyavulosi xa leswaku vanhu a va nge tshembeki eka Xikwembu loko va langutane ni miringo. Rolero i lunghelo lerikulu swonghasi!
it-2-E 521 ¶2
Ku Yingisa
Leswaku hi tsakeriwa hi Xikwembu, hi fanele hi va lava yingisaka. Samuwele u tshame a byela Sawulo a ku: “Xana Yehovha u tsakisiwa hi magandzelo yo hisiwa hi ndlela leyi a tsakisiwaka ha yona hi ku yingisa rito ra Yehovha? Waswivo! Ku yingisa swa antswa ku tlula ku endla gandzelo ni ku rhiya ndleve ku tlula ku nyikela hi mafurha ya makhuna.” (1Sa 15:22) Loko munhu a ala ku yingisa u va a bakanya rito ra Yehovha, a kombisa leswaku a nga tshembi kumbe ku va ni ripfumelo eritweni ni xihlovo xa rona. Hiyonamhaka loyi a tsandzekaka ku yingisa a nga hambananga ni loyi a hlahluvaka kumbe a gandzelaka swikwembu. (1Sa 15:23; ringanisa na Rhm 6:16.) Leswi u swi vulaka a swi vuli nchumu loko swi nga fambisani ni mitirho; loko u nga endli swo karhi swi kombisa leswaku a wu tshembi kumbe ku xixima loyi a ku nyikaka swiletelo. (Mt 21:28-32) Lava tsakisiwaka hi ku twa ni ku amukela ntiyiso wa Xikwembu kambe va nga endli leswi va lerisiwaka swona, va tixisa naswona a va nge yi kumi mikateko. (Yk 1:22-25) N’wana wa Xikwembu u swi veke erivaleni leswaku hambi ku ri lava endlaka leswi yelanaka ni leswi va lerisiweke swona kambe hi ndlela leyi hoxeke kumbe hi xikongomelo lexi nga riki xinene, a va nge ngheni eMfun’weni kambe va ta bakanyiwa.—Mt 7:15-23.
Endla Ndzavisiso
it-1-E 493
Ntwelavusiwana
Ku pfumelela swiyimo swi hi tshikilela leswaku hi kombisa ntwelavusiwana hambiloko swi nga fambisani ni ku rhandza ka Xikwembu swi nga ha va ni vuyelo byo biha. Leswi swi vonake kahle eka leswi humeleleke Sawulo. Se a wu fikile nkarhi wa vuavanyisi bya Vaamaleke, ku nga vanhu vo sungula lava hlaseleke Vaisrayele loko va ha ku huma eEgipta. Sawulo a a lerisiwe leswaku a nga va tweli vusiwana. Hikwalaho ka ntshikilelo lowu a wu huma eka vanhu lava a va ungamela, a nga xi yingisanga xileriso xa Yehovha. Hikwalaho, Yehovha u bakanye Sawulo leswaku a nga vi hosi. (1Sa 15:2-24) Loko munhu a tlangela tindlela ta vululami bya Yehovha, a tlhela a tshembeka eka Yena swi nga n’wi sevela leswaku a dyohi hilaha Sawulo a endleke hakona lerova Xikwembu xi nga ha n’wi tsakeli.
MARCH 21-27
LESWI HI SWI DYONDZAKA EBIBELENI | 1 SAMUWELE 16-17
“Nyimpi I Ya Yehovha”
“Nyimpi I Ya Yehovha”
Davhida u tiyisekise Sawulo hi ku n’wi hlamusela hi leswi humeleleke hi nghala ni bere. Xana o ti kukumuxa? Doo. Davhida a yi tiva ndlela leyi a swi hluleke ha yona swiharhi sweswo. U te: “Yehovha loyi a ndzi kutsuleke eka rhuva ra nghala ni le ka rhuva ra bere, hi yena la nga ta ndzi kutsula evokweni ra Mufilisita loyi.” Sawulo u lan’wile, kutani a ku: “Famba, onge Yehovha a nga va na wena.”—1 Samuwele 17:37.
Xana wa swi lava ku va ni ripfumelo ro fana ni ra Davhida? Xiya leswaku ripfumelo ra Davhida a ri lo tumbuluka hi xitshuketa. A ri ni ripfumelo eka Xikwembu hikwalaho ka vutivi ni ntokoto. A a swi tiva leswaku Yehovha i musirheleri loyi a nga ni rirhandzu naswona u hlayisa switshembiso swakwe. Loko hi lava ku va ni ripfumelo ro tano, hi fanele hi dyondza hi Xikwembu xa le Bibeleni. Loko hi hanya hileswi hi swidyondzaka, vuyelo bya kona byi ta tsakisa byi tlhela byi tiyisa ripfumelo ra hina.—Vaheveru 11:1.
“Nyimpi I Ya Yehovha”
Ndlela leyi Davhida a anguleke ha yona yi kombisa ripfumelo leri tiyeke. Anakanya hi mufana a byela Goliyadi a ku: “U ta eka mina hi banga ni fumu ni tlhari, kambe mina ndzi ta eka wena hi vito ra Yehovha wa mavuthu, Xikwembu xa nxaxamelo wa nyimpi ya Israyele lexi u xi tlhontlheke.” Davhida a swi tiva leswaku matimba ya munhu ni tlhari a swi nga ri swa nkoka. Yehovha Xikwembu a ta xupula Goliyadi hileswi a nga n’wi xiximangiki, lerova Davhida u vule leswaku “nyimpi i ya Yehovha.”—1 Samuwele 17:45-47.
Davhida a swi vona leswaku Goliyadi a ri xihontlovila kumbe leswaku a hlomile. Kambe Davhida a nga swi pfumelelanga sweswo swin’wi chavisa. A nga endlanga xihoxo lexi Sawulo ni vuthu rakwe va xi endleke. Davhida a nga tipimanisanga na Goliyadi. Ku ri na sweswo u langute Goliyadi hi ndlela leyi Yehovha a n’wi languta ha yona. Hambileswi a lehe timitara leti ringanaka 2.9, a tlhela a hundza vavanuna lavan’wana hinkwavo, kambe xana a ri njhani loko hi n’wi pimanisa ni muvumbi wa swilo hinkwaswo? Handle ko kanakana a ringana ni risokoti, naswona Yehovha a tiyimisele ku n’wi herisa.
“Nyimpi I Ya Yehovha”
Namuntlha malandza ya Xikwembu a ma ha hlanganyeli eka tinyimpi. Nkarhi wo tano wu hundzile. (Matewu 26:52) Kambe hi fanele hi tekelela ripfumelo ra Davhida. Ku fana na Davhida, hi fanele hi teka Yehovha a ri wa xiviri eka hina loyi a faneriwaka hi ku gandzeriwa a ri wexe hi tlhela hi n’wi xixima. Hi nga ha titwa hi tshikilelekile swinene, kambe matimba ya Yehovha ma nga hi pfuna hi hlula mintshikilelo yoleyo. Loko ho teka Yehovha tanihi Xikwembu xa hina naswona hi va ni ripfumelo eka yena ku fana na Davhida, a ku na swiphiqo leswi nga ta hi chavisa. A xi kona lexi nga hlulaka matimba ya Yehovha.
Endla Ndzavisiso
it-2-E 871-872
Sawulo
Moya wa Yehovha wu hume eka Sawulo loko Davhida a ha ku totiwa leswaku a ta va hosi ya Vaisrayele leyi nga ta landzela. Ku sukela kwalano “moya wo biha wa Yehovha wu n’wi xanisa.” Ku va Yehovha a suse moya wakwe eka Sawulo swi endle leswaku moya wo biha wu n’wi lawula, wu endla leswaku a nga vi ni kurhula, a hlangahlangana ni ku tlhela ehleketa swilo swo huma ndleleni. Ku va Sawulo a nga n’wi yingisanga Yehovha a swi paluxa mboyamelo wo biha lowu nga emianakanyweni ni le mbilwini, leswi nga endla leswaku moya wa Yehovha wu nga n’wi sirheleli Sawulo. Hambiswiritano, leswi Yehovha a pfumeleleke “moya wo biha” wu siva moya wakwe eka Sawulo wu tlhela wu n’wi xanisa, hikwalaho wu nga ha vuriwa “moya wo biha wa Yehovha,” hambi ku ri malandza ya Sawulo ma vule leswkau i “moya wo biha lowu humaka eka Xikwembu.” Hi laha nandzda wakwe a ringanyeteke hakona, Sawulo kombele leswaku Davida a tirha ku n’wi chayela vunanga leswaku a ta chaveleleka loko a karhatiwa hi “moya wo biha.”—1Sa 16:14-23; 17:15.
MARCH 28–APRIL 3
LESWI HI SWI DYONDZAKA EBIBELENI | 1 SAMUWELE 18-19
“Titsongahate Niloko Swi Ku Fambela Kahle”
Titshege Hi Moya Wa Xikwembu Loko U Langutana Ni Ku Hundzuka Ka Swiyimo eVuton’wini
4 Endzhakunyana mufana yoloye loyi a nga murisi a a ta va ni ndhuma etikweni hinkwaro. U vitaniwile leswaku a ya tirhela hosi ni ku yi tlangela vuyimbeleri. U dlaye nhenha leyi vuriwaka Goliyadi, leyi a yi ri xihontlovila xo kariha bya xivatlankombe lerova hambi ku ri masocha lama nga ni ntokoto ya Vaisrayele a ma chava ku kongomana na xona. Tanihi ndhuna ya masocha, Davhida u lwe ni Vafilista a va hlula. Vanhu a va n’wi rhandza. Va qambhe tinsimu ta ku n’wi dzunisa. Eku sunguleni, mutsundzuxi wa Hosi Sawulo u hlamusele Davhida la ha riki muntshwa a ri loyi “a nga ni vuswikoti bya ku chaya” haripa tlhelo a ri “wanuna wa vurhena ni matimba . . . , wanuna wa nyimpi ni xivulavuri xo tlhariha, wanuna la vumbekeke kahle.”—1 Samuwele 16:18; 17:23, 24, 45-51; 18:5-7.
Vana Ni Vuxiyaxiya Loko U Tirhisana Ni Vanhu Vo Hambanahambana
6 Vanhu van’wana va ngheniwa hi moya wo tikukumuxa hikwalaho ka leswi va sasekeke, va nga duma, va nga swilombe, va nga ni vuswikoti, kumbe swikhundlha. Davhida a nga pfumali na xin’we eka leswi boxiweke laha henhla kambe u titsongahatile vutomi bya yena hinkwabyo. Endzhaku ka loko Davhida a dlaye Goliyadi, Hosi Sawulo u n’wi nyike n’wana wakwe leswaku a va nsati wa yena kutani Davhida u te: “Xana ndzi mani naswona maxaka ya mina i va mani, ndyangu wa tatana eIsrayele lerova ndzi va mukon’wana wa hosi?” (1 Sam. 18:18) Davhida u pfuniwe hi yini ku titsongahata mikarhi hinkwayo? Timfanelo, vuswikoti, ni malunghelo lawa Davhida a a ri na wona u ma kume hikwalaho ka leswi Xikwembu xi ‘korhameke’ kumbe xi titsongahateke leswaku xi kota ku tirhisana na yena. (Ps. 113:5-8) Davhida a swi tiva leswaku swilo hinkwaswo leswinene leswi a nga na swona swi huma eka Yehovha.—Ringanisa na 1 Vakorinto 4:7.
7 Ku fana na Davhida vanhu va Yehovha namuntlha va tikarhatela ku titsongahata. Hi sala hi ahlamise milomu loko hi xiya leswaku hambi ku ri N’wini wa vuako hinkwabyo wa titsongahata. (Ps. 18:35) Hi yingisa ndzayo leyi nge: “Tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha.” (Kol. 3:12) Nakambe ha swi tiva leswaku rirhandzu “a ri tikurisi, a ri tikukumuxi.” (1 Kor. 13:4) Loko hi titsongahata, vanhu va nga ha tsakela ku dyondza hi Yehovha. Tanihi leswi vavanuna va nga ha vaka vagandzeri va Yehovha hileswi vasati va vona va tikhomaka hi ndlela leyinene ni van’wana va nga lava ku dyondza hi Yehovha loko va vona ku titsongahata loku vanhu vakwe va ku kombisaka.—1 Pet. 3:1.
Endla Ndzavisiso
it-2-E 695-696
Muprofeta
Hambileswi a va hlawuriwa hi moya wa Yehovha kambe a hi mikarhi hinkwayo a va vulavula leswi huhuteriweke. Kuri na sweswo, moya wa Yehovha ‘a wu fika ehenhla ka vona’ hi mikarhi yo karhi, wu paluxa marungula lama faneleke ma tivisiwa. (Ezk 11:4, 5; Mk 3:8) Leswi a swi endla leswaku va susumeteleka ku vulavula. (1Sa 10:10; Yr 20:9; Am 3:8) A va ngo endla swilo swo hlamarisa ntsena kambe ndlela leyi a va vulavula ni ku tikhoma hayona a yi kombisa matimba ni mitlhaveko yo hlamarisa. Sweswo hi swona leswi a swi hlamusela leswaku hikwalahokayini vanhu van’wana a va tekiwa tanihi lava ‘sunguleke ku profeta.’ (1Sa 10:6-11; 19:20-24; Yr 29:24-32; ringanisa na Mi 2:4, 12-17; 6:15; 7:55.) Ku hiseka ka vona eka swiavelo swa vona a swi endla leswaku va endla swilo hi ndlela leyi nga tolovelekangiki kumbe va vonaka onge a ti teki kahle, hilaha a swi ri hakona loko ku ta humelela muprofeta eka tindhuna ta masocha loko ku totiwa Yehu. Hambiswiritano, loko tindhuna ti swi xiya leswaku wanuna yoloye a ku ri muprofeta, ti ri tekele enhlokweni rungula rakwe. (2Th 9:1-13; ringanisa na Mi 26:24, 25) Hi nkarhi lowu Sawulo a ri karhi a hlongorisa Davhida, u ‘sungule ku profeta’ a hluvula swiambalo swakwe a tlhela ‘a etlela siku hinkwaro ni vusiku hinkwabyo a nga ambalanga nchumu’ naswona a swi kanakanisi leswaku Davhida u lo vhela a baleka hi nkarhi wolowo. (1Sa 19:18–20:1) Kambe Bibele a yi vuli swona leswaku mikarhi hinkwayo vaprofeta a va tshama va nga ambalanga. Eka marungula man’wana mambirhi lama tsariweke, muprofeta u fambe a nga ambalanga hi xikongomelo xa leswaku a kombisa xiphemu xo karhi xa vuprofeta byakwe. (Esa 20:2-4; Mk 1:8-11) Leswaku Sawulo a a nga ambalanga hikwalahoka leswi a a lava ku kombisa leswaku i wanuna kumbe a a nga ambalanga hileswi a a handzule swiambalo swakwe swa vuhosi kumbe ku kombisa leswaku a nga na matimba eka vulawuri bya Yehovha kumbe hikwalaho ka swivangelo swin’wana, a swi boxiwanga.
APRIL 4-10
LESWI HI SWI DYONDZAKA EBIBELENI | 1 SAMUWELE 20-22
“Leswi U Nga Swi Endlaka Leswaku U Va Munghana Lonene”
Tiyisani Vunghana Bya N’wina Makumu Ma Nga Si Fika
18 Namuntlha, vamakwerhu va langutana ni mintlhontlho yo hambanahambana. Hi xikombiso, vo tala va weriwa hi timhangu ta ntumbuluko kumbe leti vangiwaka hi vanhu. Loko sweswo swi endleka, van’wana va hina hi nga swi kota ku rhurhela vamakwerhu volavo. Van’wana va nga va pfuna hi swa timali. Kambe hinkwerhu hi nga swi kota ku kombela Yehovha a va pfuna. Loko makwerhu wo karhi a ri ni gome, swi nga endleka hi nga swi tivi leswi hi nga swi vulaka kumbe ku swi endla. Kambe hinkwerhu hi nga pfuna. Hi xikombiso, hi nga tinyika nkarhi wo va ni vanghana va hina. Hi nga rhiya ndleve loko va vulavula. Hi nga va hlayela tsalwa leri chavelelaka leri hi ri rhandzaka. (Esa. 50:4) Xa nkoka swinene, i ku seketela vanghana va wena hi nkarhi wa maxangu.—Hlaya Swivuriso 17:17.
Famba eTindleleni Ta Yehovha
7 Xikwembu xi langutele leswaku hi va vanghana lava tshembekaka. (Swiv. 17:17) Yonathani n’wana wa Hosi Sawulo u ve munghana wa Davhida. Loko Yonathani a twa leswaku Davhida u dlaye Goliyadi, “moya-xiviri wa Yonathani wu namarhelana ni moya-xiviri wa Davhida, Yonathani a sungula ku n’wi rhandza kukota moya-xiviri wakwe.” (1 Sam. 18:1, 3) Yonathani u hlevele Davhida loko Sawulo a lava ku n’wi dlaya. Endzhaku ka loko Davhida a balekile, Yonathani u tlhele a hlangana na yena kutani a endla ntwanano na yena. A ku sele katsongo Sawulo a dlaye Yonathani hikwalaho ka leswi a nga hlevela Davhida, kambe vanghana lavambirhi va tlhele va hlangana va tiyisa vunghana bya vona. (1 Sam. 20:24-41) Loko va hlangana ro hetelela, Yonathani u endle leswaku Davhida a namarhela “Xikwembu.”—1 Sam. 23:16-18.
Ku Tshama U Ri Ni Vanghana eMisaveni Leyi Nga Riki Na Rirhandzu
11 Tshembeka. Solomoni u tsarile: “Nakulorhi wa ntiyiso u ni rirhandzu nkarhi hinkwawo, naswona i makwerhu la velekiweke loko ku ri ni maxangu.” (Swiv. 17:17) Loko Solomoni a tsala marito wolawo, swi nga ha endleka a a anakanya hi vunghana lebyi tata wa yena, Davhida a a ri na byona na Yonathani. (1 Sam. 18:1) Hosi Sawulo a a lava leswaku n’wana wa yena Yonathani a n’wi tlhandlama a va hosi ya Israyele. Kambe Yonathani u yi amukerile mhaka ya leswaku Yehovha u hlawule Davhida leswaku a va hosi. Ku hambana na Sawulo, Yonathani a nga n’wi vondzokanga Davhida. A nga khunguvanyekanga loko Davhida a dzunisiwa naswona a nga swi pfumelanga swihehlo leswi Sawulo a swi hangalasa malunghana na Davhida. (1 Sam. 20:24-34) Xana hi fana na Yonathani? Loko vanghana va hina va kuma malunghelo yo karhi, xana hi tsaka na vona? Loko va weriwa hi maxangu, xana ha va chavelela hi tlhela hi va seketela? Loko hi twa munghana wa hina a hleviwa, xana hi hatla hi pfumela mhaka yoleyo? Kumbe, xana hi ta sirhelela munghana wa hina hi ku tshembeka, ku fana na Yonathani?
Endla Ndzavisiso
Tinhla-nkulu Ta Buku Ya Samuwele Wo Sungula
21:12, 13. Yehovha u langutele leswaku hi tirhisa vuswikoti bya hina byo anakanya leswaku hi langutana ni swiyimo swo tika evuton’wini. U hi nyike Rito rakwe leri huhuteriweke, leri nyikaka vutlhari, vutivi ni vuswikoti byo anakanya. (Swivuriso 1:4) Nakambe hi na mpfuno wa vakulu lava vekiweke lava nga Vakreste.
APRIL 18-24
LESWI HI SWI DYONDZAKA EBIBELENI | 1 SAMUWELE 23-24
“Lehisa Mbilu Kutani U Rindzela Yehovha”
Titshege Hi Moya Wa Xikwembu Loko U Langutana Ni Ku Hundzuka Ka Swiyimo eVuton’wini
8 Davhida u arile ku endla xo karhi eka Sawulo. Tanihi leswi a a ri ni ripfumelo ni ku lehisa mbilu, u vone swi enerile ku veka timhaka hinkwato emavokweni ya Yehovha. Loko hosi yi humile ebakweni, Davhida u yi huwelerile a ku: “Onge Yehovha a nga avanyisa exikarhi ka mina na wena; Yehovha u fanele a ndzi rihisela eka wena, kambe voko ra mina a ri nge ti ehenhla ka wena.” (1 Samuwele 24:12) Hambileswi a a swi tiva leswaku leswi a swi endliwa hi Sawulo a swi nga fanelanga, Davhida a nga tirihiselanga, naswona a nga hlamulananga hi ndlela yo biha na Sawulo kumbe ku vulavula swo biha ha yena. Eminkarhini yin’wana yo hlayanyana, Davhida u titshinyile a ala ku tirihisela. Ku ri na sweswo, u titshege hi Yehovha leswaku ku va yena loyi a lulamisaka timhaka.—1 Samuwele 25:32-34; 26:10, 11.
Xana Vutomi Bya Wena Byi Lawuriwa Hi Swiyimo Leswi U Langutanaka Na Swona?
Dyondzo ya vunharhu hileswaku, ematshan’weni ya ku tirhisa tindlela leti nga riki ta Matsalwa to hundzula swiyimo swa hina, hi fanele hi rindzela Yehovha. Mudyondzisiwa Yakobo u tsarile a ku: “Ku tiyisela a ku endle ntirho wa kona wu helela, leswaku mi ta helela ni ku va lava hanyeke etimhakeni hinkwato, mi nga kayiveli nchumu.” (Yakobo 1:4) Hi fanele hi pfumelela ku tiyisela ku “[endla] ntirho wa kona wu helela” hi ku langutana ni ndzingo ku fikela emakumu, hi papalata ku hatla hi huma eka wona hi tindlela leti nga riki ta Matsalwa. Kutani ripfumelo ra hina ri ta ringiwa ri tlhela ri tengisiwa, kutani matimba ya rona ma ta vonaka. Yosefa na Davhida va ve ni mfanelo yoleyo ya ku tiyisela. A va ringetanga ku tlhantlha swiphiqo hi ndlela leyi a yi ta siya Yehovha a nga tsakanga. Ematshan’weni ya sweswo, va lwe hi matimba leswaku va vuyeriwa hi xitalo eka swiyimo leswi va tikumeke va ri eka swona. Va rindze Yehovha, naswona va kume mikateko leyikulu hi ku endla tano! Yehovha u tirhise vavanuna lava ku kutsula ni ku rhangela vanhu va yena.—Genesa 41:39-41; 45:5; 2 Samuwele 5:4, 5.
Na hina hi nga langutana ni swiyimo leswi nga hi vangelaka ku lava tindlela to huma eka swona hi mukhuva lowu lwisanaka ni Matsalwa. Hi xikombiso, xana u hela matimba hileswi u nga si kumaka munghana wa vukati la fanelekaka? Loko swi ri tano, papalata ndzingo wihi ni wihi wa ku tlula nawu wa Yehovha wa ku teka “eHosini ntsena.” (1 Vakorinto 7:39) Xana mi langutane ni swiphiqo swa vukati? Ematshan’weni ya ku dzaha moya wa misava lowu khutazaka ku lan’wa vukati kun’we ni ku dlaya vukati, ringetani ku tlhantlha swiphiqo swo tano hi ku khomisana. (Malakiya 2:16; Vaefesa 5:21-33) Xana u langutane ni swiphiqo swa ku khathalela ndyangu wa wena hikwalaho ka vusweti? Ku rindza Yehovha swi katsa ku papalata ku ringeta ku kuma mali hi tindlela leti kanakanisaka kumbe leti nga riki enawini. (Pisalema 37:25; Vaheveru 13:18) Ina, hinkwerhu ka hina hi fanele hi ringeta hi matimba leswaku hi vuyeriwa hi xitalo eka swiyimo leswi hi nga tikumaka hi ri eka swona, kutani hi endla matshalatshala lama nga ta endla leswaku Yehovha a va ni xivangelo xa ku hi katekisa. Loko hi ri karhi hi endla tano, a hi tiyimiseleni ku rindza Yehovha leswaku a tlhantlha swiphiqo swa hina hi ku hetiseka.—Mikiya 7:7.
Endla Ndzavisiso
U Nga Pfumeleli Nchumu Leswaku Xi Ku Sivela Ku Kuma Hakelo
11 Loko hi tikarhatela ku va ni rirhandzu ni musa a hi nge vi na wona mavondzo. Bibele yi ri: “Rirhandzu ri ni mbilu yo leha ni musa. Rirhandzu a ri na mavondzo.” (1 Kor. 13:4) Hi fanele hi tikarhatela ku vona swilo hilaha Yehovha a swi vonaka hakona hi teka vamakwerhu tanihi swirho swa miri wun’we ku nga vandlha, sweswo swi ta hi pfuna leswaku hi nga vi na mavondzo. Leswi swi ta endla hi tsaka ni vamakwerhu hilaha Bibele yi vulaka hakona loko yi ku: “Loko xirho xin’wana xi vangamisiwa, swirho leswin’wana hinkwaswo swi tsaka na xona.” (1 Kor. 12:16-18, 26) Xisweswo ematshan’wini yo va ni mavondzo hi ta tsaka loko van’wana swi va fambela kahle. Xiya xikombiso xa n’wana wa Hosi Sawulo ku nga Yonathani. A nga vanga ni mavondzo loko a twa leswaku Davhida hi yena a nga ta va hosi ematshan’wini yakwe. Ku ri na sweswo u n’wi khutazile. (1 Sam. 23:16-18) Na hina a hi veni ni musa ni rirhandzu ku fana na Yonathani.
APRIL 25–MAY 1
LESWI HI SWI DYONDZAKA EBIBELENI | 1 SAMUWELE 25-26
“Xana U Endla Swilo Handle Ko Ehleketa?”
Abigayele U Endle Swilo Hi Vutlhari
10 Xana malandza ya Davhida lama gingiritekaka ma va khome njhani varisi va Nabali? Leswi a va ri vuthu ra matimba, a swi ta va swi va oloverile ku titekela tinyimpfu va ti dyela, kambe a va swi endlanga sweswo. Ku ri na sweswo, va pfunete varisi va Nabali ku sirhelela tinyimpfu. (Hlaya 1 Samuwele 25:15, 16.) Tinyimpfu ni varisi a va langutana ni makhombo yo tala. Hi nkarhi wolowo swiharhi leswi dyaka nyama enhoveni a swi tele naswona ndzilakana wa Israyele lowu nga edzongeni a wu ri ekusuhi, lerova a swi ta ma olovela makhamba lama humaka ematikweni man’wana ku ta ma ta yiva swifuwo.
11 Davhida a swi nga n’wi oloveli ku kumela malandza yakwe swakudya leswi eneleke siku rin’wana ni rin’wana loko va ri emananga. Kutani siku rin’wana Davhida u rhumele varhumiwa va khume leswaku va ya kombela mpfuno eka Nabali. Davhida u ye a ya kombela mpfuno hi nkarhi wa kahle hikuva a ku ri nkarhi wa leswaku tinyimpfu ti tsemetiwa voya naswona hi nkarhi wolowo vanhu a va ri ni malwandla. Ku endla nkhuvo hi nkarhi lowu, a ku ri mukhuva wa vanhu va le nkarhini wolowo. Davhida u tlhele a vulavula hi ku titsongahata emahlweni ka Nabali. Leswi Nabali a a ri nkulu eka yena, u n’wi xiximile a ku hi mina “n’wana wa wena Davhida.” Xana Nabali u endle yini?—1 Sam. 25:5-8.
12 Ematshan’weni yo n’wi pfuna, u hlundzukile. “U va tshinye hi vukarhi” varhumiwa va Davhida hilaha nandza loyi ku nga vulavuriwa ha yena eku sunguleni ka xihloko lexi a hlamuseleke Abigayele hakona. Nabali a a nga lavi ku twa nchumu hi xinkwa xakwe, mati kumbe ku dlaya swin’wana swa swifuwo swakwe. A a teka Davhida a ri xikangalafula naswona a a n’wi vitana hlonga leri tshamelaka ku baleka. Ndlela leyi a a endla swilo ha yona yi fana hi ku helela ni ndlela leyi Sawulo a n’wi khome ha yona Davhida tanihi leswi a a n’wi venga. Havumbirhi bya vona a va nga byi tirhisi vutlhari lebyi humaka eka Yehovha. Xikwembu a xi rhandza Davhida naswona a xi nga n’wi languti tanihi hlonga leri nga xandzuka, kambe a xi n’wi languta tanihi loyi a nga ta va hosi ya Israyele enkarhini lowu taka.—1 Sam. 25:10, 11, 14.
Abigayele U Endle Swilo Hi Vutlhari
18 Loko a ya eka Davhida u fike a kombela ku rivaleriwa onge hi yena loyi a nga n’wi dyohela. U pfumerile leswaku nuna wakwe u endla swilo hi ku pfumelelana ni nhlamuselo ya vito rakwe, naswona swi nga ha endleka leswaku u tlhele a byela Davhida leswaku a swi nga ta pfuna nchumu ku xupula munhu wo tano. Leswi a a swi tiva leswaku Davhida i murhumiwa wa Yehovha naswona “u lwa tinyimpi ta Yehovha,” u n’wi xiximile. Marito yakwe lama landzelaka ma kombisa leswaku a a xi tiva xitshembiso xa Yehovha malunghana ni mhaka ya leswaku Davhida u ta va hosi, hikuva u te: “Yehovha . . . u ta ku veka u va murhangeri wa Israyele.” Kutani u n’wi komberile leswaku a nga endli nchumu lexi nga ta n’wi siya a ri ni nandzu wa ngati kumbe “xivangelo xa ku tshetsheleka,” ku nga ku kingindziwa hi ripfalo. (Hlaya 1 Samuwele 25:24-31.) Hakunene marito yakwe ma khumba mbilu!
Endla Ndzavisiso
Abigayele U Endle Swilo Hi Vutlhari
16 Xana leswi swi vula leswaku Abigayele a a nga byi xiximi vunhloko bya nuna wakwe? A swi tano. Nabali a nga n’wi kombisanga musa nandza wa Yehovha la totiweke, naswona a ku lo sala katsongo leswaku swiendlo swakwe swa vuphukuphuku swi koxa vutomi bya vanhu vo tala lava a va to fela sopo nyama va nga dyanga. Loko Abigayele a a nga nghenelelanga, xana leswi a swi ta vula leswaku u hlanganyerile eka nandzu wa nuna wakwe? Phela eka hinkwaswo leswi a a swi endla, a a fanele a xixima Xikwembu ku tlula nuna wakwe.